Zang Shonang Yeesɔ 15

Zang bang zang ɓɔɔ ri dũng Laa, ri kpalɛ zɔɔ ka Urushalima

1Zang ɓɔɔgn, ri a nɛɛ tipi Yahudi ka Antakiya, a ri tusu zang ɓɔɔ ri shing danggn tɔ nɛɛ, “Nɔɔ nɛɛ yee shaa naa ɓɔɔ Musa dang nyaa ɓɛɛ kpang, Laa ta yuu manɛ kpang.” 2Bulu nɛɛ Baranaba ri làa zɔɔ nyaa nɛɛ rɛɛ zang keɓe gbãng gbãng ka ruu ruu keɓe. A zang naa kɔɔyi nɛɛ Bulu nɛɛ Baranaba a ɓɔɔ rɛɛ zang Antakiya ɓɔɔ, ri daa Urushalima. Ri daa hɛ̃ɛ rɛɛ zang shonang Yeesɔ nɛɛ rɛɛ zang bang bang ɓɔɔ ri ka nɔng, ka ruu ruu keɓe.

3A zang ɓɔɔ ri dũng Laa, ri shing ri zanti kati. Ri sɔɔ tipi Fonishiya nɛɛ Samariya, ri kɔɔrɔ zang naa ɓɔɔ zang ɓɔɔ ri zang Isirela kpang ri shing danggn tɔ ka bii Laa kati ɓɛɛ. Ruu keɓe shing zang ɓɔɔ ri shing danggn tɔ, ri tãa tĩnang dɔɔli. 4Ɓɔɔ ri shɛ̃ɛ Urushalima zang ɓɔɔ ri dũng Laa nɛɛ rɛɛ zang shonang Yeesɔ nɛɛ rɛɛ zang bang bang, ri ta ri waasɛ̃. A Bulu nɛɛ Baranaba ri kɔɔ ri vuu ɓɔɔ Laa yi ri naa kagn a ri palɛ ɓɛɛ. 5A zang ɓɔɔ ri shing danggn tɔ, ɓɔɔ ri ɓarɛ ka vaa zang Farisi ɓɛɛ, ri yupaa ri kɔɔyi tɔɔ, “Zang ɓɔɔ ri zang Isirela kpang ɓɔɔ ri shing danggn tɔ, ri yée shaa katɔ. Zang ti kɔɔ ri nɛɛ ri dũng nyaa ɓɔɔ Musa dang ɓɛɛ.” 6A zang shonang Yeesɔ, ri nɛɛ rɛɛ zang bang bang ri kpalɛ zɔɔ ka ruu rúu keɓe. 7Ri làa zɔɔ nyaa tɔ gbãng gbãng, a Bituru yupaa kɔɔyi tɔɔ, “Rɛɛ manzung, nɔɔ zi tɔ diki bee tɔ ɓɔɔ Laa zɔ̃ng m ka teteng manɛ, nɛɛ n kɔɔ zang ɓɔɔ ri zang Isirela kpang Ruu Tɔ̃ɔ ɓiɓɛ, tɔ̀ɔ, ri tãayi, ri ti shing danggn ɓɛɛ. 8Laa ɓɔɔ zi rɛ̃rɛnang zang tɔ nandon, tusu nɛɛ ri daa wu yeti tɔ, ka ɓɔɔ a ri Suru ɓiɓɛ naa ɓɔɔ wu a ruu ɓɛɛ. 9Basɛ teteng ɓarɛ nɛɛ ruu kpang. Yàa ri gbalang vuu shi kpang ɓarɛ, ka ruu ɓɔɔ, ri shing danggn ka bii ɓiɓɛ ɓɛɛ. 10Nɔɔ nɛɛ nɔɔ gãsɛ Laa ka ruu viya? Nɔɔ nɛɛ nɔɔ shing vuu ka yuu zang ɓɔɔ ri shing danggn tɔ, vuu ɓɔɔ ruu nɛɛ rɛɛ daa ɓuru ruu zunung tuunang kpang ɓɛɛ. 11Wu nɔngkɔ kpang. Rùu shing danggn tɔ, a Laa yi ruu naa kagn nɛɛ bìí Kpanti Yeesɔ, wu ta yuu ɓuru kati naa ɓɔɔ wu ta yuu ɓarɛ ɓɛɛ.”

