Luka 12

Yeesɔ shaarɛ zang nyaa ka ruu vuu shi kpang palɛnang

(Mat 10:26-27)

1Zang ri kpalɛ zɔɔ ɓarɛ tɔ labang gaagaa, nɔng doo naanang kagn kpang. Ri vãlɛ kaa yuu zɔɔ. A Yeesɔ gaa tɔɔsung yee rannang kaa nɛɛ zang ɓɔɔ ri mantɛ vuu ka bii ɓiɓɛ kɔ shɔɔnang tɔɔ, “Nɔɔ gãng jĩng ka yisi zang Farisi. Yisi ɓarɛ ɓi nwãarɛnang ɓɔɔ ri nwãarɛ zang nɛɛ vuu palɛnang ɓɛɛ. 2Vuu ɓɔɔ zang kɔɔ nɛɛ nwĩiri ɓɔɔ Laa naa nwangsɛ kpang, ɓi kagn kpang. Vuu ɓɔɔ zang waasɛ katɔ, ɓɔɔ Laa naa nwangsɛ kpang, ɓi kagn kpang. 3Ka ruu nɔngkɔ, nyaa ɓɔɔ zang ɓɔɔlɔ katɔ, zang naa tãa ɓi ditɔ piti. Nɔɔ nɛɛ rang zang katɔ ka yeti gãa nɛɛ nwĩiri, zang naa kɔɔ zang nimbang ditɔ nandon.

Zang ɓɔɔ nɔ́ɔ kaa vɔrɔ ɓiɓɛ ɓɛɛ

(Mat 10:28-31)

4“Masang, n kɔɔ nɔɔ, nɔɔ kaa vɔrɔ zang ɓɔɔ ri nyɔ gãmpãng bii kɔ shɛ̃ɛning a ri zunung vuu ɓɔɔ palɛnang tɔ̀ɔ́ nɛɛ knti kpang ɓɛɛ kpang. 5N tusu nɔɔ zang ɓɔɔ nɔɔ kaa vɔrɔ ɓiɓɛ katɔ. Nɔɔ kaa vɔrɔ Laa ɓɔɔ nɛɛ nyɔ gãmpãng bii tɔ, zunung ɓɔɔ wu tasɛ ka waa katɔ ɓɛɛ. Niizang n kɔɔ nɔɔ, nɔɔ kaa vɔrɔ ɓiɓɛ kɔ.

6“Zang mãlɛ́ jaaning tɔkɔsisi maani, wu kɔpɔ ziti kpang ya? Laa sùu gbete kagn teteng ɓarɛ kpang. 7Nɔɔ zi kpang ya? Naa doo suuyuu ɓɔɔ ka yuu manɛ ɓɛɛ, Laa gã katɔ nandon. Nɔɔ kaa vɔrɔ kpang, nɔɔ ɓa tɔkɔsisi katɔ.

Nyaa Yeesɔ laanang ka tĩng zang

(Mat 10:19-20, 32-33; 12:32)

8“N ti kɔɔ nɔɔ zang ɓɔɔ nɛɛ ta m ka jĩng zang nɛɛ wu ɓi ɓɔɔ mɛɛ, Jaa Shɔnzang naa kɔɔ doo nɔngkɔ, ka tĩng zang nyaa shonang Laa ɓɔɔ ka lapa nɛɛ wu ɓi zang ɓiɓɛ kɔ niizang. 9Zang ɓɔɔ nɛɛ laa nyaa mɛɛ ka tĩng zang, n naa laa nyaa ɓiɓɛ doo katɔ kɔ ka tĩng zang nyaa shonang Laa ɓɔɔ ka lapa ɓɛɛ.

10“Zang piti ɓɔɔ rang yee shi kpang, ka yuu Jaa Shɔnzang, Laa yaa wu gbalang katɔ. Zang ɓɔɔ rang yee shi kpang ka yuu Suru Laa, Laa yaa wu gbalang ɓi kpang.

