Luka 20
20
Zang hɛ̃ɛ Yeesɔ nɛɛ wi a wu naa vuu palɛnang wiya?
(Mat 21:23-27; Mar 11:27-33)
1Diki ɓɔɔgn Yeesɔ tusu zang vuu, a ti kɔɔ zang Ruu Tɔ̃ɔ Laa ka Gãa Laa, a rɛɛ zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang ɓɔɔ ri zi labeenang Laa dɔɔli ɓɛɛ, nɛɛ rɛɛ zang bang bang, ri a ka bii ɓiɓɛ. 2A ri hɛ̃ɛ wu nɛɛ, “Kɔɔ ruu jong, wi a mɔɔ naa, a mɔɔ palɛ vuu kɔ mɔɔ palɛ ɓɛɛ wiya?” 3A kasɛ ri nyaa tɔɔ, n kaaɓi, n hɛ̃ɛ nɔɔ ruu jong gbete. 4Nɔɔ kɔɔ m jong, “Batizima ɓɔɔ Yɔhana palɛ zang ɓɛɛ, ɓu wi a wu naa wiya, Laa ya, kɔ shɔnzang?” 5A ri laa zɔɔ nyaa ka naa ɓarɛ nɛɛ, “Ruu nɛɛ kɔɔ nɛɛ batizima Yɔhana, Laa a wu naa. Hɛ̃ɛ ruu nɛɛ, ‘a ka ruu vi nɔɔ shing danggn ka bii Yɔhana kpang viya?’ 6Ruu nɛɛ ti kɔɔ nɛɛ, ‘Shɔnzang a wu naa.’ Zang kɔ nihn ɓee, nandon ri luku ruu katɔ nɛɛ tari ka ruu ɓɔɔ, ri shing danggn tɔ nɛɛ bɛ̀ɛ́ Yɔhana ɓi zang nyaa shonang Laa ɓɛɛ.” 7A ri kasɛ wu nyaa nɛɛ, ri zi zang ɓɔɔ a Yɔhana naa batizima palɛnang kpang. 8A Yeesɔ ti kɔɔ ri nɛɛ, “N ti kɔɔ nɔɔ zang ɓɔɔ a m naa ɓɔɔ n palɛ vuu keɓe nɛɛ mani kpang.”
Nyaa vuu jeenang ka yuu zang shonang yeti shi kpang
(Mat 21:33-46; Mar 12:1-12)
9A kɔɔ zang ruu keɓe nɛɛ, “Zang ɓɔ̀ɔ́gn láng jaa, a ɓaa laa inabi kagn, a yàa zang ɓɔɔ langkɛ jaa, a daa zanti ka tipi ɓɔɔgn, daa nwang ka nɔngkɔ diki bee wu. 10Ka ɓɔɔ làá jaa inabi hãnang arɛ, shong zang shonang ɓiɓɛ ka bii zang ɓɔɔ ri lang wu jaa ɓɛɛ, nɛɛ zang shonang wu daa ta wu jaa inabi ka naa ɓarɛ. Zang ɓɔɔ ri lang wu jaa, ri nyɔ zang shonang keɓe zɛ̃ɛzɛ̃ɛ, ri sɔɔrɔ wu naa waati. 11Shong zang shonang ɓɔɔgn tɔkn. Zang ɓɔɔ ri lang wu jaa, ri nyɔ zang shonang keɓe ri palɛ wu vuu yusɛ̃ɛ, ri sɔɔrɔ wu naa waati doo nɔngkɔ. 12A shong zang shonang ɓɔɔ tɔkn kaa dakn taati. Ri shìng zang shonang bìí nyaa vuu waa ka bii. Ri nwangsɛ wu nɛɛ yeti jaa.
