Luka 21

Saka ɓɔɔ suvɔ loo ka Gãa Laa ɓɛɛ

(Mar 12:41-44)

1Yeesɔ tuu jĩng, a zi zang ɓɔɔ vuu naa ɓarɛ kagn, ri looro saka ɓɔɔ ri a Laa ka yeti nɔng ɓɔɔ zang tɛ̃ɛ saka ka Gãa Laa ɓɛɛ. 2A ti zi suvɔ ɓɔɔ vuu naa kpang, loo saka tɔkɔlɔng ɓiɓɛ jong. 3A kɔɔ ri tɔɔ, “N kɔɔ nɔɔ ruu ɓɔɔ niizang kɔ nwani, vuu ɓɔɔ suvɔ kaɓa loo ɓɛɛ, ɓa ɓɔ̀ɔ́ zang piti katɔ. 4Ka ruu ɓɔɔ, zang keɓe ri nwangsɛ saka ɓarɛ ka yeti vuu naa ɓarɛ ɓɔɔ gaagaa ɓɛɛ, ri a Laa. Suvɔ ɓɔɔ vuu naa ɓiɓɛ kpang keɓe, atɛ ɓi vuu naa ɓiɓɛ ɓɔɔ wu walɛ vuu shaanang nɛɛ mani kɔ nwani nandon.”

Yeesɔ kɔɔ zang naa ɓɔɔ zang naa Jili Gãa Laa ɓɛɛ

(Mat 24:1-2; Mar 13:1-2)

5Zang ɓɔɔ ka teteng zang ɓɔɔ ri mantɛ vuu ka bii Yeesɔ ri rang yee ka yuu Gãa Laa, naa ɓɔɔ zang gbarɛ nɛɛ tari tɔ̃ɔ tɔ̃ɔ, a ɓɔɔ vuu ɓɔɔ zang a Laa nɛɛ zang gbarɛ Gãa Laa nɛɛ mani ɓɛɛ.

6A Yeesɔ kɔɔ ri tɔɔ, “Gãa Laa kɔ nɔɔ zi, nɛɛ vuu kɔ zang gbarɛ bii ɓiɓɛ nɛɛ mani ɓee, diki a ditɔ ɓɔɔ zang naa jili Gãa keɓe, zang yaa tari gbete ɓɔɔ pã́ng ka yuu zɔɔ kpang ɓɛɛ.”

Jĩng dannang ɓɔɔ naa a shɔɔnang ɓɛɛ

(Mat 24:3-14; Mar 13:3-13)

7A ri hɛ̃ɛ wu nɛɛ, “Maalang, zang naa palɛ vuu keɓe gn vi nɔngkɔ viya? Ɓu vi naa tusu ruu nɛɛ diki ɓɔɔ vuu keɓe naa palɛ kagn a tɔ viya?” 8A kɔɔ ri tɔɔ, “Nɔɔ gãng jĩng waasɛ̃ zang ɓɔɔ nɛɛ nwãarɛ nɔɔ. Zang dɔɔli a ditɔ nɛɛ nung mɛɛ, ri naa kɔɔyi nɛɛ rikɔ zang ɓɔɔ naa a ɓɛɛ. A ri ti kɔɔ nɛɛ diki a naabm tɔ. Nɔɔ dũ̀ng ri kpang. 9Nɔɔ nɛɛ tãayi zang nɛɛ kɔɔrɔ nɛɛ zang takɛ sĩiri, nɛɛ zang ti palɛ nyaa, nɔɔ kaa vɔrɔ kpang. Vuu keɓe kɔ ri gaayu shɔɔnang. Nɔɔ tɔɔ kpang nɛɛ, diki ɓɔɔ koo waa nyaa a tɔ naabm kpang.”

