Yɔhana 12

Zang tũuru Yeesɔ nung ka Bɛtani

(Mat 26:6-13; Mar 14:3-9)

1Diki nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ, yaa kaa mangbete, a Yeesɔ daa ka Bɛtani. Daa ka gãa Liyazaru, yɔɔ ɓɔɔ wu wisi paa nɛɛ saa ɓɛɛ. 2Zang nwãa wu vuu shaanang laarang. Mata kɔ basɛ ri vuu shaanang. Liyazaru ti ka teteng zang ɓɔɔ ri shaa vuu shaanang nɛɛ Yeesɔ ɓɛɛ. 3A Marayamu tuu nung ɓɔɔ shaa nyaa dɔɔli, ɓɔɔ ti a sɛ̃ɛ tɔ̃ɔ, ɓɔɔ zang palɛ nɛɛ dĩiri laa ɓɔɔ zang ɓaa nɛɛ naadi kɔ shɛ̃ɛning ɓɛɛ. Túu nung, a tungku ka doo Yeesɔ, ti alɛ doo bìí nɛɛ suuyuu ɓiɓɛ. Sɛ̃ɛ nung ta yeti gãa kaa gbayi gbayi.

4Zang gbete ka teteng zang ɓɔɔ ri mantɛ vuu ka bii Yeesɔ, ɓɔɔ zang ɓaa wu nɛɛ Yahuda Isikariyoti, ɓɔɔ wukɔ naa nyɔ yuu Yeesɔ, lasɛ yeti ka ruu vuu ɓɔɔ Marayamu palɛ ɓɛɛ, a kɔɔyi tɔɔ, 5“Zang nɛɛ mãlɛ́ nung keɓe zang basɛ rɛɛ zang ɓɔɔ vuu kaa naa ɓarɛ kpang saka bìí kpang ka ruu viya? Nung keɓe naa zang hoo dinari laa maani dakn taati katɔ.” 6Kɔɔ ruu keɓe, wu ka ruu ɓɔɔ gn zang ɓɔɔ vuu ka naa kpang, kɔng wu katɔ kpang. Ɓi ka ruu ɓɔɔ, wu shɔngɓɔ ɓɛɛ. Wukɔ yiti duku ɓɔɔ ri tɛ̃ɛ saka ɓarɛ kagn, lee ɓɔɔ ti ɓɔɔrɔ saka kagn katɔ ɓɛɛ.

7Yeesɔ kɔɔyi tɔɔ, “Yaa jaa soro ka nɔngkɔ. Shing nung keɓe ka ruu diki ɓɔɔ zang naa gbãa m ɓɛɛ. 8Zang ɓɔɔ vuu ka naa ɓarɛ kpang, ri ɓarɛ kagn teteng manɛ diki diki. N naa nwáng m tɔ̀ɔ́ nɛɛ nɔɔ kpang.”

Zang kãa gbalang nɛɛ zang nyɔ Liyazaru vɔrɔ

9Zang Yahudi dɔɔli ri tãa nyaa nɛɛ Yeesɔ ka Bɛtani a ri daayi. Ri dàa ka ruu Yeesɔ kɔ shɛ̃ɛning kpang, nɛɛ ri daa zi ɓɔɔ kaa Liyazaru ɓɔɔ Yeesɔ wisi wu paa nɛɛ sàa ɓɛɛ. 10Rɛɛ zang bang bang zang ɓɔɔ ri dɔɔ vuu ka Gãa Laa, ri mangnɛ, nɛɛ ri nyɔ Liyazaru vɔrɔ jong. 11Ka ruu ɓɔɔ, zang Yahudi dɔɔli, ri yaa ri kana, ri shing danggn kaa bii Yeesɔ ka ruu Liyazaru kɔ ɓɛɛ.

Yeesɔ vang seesaa daa ka Urushalima

(Mat 21:1-11; Mar 11:1-11; Luk 19:28-40)

12Nɔng naa gãntɛ tɔ, a zang dɔɔli ɓɔɔ ri a nɔng nyaalaa shaanang, ri tãa nyaa nɛɛ Yeesɔ a kana Urushalima. 13Ri sãkɛ nasãng laa nung manja, a ri daayi nɛɛ ri daa kpisi wu yuu. Ri mɛ̀ɛrɛ́ nyaa kana lapa nɛɛ, “Zang wu dɔ̀ɔ Laa ta. Laa wu a zang ɓɔɔ a nɛɛ nung ɓiɓɛ tĩnang tãanang ta. Laa wu a kpanti zang Isirela tĩnang tãanang.”

