1 Koranti 3

Ruu ka yuu zɔɔ kusunang ka Gãa Laa

1Niizang rɛɛ manzung, ɓɔɔ bɛ̀ɛ́ n doo nɛɛ nɔɔ, n rang nɔɔ yee naa zang ɓɔɔ Suru Laa kagn yeti ɓarɛ ɓɛɛ kpang. N rang nɔɔ yee naa shɔnzang waati kɔ jong, ka ruu ɓɔɔ, nɔɔ nwáng doo naa wujɛ rɛ̃ɛting waati ka gbalang Kirisi ɓɛɛ. 2N á nɔɔ míi, wu vuu shaanang ɓɔɔ lakɛ katɔ kpang. Ka ruu ɓɔɔ, bɛ̀ɛ́ nɔɔ daa naa shaanang gn kpang ɓɛɛ. Bìí kãntang keɓe nɔɔ ti daa naa shaanang gn kpang kɔ sasak. 3Nɔɔ nwang doo naa zang koo keɓe, ka ruu ɓɔɔ, nɔɔ kaa doo sũnyaa nɛɛ zɔɔ, nɔɔ haa doo nyaa nɛɛ zɔɔ ɓɛɛ. Nɔɔ zi kpang nɛɛ naa nɔɔ pálɛ̀ nɔngkɔ, nɔɔ doo naa zang koo keɓe kɔ kpang ya? Nɔɔ palɛ wu naa ɓɔɔ zang piti palɛ ɓɛɛ kpang ya? 4Naa zang gbete kɔɔyi nɛɛ, “N dũng m Bulu,” a zang ɓɔɔ kɔɔ ɓi nɛɛ, “N dũng m Apolo”. Wee nɔɔ pálɛ̀ nɔngkɔ ɓee, nɔɔ doo naa zang koo keɓe kɔ.

5Zang ɓaa wi nɛɛ Apolo wiya? Zang ɓaa wi nɛɛ Bulu wiya? Ruu ɓuru zang shonang Laa kɔ shɛn. Nɔɔ zi Kirisi nɛɛ naa ɓuru. 6Rùu ɓuru naa zang ɓɔɔ ri lang jaa ɓɛɛ. Nkɔ ɓaa jĩng vuu, a Apolo ɓaarɛ mii kagn. Ɓi Laa kɔ ka bm gbete shingnɛ jĩng vuu tarɛ, a bangnɛ. 7Ka ruu nɔngkɔ, zang ɓɔɔ ɓáa jĩng vuu, nɛɛ zang ɓɔɔ ɓàarɛ́ mii kagn, ri ɓarɛ vuu ɓɔɔ kpang. Laa ɓɔɔ wukɔ shingnɛ, jĩng vuu tarɛ, a bangnɛ, wukɔ ɓa ri nandon. 8Zang ɓɔɔ ɓaa jĩng vuu, nɛɛ zang ɓɔɔ ɓaarɛ mii kagn, ri ɓarɛ gbete, zang ɓɔɔ ɓa zɔɔ kpang. Laa naa á zang ɓu vuu ɓɔɔ daa naa shonang ɓiɓɛ ɓɛɛ. 9Wee ruu ziti ɓee, ruu kpalɛ yuu ɓuru nɛɛ Laa ruu palɛ shonang. Nɔɔ manɛ kaa jaa ɓɔɔ Laa lang ɓɛɛ.

