Matiyu 28

Naa ɓɔɔ Laa wisi Yeesɔ paa ɓɛɛ

(Mar 16:1-8; Luk 24:1-12; Yɔh 20:1-10)

1Nɔng naa gãntɛ tɔ gbete, ka knti Diki Ɔ̃sɔnang zang Yahudi, Marayamu Magadaliya nɛɛ Marayamu ɓɔɔ ɓɛɛ, ri daayi nɛɛ ri daa leng jĩng ka yuu saa. 2A tipi ruutunang ɓɔɔ bang ruutu, ka ruu ɓɔɔ, zang nyaa shonang Laa ɓɔɔ ka lapa shooro, daa ka nɔng yuu sàa, a jĩiri tari ɓɔɔ zang ku nyaa sàa nɛɛ mani, nwang ka yuu ɓiɓɛ ɓɛɛ. 3Waa nyaating ɓiɓɛ, nwang naa shala mii ɓɔɔ kɔlɔ ɓɛɛ. Fɔ̃ɔrɔ ɓiɓɛ ti puru shãa shãa. 4Sɔɔja ɓɔɔ ri gãng jĩng ka yuu saa, ri kaa vɔrɔ ɓiɓɛ, bii ɓarɛ mãrɛ, ri nwang kaa naa zang ɓɔɔ ri vɔ katɔ ɓɛɛ.

5A zang nyaa shonang Laa ɓɔɔ lapa kaɓa, kɔɔ zang soro ɓɔɔ ri daa jĩng lennang ka yuu sàa kaɓa nɛɛ, “Nɔ́ɔ kaa vɔrɔ kpang, n zi tɔ, nɔɔ kãa Yeesɔ ɓɔɔ zang ɓaa wu naa ka laa ɓɛɛ. 6Tɔ̀ɔ́ nɔng kpang, seepaa tɔ naa ɓɔɔ wu kɔɔ ɓɛɛ. Nɔɔ a ta, nɔɔ zi nɔng ɓɔɔ bɛ̀ɛ́ roo kagn ɓɛɛ. 7Nɔɔ dita pati, nɔɔ daa kɔɔ zang ɓɔɔ ri mantɛ vuu ka bii ɓiɓɛ nɛɛ, seepaa tɔ nɛɛ sàa. Dàá Galili kana tĩng ɓarɛ. Ri daa zi wu ka nɔngkɔ. N kɔɔ nɔɔ tɔ.”

8A zang soro kaɓa, ri yaa nɔng yuu sàa kaa tantɛnang, nɛɛ vɔrɔ kaanang, nɛɛ tĩnang tãanang ning, a ri yurɛ, nɛɛ ri daa kɔɔ zang ɓɔɔ ri mantɛ vuu ka bii ɓiɓɛ ɓɛɛ. 9A Yeesɔ naa ɓee ri yuu, a jee ri nyaa tɔɔ, “Palɛ biya?” Ɓudo ɓɔɔ ri zi wu naa weɓe, ri see zɔɔ, ri daa yi wu ka doo, ri báng wu kati. 10A Yeesɔ kɔɔ ri tɔɔ, “Nɔ́ɔ kaa vɔrɔ kpang, nɔɔ dita nɔɔ daa kɔɔ rɛɛ manzung, nɛɛ ri daa ka Galili, ri daa zi m ka nɔngkɔ.”

Ruu ɓɔɔ zang sɔɔja ɓɔɔ ri gãng jĩng ka yuu sàa ri kɔɔ ɓɛɛ

11Zang soro ri daa tɔ, a zang sɔɔja ɓɔɔ, ri daa ka gari. Ri daa kɔɔ zang bang bang zang ɓɔɔ ri dɔɔ vuu ka Gãa Laa, vuu piti ɓɔɔ palɛ ɓɛɛ kati. 12Ɓɔɔ zang bang bang zang ɓɔɔ ri dɔɔ vuu ka Gãa Laa, ri kpalɛ zɔɔ tɔ, nɛɛ zang bang bang zang Yahudi ri tɔ̀ng zɔɔ, a ri sèe saka gaagaa ri a rɛɛ sɔɔja, 13nɛɛ rɛɛ sɔɔja ri kɔɔrɔ zang nɛɛ, “Zang ɓɔɔ ri mantɛ vuu ka bii Yeesɔ, ri a nɛɛ zĩi bɛ̀ɛ́ hingro yiki ruu katɔ, ri ɓɔɔ bii vɔrɔ ɓiɓɛ. 14Gɔmna nɛɛ naa tãa ruu keɓe tɔ, ruu naa kɔɔ wu naa ɓɔɔ vuu bii palɛ ɓɛɛ ditɔ, ka ruu ɓɔɔ, nɔɔ nɛɛ naa dang jĩng ɓɛɛ.”

15A rɛɛ sɔɔja ri ta saka ri palɛ vuu ɓɔɔ zang kɔɔ ri ɓɛɛ kati. Zang Yahudi ri ti ráng ruu keɓe doo naa lɛɛkɔ sasak.

Ruu ɓɔɔ Yeesɔ kɔɔ zang ɓɔɔ ri mantɛ vuu ka bii ɓiɓɛ ɓɛɛ

(Mar 16:14-18; Luk 24:36-49; Yɔh 20:19-23)

16A zang ɓɔɔ ri mantɛ vuu ka bii Yeesɔ kopi tu gbete naa daa ka Galili, ka yuu kɔpɔ ɓɔɔ Yeesɔ kɔɔ ri ɓɛɛ. 17Ri daa ĩi wu, a ri báng wu. A zang ɓɔɔ ri, zi kpang nɛɛ wukɔ niizang kpang. 18A Yeesɔ arɛ naa kɔɔ ri tɔɔ, “Laa a m naa tɔ ka yuu vuu ɓɔɔ ka lapa, nɛɛ ɓɔɔ ka tipi nandon. 19Ka ruu nɔngkɔ, nɔɔ dita, nɔɔ daa kɔɔ zang tipi ɓɔɔ ka koo keɓe nandon ruu mɛɛ, tɔɔ, ri nwang zang ɓɔɔ ri dũng m kati. Nɔɔ ti palɛ ri batizima nɛɛ nung Daa mɛɛ Laa, nɛɛ ɓɔɔ mɛɛ Jaa ɓiɓɛ, nɛɛ ɓɔɔ Suru Laa. 20Nɔɔ ti kpɛ̃ɛrɛ ri, nɛɛ ri dũng nyaa ɓɔɔ n dang nɔɔ ɓɛɛ nandon. N yaa nɔɔ kpang. N nwang nɛɛ nɔɔ sasak, diki ɓɔɔ koo keɓe naa waa nyaa, nɛɛ mani.”

Currently Selected:

Matiyu 28: mzmNT

Highlight

Copy