Yɔhana 13

Yeesɔ sɔ̀ɔrɔ̀ doo zang ɓɔɔ ri mantɛ vuu kaa bii ɓiɓɛ ɓɛɛ

1Bɛɛ diki nyaalaa pasika ɓɔɔ zang kpaa danggn diki ɓɔɔ Laa tɛɛ ɓɛɛ, yaa kaa tɔkɔlɔng. Yeesɔ zi tɔ nɛɛ diki a tɔ, ɓɔɔ wu yaa koo keɓe, wu daa ka bii Daa ɓiɓɛ ɓɛɛ. Yeesɔ kasɛ zang ɓiɓɛ ɓɔɔ ka koo keɓe, ka ruu nɔngkɔ, kasɛ nɛɛ wu tusu ri naa ɓɔɔ wu kasɛ ri dɔɔli ɓɛɛ.

2Yeesɔ nɛɛ zang ɓɔɔ ri mantɛ vuu ka bii ɓiɓɛ, ri shaa vuu shaanang laarang kana. A sheetang shìng Yahuda Isikariyoti jaa Siman, rɛ̃rɛnang tɔ, ka yeti ɓiɓɛ nɛɛ wu nyɔ yuu Yeesɔ. 3Yeesɔ ti zi tɔ, nɛɛ Daa ɓiɓɛ a wu naa vuu palɛnang tɔ nandon. Ti zi tɔ nɛɛ wu à nɛɛ bii Laa, nɛɛ wu ti gbãayu ka bii Laa ka nɔng. 4A Yeesɔ seepaa nɛɛ nɔng vuu shaanang. Tu fɔ̃ɔrɔ ɓiɓɛ ɓɔɔ biling, a mã fɔ̃ɔrɔ ɓiɓɛ ɓɔɔ nɛɛ wili bii tɔ, alɛ nɛɛ manɛ ɓɛɛ ka sang. 5A tɛ̃ɛ mii ka waka, a gaa tɔɔsung ɓɔɔ wu sɔɔ zang ɓɔɔ ri mantɛ vuu kaa bii ɓiɓɛ doo. Wu ti alɛ nɛɛ fɔ̃ɔrɔ bii alɛnang ɓɔɔ wu mã ka sang ɓɛɛ. 6A tɔ ka yuu Siman Bituru, a Bituru hɛ̃ɛ tɔɔ, “Mɔɔ nɛɛ mɔɔ sɔɔ m doo ya Kpanti?”

7Yeesɔ kasɛ wu nyaa tɔɔ, “Mɔɔ zi dĩiri vuu ɓɔɔ n pàlɛ́ mɔɔ kãntang keɓe kpang, mɔɔ naa zi ditɔ nɛɛ knti.”

8Bituru kɔɔ wu tɔɔ, “Mɔɔ sɔ̀ɔ doo mɛɛ kpang dòndòng.” Yeesɔ kɔɔ wu tɔɔ, “Naa n sɔ̀ɔ mɔɔ doo kpang, ruu mɛɛ hãa kagn nɛɛ mɔɔ kpang.”

9A Siman Bituru kɔɔ wu kati tɔɔ, “Mɔ́ɔ sɔ̀ɔ wu doo mɛɛ kɔ shɛ̃ɛning kpang, sɔɔ naa mɛɛ jong nɛɛ yuu mɛɛ.”

10Yeesɔ kɔɔ wu tɔɔ, “Zang ɓɔɔ nɛɛ wili bii tɔ, bii rĩiti tɔ̀ɔ́ bii ɓiɓɛ kpang, sɔɔ bii ɓiɓɛ ɓi tɔ̀ɔ́ tɔkn kpang. Sɔɔ ɓi kaa doo kɔ shɛ̃ɛning. Wee nɔɔ ɓee, bii manɛ tu tɔ nandon, yaa kaa zang gbete.” 11(Yeesɔ zi zang ɓɔɔ naa nyɔ yuu ɓiɓɛ ɓi tɔ, ka ruu nɔngkɔ, kɔɔyi tɔɔ, “Bii manɛ tu tɔ nandon, yaa ɓɔ̀ɔ́ zang gbete.”)

12Yeesɔ hangsɛ ri doo sɔɔnang tɔ, a hãa fɔ̃ɔrɔ ɓiɓɛ kaa nɔng, a gbãayu daa nwáng ka nɔng ɓiɓɛ ka nɔng vuu shaanang. A hɛ̃ɛ ri tɔɔ, “Nɔɔ zi vuu ɓɔɔ n pàlɛ́ nɔɔ kãntang keɓe ɓu tɔ ya? 13Nɔɔ ɓáa m nɛɛ maalang, a nɔɔ ɓaa m nɛɛ kpanti. Nɔɔ ɓaa waasɛ̃, ka ruu ɓɔɔ, n maalang, a n ti Kpanti niizang ɓɛɛ. 14Wee n maalang, n ti Kpanti manɛ, n sɔɔ nɔɔ doo tɔ ɓee, nɔ́ɔ sɔɔ zɔɔ doo jong dòo nɔngkɔ. 15N tusu nɔɔ naa tɔ, nɔɔ palɛ vuu kɔ n pàlɛ̀ nɔɔ ɓee doo nɔngkɔ. 16N kɔ̀ɔ́ nɔɔ ruu ɓɔɔ niizang kɔ nwani, zang ɓɔɔ pàlɛ́ zang shonang, ɓa dabang gãa ɓiɓɛ ɓi kpang. Zang nyaa shonang ti ɓa zang ɓɔɔ shong wu ɓi kpang. 17Wee nɔɔ zi vuu keɓe tɔ ɓee, naa nɔɔ palɛ, nɔkɔ naa tãa tĩnang.

18“N kɔɔ ruu keɓe ka yuu manɛ nandon kpang. N zi zang ɓɔɔ n shɛ̃ɛrɛ ri m tɔ. Vuu keɓe nwáng nɔngkɔ, naa ɓɔɔ zang bee ka yeti Labeenang Laa ɓɛɛ. Labeenang Laa kɔɔyi tɔɔ, ‘Zang ɓɔɔ n basɛ borodi mɛɛ nɛɛ wu, ràa m yuu knti tɔ. Nwáng zang ɓɔɔ shing jĩng nɛɛ n kpang tɔ.’ 19N kɔɔ nɔɔ vuu keɓe kãntang, bɛ̀ɛ́ vuu bìí palɛ gn kpang. Nɛɛ palɛ tɔ, nɔɔ zi kaa gn nɛɛ nkɔ zang ɓɔɔ n kɔɔ nɔɔ nɛɛ n wukɔ ɓɛɛ. 20N kɔ̀ɔ́ nɔɔ ruu ɓɔɔ niizang kɔ nwani, zang ɓɔɔ nɛɛ ta zang ɓɔɔ n shong ɓɛɛ, ta m tɔ jong. Zang ɓɔɔ nɛɛ ti ta m, ta ɓi zang ɓɔɔ shong m ɓɛɛ.”

Yeesɔ kɔɔ naa ɓɔɔ zang naa nyɔ yuu ɓiɓɛ ɓɛɛ

(Mat 26:20-25; Mar 14:17-21; Luk 22:21-23)

21Yeesɔ kɔɔ vuu keɓe tɔ, a vuu bìí kpãa wu ka yeti, a kɔɔ kaa faarik tɔɔ, “N kɔɔ nɔɔ ruu ɓɔɔ niizang kɔ nwani, zang gbete ka teteng manɛ nyɔ yuu mɛɛ ditɔ.”

22Zang ɓɔɔ ri mantɛ vuu ka bii ɓiɓɛ ri pɛ̃ɛrɛ zɔɔ, ri zi zang ɓɔɔ Yeesɔ kɔɔ ruu bìí ka yuu ɓiɓɛ kpang. 23Zang gbete ka teteng ɓarɛ ɓɔɔ Yeesɔ kasɛ wu dɔɔli ɓɛɛ, nwáng nɛɛ wu naabm. 24A Siman Bituru rang wu yee, kɔɔ wu tɔɔ, “Hɛ̃ɛ Yeesɔ nɛɛ, wu kɔɔ ruu ka yuu wiya?”

25A yɔɔ kaɓa wɔ ka bii Yeesɔ naabm, a hɛ̃ɛ wu nɛɛ, “Ɓu wiya Kpanti?”

26Yeesɔ kasɛ wu nyaa tɔɔ, “Zang ɓɔɔ n hãa borodi keɓe ka yɔkɔ, n a wu, zang bìí kɔ naa mãlɛ́ yuu mɛɛ.” A sha borodi tɔkɔlɔng hãa ka yɔkɔ a, a Yahuda, jaa Siman Isikariyoti. 27Ɓɔɔ Yahuda ta borodi hn, sheetang ta rɛ̃rɛnang ɓiɓɛ. Yeesɔ kɔɔ wu tɔɔ, “Vuu ɓɔɔ mɔɔ mangnɛ, nɛɛ mɔɔ palɛ ɓɛɛ, palɛ ta pati.” 28Zang ɓɔɔ kagn nɔng vuu shaanang ɓɔɔ zi vuu ɓɔɔ pálɛ̀, a Yeesɔ kɔɔ wu nɔngkɔ ɓɛɛ kpang. 29Zang ɓɔɔ ri kɔɔ ɓarɛ nɛɛ naa ɓɔɔ duku saka ɓarɛ ka naa Yahuda kɔ, Yeesɔ kɔɔ wu nɛɛ wu hoo vuu ɓɔɔ ri shaa ɓɛɛ. Zang ɓɔɔ ri kɔɔ ɓarɛ nɛɛ Yeesɔ shong wu nɛɛ wu daa a zang ɓɔɔ vuu ka naa kpang saka.

30Yahuda ta borodi, a tantɛ nwannang daa biling. Bɛɛ kaa nɔng zĩi.

Nyaa dannang ɓɔɔ shɔɔ

31Yahuda nwáng tɔ ka biling, a Yeesɔ kɔɔ zang ɓɔɔ ri mantɛ vuu ka bìí ɓiɓɛ, ɓɔɔ nimbang tɔɔ, “Kãntang keɓe, shɔnzang ri zi bannang mɛɛ ɓɔɔ n Jaa Shɔnzang kaa tɔ. Bannang Laa ti tusu bii kana jong, ka ruu vuu ɓɔɔ n palɛ ɓɛɛ. 32Zang nɛɛ zi bannang Laa kana ka bii mɛɛ, Laa ti tusu zang bannang mɛɛ ɓɔɔ n Jaa Shɔnzang ditɔ jong. Laa suukãng kpang, a m bannang tantɛnang. 33Wujɛ mɛɛ, n nwang tɔ̀ɔ́ nɛɛ nɔɔ diki wu bee tɔkɔlɔng kpang. Nɔɔ naa kãa m ditɔ. N kɔ̀ɔ nɔɔ doo vuu ɓɔɔ n kɔ̀ɔ zang bang bang zang Yahudi ɓɛɛ kɔ, ‘Nɔng ɓɔɔ n daa ɓɛɛ, nɔɔ zunung daanang kpang.’ 34Kãntang keɓe, n dang nɔɔ kaa nyaa ɓɔɔ shɔɔ. Nɔɔ kasɛ ruu zɔɔ katɔ. Naa ɓɔɔ n kasɛ nɔɔ, nɔɔ kasɛ ruu zɔɔ doo nɔngkɔ. 35Naa nɔɔ kàsɛ́ ruu zɔɔ, zang zi ka wukɔ nɛɛ nɔɔ manɛ zang ɓɔɔ ri mantɛ vuu ka bìí mɛɛ ɓɛɛ.”

Yeesɔ kɔɔ naa ɓɔɔ Bituru naa laa nyaa ɓiɓɛ ɓɛɛ

(Mat 26:31-35; Mar 14:27-31; Luk 22:31-34)

36Siman Bituru hɛ̃ɛ Yeesɔ tɔɔ, “Mɔɔ daa ka niya, Kpanti?” Yeesɔ kasɛ wu nyaa tɔɔ, “Nɔng ɓɔɔ n daa ɓɛɛ, mɔɔ dũng m kãntang keɓe kpang. Mɔɔ naa dũng m kaa nɛɛ knti.”

37Bituru hɛ̃ɛ wu tɔɔ, “Kpanti, n dũ̀ng mɔɔ kãntang kpang ka ruu viya? N kasɛ tɔ, n vɔ ka ruu ɓaaɓɛ katɔ.”

38Yeesɔ hɛ̃ɛ wu tɔɔ, “Mɔɔ vɔ katɔ ka ruu mɛɛ niizang ya? N kɔ̀ɔ́ mɔɔ ruu ɓɔɔ niizang kɔ nwani, ɓɔɔ kn naa ɓaa nyaa bɛ̀ɛ́ mɔɔ laa nyaa tɔ, daa doo taati, nɛɛ mɔɔ zi m nung ɓaa kpang.”

Currently Selected:

Yɔhana 13: mzmNT

Highlight

Copy