Nɔɔ manɛ naa gãa ɓɔɔ Laa mãa ɓɛɛ. 10Laa pàlɛ̀ m tɔ̃ɔ ka tĩng, yáa m nɛɛ nkɔ n gaayu shonang kaɓa. N loo doo gãa kaɓa waasɛ̃, naa zang ɓɔɔ zunung gãa mãanang katɔ ɓɛɛ. N loo doo gãa tɔ a zang ɓɔɔ mãa ɓi ka gãa. Zang ɓu wu palɛ waasɛ̃ naa ɓɔɔ wu mãa gãa bìí ɓɛɛ. 11Ka ruu ɓɔɔ, zang ɓɔɔ lòó doo gãa ɓɔɔgn takpang. Doo gãa ɓɔɔ Laa looyi, ɓi wukɔ Yeesɔ Kirisi. 12Zang ɓɔɔ ri tuu zinariya, zang ɓɔɔ ri tuu azurufa, zang ɓɔɔ ri tuu ɓarɛ tari ɓɔɔ shaa nyaa dɔɔli ɓɛɛ, ri mãa gãa nɛɛ mani ka yuu doo gãa kɔ zang loo ɓee. A zang ɓɔɔ ri see ɓarɛ laa, nɛɛ wisi, a ɓɔɔ furu vuu, ri mãa gãa nɛɛ mani, ka yuu doo gãa keɓe. 13Diki ɓɔɔ shonang zang naa tusu bii kagn a ditɔ. Ka ruu ɓɔɔ, ka diki kaɓa, ɓɔɔ Yeesɔ Kirisi gbãayu ka koo keɓe, Laa naa gãsɛ shonang zang ɓu nɛɛ waa, waa kɔ naa túsù kati waasɛ̃ naa ɓɔɔ zɔ̃ng shonang zang ɓu nwàng ɓɛɛ. 14Naa gãa ɓɔɔ zang mãa ka yuu doo gãa kaɓa nɛɛ shii katakata ka yeti waa, waa nɛɛ shaa kpang, Laa a zang kaɓa vuu ɓɔɔ daa naa katɔ ɓɛɛ. 15Naa gãa zang kaɓa waa shaayi zang kaɓa wàlɛ̀ vuu ɓɔɔ Laa a zang kpang. Laa ta yuu zang kaɓa katɔ naa ɓɔɔ shɔnzang wɔ nɛɛ yeti waa ɓɛɛ. 16Nɔɔ zi kpang nɛɛ nɔkɔ Gãa Laa, a Suru Laa nwàng ka yeti manɛ kpang ya? 17Zang ɓɔɔ nɛɛ lasɛ Gãa Laa keɓe, Laa naa nyɔ zang kaɓa vɔrɔ. Ka ruu ɓɔɔ, Laa zɔ̃ng Gãa keɓe nɛɛ wu nwang ɓɔɔ yuu ɓiɓɛ ɓɛɛ. Gãa keɓe ɓi nɔkɔ.

18Nɔ́ɔ nwãarɛ yuu manɛ kpang. Naa zang ɓɔɔ ka teteng manɛ tuu yuu ɓiɓɛ nɛɛ wu zũng dɔɔli ka yeti vuu koo keɓe, wu risi yuu ɓiɓɛ naa shoko, tɔ̀ɔ, wu zũng kati. 19N kɔɔ nɔngkɔ, ka ruu ɓɔɔ, vuu ɓɔɔ zang zili ka koo keɓe nɛɛ ɓi zũnang, ka jĩng Laa ɓi vuu shoko. Vuu ɓɔɔ zang bee ka yeti labeenang Laa niizang kɔ nwani. Zang beeyi nɛɛ,

“Laa yi zang ɓɔɔ ri zũng dɔɔli

ka nɔng ɓɔɔ ri palɛ zang zũnang ɓɛɛ.”

20Zang ti bèe ka nɔng ɓɔɔ nɛɛ,

“Laa zi ɓi tɔ nɛɛ rɛ̃rɛnang zang ɓɔɔ

ri zũng katɔ ɓi waati.”

21Ka ruu nɔngkɔ, zang ɓɔɔ wu rang yee bang bang ka yuu ɓiɓɛ, ka ruu ɓɔɔ wu di yuu ka bii shɔnzang kpang. Vuu piti ɓi ɓɔɔ manɛ. 22Naa doo wiya? Naa doo Bulu, naa Apolo naa Bituru, ri ɓarɛ zang shonang manɛ. Koo nandon, nɛɛ suru bii, nɛɛ vɔrɔ ɓi ɓɔɔ manɛ kɔ nandon. Naa doo vuu ɓɔɔ nɔɔ zili kãntang keɓe, nɛɛ vuu ɓɔɔ a doo ka knti, ri ɓarɛ ɓɔɔ manɛ kɔ nandon. 23Nɔɔ manɛ kaa ɓɔɔ Kirisi, a Kirisi ɓi kaa ɓɔɔ Laa.

Currently Selected:

1 Koranti 3: mzmNT

Highlight

Copy