10Ti kɔɔ zang tɔɔ, “Zang koolaa ɓɔɔgn ri naa ta sĩiri nɛɛ zang koolaa ɓɔɔgn. Kpanti ɓɔɔgn nɛɛ kpanti ɓɔɔgn ri ti naa ta sĩiri. 11Tipi naa ruutu ka nɔng piti piti. Nyɔkɔ nɛɛ kɔnang ka zɔ̃ng zɔ̃ng naa nwang nyaa nɛɛ nɔng piti piti. Vuu vɔrɔ kaanang nɛɛ vuu baabii naa nwang bii ka lapa. 12Ɓɔɔ diki keɓe à gn kpang, zang yi nɔɔ zang ti dang nɔɔ jĩng. Zang a nɔɔ rɛɛ zang bang bang gãa zɔɔ kpalɛnang, ri jɛ̃ɛ nɔɔ ruu, ri loo nɔɔ ka sãa. Zang daa nɛɛ nɔɔ ka bii kpanti, nɛɛ bii gɔmna, ka ruu ɓɔɔ, nɔɔ ráng yee mɛɛ ɓɛɛ. 13Nɔɔ walɛ manɛ kaa gbalang ɓɔɔ nɔɔ kɔɔ zang ruu mɛɛ ɓɛɛ. 14Nɔɔ tɔ́ɔ kpang nɛɛ, nɔɔ rɛ̃rɛ vuu ɓɔɔ nɔɔ kɔɔ ɓɛɛ kpang, 15ka ruu ɓɔɔ, n a nɔɔ yee nɛɛ zũnang naa ɓɔɔ zang ɓɔɔ ri kasɛ ruu manɛ kpang, ri zunung naa ɓɔɔ ri laa nyaa nɛɛ nɔɔ kpang ɓɛɛ. 16Naa doo rɛɛ daa manɛ nɛɛ nàá manɛ, nɛɛ rɛɛ ɓaazung, a ɓɔɔ rɛɛ ɓaa sang ri naa nyɔ yuu manɛ ditɔ. A zang ti nyɔkɔ́ zang ɓɔɔ vɔrɔ ka teteng manɛ. 17Zang piti ri kasɛ ruu manɛ kpang, ka ruu mɛɛ. 18A vuu ɓɔɔ lee suuyuu manɛ gbete naa bii kpang. 19Nɔɔ nɛɛ mã danggn tɔ kagn nɔɔ ta yuu manɛ katɔ.

Yeesɔ kɔɔ naa ɓɔɔ zang naa jili Urushalima

(Mat 24:15-21; Mar 13:14-19)

20“Nɔɔ nɛɛ zirɛ zang sĩiri tanang nɛɛ kiiri gari Urushalima nyaa tɔ ka teteng, nɔɔ zi ka wukɔ nɛɛ diki ɓɔɔ zang jili wu kagn a tɔ naabm. 21Zang ɓɔɔ ri ka tipi Yahudi, ri yurɛ, ri waa ka yuu kɔpɔ. Zang ɓɔɔ ri ka yeti gari Urushalima ri nwangnɛ ri yaa nɔng. A zang ɓɔɔ ri ka dalɛ ri hãa nyaa tɔ̀ɔ́ ka yeti gari kpang. 22Ka ruu ɓɔɔ, diki kaɓa ɓi diki ɓɔɔ Laa naa dang zang jĩng ɓɛɛ. Tɔ̀ɔ, vuu ɓɔɔ labeenang Laa kɔɔ ɓɛɛ, wu nwang kaa nɔngkɔ niizang. 23Ka diki kaɓa, zang soro ɓɔɔ ri tuu jaa ka yeti nɛɛ ɓɔɔ ri jaa ka naa, ri nwang vuu gn kɔnang. Ka ruu ɓɔɔ, zang koo keɓe ri naa dang jĩng dɔɔli, a yeti ti naa lasɛ Laa nɛɛ ri dɔɔli ɓɛɛ. 24Zang nyɔkɔ ɓɔɔ vɔrɔ nɛɛ yere bang. Zang ti yiki ɓɔɔ ka nyaa sĩiri, zang daa nɛɛ ri, ka koo piti piti. Zang ɓɔɔ ri zi Laa kpang, ri naa jili gari Urushalima. Ri nwang nɔngkɔ sasak, diki ɓɔɔ Laa ka ri, waa nyaa nɛɛ mani.

Naa ɓɔɔ Jaa Shɔnzang naa gbãayu ɓɛɛ

(Mat 24:29-31; Mar 13:24-27)

25“Nɔɔ naa zi vuu ka làa, nɛɛ shala nɛɛ sàng ka zɔ̃ng zɔ̃ng. Zang koolaa ka bm bm ri naa kaa vɔrɔ, ka ruu ɓɔɔ, mii waapo kaarɛ nyaa a ti see varɛ dɔɔli ɓɛɛ. 26Shɔnzang ri naa kaa vɔrɔ dɔɔli, nung vɔrɔ gbete, ka ruu jĩng dannang ɓɔɔ a ka koo keɓe ɓɛɛ. Ka diki kaɓa, vuu bang bang ɓɔɔ ka lapa ɓɛɛ, zang naa zĩiti ri katɔ. 27Tɔ̀ɔ, zang zi Jaa Shɔnzang kati, ka ɓɔɔ wu a nɛɛ lapa ka yeti sãmbong ɓɛɛ nɛɛ naa vuu palɛnang, a ɓɔɔ bannang ɓiɓɛ ɓɛɛ. 28Vuu keɓe nɛɛ gaayu palɛnang tɔ, nɔɔ tuu jĩng ka lapa, nɔɔ pɛ̃ɛrɛ, ka ruu ɓɔɔ, laa ɓɔɔ zang ta yuu manɛ kagn, a naabm tɔ ɓɛɛ.”

Vuu ɓɔɔ ruu zi ka bii laa sĩiri ɓɛɛ

(Mat 24:32-35; Mar 13:28-31)

29A kɔɔ ri ruu keɓe, nɛɛ nyaa vuu jeenang tɔɔ, “Nɔɔ pɛ̃ɛrɛ laa sĩiri nɛɛ laa nimbang nandon. 30Ri nɛɛ gaayu gɔpɔ shɔɔ lusunang tɔ, nɔɔ zi katɔ nɛɛ nɔng guusi a naabm tɔ. 31Dòo nɔngkɔ, nɔɔ nɛɛ zi vuu keɓe nɛɛ gaayu palɛnang nɛɛ, nɔɔ zi kati, nɛɛ diki ɓɔɔ Laa naa roo Kpanti kagn a naabm tɔ. 32N kɔ̀ɔ́ nɔɔ ruu ɓɔɔ niizang kɔ nwani, vuu keɓe palɛ ka gbongkarɛ, tɔ̀ɔ, zang koo jaa knti keɓe ri vɔlɔ kati nandon. 33Lapa nɛɛ tipi naa shaarɛ ditɔ, a ruu mɛɛ shaarɛ ɓi kpang dòndòng.

Nɔɔ kpalɛ bii katɔ

34“Nɔɔ gãng jĩng kagn, rɛ̃rɛnang manɛ nɛɛ kpiti nɛɛ vuu shaanang nɛɛ vuu ɓoonang. Rɛ̃rɛnang ɓɔɔ nɔɔ rɛ̃rɛ ka yuu vuu ɓɔɔ nɔɔ kasɛ ka koo keɓe ɓɛɛ. Ka ruu ɓɔɔ, diki kaɓa nɛɛ arɛ, bɛ̀ɛ́ nɔɔ shing danggn kpang, naa ɓɔɔ saka ta yɔpɔ ɓɛɛ. 35Diki kaɓa naa a ka yuu zang ɓɔɔ ri nwang ka koo keɓe nandon. 36Nɔɔ gãng jĩng kagn, nɔɔ gaa Laa diki diki, tɔ̀ɔ, nɔɔ walɛ kaka ɓɔɔ nɔɔ mã danggn jĩng dannang ɓɔɔ a ɓɛɛ. Tɔ̀ɔ, nɔɔ naa shii ka tĩng mɛɛ, ɓɔɔ n Jaa Shɔnzang ɓɛɛ.”

37Nɛɛ nɔng laagɛ̃, Yeesɔ tusu zang vuu ka Gãa Laa, nɔng zĩi nɛɛ a tɔ, wu yaa yeti gari, wu daa kaa kɔpɔ ɓɔɔ zang ɓaa nɛɛ Zeetung ɓɛɛ, wu daa roo ka nɔngkɔ. 38Nɔng nɛɛ ti gãntɛ tɔ, zang ti kpalɛ zɔɔ ka yeti Gãa Laa, nɛɛ ri tãa vuu ɓɔɔ wu tusu ɓɛɛ.

Currently Selected:

Luka 21: mzmNT

Highlight

Copy