Maraku 2

Yeesɔ masɛ zang ɓɔɔ bii ɓiɓɛ vɔ katɔ ɓɛɛ

(Mat 9:1-8; Luk 5:17-26)

1Diki nɛɛ tɔɔ wu bee tɔkɔlɔng, Yeesɔ naa gbãayu tɔkn ka Kafanahu, a zang tãa nyaa tɔɔ Yeesɔ a gãa tɔ. 2A zang kpalɛ zɔɔ gaagaa, nɔng yi nyaa kaa nɛɛ biling piti. A Yeesɔ rang ri yee Laa kati. 3A zang dɛ̃ɛti ri tuu zang ɓɔɔ bii ɓiɓɛ vɔ katɔ, ri atɛ wu. 4Ri walɛ gbalang ɓɔɔ ri daa nɛɛ wu ka bii Yeesɔ kpang, ka ruu zang ɓɔɔ ri kpalɛ zɔɔ gaagaa ɓɛɛ. Ka ruu nɔngkɔ, ri vang yuu sãa ri puu ka nɔng ɓɔɔ Yeesɔ kagn, ri yaa yɔɔ ɓɔɔ bii vɔ katɔ, ɓɔɔ zang ta ka laa naa nɛɛ soo, ka tĩng Yeesɔ. 5Yeesɔ zi naa ɓɔɔ zang dɛ̃ɛti kaɓa ri shing danggn ka bii ɓiɓɛ, a kɔɔ zang ɓɔɔ bii vɔ katɔ tɔɔ, “Man jaa, zang yaa mɔɔ gbalang vuu shi kpang ɓaaɓɛ tɔ.”

6Ka diki kaɓa, zang ɓɔɔ ri tusu zang labeenang, ri nwang kagn nɔngkɔ. Ri rɛ̃rɛ ka yeti ɓarɛ, a ri ti hɛ̃ɛ zɔɔ nɛɛ, 7“Yɔɔ keɓe kɔɔ ruu nɔngkɔ, ka ruu viya? Tuu yuu ɓiɓɛ naa Kpanti Laa. Naa wu Kpanti Laa kpang, zang ɓɔɔ yaa zang gbalang vuu shi kpang kagn koo keɓe gbete ya?”

8Yeesɔ zi ɓi tɔ ka yeti suru bii ɓiɓɛ tantɛnang nɛɛ, ri rɛ̃rɛ ɓarɛ veɓe kɔ. A hɛ̃ɛ ri tɔɔ “Nɔɔ rɛ̃rɛ ɓu ka ruu vi, nɔngkɔ viya? 9Ɓɔɔ zang kɔɔ zang ɓɔɔ bii vɔ katɔ nɛɛ ‘Zang yaa mɔɔ gbalang vuu shi kpang ɓaaɓɛ tɔ,’ nɛɛ ɓɔɔ zang kɔɔ nɛɛ, ‘Seepaa ta mɔɔ tuu vuu roonang ɓaaɓɛ mɔɔ daayi.’ Ɓu wi kpãa kpang ka teteng yee keɓe wiya? 10N másɛ̀ yɔɔ keɓe ditɔ, tɔ̀ɔ, nɔ́ɔ zi kati nɛɛ, zang a Jaa Shɔnzang naa tɔ ka koo keɓe, nɛɛ wu yaa zang gbalang vuu shi kpang ɓarɛ.” A raa jĩng kɔɔ yɔɔ ɓɔɔ bii vɔ katɔ nɛɛ, 11“N kɔɔ mɔɔ, seepaa, mɔɔ tuu vuu roonang ɓaaɓɛ mɔɔ daa gãa.”

12A yɔɔ ɓɔɔ bii vɔ katɔ seepaa tantɛnang tuu siri ɓiɓɛ, ra ka jĩng zang nandon, a daayi. Ɓɔɔ zang ɓɔɔ ri kpalɛ zɔɔ ri zi naa weɓe, ri mã naa ka danggn. A ri dɔɔ Kpanti Laa. Ri tɔɔ “Ruu zi vuu ɓɔɔ naa weɓe, gngn kpang.”

Yeesɔ ɓaa Leevi nyaa

(Mat 9:9-13; Luk 5:27-32)

13Yeesɔ ti naa paasɛ daanang tɔkn ka nyaa rang mii waapo. A zang dɔɔli ri a ka bii ɓiɓɛ, a tusu ri vuu kati. 14Yeesɔ rakɛ kana nyaa mii waapo, a zi yɔɔ ɓɔɔ ta saka tipi, ɓɔɔ zang ɓaa wu nɛɛ Leevi jaa Alifaya nwang tɔ ka yeti gãa saka tipi tanang. A Yeesɔ ɓaa wu nyaa, a kɔɔ wu tɔɔ, “Dũng m ta.” A Leevi seepaa dũng wu kati.