11“Zang nɛɛ atɛ nɔɔ tɔ, nɛɛ zang jɛ̃ɛ nɔɔ ruu ka gãa zɔɔ kpalɛnang zang Yahudi, kɔ ka bii gɔmna, kɔ bii zang bang bang ɓɔɔ ri yiti tipi ɓɛɛ, nɔɔ rɛ̃rɛ ka ruu naa ɓɔɔ, nɔɔ daa kasɛ zang nyaa, nɛɛ naa vuu ɓɔɔ nɔɔ daa kɔɔ ɓɛɛ kpang. 12Ka ruu ɓɔɔ, Suru Laa naa tusu nɔɔ vuu ɓɔɔ nɔɔ kɔɔ ɓɛɛ ditɔ ka laa kaɓa ɓɛɛ.”

Ruu zang ɓɔɔ vuu naa ɓiɓɛ ka gn, ɓɔɔ shoko ɓɛɛ

13Zang gbete ka teteng zang ɓɔɔ gaagaa kaɓa, kɔɔ Yeesɔ tɔɔ, “Maalang, kɔɔ manzung nɛɛ wu basɛ vuu vɔ ta nɛɛ n.”

14A Yeesɔ kasɛ wu nyaa tɔɔ, “Masang, ɓu wi shing m zang ɓɔɔ jɛ̃ɛ zang ruu, kɔ zang ɓɔɔ basɛ nɔɔ vuu ɓɛɛ wiya?” 15A kɔɔ zang ɓɔɔ ri kpalɛ zɔɔ nandon tɔɔ, “Nɔɔ palɛ tɔ̃ɔ, nɔɔ gãng jĩng, ka jĩng shinnang ka vuu naa ning. Ka ruu ɓɔɔ, zang gãsɛ suru bii shɔnzang nɛɛ vuu naa ɓiɓɛ ɓɔɔ gaagaa kpang ɓɛɛ.”

16A kɔɔ ri ruu kaa nɛɛ nyaa vuu jeenang tɔɔ, “Zang vuu naa ɓɔɔ kagn, lang jaa, a walɛ vuu shaanang dɔɔli. 17A rɛ̃rɛ ka yeti ɓiɓɛ tɔɔ, ‘N palɛ biya? Nɔng ɓɔɔ n tɛ̃ɛ vuu gbaa mɛɛ kagn ɓɛɛ kpang.’ 18A kɔɔyi tɔɔ, ‘N zi vuu ɓɔɔ n palɛ ɓɛɛ tɔ. N jili bɔ̃nɔ mɛɛ ka tipi, n mã́arɛ̀ ɓɔɔgn bang bang. Tɔ̀ɔ, n kpalɛ vuu gbaa mɛɛ nɛɛ vuu naa mɛɛ kagn nandon.’ 19Tɔ̀ɔ, n kɔɔ bii mɛɛ kati nɛɛ, ‘Mɔɔ walɛ vuu tɔ̃ɔ tɔ̃ɔ ɓɔɔ mɔɔ kasɛ ɓɛɛ tɔ, nung saa gaagaa. Nwang ta mɔɔ shaa vuu shaanang, mɔɔ ɓoo ɓɔɔ ɓoonang, mɔɔ tãa tĩnang kati.’ 20A Laa naa kɔɔ yɔɔ tɔɔ, ‘Shoko kiɓi, lɛ̀ɛ́kɔ nɛɛ zĩi keɓe, mɔɔ vɔ kaa tɔ. Vuu kɔ mɔɔ shĩ̀lí ɓɛɛ, naa raa ɓu kaa ɓɔɔ wiya?’ ”

21A Yeesɔ hangsɛ yee ɓiɓɛ kaa tɔɔ, “Zang ɓɔɔ ri kpàlɛ̀ yuu ɓarɛ vuu naa, a ka tĩng Laa, vuu naa ɓarɛ kagn kpang, ri naa nwang ɓarɛ doo naa yɔɔ kɔ doori.”

Nɔɔ shing danggn ka bii Laa

(Mat 6:25-34)