12Zang ɓɔɔ ri kpalɛ zɔɔ, ri nwang kaa kikiri, ka ɓɔɔ ri tãa naa ɓɔɔ Baranaba nɛɛ Bulu ri kɔɔrɔ vuu ɓɔɔ zang zirɛ zang mã naa ka danggn, ɓɔɔ Laa yi ri naa kagn, ri pálɛ̀ ka teteng zang ɓɔɔ ri zang Isirela kpang ɓɛɛ. 13Ri hangsɛ yee ranang tɔ, a Yakub rang yee kati tɔɔ, “Nɔɔ ɓaa shoo karɛ rɛɛ manzung. 14Wee Siman kɔ̀ɔ́ ruu doo naa ɓee, naa ɓɔɔ Laa gaayu kasɛ zang ɓɔɔ ri zang Isirela kpang, a zɔ̃ngkɔ zang ɓɔɔ ka teteng ɓarɛ nɛɛ ri nwang zang ɓiɓɛ tɔ. 15Rúu ɓɔɔ rɛɛ zang nyaa shonang Laa ri kɔɔyi daa gbete nɛɛ weɓe. Labeenang Laa kɔɔyi nɛɛ,

16“ ‘Nɛɛ knti, n gbãayu ditɔ n naa mãa nɔng nwannang

Dawuda ɓɔɔ jì ɓɛɛ.

N mãa nɔng ɓɔɔ jili ɓɛɛ.

N wisi paa ka nɔng,

17tɔ̀ɔ, zang nimbang ri kãa Laa kati,

nɛɛ zang ɓɔɔ ri zang Isirela kpang,

ɓɔɔ zang ɓaa nung mɛɛ ka teteng ɓarɛ ɓɛɛ.

18Laa ɓɔɔ tùsù zang vuu keɓe doo tɛ̃ɛ tɛ̃ɛ, wukɔ kɔɔ vuu keɓe.’

19“Ka ruu nɔngkɔ, n kɔɔ nɔɔ, rúu kpãa zang ɓɔɔ ri zang Isirela kpang, ɓɔɔ ri a ka bii Laa ɓɛɛ kpang. 20Rúu bèe ri laa kɔ jong, rúu kɔɔ ri nɛɛ rí shaa vuu ɓɔɔ zang yee vaka kpang, ri rooro nɛɛ zang soro ɓɔɔ wu soro ɓarɛ kpang, kpang. Ri shaa vuu ɓɔɔ zang bɔ̃ɔ vɔ̃ɔrɔ katɔ ɓɛɛ kpang, ri ti shaa zĩi kpang. 21Ka ruu ɓɔɔ, diki bée tɔ ɓɔɔ zang gã nyaa dannang Musa ka gãa zɔɔ kpalɛnang, ka Diki Ɔ̃sɔnang diki diki ɓɛɛ. Zang ti kɔɔrɔ zang ruu ɓiɓɛ ka gari gari nandon.”

Labeenang ɓɔɔ zang keɓe ri bée ɓɛɛ

22A zang shonang Yeesɔ ri nɛɛ rɛɛ zang bang bang, nɛɛ zang ɓɔɔ ri dũng Laa, nyaa ɓarɛ a gbete, nɛɛ ri shɛ̃ɛrɛ zang ɓɔɔ ka teteng ɓarɛ, ri shong ri ka Antakiya nɛɛ ri dàa nɛɛ Bulu nɛɛ Baranaba. A ri zɔ̃ng zang varɛ ziti ɓɔɔ zang ɓɔɔ ri shing danggn tɔ, ri á ri bannang dɔɔli ɓɛɛ. Yahuda ɓɔɔ zang ɓaa wu nɛɛ Basaba ɓɛɛ, ri nɛɛ Siila. 23A zang shong ri nɛɛ labeenang keɓe tɔɔ,

