Maraku 1

Yee Laa ɓɔɔ Yɔhana ɓɔɔ palɛ zang batizima kɔɔ ɓɛɛ

(Mat 3:1-12; Luk 3:1-18; Yɔh 1:19-28)

1Wee naa ɓɔɔ Ruu Tɔ̃ɔ Yeesɔ Kirisi Jaa Laa gaayu ɓɛɛ. 2Gaayu ka naa ɓɔɔ zang bee ka yeti labeenang Ishaya, zang nyaa shonang Laa ɓɛɛ. “Laa tɔɔ,

“ ‘N shong zang shonang mɛɛ,

ɓɔɔ palɛ mɔɔ gbalang ditɔ ka tĩng ɓaaɓɛ.’ ”

3“Zang ɓɔɔ kagn, rang yee Laa ka yeti waala tɔɔ.

‘Kpanti a kaa tɔ, nɔɔ palɛ wu gbalang ta.

Nɔɔ shiiri wu katɔ ɓororo.’ ”

4A Yɔhana naa nwáng nyaa palɛ zang batizima ka waala. Kɔɔ zang Ruu Laa nɛɛ, “Nɔɔ yaa vuu shi kpang manɛ ta, nɔ́ɔ kɔ̃sɔ yeti, tɔɔ n palɛ nɔɔ batizima. Laa wu yaa nɔɔ gbalang vuu shi kpang manɛ kati.” 5A zang dɔɔli nɛɛ tipi Yahudi nɛɛ zang ɓɔɔ ka Urushalima, ri daa ka bii ɓiɓɛ. Ri kɔɔrɔ Laa vuu shi kpang ɓarɛ, a Yɔhana palɛ ri batizima ka mii rang Urudung.

6Yɔhana hãa fɔ̃ɔrɔ ɓɔɔ zang palɛ nɛɛ shãngti vuu vaa ɓɔɔ zang ɓaa nɛɛ hòlòng ɓɛɛ. A ti mã guruji ka sãng ɓiɓɛ. Vuu shaanang ɓiɓɛ ɓi ti zɔɔrɔ nɛɛ warɛ. 7Kɔɔ zang tɔɔ “Zang ɓɔɔ a ka knti mɛɛ ɓa m katɔ nɛɛ bannang. N daa naa ɓɔɔ n sɔ̃ ka tĩng ɓiɓɛ, n kãlɛ soo koodoo ɓiɓɛ kpang. 8N palɛ nɔɔ batizima m nɛɛ mii, naa palɛ nɔɔ ɓi nɛɛ Suru Laa.”

Naa ɓɔɔ zang palɛ Yeesɔ batizima ɓɛɛ

(Mat 3:13-17; Luk 3:21-22)

9Diki nɛɛ tɔɔ wu bee tɔkɔlɔng, Yeesɔ a kaa nɛɛ Nazara ɓɔɔ ka tipi Galili, a Yɔhana palɛ wu batizima ka mii rang Urudung. 10Ɓɔɔ Yeesɔ nwang nɛɛ mii hn, a zi lapa puuyi, Suru Laa shooro kana, ka yuu ɓiɓɛ naa koro. 11A ri ti tãa yee nɛɛ lapa tɔɔ, “Mɔkɔ jaa mɛɛ ɓɔɔ n kasɛ gbãng gbãng kɔ.”

Naa ɓɔɔ Sheetang gãsɛ Yeesɔ ɓɛɛ

(Mat 4:1-11; Luk 4:1-13)

12A Suru Laa tantɛ wu dɔ̃nang ka waala. 13Nwáng ka waala diki laa ziti, a Sheetang gãsɛ wu kaa sasak. Ka nɔng kaɓa vuu kpaasi kagn nɔngkɔ, a zang nyaa shonang Kpanti Laa ɓɔɔ ka lapa, ri arɛ, ri yi wu naa ka bii.

Zang jaazĩi yinang dɛ̃ɛti ɓɔɔ Yeesɔ ɓaa ri nyaa ɓɛɛ

(Mat 4:12-22; Luk 4:14-15; 5:1-11)

14Ka knti ɓɔɔ zang mã Yɔhana tɔ ka sãa, Yeesɔ naa a ka tipi Galili kɔɔrɔ zang Ruu Tɔ̃ɔ Kpanti Laa tɔɔ, 15“Diki a tɔ, diki ɓɔɔ Laa roo Kpanti yaa kaa naabm. Nɔɔ kɔ̃sɔ yeti manɛ ta, nɔ́ɔ shing danggn ka Ruu Tɔ̃ɔ Laa.”

