Zang Shonang Yeesɔ 16

Bulu nɛɛ Siila ri daa nɛɛ Timoti

1Bulu daa ka Daabe, a naa daa ka Lisitira nɔng ɓɔɔ yɔɔ ɓɔɔ dũng Laa ɓɔɔ zang ɓaa wu nɛɛ Timoti kagn ɓɛɛ. Niiɓɛ ɓɔɔ dũng doo Laa kɔ doori, ɓi zang Yahudi a diiɓɛ ɓi kaa zang Heleni. 2Zang ɓɔɔ ri shing danggn tɔ ɓɔɔ ri ka Lisitira nɛɛ Ikoniya ri rang yee tɔ̃ɔ ka yuu Timoti. 3Bulu kasɛ nɛɛ wu daa nɛɛ Timoti, ka ruu nɔngkɔ, yèe wu shaa kati. Yèe wu shaa, ka ruu ɓɔɔ, zang Yahudi ɓɔɔ ri ka tipi kaɓa nandon, ri zi tɔ nɛɛ dáa Timoti zang Heleni ɓɛɛ. 4Ɓɔɔ ri tɛ̀ɛrɛ̀ rɛɛ gari, ri kɔɔrɔ rɛɛ zang ɓɔɔ ri shing danggn tɔ nyaa ɓɔɔ rɛɛ zang shonang Yeesɔ nɛɛ rɛɛ zang bang bang ɓɔɔ ri ka Urushalima ri dang ɓɛɛ. Nɛɛ ri dũng nyaa keɓe waasɛ̃. 5Ka ruu nɔngkɔ, Laa yi zang ɓɔɔ ri dũng wu naa ka bii, a ri shing danggn ka bii ɓiɓɛ gbãng gbãng, a ri ti shang kaa diki diki.

Bulu rɔ̃kɔ ka gari Torowasa

6Suru Laa zãa ri Ruu Laa kɔɔnang ka tipi Asiya ka ruu nɔngkɔ, ri tɛ̀ɛrɛ̀ tipi Fijiya nɛɛ ɓɔɔ Galatiya. 7Ri a tɔ, ka nyaa tipi Misiya, ri tɔɔ ri daa ka tipi Bitiniya, a Suru Laa zãa ri daanang. 8A ri sɔɔ yeti tipi Misiya ri tɛɛyi ri daa ka gari Torowasa. 9Nɛɛ zĩi Bulu rɔ̃kɔ. Zi yɔɔ tipi Makidoniya shiiyi gaa wu nɛɛ, “Tárɛ mɔɔ a ka tipi Makidoniya mɔɔ naa yi ruu naa ka bii.” 10Ɓu doo ɓɔɔ Bulu rɔ̃kɔ naa weɓe, ruu kpalɛ bii daanang Makidoniya. Ruu zi kaa wukɔ nɛɛ Laa ɓaa ruu nyaa nɛɛ ruu daa kɔɔ rɛɛ zang kaɓa Ruu Tɔ̃ɔ ɓiɓɛ.

Lidiya shing danggn ka bii Laa

11A ruu vang Laana nɛɛ Torowasa ruu sha dɔ̃ɔ gbete, ruu daa ka Samutaraki. Nɔng naa gãntɛ, ruu daa Niyapoli.

12Ruu yupaa nɛɛ nihn, ruu daa kaa Filipi ɓɔɔ wukɔ gari bang ka tipi Makidoniya ɓɛɛ. Gari keɓe, ɓi gari zang Rooma. Ruu nwang ka gari keɓe, diki bee ruu katɔ tɔkɔlɔng.

13Ka Diki Ɔ̃sɔnang ruu nwang ka nyaa gari biling, ruu daa ka nyaa rang. Ruu tɔɔ naa ruu wàlɛ́ nɔng Laa gaanang katɔ ka nɔng. Ruu nwang ka nɔngkɔ, ruu ràng rɛɛ zang soro ɓɔɔ ri kpálɛ́, yee Laa. 14Ka teteng zang soro ɓɔɔ ri tã̀á ruu keɓe, jaa soro ɓɔɔ kagn gbete, zang ɓaa wu nɛɛ Lidiya. Jaa soro keɓe, zang gari Tayatira, màlɛ́ fɔ̃ɔrɔ ɓɔɔ nwɛ̃ɛri ɓɛɛ. Ɓi ti zang ɓɔɔ bang Laa ɓɛɛ. Laa puu wu jĩng nɛɛ, wu zi vuu ɓɔɔ Bulu kɔ̀ɔ́ ɓɛɛ, nɛɛ wu ti shing danggn kati. 15Zang palɛ wu batizima tɔ, nɛɛ zang ɓɔɔ ri ka gãa ɓiɓɛ, a gaa ruu nɛɛ, “Nɔɔ nɛɛ zi tɔ nɛɛ n zang ɓɔɔ shing danggn tɔ ka bii Laa, nɔɔ a ta ka gãa mɛɛ nɔɔ nwang ka nɔng.” Yi ruu tĩng ka bii, a ruu kasɛ kati.