14Yeesɔ walɛ jaa seesaa váng kagn, naa ɓɔɔ zang bée ka yeti labeenang Laa tɛ̃ɛ tɛ̃ɛ ɓɛɛ. 15Zang bee tɔɔ, “Nɔ́ɔ kaa vɔrɔ kpang, zang gari Siyona, kpanti manɛ a kana, váng ka dakn seesaa.” 16Bɛɛ rɛɛ zang ɓɔɔ ri mantɛ vuu ka bii ɓiɓɛ, ri zi vuu ɓɔɔ zang bee keɓe gn kpang. Ri naa zi kaa nɛɛ knti ka ɓɔɔ bɛ̀ɛ́ zang wisi Yeesɔ paa tɔ, Laa ti a wu bannang tɔ ɓɛɛ. Ri naa kpaa danggn kati nɛɛ zang bee vuu keɓe katɔ ka yuu ɓiɓɛ, a zang ti pàlɛ̀ wu vuu bìí tɔ.

17Zang ɓɔɔ bɛ̀ɛ́ ri nɛɛ Yeesɔ, ka diki ɓɔɔ Yeesɔ ɓaa Liyazaru nyaa nɛɛ saa, a wisi wu paa nɛɛ vɔrɔ ɓɔɔ wu vɔ ɓɛɛ, ri daa kɔ̀ɔrɔ̀ zang vuu bìí. 18Zang dɔɔli ri daa kpisi wu yuu, ka ruu ɓɔɔ, ri tãayi nɛɛ Yeesɔ kɔ pálɛ́ vuu ɓɔɔ zang zirɛ, zang mã naa ka danggn keɓe ɓɛɛ. 19A zang Farisi ri kɔ̀ɔrɔ̀ zɔɔ nɛɛ, “Rùu pálɛ̀ vuu ɓɔɔgn kpang tingkiring. Nɔɔ zirɛ, zang koo nandon ri daa tɔ ka bii ɓiɓɛ.”

Zang Heleni ri kãa nɔng Yeesɔ

20Zang Heleni kagn teteng zang ɓɔɔ ri daa Laa bannang ka Urushalima, ka ɓɔɔ zang daa nyaalaa shaanang ɓɛɛ. 21Ri daa ka bii Filibu, Filibu ɓi yɔɔ gari Bɛsɛda ɓɔɔ ka tipi Galili ɓɛɛ. A ri kɔɔ wu nɛɛ, “Maalang, ruu kasɛ Yeesɔ zinang.”

22Filibu daa kɔɔ Anduru, a ri daa kaa nyaa zɔɔ, ri daa kɔɔ Yeesɔ. 23Yeesɔ kasɛ ri nyaa tɔɔ, “Diki ɓɔɔ zang a Jaa Shɔnzang bannang kagn a tɔ. 24N kɔ̀ɔ́ nɔɔ ruu ɓɔɔ niizang kɔ nwani, naa zang ɓaa jĩng zee ka tipi kpang, nwang ɓi ka nɔngkɔ, jĩng zee gbete. Zang nɛɛ ɓaa tɔ, wu tarɛ, wu shing jĩng kaa gaagaa. 25Zang ɓɔɔ nɛɛ kasɛ suru bìí ɓiɓɛ dɔɔli, shàarɛ́ ɓi katɔ kɔ̀ jong. Zang ɓɔɔ nɛɛ kasɛ ruu suru bii ɓiɓɛ ka koo keɓe kpang, shing ɓi katɔ ka ruu suru bii ɓɔɔ waa nyaa kpang ɓɛɛ. 26Zang ɓɔɔ nɛɛ shòng m shonang, wu dũng, m ka knti. Nɔng ɓɔɔ n kagn zang shonang mɛɛ nwáng doo ka nɔngkɔ. Daa mɛɛ ti naa a zang ɓɔɔ palɛ m shonang bannang katɔ.”

Yeesɔ kɔɔ zang naa ɓɔɔ wu naa vɔ ɓɛɛ

27A Yeesɔ kɔɔyi tɔɔ, “Jĩng dannang keɓe kpãa m tɔ yeti dɔɔli. N kɔɔ ɓu kaa nɛɛ viya? N kɔ̀ɔ nɛɛ, ‘Daa mɛɛ mɔ́ɔ yaa diki keɓe wu a ka yuu mɛɛ kpang ya?’ Kpang, n a ka ruu jĩng dannang ɓɔɔ diki keɓe kɔ. 28Daa mɛɛ palɛ vuu ɓɔɔ zang a mɔɔ bannang ɓɛɛ ta.” A zang tãa yee kaa nɛɛ lapa kɔɔyi nɛɛ, “N tusu zang bannang mɛɛ tɔ, n ti paasɛ ditɔ tɔkn.”

29Zang dɔɔli ɓɔɔ ri kpalɛ zɔɔ ka nɔng, ri tãa yee bìí. Zang ɓɔɔ ri kɔɔyi nɛɛ ɓi shala mɛɛyi. Zang ɓɔɔ ri tɔɔ, “Ɓi zang nyaa shonang Laa ɓɔɔ ka lapa rang yee nɛɛ wu.”

30Yeesɔ kɔɔ ri tɔɔ, “Yèe ɓɔɔ nɔɔ tãa ɓɛɛ, ɓi ka ruu mɛɛ kpang, ɓi ka ruu manɛ kɔ. 31Diki ɓɔɔ zang jɛ̃ɛ zang koo keɓe ruu a tɔ. Wee kaa diki ɓɔɔ zang nwangsɛ sheetang, kpanti koo keɓe ɓɛɛ kɔ. 32Zang nɛɛ naa ɓaa m naa tɔ ka laa, a zang wisi m paa, tɔ̀ɔ, n naa gɔ̃ɔ zang piti, ri a ka bii mɛɛ.”

33Ɓɔɔ kɔɔ naa weɓe, gãsɛ ɓi zɔ̃ng vɔrɔ ɓɔɔ wu naa vɔ ɓɛɛ.

34Zang ɓɔɔ ri kpalɛ zɔɔ ɓɛɛ, ri kasɛ wu nyaa tɔɔ, “Zang bee ka yeti Labeenang nyaa dannang Laa ɓuru tɔɔ, Kirisi naa nwáng ɓi dòndòng. A mɔɔ kɔɔ ɓaa ka biya nɛɛ zang naa tuu Jaa Shɔnzang viya? Ɓi kaa wi Jaa Shɔnzang keɓe wiya?”

35Yeesɔ kasɛ ri nyaa tɔɔ, “Nɔng yakɛnang nwàng doo ka teteng manɛ diki bée katɔ tɔkɔlɔng. Nɔɔ rakɛ ta, bɛ̀ɛ́ nɔng yakɛ doo katɔ, nɔng nɛ̀ɛ́ tɔ̀ɔ́yi. Ka ruu ɓɔɔ, nɔng nɛɛ tɔ̀ɔ́ tɔ, zang ɓɔɔ ràkɛ́, zi nɔng ɓɔɔ wu daa ɓɛɛ takpang ɓɛɛ. 36Wee nɔng yakɛnang doo nɛɛ nɔɔ ɓee, nɔɔ shing danggn ka wu, tɔɔ nɔɔ yakɛ zang nɔng kati.” Yeesɔ kɔɔ vuu keɓe tɔ, a daayi. Waasɛ yuu ɓiɓɛ, zang ri zi wu kaa takpang.

Zang Yahudi ri shing danggn gń ka bii Yeesɔ kpang

37Yeesɔ palɛ vuu ɓɔɔ zang zirɛ, zang mã naa ka danggn keɓe nandon, ri zi jĩng ka bii, a ri shing danggn ka bii ɓiɓɛ kpang doo nɛɛ mani. 38Vuu keɓe palɛ ɓi naa ɓɔɔ Ishaya zang nyaa shonang Laa kɔɔ ka tĩng tɛ̃ɛ tɛ̃ɛ ɓɛɛ. Ishaya kɔɔyi tɔɔ,

“Kpanti, ɓu wi shing danggn ka

ruu ɓɔɔ rùu kɔɔ ɓɛɛ wiya?

Ɓu wi ti zi naa vuu palɛnang ɓaaɓɛ wiya?”

39Ishaya kɔɔ tɔkn tɔɔ, ri shing danggn kpang ka ruu ɓɔɔ,

40“Laa zuu ri jĩng katɔ,

a ti zãa yeti ɓarɛ vuu zinang katɔ.

Nɛɛ tɔɔ, jĩng ɓarɛ wu zi nɔng kaa takpang

Yeti ɓarɛ ti zi vuu kpang. Ka ruu ɓɔɔ, ri nɛɛ

gbãayu ka bii ɓiɓɛ, nɛɛ wu ta yuu ɓarɛ ɓɛɛ.”

41Ishaya kɔɔ vuu keɓe, ka ruu ɓɔɔ, zi bannang Yeesɔ ɓɛɛ, a rang ruu ka yuu ɓiɓɛ.

42A zang bang bang zang Yahudi dɔɔli, ri shing danggn ka bii Yeesɔ. A ri nwangsɛ yuu ɓarɛ kaa takpang, ka ruu ɓɔɔ, ri kaa vɔrɔ zang Farisi ɓɛɛ. Ri kasɛ nɛɛ zang zãa ri gãa zɔɔ kpalɛnang daanang kpang. 43Ri kasɛ ɓɔɔ shɔnzang dɔɔ ri, ɓa ɓɔɔ Laa dɔɔ ri katɔ.

Yeesɔ kɔɔ naa ɓɔɔ zang naa jɛ̃ɛ zang ruu ɓɛɛ

44A Yeesɔ mɛɛ nyaa ka lapa kɔɔyi tɔɔ, “Zang ɓɔɔ nɛɛ shing danggn ka bii mɛɛ, shing danggn wu ka bìí mɛɛ kɔ gbete kpang. Shing danggn ka bii zang ɓɔɔ shong m ɓɛɛ. 45Zang ɓɔɔ nɛɛ zi m tɔ, zi zang ɓɔɔ shong m tɔ. 46N a ka koo keɓe, tɔ̀ɔ n yakɛ zang nɔng, tɔ̀ɔ zang ɓɔɔ nɛɛ shing danggn ka bii mɛɛ wu nwang tɔ̀ɔ́ nɔng ɓɔɔ tɔ̀ɔ katɔ kpang. 47Zang ɓɔɔ nɛɛ tãa ruu mɛɛ, nɛɛ yiti ka yeti ɓiɓɛ kpang, n dɔng wu ruu kpang, ka ruu ɓɔɔ, n arɛ nɛɛ n naa dɔng zang koo ruu kpang ɓɛɛ. N arɛ nɛɛ n ta yuu zang koo katɔ kɔ jong ɓɛɛ. 48Zang ɓɔɔ nɛɛ bɛ̃ɛ m, nɛɛ ti ta ruu mɛɛ kpang, zang ɓɔɔ dɔng wu ruu kagn. Ruu mɛɛ ɓɔɔ n kɔɔ ɓɛɛ, wukɔ naa dɔng wu ruu ka diki ɓɔɔ koo waa nyaa ɓɛɛ. 49Ka ruu ɓɔɔ, n ráng wu yee yuu mɛɛ kpang ɓɛɛ. Daa mɛɛ ɓɔɔ shong m kɔ, kɔɔ m vuu ɓɔɔ n dàa kɔɔ ɓɛɛ, nɛɛ naa ɓɔɔ n dàa kɔ̀ɔ́ ɓɛɛ. 50N zi tɔ vuu ɓɔɔ Daa kɔɔyi, á zang suru bii ɓɔɔ waa nyaa kpang ɓɛɛ. Ka ruu nɔngkɔ, vuu ɓɔɔ n kɔɔ ɓɛɛ, n kɔɔ m doo vuu ɓɔɔ Daa mɛɛ kɔɔ m nɛɛ n kɔɔ ɓɛɛ kɔ.”

Currently Selected:

Yɔhana 12: mzmNT

Highlight

Copy