16Yeesɔ ra kana nyaa mii waapo Galili, a zi rɛɛ Siman nɛɛ jaa niiɓɛ Anduru ri vang jang jaazĩi kana mii, ka ruu ɓɔɔ, ri ɓarɛ zang jaazĩi yinang ɓɛɛ. 17A Yeesɔ ɓaa ri nyaa tɔɔ “Nɔɔ arɛ nɔɔ dũng m. N tusu nɔɔ naa ɓɔɔ nɔɔ ɓaa zang nyaa ri a ka bii mɛɛ ɓɛɛ.” 18A ri yaa jang ɓarɛ tantɛnang, ri dũng wu.

19Yeesɔ nɛɛ tɔɔ wu daa ka tĩng tɔkɔlɔng, zi Yakub nɛɛ jaa niiɓɛ Yɔhana wujɛ Zebedi, ri gbarɛ jang jaazĩi ɓarɛ ka yeti tonsi. 20A ti tantɛ ri nyaa ɓaanang. Ri yaa daa ɓarɛ Zebedi ka yeti tonsi nɛɛ zang ɓɔɔ ri palɛ ri shonang, a ri dũng wu.

Zang ɓɔɔ suru shi kpang kagn bii ɓiɓɛ ɓɛɛ

(Luk 4:31-37)

21A ri daa ka gari Kafanahu. A Diki Ɔ̃sɔnang naa arɛ, Yeesɔ daa ka gãa zɔɔ kpalɛnang zang Yahudi, a gáa zang tɔɔsung vuu tusunang kati. 22Zang ɓɔɔ ri tãa vuu ɓɔɔ wu tusu, ri mã naa ka danggn, ka naa ɓɔɔ, wu tusu vuu ɓɛɛ, ka ruu ɓɔɔ, tusu ri vuu ɓi naa ɓɔɔgn. Tùsù zang ɓi naa zang ɓɔɔ ri tusu zang vuu ɓɛɛ kpang.

23Ka laa kaɓa, zang ɓɔɔ suru shi kpang ka bii ɓiɓɛ kagn yeti gãa zɔɔ kpalɛnang ɓarɛ. A mɛɛ nyaa tɔɔ. 24“Mɔɔ kãa vi ka bii ɓuru viya? Yeesɔ yɔɔ Nazara? Mɔɔ arɛ nɛɛ mɔɔ naa nyɔkɔ ruu katɔ ya? N zi mɔɔ nung tɔ, mɔkɔ zang tɔ̃ɔ ɓɔɔ à nɛɛ bii Laa ɓɛɛ.”

25A Yeesɔ mangkɛ suru shi kpang tɔɔ, “Voo nyaa ta! Nwáng ta mɔɔ yàa wu bii.” 26A suru shi kpang tuu wu, loo wu ka tipi, a mɛɛ nyaa ka lapa, a nwangnɛ yaa wu bii kati. 27Zang piti ri mã naa ka danggn. Ri hɛ̃ɛlɛ zɔɔ ka naa ɓarɛ, tɔɔ, “Ɓi lɛ̀ɛ́ vuu tusunang kiya? Yɔɔ keɓe mangkɛ suru shi kpang, a ri ti ɓaa shoo ka nyaa ɓiɓɛ.”

28A nyaa Yeesɔ baa nɔng kaa tantɛnang ka tipi Galili nandon.

Zang dɔɔli ɓɔɔ Yeesɔ masɛ ɓɛɛ

(Mat 8:14-17; Luk 4:38-41)