15Laa ɓa tɔ tɔkɔlɔng, Yeesɔ daa ka gãa Leevi, daa nwangnɛ shaa vuu shaanang kaa nɛɛ zang ɓɔɔ ri mantɛ vuu ka bii ɓiɓɛ nɛɛ zang dɔɔli ɓɔɔ ri ta saka tipi, nɛɛ zang ɓɔɔgn ɓɔɔ ri dũng nyaa ɓɔɔ Laa dangnɛ kpang ɓɛɛ. Ka ruu ɓɔɔ zɔ̃ng zang dɔɔli, ri dũng knti ɓiɓɛ ɓɛɛ. 16Ɓɔɔ zang Farisi ɓɔɔ ri tusu zang ɓarɛ labeenang, ri zi Yeesɔ shaa vuu nɛɛ zang ɓɔɔ ri dũ̀ng nyaa ɓɔɔ Laa dangnɛ kpang hn, ri hɛ̃ɛ zang ɓɔɔ ri mantɛ vuu ka bìí ɓiɓɛ nɛɛ, “Shaa vuu nɛɛ zang ɓɔɔ ri ta saka tipi, nɛɛ zang ɓɔɔgn ɓɔɔ ri dũ̀ng nyaa ɓɔɔ Laa dangnɛ kpang ka ruu viya?”

17Ɓɔɔ Yeesɔ tãa naa weɓe, a kɔɔ ri tɔɔ “Zang ɓɔɔ bii kɔ̀ng ri kpang, ri daa bii zang ɓɔɔ, palɛ zang kɔnang ɓi kpang. Ɓi zang ɓɔɔ bii kɔng ri katɔ kɔ, ri daa shɛ̃ɛning. N arɛ nɛɛ, n naa ɓaa nyaa ka zang ɓɔɔ tɔ̃ɔ nɛɛ ri kɔ̃sɔ yeti kpang. N arɛ nɛɛ n naa ɓaa nyaa m ka zang ɓɔɔ ri dũ̀ng nyaa ɓɔɔ Laa dangnɛ kpang ɓɛɛ.”

Ruu Nyaalaa sennang

(Mat 9:14-17; Luk 5:33-39)

18Ka diki kaɓa zang ɓɔɔ ri mantɛ vuu ka bii Yɔhana, nɛɛ ɓɔɔ ri mantɛ vuu ka bii Farisi, ri seng nyaalaa. A zang ɓɔɔgn ri arɛ, ri naa hɛ̃ɛ Yeesɔ tɔɔ “Ka ruu vi zang ɓɔɔ ri mantɛ vuu ka bii Yɔhana, nɛɛ Farisi ri seng nyaalaa, ɓɔɔ ɓaaɓɛ ri sèng ɓarɛ kpang viya?”

19A Yeesɔ kasɛ ri nyaa tɔɔ “sinyɛ ɓeevɛ ɓeesang, sèng nyaalaa ka diki ɓɔɔ sinyɛ ɓeevɛ doo nɛɛ ri kpang. 20Sinyɛ ɓeevɛ nɛɛ tɔ̀ɔ́ nɛɛ ri kpang, tɔɔ ri naa seng nyaalaa ka diki kaɓa kɔ.

21“Zang lu fɔ̃ɔrɔ gbaala ɓi jong nɛɛ sɛ̃ɛ fɔ̃ɔrɔ ɓɔɔ shɔɔ kpang. Naa zang lurɛ, sɛ̃ɛ fɔ̃ɔrɔ shɔɔ naa gɔɔ katɔ lɔɔsɔ fɔ̃ɔrɔ gbaala kaɓa, yaa yeng kaa bang dɔɔli. 22Zang ti tɛ̃ɛ saa shɔɔ ɓi jong ka yeti zàáng gbaala ɓɔɔ zang palɛ nɛɛ koo ɓɛɛ kpang. Naa zang tɛ̃ɛyi, saa naa si katɔ, wu sãa zàáng kati. Saa tɛ̃ɛ ka tipi, zàáng ti lasɛ katɔ. Zang tɛ̃ɛ saa shɔɔ ɓi ka zàáng shɔɔ kɔ doori.”

Ruu Diki Ɔ̃sɔnang

(Mat 12:1-8; Luk 6:1-5)

23Ka Diki Ɔ̃sɔnang, Yeesɔ sɔɔ gbalang ɓɔɔ tɛɛ yeti jaa zee, a zang ɓɔɔ ri mantɛ vuu ka bii ɓiɓɛ ri gaa tɔɔsung yuu zee bɔ̃ɔrɔnang kati ri shaayi. 24A zang Farisi hɛ̃ɛ Yeesɔ tɔɔ, “Zirɛ zang ɓaaɓɛ ri palɛ shonang ka Diki Ɔ̃sɔnang ka ruu viya?” 25A Yeesɔ kasɛ ri nyaa tɔɔ “Nɔɔ gã vuu ɓɔɔ Dawuda pálɛ́ ka diki ɓɔɔ nyɔkɔ nyɔ ri dɔɔli nɛɛ zang ɓɔɔ ri dũng wu gngn kpang ya? 26Naa ɓɔɔ daa ka Gãa Laa ka diki ɓɔɔ Abiyata kɔ kpanti zang ɓɔɔ ri dɔɔ vuu ka Gãa Laa, a daa tuu borodi ɓɔɔ zang dang nyaa nɛɛ zang ɓɔɔ ri dɔɔ vuu ka Gãa Laa kɔ ri shaa shɛ̃ɛning, a shaa nɛɛ zang ɓɔɔ ri nɛɛ wu kpang ya?”

27A Yeesɔ kɔɔ ri tɔɔ “Zang palɛ Diki Ɔ̃sɔnang ɓi ka ruu shɔnzang kɔ jong, zang palɛ wu shɔnzang ka ruu Diki Ɔ̃sɔnang kpang. 28Ka ruu nɔngkɔ, Jaa Shɔnzang kɔ Kpanti nɛɛ ɓɔɔ Diki Ɔ̃sɔnang piti.”

Currently Selected:

Maraku 2: mzmNT

Highlight

Copy