“Rukɔ zang shonang Yeesɔ, ruu nɛɛ rɛɛ zang bang bang, ɓɔɔ ruu manzung manɛ ɓɛɛ, ruu shong nyaa nɛɛ zang jèe ruu rɛɛ manzung ɓuru ɓɔɔ ri ɓarɛ zang Isirela kpang, a ri zi Laa ɓarɛ tɔ kati ɓɛɛ. Ɓɔɔ ri nwang ka Antakiya nɛɛ tipi Siriya nɛɛ Silisiya ɓɛɛ. 24Ruu tãa nyaa nɛɛ zang ɓɔ̀ɔ́gn ri daa nɛɛ teteng ɓuru, ri daa kpãa nɔɔ, ri lasɛ nɔɔ yeti nɛɛ vuu ɓɔɔ ri kɔɔrɔ ɓɛɛ. Rùu ti kɔɔ ri vuu ɓɔɔ kagn nɛɛ ri daa kɔɔ nɔɔ kpang. 25Ka ruu nɔngkɔ, ruu kpalɛ zɔɔ, a nyaa ɓuru daa gbete, nɛɛ ruu shɛ̃ɛrɛ zang, ruu shong ri ka bii manɛ. Ri daa nɛɛ rɛɛ wusang ɓuru Baranaba nɛɛ Bulu, 26ɓɔɔ ri loo yuu ɓarɛ tɔ ka nɔng ɓɔɔ ri pàlɛ́ Kpanti ɓuru Yeesɔ Kirisi shonang ɓɛɛ. 27Rùu shong nɔɔ Yahuda nɛɛ Siila nɛɛ ri kɔɔ nɔɔ nɛɛ nyaa ɓarɛ. Vuu ɓɔɔ ri kɔɔ nɔɔ gbete nɛɛ vuu kɔ ruu bèe nɔɔ ɓɛɛ. 28Nyaa ɓuru daa gbete nɛɛ Suru Laa nɛɛ ruu gisi nɔɔ vuu ɓɔɔ tɔ̀ɔ́ ka yuu rɛɛ vuu ɓɔɔ daa naa ɓɔɔ nɔɔ palɛ katɔ ɓɛɛ kpang. 29Nɔ́ɔ shaa vuu ɓɔɔ zang yee vaka kpang, nɔɔ shaa zĩi kpang. Nɔɔ ti shaa vuu ɓɔɔ zang bɔ̃ɔ vɔ̃ɔrɔ katɔ ɓɛɛ kpang, nɔɔ rooro nɛɛ soro ɓɔɔ wu soro manɛ kpang, kpang. Naa nɔɔ pálɛ̀ rɛɛ vuu keɓe kpang, nɔɔ tãa tĩnang katɔ.”

30A zang shing ri zanti kati. Ri daa Antakiya kati, ri daa kpalɛ zang ɓɔɔ ri dũng Laa, ri a ri labeenang bìí. 31Ɓɔɔ zang ri gã labeenang bìí, ri tãa tĩnang dɔɔli, ka ruu ɓɔɔ, ruu bìí mã ri danggn ɓɛɛ. 32Yahuda nɛɛ Siila ɓɔɔ ri doo zang nyaa shonang Laa kɔɔ doori, ri rang zang yee sasak. Yee ɓarɛ mã zang danggn kati. 33Ri nwang ka Antakiya tɔkɔlɔng, a zang ɓɔɔ ri dũng Laa ri shing ri zanti nɛɛ ri daa waasɛ̃. A ri gbãayu ka bii zang ɓɔɔ ri shong ri ɓɛɛ. 34[A Siila kasɛ nɛɛ wu nwang ɓi doo ka nɔngkɔ.] 35Bulu nɛɛ Baranaba ri nwang ɓarɛ kaa Antakiya ka nɔngkɔ. Ri nɛɛ rɛɛ zang ɓɔɔ ri tusu zang vuu, a ri ti kɔ̀ɔrɔ́ zang Ruu Laa ɓɛɛ.

Bulu ri basɛ zɔɔ nɛɛ Baranaba

36Diki naa bee tɔ tɔkɔlɔng, a Bulu kɔɔ Baranaba nɛɛ, “Ruu gbãayu ta ruu leng rɛɛ manzung ɓuru ka rɛɛ gari ɓɔɔ ruu kɔ̀ɔrɔ̀ zang Ruu Laa kagn ɓɛɛ. Rúu zi naa ɓɔɔ ri nwang ɓɛɛ.” 37Baranaba kasɛ nɛɛ ri daa nɛɛ Yɔhana ɓɔɔ zang ɓaa wu nɛɛ Maraku ɓɛɛ ning. 38Bulu zi naa ɓɔɔ ri dàá nɛɛ zang ɓɔɔ gbãayu ka Pamfiliya, yaa ri daa nɛɛ ri ka nɔng shonang kpang kpàng. 39Ri hàa nyaa, a ri basɛ zɔɔ. Baranaba ri ɓakɛ zɔɔ nɛɛ Maraku ri vang laana ri daa ka Kuburu. 40A Bulu tuu ɓi kaa Siila. Ka knti ɓɔɔ zang ɓɔɔ ri shing danggn tɔ ri gàa ri Laa tɔ nɛɛ Laa wu gãng jĩng ka ri, a ri yi gbalang ri daayi. 41Bulu daa ka Siriya nɛɛ Silisiya ri mã zang ɓɔɔ ri dũng Laa danggn.

Currently Selected:

Zang Shonang Yeesɔ 15: mzmNT

Highlight

Copy