Zang loo Bulu nɛɛ Siila ka sãa

16Diki ɓɔɔgn, ruu daa ka nɔng ɓɔɔ zang gaa Laa kagn ɓɛɛ, a jaa zang soro ɓɔɔ ɓi jaafoo, kpisi ruu yuu. Jaafoo keɓe suru shi kpang kagn bii ɓiɓɛ ɓɔɔ shing wu hɛ̃ɛ zang paa ɓɛɛ. Zang ɓiɓɛ, ri walɛ vuu nɛɛ wu dɔɔli, ka ruu paa ɓɔɔ wu hɛ̃ɛ ɓɛɛ. 17Dũng ruu nɛɛ Bulu ka knti mɛɛrɛ nyaa, kɔɔyi nɛɛ, “Zang keɓe, ri zang shonang Laa ɓɔɔ ɓa zang piti katɔ ɓɛɛ. Ri kɔ̀ɔ́ nɔɔ, naa ɓɔɔ nɔɔ ta yuu manɛ ɓɛɛ.” 18Pálɛ̀ naa weɓe diki diki, a yeti Bulu naa lasɛ, a raa jĩng kɔɔ suru shi kpang tɔɔ, “N dang mɔɔ nyaa nɛɛ nung Yeesɔ Kirisi, nwangnɛ mɔɔ yaa wu bii.” A suru shi kpang tantɛ nwannang.

19Ɓɔɔ rɛɛ zang jaafoo ri zirɛ nɛɛ zang lasɛ ri gbalang ɓɔɔ ri walɛ saka nɛɛ mani tɔ, ri yiki rɛɛ Bulu nɛɛ Siila, ri gɔ̃ ri, ri daa nɛɛ ri ka tĩng rɛɛ zang bang. Ka nɔng ɓɔɔ zang jɛ̃̀ɛ́ zang ruu kagn ka lumang ɓɛɛ. 20Zang atɛ ri tɔ, ka bii zang ɓɔɔ ri jɛ̃̀ɛ́ zang ruu ɓɛɛ, a ri kɔɔyi tɔɔ, “Zang keɓe ri ɓarɛ zang Yahudi. Ri kpãa zang gari ɓuru.

21“Ri kɔ̀ɔrɔ́ ruu, nɛɛ ruu dũng gbalang ɓɔɔ daa naa ɓɔɔ, ruu zang Rooma ruu tarɛ, ruu dũngnɛ ɓɛɛ kpang ɓɛɛ.” 22Zang ɓɔɔ ri kpalɛ zɔɔ ri tɛ̃ɛ nyaa jong ka nɔng ɓɔɔ ri kɔɔrɔ ruu ka yuu Bulu nɛɛ Siila ɓɛɛ. A rɛɛ zang ɓɔɔ ri jɛ̃ɛ zang ruu, ri kɔɔ zang nɛɛ zang lɔɔsɔ fɔ̃ɔrɔ ɓɔɔ ka bii Bulu nɛɛ Siila ɓɛɛ. Ri ti kɔɔ zang nɛɛ zang wu nyɔkɔ ri ta nɛɛ gbãa. 23Zang nyɔkɔ ri tɔ zɛ̃ɛzɛ̃ɛ, a zang loo ri ka sãa. Zang kɔɔ zang ɓɔɔ gã sãa nɛɛ wu ku ri gbãng gbãng. 24Ɓɔɔ zang ɓɔɔ gã sãa tãa naa weɓe, daa nɛɛ ri ka yeti sãa ɓɔɔ tĩng. Mã ri doo ka bìí laa waa bang.

25Nɛɛ gãmbang zĩi Bulu nɛɛ Siila ri gàá Laa, ri ti gàá wu soo. Zang ɓɔɔ zang mã ri dòo ka sãa kɔ, ɓɔɔ nimbang, ri ɓaa shoo ri tãa ri. 26A tipi tantɛ ruutunang, a zĩiti gãa daa nɔng ka doo ɓiɓɛ ɓɔɔ zang loo ka tipi ɓɛɛ. Nyaa gãa ri tantɛ pulunang, a soo saka ɓɔɔ zang mãlɛ zang ɓɔɔ zang looro ri ka sãa nɛɛ mani tɛ̃ɛ nandon, yaa ri naa. 27Zang ɓɔɔ gã sãa hingsi jĩng. Ɓu doo ɓɔɔ zi nyaa gãa sãa bm, kɔɔ ɓi naa zang ɓɔɔ ka sãa ri yuku tɔ. Ka ruu nɔngkɔ, zɔ̃ng yere bang ɓiɓɛ nɛɛ wu nyɔ yuu ɓiɓɛ kaa vɔrɔ. 28A Bulu mɛɛ nyaa ka lapa nabm tɔɔ, “Mɔ́ɔ lasɛ yuu ɓaaɓɛ kpang, ruu doo ka nɔng nandon.”

29Zang ɓɔɔ gã sãa ɓaa nyaa nɛɛ zang atɛ waa. A daa ka yeti gãa ɓɔɔ rɛɛ Bulu nɛɛ Siila kagn ɓɛɛ. Tang nɛɛ gutu ka tĩng ɓarɛ, bii zàá wu kpɔkpɔk. 30A sɔɔ ri tĩng nwangsɛ ri ka biling, a hɛ̃ɛ ri tɔɔ, “Rɛɛ maalang, n pálɛ̀ vi n ta yuu mɛɛ viya?” 31Ri kasɛ wu nyaa tɔɔ, “Shing danggn ka bìí Kpanti Yeesɔ, mɔɔ ta yuu ɓaaɓɛ katɔ. Mɔɔ nɛɛ zang ɓɔɔ ri ka gãa ɓaaɓɛ nandon.” 32A ri kɔɔ wu Ruu Laa nɛɛ zang ɓɔɔ ri ka gãa ɓiɓɛ piti. 33Zang ɓɔɔ gã sãa sèe ri dòo nɛɛ zĩi kɔ tantɛnang daa sɔɔ ri nɔɔrɔ. A ri palɛ wu batizima nɛɛ zang ɓɔɔ ri ka gãa ɓiɓɛ nandon. 34A see Bulu nɛɛ Siila daa nɛɛ ri ka gãa ɓiɓɛ. Daa a ri vuu shaanang nɛɛ ri shaayi. Wu nɛɛ zang ɓɔɔ ka gãa ɓiɓɛ nandon, ri tãa tĩnang dɔɔli, ka ruu ɓɔɔ, ri shing danggn tɔ, ka bìí Laa ɓɛɛ.

35Ɓɔɔ nɔng naa gãntɛ, zang ɓɔɔ ri jɛ̃̀ɛ́ zang ruu, ri shong rɛɛ zang ɓɔɔ gã ri ɓɛɛ, nɛɛ ri daa kɔɔ zang ɓɔɔ gã sãa nɛɛ, “Yaa rɛɛ zang kaɓa naa ta ri daayi.”

36Zang ɓɔɔ gã sãa daa kɔɔ Bulu kati nɛɛ, “Rɛɛ zang bang ri shong nyaa ka ruu ɓaaɓɛ nɛɛ Siila, nɛɛ n yaa nɔɔ naa ta. Nɔɔ yupaa ta, nɔɔ daa waasɛ̃.”

37A Bulu kɔɔ rɛɛ zang ɓɔɔ zang shong ri ɓɛɛ tɔɔ, “Ruu zang Rooma a zang nyɔ ruu nɛɛ gbãa ka jĩng zang piti. Ruu palɛ vuu shi kpang ɓɔɔ kagn kpang, zang ti loo ruu ka sãa. Zang nɛɛ zang yaa ruu naa kaa nɛɛ nwĩiri ya? Ruu daa kpang. Zang bang Rooma bìí ri a ka nihn nɛɛ doo ɓarɛ ri yaa ruu naa.”

38Zang ɓɔɔ zang shong ri, ri daa kɔɔ rɛɛ zang bang Rooma ruu keɓe. Ɓɔɔ ri tãayi nɛɛ Bulu nɛɛ Siila ri doo zang Rooma kɔ, bii kaa ri vɔrɔ. 39Ri daayi ri daa gaa Bulu nɛɛ Siila nɛɛ ri yàa ri gbalang vuu shi kpang ɓɔɔ ri palɛ ri ɓɛɛ ta. A ri nwangsɛ ri nɛɛ yeti sãa. Ri kɔɔ ri nɛɛ ri dita ri yaa gari. 40Bulu nɛɛ Siila ri nwangnɛ yeti sãa ri daa ka gãa Lidiya. Ri ĩi zang ɓɔɔ ri dũng Laa ka nɔng, a ri rang zang ruu ɓɔɔ mã ri danggn ɓɛɛ, a ri daa kati.

Currently Selected:

Zang Shonang Yeesɔ 16: mzmNT

Highlight

Copy