22A Yeesɔ kɔɔ zang ɓɔɔ ri mantɛ vuu ka bii ɓiɓɛ tɔɔ, “Ka ruu nɔngkɔ, n kɔɔ nɔɔ, nɔ́ɔ nyɔ yuu manɛ nɛɛ rɛ̃rɛnang, ka ruu vuu ɓɔɔ nɔɔ naa shaayi, nɛɛ ruu fɔ̃ɔrɔ ɓɔɔ nɔɔ hãa ka bii ɓɛɛ kpang. 23Ka ruu ɓɔɔ, suru bii shɔnzang ɓa vuu shaanang katɔ ɓɛɛ. Bii shɔnzang ti ɓa fɔ̃ɔrɔ katɔ ɓɛɛ. 24Nɔɔ zi rɛɛ gãgãa karɛ. Ri lang jaa kpang, ri ti yee zee jong kpang. Gòoto vuu tɛ̃ɛnang ɓarɛ ɓi kagn nɛɛ bɔ̃nɔ kpang. Laa a ri vuu shaanang katɔ. Nɔɔ ɓaa jaaning katɔ. 25Zang ɓɔɔ kagn teteng manɛ ɓɔɔ zunung ɓɔɔ wu gisi yuu ɓiɓɛ diki katɔ ka ruu rɛ̃rɛnang ɓɔɔ wu rɛ̃rɛ ɓɛɛ ya? 26A nɔɔ nɛɛ zunung vuu ɓɔɔ tɔkɔlɔng naa weɓe palɛnang kpang, nɔɔ rɛ̃rɛ ka ruu rɛɛ vuu ɓɔɔ ɓɛɛ, ka ruu viya? 27Nɔɔ zi mangwaa ɓɔɔ ri bangkɛ ɓɛɛ karɛ. Ri palɛ wu shonang kpang, ri ti see fɔ̃ɔrɔ kpang. Naa doo kpanti Sulemanu nɛɛ vuu naa ɓiɓɛ piti, fɔ̃ɔrɔ ɓiɓɛ ɓɔɔ shirɛ, daa doo mangwaa keɓe kpang. 28Laa nɛɛ gbarɛ wisi kɔ zang zi lɛɛkɔ, ɓuru zang dɔɔ kaa nɛɛ waa ɓee, a nɔɔ fɔ̃ɔrɔ ɓɔɔ nɔɔ hãa ka bii ɓɛɛ kpang ya? Nɔɔ shing danggn ka bii Laa kpang ka ruu viya?

29“Nɔ́ɔ nyɔ yuu manɛ nɛɛ nɔɔ rɛ̃rɛ ka ruu vuu ɓɔɔ nɔɔ shaayi, nɛɛ vuu ɓɔɔ nɔɔ ɓoo ɓɛɛ kpang. 30Zang ɓɔɔ ri dũ̀ng Laa kpang ka koo keɓe, ri shing jĩng ka vuu keɓe kɔ. Daa manɛ zi ɓi tɔ nɛɛ nɔɔ kasɛ veɓe katɔ. 31Nɔɔ shíng danggn ka kpanti ɓɔɔ Laa roo ɓɛɛ kɔ jong. A nɔɔ vuu keɓe ditɔ kagn nandon.

Nɔɔ kpalɛ vuu manɛ ka lapa

(Mat 6:19-21)

32“Wee nɔɔ rukutu ɓee, nɔ́ɔ kaa vɔrɔ kpang, Daa manɛ kasɛ tɔ nɛɛ nɔɔ roo kpanti nɛɛ wu ka nɔng ɓɔɔ wu naa roo kpanti ɓɛɛ. 33Nɔɔ mãlɛ́ vuu naa manɛ ta, nɔɔ a zang ɓɔɔ vuu ka naa kpang ɓɛɛ saka. Nɔɔ kpalɛ yuu manɛ vuu ɓɔɔ lasɛ kpang, ka nɔng Laa. Ka nɔng ɓɔɔ shaarɛ kpang, shɔngɓɔ daa ɓɔɔ kpang, tuuru ri ti daa lasɛ kpang ɓɛɛ. 34Ka ruu ɓɔɔ, shɔnzang shing gn ɓi doo ka nɔng ɓɔɔ wu kpalɛ vuu ɓiɓɛ kagn kɔ doori ɓɛɛ.

Zang ɓɔɔ ri dũng Yeesɔ, ri kpalɛ bii ka ruu diki ɓɔɔ wu gbãayu ɓɛɛ

35“Nɔɔ kpalɛ bii tɔ̃ɔ tɔ̃ɔ, nɔɔ ti mang waa zàáng sɔɔ manɛ katɔ. 36Naa zang shonang ɓɔɔ ri gã dabang ɓarɛ ɓɔɔ daa ka nɔng kn sinyɛ shaanang ɓɛɛ. Naa dabang gbãayu, naa waa nyaa gãa naa gbete, ri puu wu tantɛnang ɓɛɛ. Nɔɔ kpalɛ bii nɔngkɔ, ka ruu diki ɓɔɔ Kpanti Yeesɔ manɛ gbãayu ɓɛɛ. 37Tĩnang tãanang ɓi ɓɔɔ zang shonang ɓɔɔ dabang ɓarɛ arɛ naa ĩi ri ningkãari ɓɛɛ. N kɔ̀ɔ́ nɔɔ ruu ɓɔɔ niizang kɔ nwani, wukɔ naa tu fɔ̃ɔrɔ ɓiɓɛ jong, wu shing ri, ri nwang ka nɔng vuu shaanang, wu a ri vuu shaanang ri shaayi. 38Zang shonang keɓe naa tãa tĩnang dɔɔli, naa dabang ɓarɛ a doo nɛɛ teteng gãmbang, kɔ nɛɛ yuu gãndi, naa ĩi ri ningkãari ɓɛɛ. 39Zi karɛ, naa zang gãa nɛ̀ɛ́ zi laa ɓɔɔ shɔngɓɔ a ɓɛɛ katɔ, nɛ̀ɛ́ yaa gãa ɓiɓɛ shɔngɓɔ wu shɛ̃ɛ kpang. 40Nɔɔ kpalɛ bii nɔngkɔ doori, ka ruu ɓɔɔ, Jaa Shɔnzang a ka laa ɓɔɔ nɔɔ shing gn nɛɛ wu a kpang ɓɛɛ.”

Zang shonang tɔ̃ɔ nɛɛ ɓɔɔ shi kpang

(Mat 24:45-51)

41Bituru hɛ̃ɛ wu tɔɔ, “Dabang, mɔɔ rang rukɔ nyaa vuu jeenang keɓe ya, kɔ mɔɔ rang zang piti?” 42A kpanti kasɛ wu nyaa tɔɔ, “Ɓu wi zang shonang tɔ̃ɔ, a ti zũng katɔ wiya? Ɓɔɔ zang gãa ɓiɓɛ yaa wu gãa ka naa, nɛɛ wu alɛ zang vuu shaanang ka laa vuu shaanang ɓarɛ wiya? 43Tĩnang tãanang ɓi ɓɔɔ zang shonang kaɓa kɔ. Zang gãa ɓiɓɛ nɛɛ arɛ, nɛɛ naa ĩi wu palɛ shonang bìí kana ɓɛɛ. 44N kɔ̀ɔ́ nɔɔ, ruu ɓɔɔ niizang kɔ nwani, zang gãa ɓiɓɛ naa yàá wu vuu naa ɓiɓɛ nandon, wu gãng jĩng kagn. 45A naa zang shonang kaɓa kɔɔ ka yeti ɓiɓɛ tɔɔ, ‘Diki dabang gãa mɛɛ bee tɔ, a gn kpang,’ a gaa tɔɔsung zang shonang ɓɔɔ varɛ nɛɛ ɓɔɔ soro nyɔkɔnang. Wu ti shaa vuu shaanang, wu ti ɓoo sàa, sàa si wu. 46Dabang gãa zang shonang kaɓa, naa a ka diki ɓɔɔ zang shonang kaɓa shing gn anang ɓiɓɛ kpang ɓɛɛ. Dabang gãa ɓiɓɛ naa dang wu jĩng gbãng gbãng, wu daa shing wu nɛɛ zang ɓɔɔ ri shing danggn ka bii Laa kpang ɓɛɛ.

47“Zang ɓɔɔ nɛɛ zi vuu ɓɔɔ dabang gãa ɓiɓɛ kasɛ nɛɛ wu palɛ a palɛ kpang, zang naa nyɔ wu ditɔ zɛ̃ɛzɛ̃ɛ. 48Zang shonang ɓɔɔ zi vuu ɓɔɔ dabang gãa ɓiɓɛ kasɛ nɛɛ wu palɛ kpang, naa palɛ vuu ɓɔɔ daa naa ɓɔɔ zang nyɔ zang katɔ, zang naa nyɔ wu ɓi tɔkɔlɔng. Zang ɓɔɔ zang a wu vuu dɔɔli, zang naa ta ɓi doo dɔɔli kɔ, ka naa ɓiɓɛ. Zang ɓɔɔ zang ti yaa wu vuu dɔɔli, zang shing gn nɛɛ naa a zang ɓi doo dɔɔli kɔ.

Yeesɔ à ɓi zang basɛnang

(Mat 10:34-36)

49“N à m waa dɔɔnang kɔ jong, ka koo keɓe. N kasɛ tɔ, waa bii nɛɛ shaa kana. 50Jĩng dannang naa ɓa m yuu naa ɓɔɔ zang hãa zang ka mii batizima ɓɛɛ. 51Nɔɔ kɔɔ ɓu nɛɛ naa n atɛ nwannang nyaa zɔɔ ka koo keɓe ya? Kpang, n kɔ̀ɔ́ nɔɔ, n a m zang basɛnang kɔ jong. 52Vuu ɓɔɔ gaayu nɛɛ lɛɛkɔ, ka yeti gãa gbete zang nɛɛ kagn maani, ri basɛ zɔɔ. Zang taati shing jĩng nɛɛ zang ziti kpang, a zang ziti ti shing jĩng nɛɛ zang taati kpang. 53Daa ri naa shing jĩng nɛɛ wujɛ ɓarɛ ɓɔɔ varɛ kpang. A wujɛ varɛ ti shing jĩng nɛɛ daa ɓarɛ kpang. Nàá wujɛ ri naa shing jĩng nɛɛ wujɛ ɓarɛ ɓɔɔ soro kpang. A wujɛ soro ri ti naa shing jĩng nɛɛ nàá ɓarɛ kpang. Shɔnkpang ɓɔɔ soro, naa shing jĩng nɛɛ ɓeekpang ɓɔɔ soro kpang.”

Yeesɔ shaarɛ zang nyaa

(Mat 16:2-3)

54A Yeesɔ kɔɔ zang ɓɔɔ ri kpalɛ zɔɔ gaagaa tɔɔ, “Nɔɔ nɛɛ zi sãmbong ɓɔɔ seepaa nɛɛ nɔng ɓɔɔ laa hãa nyaa kagn tɔ, nɔɔ tàntɛ́ kɔɔnang nɛɛ, ‘Mii naa a katɔ’ Mii ti naa a katɔ nɔngkɔ. 55Nɔɔ nɛɛ ti zi pũngku nɛɛ waa nyaa tɔ, nɔ̀ɔ kɔɔyi nɛɛ ‘Nɔng nwãanang a kaa tɔ.’ Nɔng nwãanang ti a niizang. 56Ɓɔɔ nɔɔ zang ɓɔɔ nwãarɛ zang nɛɛ vuu palɛnang ɓɛɛ, nɔɔ nɛɛ pɛ̃ɛrɛ koo tɔ, nɛɛ lapa, nɔɔ zi vuu ɓɔɔ naa nwang katɔ. A nɔɔ zi vuu ɓɔɔ Laa palɛ ka diki keɓe kpang ka ruu viya?

Nɔɔ mã zɔɔ naa nɛɛ zang ɓɔɔ ɓaa nɔɔ nyaavaa ɓɛɛ

(Mat 5:25-26)

57“Nɔɔ ti zi naa ɓɔɔ nɔɔ shɛ̃̀ɛrɛ́ yuu manɛ vuu tɔ̃ɔ ɓɔɔ nɔɔ palɛ kpang, ka ruu viya? 58Zang nɛɛ ɓàa mɔɔ nyaavaa, zang nɛɛ daa nɛɛ mɔɔ ka nɔng ruu jɛ̃ɛnang. Kãa gbalang naa ɓɔɔ nɔɔ mã zɔɔ naa nɛɛ zang ɓɔɔ ɓàa mɔɔ nyaavaa ɓɛɛ ka gbalang. Ka ruu ɓɔɔ nɛ̀ɛ́ daa nɛɛ mɔɔ ka nɔng zang ɓɔɔ jɛ̃ɛ ruu ɓɛɛ. Zang ɓɔɔ jɛ̃ɛ ruu daa tuu mɔɔ a zang shonang ɓiɓɛ, tɔ̀ɔ, ri daa loo mɔɔ ka sãa ɓɛɛ. 59N kɔ̀ɔ́ mɔɔ, mɔɔ hangsɛ nyaa vuu ɓɔɔ zang yee mɔɔ shunang ka gbongkarɛ nandon, tɔ̀ɔ, zang naa yaa mɔɔ naa kati.”

Currently Selected:

Luka 12: mzmNT

Highlight

Copy