29Ɓɔɔ rɛɛ Yeesɔ nwang nɛɛ gãa zɔɔ kpalɛnang zang Yahudi hn, ri daa kaa nɛɛ rɛɛ Yakub nɛɛ Yɔhana ka gãa rɛɛ Siman Anduru. 30Ka diki kaɓa Siman ɓeekpeng ɓɔɔ yi ɓeeso roo ka tipi, ka ruu ɓɔɔ, bii zaa wu katɔ ɓɛɛ. A zang kɔɔ Yeesɔ kati. 31A Yeesɔ arɛ yi wu naa, a wisi wu paa. Bii ɓɔɔ zaa wu, yaa wu nɔng kati. A Bituru ɓeekpeng seepaa a atɛ ri vuu shaanang kati. 32Nɛɛ laarang bɛ̀ɛ́ laa hãa nyaa tɔ dii, zang atɛ wu zang kɔnang nɛɛ zang ɓɔɔ suru shi kpang ka bii ɓarɛ ɓɛɛ kaa dɔɔli. 33Zang gari, ri kpalɛ zɔɔ ka nyaa gãa ɓɔɔ wu kagn ɓɛɛ dɔɔli. 34A Yeesɔ masɛ zang ɓɔɔ vuu palɛ ri ka zɔ̃ng zɔ̃ng ɓɛɛ dɔɔli. A ti nwangsɛ suru shi kpang nɛɛ bii zang dɔɔli. Yàa suru shi kpang gbalang ɓɔɔ ri rang yee ɓɛɛ kpang, ka ruu ɓɔɔ, ri zi wu nung tɔ ɓɛɛ.

Yeesɔ rang yee Laa ka Galili

(Luk 4:42-44)

35A Yeesɔ seepaa nɛɛ yuu gãndi, yaa gãa, daa ka nɔng ɓɔɔ zang kagn kpang daa gaa Laa ka nɔngkɔ. 36A Siman ri see zɔɔ nɛɛ zang ɓɔɔ ri nɛɛ wu, ri kãa wu. 37Ri daa ĩi wu tɔ, a ri kɔɔ wu tɔɔ, “Zang piti ri kãa mɔkɔ.”

38A Yeesɔ kasɛ ri nyaa tɔɔ, “Rúu daa nɔɔ rɛɛ gari ɓɔɔ ka tĩng ɓuru naabm ta, tɔ̀ɔ n daa rang yee Laa kaa jong nɔngkɔ, ka ruu ɓɔɔ, n a ka ruu yee Laa kɔ rannang ɓɛɛ.”

39A rakɛ ka tipi Galili nandon, rang zang yee Laa ka gãa zɔɔ kpalɛnang zang Yahudi, a ti nwàngsɛ̀ zang dɔɔli suru shi kpang.

Zang vuu bii ɓɔɔ Yeesɔ masɛ ɓɛɛ

(Mat 8:1-4; Luk 5:12-16)

40A yɔɔ ɓɔɔ vuu bii shaa katɔ, arɛ naa tang nɛɛ gutu, gaa wu tɔɔ “Mɔɔ nɛɛ kasɛ katɔ, mɔɔ zunung ɓɔɔ mɔɔ masɛ m katɔ.”

41A gn yɔɔ kɔng Yeesɔ dɔɔli, Yeesɔ dĩi naa lee wu, a kɔɔyi tɔɔ “N kasɛ tɔ, vuu bii ɓaaɓɛ wu yaa mɔɔ nɔng ta.” 42A vuu bii yaa yɔɔ nɔng kaa tantɛnang. 43A Yeesɔ shaarɛ wu nyaa gbãng gbãng, a kɔɔ wu tɔɔ, 44“Mɔ́ɔ daa kɔɔ zang ɓɔɔ kpang. Daayi mɔɔ daa tusu zang ɓɔɔ ri dɔɔ vuu vaa ka Gãa Laa, bii ɓaaɓɛ. Tɔ̀ɔ mɔɔ ti dɔɔ Kpanti Laa vuu ɓɔɔ Musa dang nyaa ɓɛɛ. Tɔ̀ɔ zang ri zi kagn nɛɛ vuu bii ɓaaɓɛ yaa mɔɔ nɔng tɔ.”

45Yɔɔ ɓɔɔ vuu bii shaa kaɓa, daayi daa kɔ̀ɔrɔ̀ zang vuu ɓɔɔ Yeesɔ pàlɛ̀ wu ɓi doo nɛɛ mani. Ka ruu nɔngkɔ, Yeesɔ walɛ gbalang ɓɔɔ wu nwang bii ka dalɛ, wu daa gari ɓɔɔgn takpang. Nwalɛ kaa nɔng ɓɔɔ zang kagn kpang ɓɛɛ. Zang ti daa bii Yeesɔ ɓi doo nɛɛ mani, nɛɛ nɔng piti, piti.

Currently Selected:

Maraku 1: mzmNT

Highlight

Copy