13“A zang jaa tɔɔ, ‘N palɛ kaa biya? N shong kaa jaa gbete ɓɔɔ n kasɛ wu dɔɔli ɓɛɛ. Nɛɛ kasɛ, ri naa ɓaa shoo ka nyaa ɓiɓɛ kɔ.’ 14Ɓɔɔ rɛɛ zang ɓɔɔ wu yàa ri jaa, ri zi jaa ɓiɓɛ bii hn, ri tɔ̀ng zɔɔ ka naa ɓarɛ nɛɛ, jaa ɓɔɔ naa shaa vuu vɔ daa ɓiɓɛ kɔ a kana ɓa. Nɔɔ arɛ ruu nyɔ wu vɔrɔ, tɔɔ jaa keɓe naa nwang kaa ɓɔɔ ɓuru. 15A ɓɔɔ jaa naa a ka yeti jaa, ri yi wu, ri nwangsɛ wu nɛɛ yeti jaa, a ri nyɔ wu vɔrɔ ka nɔngkɔ. Ɓɔɔ nɔɔ zi ka yeti manɛ, zang jaa keɓe nɛɛ a tɔ, naa palɛ zang ɓɔɔ wu yaa ri jaa keɓe viya? 16Naa nyɔkɔ zang ɓɔɔ wu yaa ri jaa keɓe nandon, wu yaa rɛɛ zang ɓɔɔgn jaa bii.” Zang ɓɔɔ ri tãa vuu keɓe, ri tɔɔ, “Laa wu zã́a vuu keɓe nwannang nɔngkɔ katɔ.” 17A pɛ̃ɛrɛ ri, a hɛ̃ɛ ri tɔɔ, “Ruu Laa keɓe kɔɔrɔ ɓu nɛɛ viya? Ruu Laa ɓɔɔ tɔɔ,
“ ‘Tari ɓɔɔ zang ɓɔɔ mãa gãa
ri bɛ̃ɛyi wukɔ naa raa tari
ɓɔɔ yiti gãa ɓɛɛ kati.’
18Shɔnzang ɓɔɔ nɛɛ watɛ ka yuu tari keɓe kakɛ katɔ. Tari kɔ nɛɛ watɛ ka yuu shɔnzang, nang wu dɔ̃ɔ gbete yerek.”
Ruu saka tipi ɓɔɔ zang shu Kayisa ɓɛɛ
(Mat 22:15-22; Mar 12:13-17)
19Zang ɓɔɔ ri zi labeenang Laa dɔɔli, nɛɛ zang bang bang zang ɓɔɔ ri dɔɔ vuu ka Gãa Laa ɓɔɔ ri tãa ruu keɓe, nɛɛ ri yi Yeesɔ kaa tɔ tantɛnang, ka ruu ɓɔɔ, ri zi tɔ nɛɛ Yeesɔ kɔɔ ruu keɓe ka yuu ɓarɛ kɔ ɓɛɛ. Ri yi wu kaa takpang, ka ruu ɓɔɔ, ri kaa vɔrɔ zang ɓɔɔ ka nɔng ɓɛɛ.
20Ka ruu nɔngkɔ, ri kãa gbalang ɓɔɔ ri yi wu ɓɛɛ. Ri shongko zang ɓarɛ nɛɛ ri palɛ bii naa ri zang tɔ̃ɔ, ri tãa ruu ɓɔɔ Yeesɔ kɔɔ ɓɛɛ. Nɛɛ rang yee shi kpang tɔ, ri yi wu, ri a gɔmna ɓɔɔ zang Rooma shing ɓɛɛ. 21A zang keɓe ri hɛ̃ɛ wu nɛɛ “Maalang, ruu zi tɔ vuu ɓɔɔ mɔɔ kɔɔyi, nɛɛ vuu ɓɔɔ mɔɔ tusu piti tɔ̃ɔ. Mɔɔ shɛ̃ɛrɛ zang ɓaa kpang. Mɔɔ túsù Ruu Laa ɓaa tɔ̃ɔ tɔ̃ɔ. 22Kɔɔ ruu jong, daa naa ɓɔɔ ruu shu kpanti Kayisa saka tipi katɔ ya, kɔ ruu shu kpang?” 23Yeesɔ ti zi vuu ɓɔɔ ri mang ka yeti ɓarɛ ɓii tɔ, a kɔɔ ri nɛɛ, 24“Nɔɔ atɛ m dinari karɛ. Ɓɔɔ ri atɛ tɔ, a hɛ̃ɛ ri tɔɔ, zang shing waa nyaating, nɛɛ nung wi kagn wiya?” A ri kasɛ wu nɛɛ, “Ɓɔ̀ɔ́ Kpanti Kayisa.” 25A kɔɔ ri nɛɛ, “Nɛɛ nɔngkɔ, nɔɔ a Kayisa vuu ɓɔɔ ɓi ɓɔ̀ɔ́ Kayisa ɓɛɛ, nɔɔ ti a Laa vuu ɓɔɔ ɓi ɓɔ̀ɔ́ Laa ɓɛɛ.” 26A ri zunung naa ɓɔɔ ri yi wu nɛɛ yee ɓɔɔ ri hɛ̃ɛ wu keɓe kpang, ka ruu ɓɔɔ, kasɛ ri nyaa waasɛ̃ ɓɛɛ. A ri vɔ̃ nyaa kati. Ri mã naa ka danggn, ka ruu nyaa ɓɔɔ wu kasɛ ri ɓɛɛ.
Naa ɓɔɔ Laa wisi zang paa nɛɛ saa ɓɛɛ
(Mat 22:23-33; Mar 12:18-27)
27Rɛɛ zang Saduki ri kasɛ ɓarɛ kpang nɛɛ zang kɔɔyi nɛɛ zang nɛɛ vɔ tɔ, zang yupaa tɔkn kpang, ri a ka bii ɓiɓɛ. 28Ri hɛ̃ɛ wu nɛɛ, “Maalang. Musa bee rùu ka yeti labeenang nyaa dannang Laa tɔɔ, zang ɓɔɔ nɛɛ vɔrɛ naa yi jaa kagn kpang, ɓeezung wu sɔɔrɔ soro ɓiɓɛ, wu yi wu jaa. 29Wujɛ varɛ ɓɔɔ kagn jaa nàá zɔɔ, ri manziti. Ɓɔɔ bang gaayu gee soro a vɔrɛ, bɛ̀ɛ́ yi jaa gn kpang. 30Zang ɓɔɔ ɓang wu sɔɔrɔ soro keɓe, a ti vɔrɛ yi jaa doo kpang kɔ. 31Ɓɔɔ ɓang zang keɓe ti sɔɔrɔ soro keɓe tɔkn. Ri palɛ nɔngkɔ, ri manziti nandon, a ri ti vɔlɔ ri yi jaa kpang kɔ nandon. 32Kaa nɛɛ knti, jaa soro bìí naa vɔ jong. 33Ka diki ɓɔɔ Laa naa wisi zang paa nɛɛ sàa ɓɛɛ, jaa soro keɓe naa nwang ɓɔɔ wiya ka teteng ɓarɛ wiya? Ka ruu ɓɔɔ, ri shing soro keɓe katɔ, ri manziti nandon ɓɛɛ.”
34Yeesɔ kasɛ ri nyaa tɔɔ, “Zang koo keɓe ri gee soro, zang ti a ri wujɛ soro ri shĩili. 35A rɛɛ zang ɓɔɔ Laa zirɛ nɛɛ ri daa naa ɓɔɔ wu wisi ri paa katɔ, ri daa nɔng ɓɔɔ wu roo kpanti ɓɛɛ, ri gee soro ɓarɛ jong kpang. Zang ti a wujɛ soro jong, zang gee ri kpang. 36Ri ti vɔ ɓarɛ takpang dòndòng, ka ruu ɓɔɔ, ri nwáng ɓarɛ kaa naa zang nyaa shonang Laa ɓɔɔ ka lapa ɓɛɛ. Ri ɓarɛ kaa wujɛ Laa, ka ruu ɓɔɔ, zang wisi ri paa tɔ nɛɛ saa ɓɛɛ. 37Ka ruu zang paa wisinang nɛɛ sàa ɓɔɔ nɔɔ hɛ̃ɛ ɓɛɛ, Musa kɔ̀ɔ tɔ, ka yeti labeenang ɓiɓɛ nɔngkɔ, ka nɔng ɓɔɔ bèe ruu waa ɓɔɔ shaa jaa laa bɛbɛtɛ ɓɛɛ. Musa ɓàa Laa nɛɛ, ‘Làá Ibirayi, Làá Ishaaku, nɛɛ Làá Yakubu.’ Ka ruu nɔngkɔ, zang keɓe ri doo ningkãari. 38Laa ɓi Làá zang ɓɔɔ ri vɔlɔ katɔ ɓɛɛ kpang, ɓi Làá zang ɓɔɔ ningkãari ɓɛɛ. Ka ruu ɓɔɔ, zang piti nwang ningkãari ka ruu ɓiɓɛ kɔ ɓɛɛ.” 39Zang ɓɔɔ ri zi labeenang Laa dɔɔli ɓɔɔ ri shiiri ka nɔng, ri tɔɔ wu nɛɛ, “Mɔɔ rang nyaa tɔ tɔ̃ɔ maalang.” 40Zang Saduki ɓasi, ri hɛ̃ɛ ruu ɓɔɔ takpang.
Ɓu wi Kirisi wiya?
(Mat 22:41-46; Mar 12:35-37)
41A Yeesɔ hɛ̃ɛ ri nɛɛ, “Nɔɔ kɔɔ ka ruu vi, nɛɛ Kirisi jaa zɔ̃ng Dawuda viya? 42Dawuda nɛɛ yuu ɓiɓɛ bee ka yeti labeenang Zabura tɔɔ,
“ ‘Kpanti Laa kɔɔ kpanti mɛɛ nɛɛ,
“Nwang ka nakn mɛɛ,
43n raa zang ɓɔɔ shing jĩng nɛɛ mɔɔ kpang ditɔ
mɔ́ɔ náa ri nɛɛ doo.” ’
44Dawuda nɛɛ ɓaa wu nɛɛ Kpanti, a palɛ ka biya, naa nwang jaa zɔ̃ng Dawuda tɔkn wiya?”
Yeesɔ shaarɛ zang nyaa ka ruu zang ɓɔɔ ri tusu zang vuu ɓɛɛ
(Mat 23:1-36; Mar 12:38-40)
45A Yeesɔ raa nyaa ka bii rɛɛ zang ɓɔɔ ri mantɛ vuu ka bii ɓiɓɛ ɓɛɛ, a kɔɔ ri naa ɓɔɔ zang piti tãa ɓɛɛ. 46Kɔɔ ri tɔɔ, “Nɔɔ gãng jĩng ka zang ɓɔɔ ri tusu zang vuu ɓɛɛ waasɛ̃. Ri kasɛ rakɛnang nɛɛ fɔ̃ɔrɔ puru, a ri ti kasɛ nyaa jeenang ka lumang. Ri kasɛ nɛɛ zang a ri nɔng nwannang bang ka gãa zɔɔ kpalɛnang, nɛɛ nɔng ɓɔɔ zang kpalɛ yuu, zang shaa vuu shaanang ɓɛɛ. 47Ri mulu suvɔ, ri talɛ vuu ɓɔɔ ka naa ɓarɛ nandon. Ri ti kasɛ Laa gaanang sasak nɛɛ zang zi ri kati. Laa naa dang ri jĩng ɓa ɓɔɔ zang piti.”
Currently Selected:
Luka 20: mzmNT
Highlight
Share
Copy
Want to have your highlights saved across all your devices? Sign up or sign in
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust
