Matiyu 19
19
Soro hinnang
(Mar 10:1-12; Luk 16:18)
1Yeesɔ hangsɛ nyaa ruu keɓe kɔɔnang tɔ, a seepaa nɛɛ Galili daa ka tipi Yahudi ɓɔɔ zang ta rang Urudung katɔ ɓɛɛ. 2Zang dɔɔli dũuru wu ka knti. A masɛ ri ka nɔngkɔ. 3A zang ɓɔɔ ka teteng zang Farisi ri naa a ka bii ɓiɓɛ, nɛɛ ri gãsɛ wu katɔ. Ri hɛ̃ɛ Yeesɔ tɔɔ, “Ruu Laa ɓɔɔ Musa beeyi kasɛ tɔ nɛɛ zang wu hing soro ɓiɓɛ, ka ruu vuu ɓɔɔ wu palɛ, ɓɔɔ daa wu ɓi kpang ɓɛɛ ya?”
4Yeesɔ kasɛ ri nyaa tɔɔ, “Nɔɔ gã gngn nɛɛ Laa ɓɔɔ mã́a zang ka tĩng tɛ̃ɛ tɛ̃ɛ, mã́a ri, zang varɛ nɛɛ zang soro kpang ya?” 5Yeesɔ kɔɔ ri tɔɔ, “Ka ruu nɔngkɔ, zang varɛ yaa niiɓɛ nɛɛ diiɓɛ, ɓakɛ zɔɔ nɛɛ soro ɓiɓɛ ri ziti keɓe ri nwang kaa bii gbete. 6Ka ruu nɔngkɔ, ri tɔ̀ɔ́ ziti kpang, ri kaa gbete. Vuu ɓɔɔ Kpanti Laa nɛɛ ɓakɛ tɔ, shɔnzang wu basɛ takpang.”
7A zang Farisi hɛ̃ɛ Yeesɔ tɔɔ, “A Musa kɔɔ zang ka ruu vi, nɛɛ zang ɓɔɔ nɛɛ tɔɔ wu hing soro ɓiɓɛ, wu a wu labeenang soro hinnang, tɔ̀ɔ, zang wu hing wu kati viya?”
8Yeesɔ kasɛ ri nyaa tɔɔ, “Musa a nɔɔ naa soro manɛ hinnang ka ruu ɓɔɔ nɔɔ kpãa nyaa vuu tusunang katɔ ɓɛɛ. A vuu keɓe wu nɔngkɔ ka tĩng kpang. 9Ka ruu nɔngkɔ, naa shɔnzang hing soro ɓiɓɛ naa wu ka ruu ɓɔɔ, roo nɛɛ zang varɛ ɓɔɔgn ɓɛɛ kpang, a shing soro ɓɔɔgn, zang keɓe palɛ ɓi dũndũng nɛɛ soro ɓɔɔgn ɓɔɔ wu shing ɓɛɛ.”
10A zang ɓɔɔ ri mantɛ vuu ka bii ɓiɓɛ, ri kɔɔ wu tɔɔ, “Nwannang zang varɛ nɛɛ ɓeeso, nɛɛ nwang nɔngkɔ, zang wu shing soro kpang gbã̀ágbãa.”
11Yeesɔ naa risi nyaa kɔɔ ri tɔɔ, “Wu shɔnzang piti zunung ruu keɓe tanang kpang, ɓi zang ɓɔɔ Kpanti Laa a ri naa kɔ ta shɛ̃ɛning. 12Zang ɓɔɔgn, ri roo soro kpang, bii varɛ ɓarɛ vɔ katɔ, ka ruu ɓɔɔ zang yi ri nɔngkɔ ɓɛɛ. Zang ɓɔɔgn zang palɛ ri katɔ. Zang ɓɔɔ ri ti bɛ̃ɛ soro roonang nɛɛ yuu ɓarɛ, ka ruu kpanti roonang Laa. Zang ɓɔɔ nɛɛ ta ruu keɓe katɔ, wu tarɛ.”
Yeesɔ nɛɛ wujɛ seseere
(Mar 10:13-16; Luk 18:15-17)
13A zang atɛ wu wujɛ seseere nɛɛ wu shing ri naa ka yuu tɔ̀ɔ wu ti gaa ri Laa. A zang ɓɔɔ ri mantɛ vuu ka bii ɓiɓɛ ri, mangkɛ zang ɓɔɔ ri atɛ wujɛ kati. 14Yeesɔ kɔɔ ri nɛɛ, “Nɔɔ yaa wujɛ seseere ka nɔngkɔ ri a ka bii mɛɛ. Nɔ́ɔ nɔ̀ɔ ri gbalang kpang. Kpanti roonang Laa ɓi ɓɔ̀ɔ́ zang ɓɔɔ naa weɓe kɔ.”
15Shìng ri naa tɔ ka yuu, gaa ri Laa, a seepaa daa kati.
Jasang ɓɔɔ vuu naa ɓiɓɛ dɔɔli ɓɛɛ
(Mar 10:17-31; Luk 18:18-30)
16A zang ɓɔɔgn arɛ naa hɛ̃ɛ Yeesɔ tɔɔ, “Maalang, vuu tɔ̃ɔ ɓɔɔ naa n palɛ, n walɛ suru bii ɓɔɔ waa nyaa kpang, ɓu viya?”
17A Yeesɔ kasɛ wu nyaa tɔɔ, “Mɔɔ hɛ̃ɛ m ruu vuu ɓɔɔ tɔ̃ɔ ka ruu viya? Laa kɔ tɔ̃ɔ gbete. Mɔɔ nɛɛ kasɛ suru bii ɓɔɔ waa nyaa kpang, dũng nyaa ɓɔɔ Kpanti Laa dang ɓɛɛ.”
18A hɛ̃ɛ Yeesɔ tɔɔ, “Ń dũng ɓu nyaa ɓɔɔ Laa dang ɓɛɛ kìya?” Yeesɔ tɔɔ, “Mɔ́ɔ nyɔ zang vɔrɔ kpang, mɔ́ɔ roo nɛɛ soro zang kpang, mɔ́ɔ ɓɔ̀ɔ shɔngɓɔ kpang, mɔ́ɔ kɔɔ ruu nɛɛ sèé ka yuu zang ɓɔɔ kpang. 19Ɓaa shoo ka nyaa daaɓɛ nɛɛ ɓɔɔ naaɓɛ tɔ̃ɔ tɔ̃ɔ. Mɔɔ ti kasɛ ruu zang ɓɔɔ mɔɔ nwalɛ nɛɛ ri, doo naa ɓɔɔ mɔɔ kasɛ yuu ɓaaɓɛ kɔ.”
20Yɔɔ jasang kasɛ wu nyaa tɔɔ, “N palɛ vuu keɓe tɔ nandon, yàa m ɓu kaa viya?”
21A Yeesɔ kɔɔ wu tɔɔ, “Mɔɔ nɛɛ kasɛ nɛɛ mɔɔ nwang zang ɓɔɔ vuu shi kpang ɓi ka bii ɓiɓɛ gbete kpang, ka tĩng Laa, dita mɔɔ daa mãlɛ́ vuu naa ɓaaɓɛ nandon, mɔɔ basɛ zang ɓɔɔ vuu ka naa ɓarɛ kpang saka vuu ɓɔɔ mɔɔ malɛ ɓɛɛ kati. Mɔɔ naa walɛ vuu naa ditɔ ka lapa. Tɔ̀ɔ, mɔɔ arɛ mɔɔ dũng m.”
22Ɓu doo ɓɔɔ yɔɔ jasang kaɓa tãa naa weɓe, yeti ɓiɓɛ lasɛ dɔɔli, a daayi, ka ruu ɓɔɔ, vuu naa ɓiɓɛ dɔɔli ɓɛɛ.
23Yeesɔ kɔɔ zang ɓɔɔ ri mantɛ vuu ka bii ɓiɓɛ tɔɔ, “N kɔɔ nɔɔ ruu ɓɔɔ niizang kɔ nwani, daanang zang ɓɔɔ vuu naa ɓarɛ kagn ka nɔng ɓɔɔ Laa roo kpanti, naa kpãa dɔɔli. 24N kɔɔ nɔɔ tɔkn, daanang zang ɓɔɔ vuu naa ɓarɛ kagn ka nɔng ɓɔɔ Laa roo kpanti, kpãa nyaa ɓa ɓɔ̀ɔ vuu vaa ɓɔɔ zang ɓaa nɛɛ hòlòng ɓú nɛɛ yeng shɔng fɔ̃ɔrɔ ɓɛɛ katɔ.” 25Ɓɔɔ zang ɓɔɔ ri mantɛ vuu ka bii Yeesɔ, ri tãa naa weɓe, ri mã naa ka danggn. Ri tɔɔ, “A ɓu wi walɛ suru bii ɓɔɔ waa nyaa kpang wiya?”
26Yeesɔ pɛ̃ɛrɛ ri, a kɔɔ ri tɔɔ, “Vuu keɓe shɔnzang zunung palɛnang kpang, a Laa zunung vuu piti palɛnang ɓi katɔ.”
27Bituru hɛ̃ɛ wu tɔɔ, “A wee ruu yaa vuu piti tɔ, ruu dũng mɔɔ ɓee, ruu naa walɛ ɓu kaa viya?”
28Yeesɔ kɔɔ ri tɔɔ, “N kɔɔ nɔɔ ruu ɓɔɔ niizang kɔ nwani, ka diki ɓɔɔ Jaa Shɔnzang naa arɛ, naa nwang ka laa kpanti nɛɛ naa bannang ɓiɓɛ ka koo shɔɔ. Ɓɔɔ nɔɔ dũ̀ng knti mɛɛ, nɔɔ naa nwáng ditɔ jong ka laa nwannang kopi tu ziti. Tɔ̀ɔ nɔ́ɔ jɛ̃̀ɛ zɔ̃ng wujɛ Isirela ɓɔɔ kopi tu ziti ruu kati. 29Zang piti ɓɔɔ yaa gãa ɓiɓɛ, nɛɛ ɓeezung, nɛɛ ɓeenaa, nɛɛ diiɓɛ, nɛɛ niiɓɛ, nɛɛ wujɛ ɓiɓɛ, a ɓɔɔ tipi jaa lannang ɓiɓɛ, ka ruu mɛɛ, naa walɛ vuu ɓɔɔ wu yaa ɓɛɛ ditɔ dakn laa maani. Ti walɛ suru bii ɓɔɔ waa nyaa kpang ɓɛɛ katɔ. 30A zang dɔɔli ka teteng zang kɔ ri ka tĩng kãntang keɓe, kɔ naa waa nyaa knti. Zang kɔ ri ka knti kãntang keɓe, kɔ naa sɔɔ zang tĩng kaa jong.”
Currently Selected:
Matiyu 19: mzmNT
Highlight
Share
Copy
Want to have your highlights saved across all your devices? Sign up or sign in
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust
