Luka 13

Nɔ̀ɔ yaa gbalang vuu shi kpang manɛ

1Ka diki kaɓa, zang ɓɔɔ ri kagn nɔng, ri kɔɔ Yeesɔ ruu zang Galili ɓɔɔ Bilatu shingnɛ, zang nyɔ ri vɔrɔ bɛ̀ɛ́ ri dɔɔ Laa vuu ɓɛɛ. 2A Yeesɔ kasɛ ri nyaa tɔɔ, “Nɔɔ kɔɔ ɓu nɛɛ ka ruu ɓɔɔ, zang Galili kaɓa, ri vɔ nɔngkɔ, vuu shi kpang ɓarɛ ɓa ɓɔ̀ɔ́ zang Galili ɓɔɔ nimbang ɓi katɔ ya? 3N kɔ̀ɔ́ nɔɔ, wu nɔngkɔ kpang, naa nɔɔ kɔ̃sɔ yeti, nɔɔ yaa vuu shi kpang manɛ kpang, nɔɔ naa vɔ̀lɔ́ doo nɔngkɔ nandon. 4Nɔɔ ti kɔɔ ɓu nɛɛ zang kopi tu mantaati kɔ gãa beebang ɓɔɔ ka Siluwa jirɛ, nyɔkɔ ri vɔrɔ ɓa, ɓi ka ruu ɓɔɔ, ri palɛ vuu shi kpang ɓɔɔ ɓa ɓɔɔ zang nimbang ɓɔɔ ri nwang ka Urushalima katɔ ɓɛɛ ya? 5N kɔ̀ɔ́ nɔɔ, wu nɔngkɔ kpang, naa nɔɔ kɔ̃sɔ yeti, nɔɔ yaa vuu shi kpang manɛ kpang nɔɔ naa vɔlɔ doo nɔngkɔ nandon.”

Laa sĩiri ɓɔɔ ra jaa kpang ɓɛɛ

6A Yeesɔ ráng nyaa vuu jeenang keɓe kati tɔɔ, “Yɔɔ ɓɔɔ kagn ɓaa laa sĩiri ka jaa ɓiɓɛ, a arɛ nɛɛ wu naa hãa kaa jĩng laa sĩiri, a ĩi gbete kpang. 7A kɔɔ zang ɓɔɔ gãng jĩng ka jaa, tɔ̀ɔ́, ‘Zirɛ, saa ɓɔɔ n a jaa sĩiri hãnang ka laa sĩiri keɓe, n ĩi kpang daa lɛ̀ɛ́ taati. Dɔng ta ka tipi, ka ruu ɓɔɔ, ta nɔng waati ɓɛɛ.’ 8A yɔɔ ɓɔɔ gãng jĩng ka jaa kasɛ wu nyaa tɔɔ, ‘Dabang, yaa ka nɔngkɔ saa gbete tɔkn ka gbongkarɛ. N gbãa doo ɓiɓɛ ditɔ, n tɛ̃ɛ vĩi vuu vaa kagn. 9Sãmpo nɛɛ naa ra jaa tɔ, wukɔ tɔ̃ɔ. Nɛɛ naa ra jaa doo kpang kɔ, n naa dɔng kati.’ ”

Yeesɔ masɛ Jaa soro ɓɔɔ lang katɔ, ka Diki Ɔ̃sɔnang

10Ka Diki Ɔ̃sɔnang ɓɔɔ kagn, Yeesɔ tusu zang vuu ka gãa zɔɔ kpalɛnang. 11A jaa soro kagn nɔngkɔ, ɓɔɔ suru shi kpang kagn bii ɓiɓɛ saa kopi tu mantaati ɓɛɛ. Lang wu katɔ, zunung ɓɔɔ wu wisi bii ɓiɓɛ paa kpang. 12Ɓɔɔ Yeesɔ zi wu, ɓaa wu nyaa tɔɔ, “Jaa soro, kɔnang ɓaaɓɛ yaa mɔɔ nɔng tɔ.” 13A shìng jaa soro naa ɓiɓɛ ka bii, a bii jaa soro shiiri kaa tantɛnang, a jaa soro dɔɔ Laa kati.

14Gnvɔ shaa zang bang gãa zɔɔ kpalɛnang dɔɔli, ka ruu ɓɔɔ, Yeesɔ masɛ zang kɔnang ka Diki Ɔ̃sɔnang ɓɛɛ. A yɔɔ zang bang rang yee, kɔɔ zang tɔɔ, “Diki mangbete ɓɔɔ zang palɛ shɔɔnang kagn, nɔɔ a ka diki kaɓa kɔ, tɔ̀ɔ, zang masɛ nɔɔ, nɔɔ a ka Diki Ɔ̃sɔnang kpang.”

15A Kpanti Yeesɔ kɔɔ wu tɔɔ, “Zang ɓɔɔ ri nwãarɛ zang nɛɛ vuu palɛnang ɓɛɛ, zang ɓɔɔ kagn teteng manɛ gbete kãlɛ napo, kɔ seesaa ɓiɓɛ nɛɛ vàa, daa a wu mii ka Diki Ɔ̃sɔnang kpang ɓu wiya? 16A ka ruu vi, jaa zɔ̃ng Ibirayi zang soro kɔ sheetang mã wu, saa kopi tu mantaati, zang yaa wu naa ka Diki Ɔ̃sɔnang kpang viya? 17Ɓɔɔ Yeesɔ kɔɔ naa weɓe, yusɛ̃ɛ tuu zang ɓɔɔ ri shing jĩng nɛɛ wu kpang ɓɛɛ, nandon. Zang ɓɔɔ ri kpalɛ zɔɔ ri tãa tĩnang vuu ɓɔɔ zang mã naa ka danggn piti ɓɔɔ Yeesɔ palɛ ɓɛɛ.”

Yeesɔ rang yee ka yuu jĩng Masita nɛɛ vuu ɓɔɔ zang ɓaa nɛɛ Yisi

(Mat 13:31-33; Mar 4:30-32)

18A Yeesɔ hɛ̃ɛyi tɔɔ, “Kpanti roonang Laa nwàng ɓu naa viya? N gãsɛ ɓú nɛɛ viya? 19Nwang naa jĩng masita ɓɔɔ zang tuuyi, zang ɓaa ka jaa ɓɛɛ. Wu naa bangnɛ, jaaning ri kɔng saara ka nasãng ɓiɓɛ ɓɛɛ.”

20A Yeesɔ ti kɔɔ tɔkn tɔɔ, “Nɔɔ gãsɛ kpanti roonang Laa ɓu nɛɛ viya? 21Nwang naa yisi tɔkɔlɔng ɓɔɔ zang soro tɛ̃ɛ ka zũng ɓɔɔ zang palɛ borodi nɛɛ mani, ɓɔɔ ka taasa gaagaa, wu puu kati ɓɛɛ.”

Nyaa gãa ɓɔɔ tɔ̃ntɔ̃rɔng ɓɛɛ

(Mat 7:13-14, 21-23)

22A Yeesɔ rang zang yee Laa ka gari bang bang nɛɛ jaa gari ɓɔɔ zang rooro ka gbalang, ka ɓɔɔ wu daa Urushalima ɓɛɛ. 23A zang gbete hɛ̃ɛ wu tɔɔ, “Kpanti, zang ɓɔɔ zang naa ta yuu ɓarɛ dɔɔli kpang ya?” A kasɛ ri nyaa tɔɔ, 24“Nɔɔ lakɛ yuu, nɔɔ tu yeti gãa nɛɛ nyaa gãa ɓɔɔ tɔ̃ntɔ̃rɔng ɓɛɛ, ka ruu ɓɔɔ, n kɔɔ nɔɔ, zang dɔɔli ri naa kãa gbalang tunang, ri walɛ kpang ɓɛɛ.

25“Zang gãa nɛɛ naa seepaa tɔ, nɛɛ ku nyaa gãa tɔ, nɔɔ naa shii ka biling, nɔɔ ɓaa nyaa, nɔɔ gàa wu nɛɛ, ‘Kpanti, puu ruu nyaa gãa.’ Naa kasɛ nɔɔ nyaa nɛɛ, ‘N zi nɔɔ nung m kpang.’ 26Nɔɔ naa kɔɔ manɛ kaa nɛɛ, ‘Ruu shaa vuu shaanang, a ruu ti ɓoo mii nɛɛ mɔkɔ. Mɔɔ ti tusu zang vuu ka gari ɓuru kɔ.’ 27Naa kasɛ nyaa ɓi kaa nɛɛ, ‘N kɔɔ nɔɔ, n zi nɔɔ nung m kpang. Nɔɔ dita kaaɓa nɔɔ yaa m bii, nɔɔ zang vuu shi kpang palɛnang kiɓi.’ 28Nɔɔ naa kaa ditɔ, ka nɔng kaɓa, nɔɔ shaa tãri kpaaka kpaaka. Nɔɔ naa zi rɛɛ Ibirayi ditɔ ka nɔng ɓɔɔ Laa roo kpanti nɛɛ Ishaaku nɛɛ Yakubu nɛɛ rɛɛ zang nyaa shonang Laa, a zang nwangsɛ nɔɔ manɛ ka biling ɓɛɛ. 29Zang naa alɛ ditɔ nɛɛ nɔng piti, piti ɓɔɔ ka koo keɓe, zang shaa vuu shaanang ka nɔng ɓɔɔ Laa roo kpanti ɓɛɛ. 30Zang ɓɔɔ rikɔ doo knti kãntang keɓe, rikɔ naa sɔ̀ɔ́ zang tĩng. A zang ɓɔɔ rikɔ ka tĩng, ri naa ràa zang ɓɔɔ waa nyaa knti ɓɛɛ.”

Naa ɓɔɔ Yeesɔ kasɛ Urushalima ɓɛɛ

(Mat 23:37-39)

31Ka laa kaɓa, zang Farisi ri naa arɛ, ri kɔɔ wu tɔɔ, “Seepaa ta mɔɔ daa nɔng ɓɔɔgn, Hiridu kasɛ nɛɛ wu nyɔ mɔɔ katɔ.”

32A kɔɔ ri tɔɔ, “Nɔɔ dita, nɔɔ daa kɔɔ yaka jĩngti kaɓa nɛɛ, ‘N nwangsɛ suru shi kpang, a n ti masɛ zang lɛɛkɔ, nɛɛ ɓuru. Lagbete n naa hangsɛ nyaa shonang mɛɛ.’ 33N daa m kana Urushalima lɛɛkɔ, nɛɛ ɓuru nɛɛ diki. Ka ruu ɓɔɔ, zang nyɔ zang nyaa shonang Laa ka nɔng ɓɔɔgn kpang ɓɛɛ.

34“Zang Urushalima, zang Urushalima, nɔkɔ nyɔkɔ rɛɛ zang nyaa shonang Laa, a nɔɔ ti luku zang ɓɔɔ Laa shongko nɔɔ ɓɛɛ. N kasɛ nɛɛ n kpalɛ wujɛ manɛ naa ɓɔɔ nàá kn kpalɛ jaa, zuu nasãng ɓiɓɛ kagn ɓɛɛ, nɔɔ ti yaa m kpang. 35Laa naa ràá Gãa Laa manɛ yuu knti ditɔ. N kɔɔ nɔɔ, nɔɔ walɛ jĩng mɛɛ zinang takpang. Diki ɓɔɔ nɔɔ naa kɔɔ nɛɛ, ‘Tĩnang tãanang ɓi ɓɔɔ zang ɓɔɔ a ka nung kpanti ɓɛɛ, a nɛɛ mani.’ ”

Currently Selected:

Luka 13: mzmNT

Highlight

Copy