Matthieu 16
16
1Pharisiendjé ke Sadducéendjé ndé, dèdè ndoudjou Jésus ta tòdjoudè né tòdjou ke dara, mbata dèdè ndiki ta nèè.
2Nè ntél tar naredè, mpana, Tokou kade woei, sésè epaidjé, Loou a to madji mbata dara kasè.
3Ke sindò, epaidjé, Loou a to madjang bokonè mbata dara kasè ke ndi il. Sésè egeridjé ta kòrou gel tar lo né ke dara, a sésè egeridjé ta kòrou gel tar né ke loshénè ang.
4Gel dooudjé ke madjang ke to kaiyadjé nsange né tòdjou, a da karedè né tòdjou kada ang, sè né tòdjou lo Jonas. Tokou ban nè nïyadè nao.
5Tokou ndjè kao gè tédjé téh toura man té, mèdè ikidè ta kao ke mourou.
6Jésus pa aredè, Ngemidjé madji, aïndjé tar oum lo Pharisiendjé ke lo Sadducéendjé.
7Ndjè kao gè tédjé pa horodè té, pana, Djèdjè ndé ke mourou ang.
8Tokou Jésus geré tar nèn, nè mpana, Sè dooudjé ke ndjè ko mè té ngadji, epaidjé horosè té mbata di wa, mbata éhdjé ke mourou ang?
9Egeridjé ang bai wa? Tar mourou mi lo dooudjé dourou mi ke mbòidjé kesè ase karè ban wa, ikisè wa?
10Aséh mourou shiri lo dooudjé dourou sò ke mbòidjé kesè ase karè ban wa?
11Mba di a sésè egeridjé ang ke ma mpa tar mourou ang wa? Aïndjé tar oum lo Pharisiendjé ke lo Sadducéendjé.
12Bana dèdè ngeré ke nè mpa naredè ta kaïn sér mourou ang, a ta kaïn tar ke Pharisiendjé ke Sadducéendjé ntòdjou.
13Bana tokou Jésus téh nange té ke Césarée Philippe, nè ndoudjou ndjè kao gè tédjé, mpana, Dooudjé pana Ngon lo doou to na wa?
14Dèdè mpana, Maredjé pana, Jean ndjè da baptême. Maredjé pana, Élie, ke maredjé pana, Jérémie aséh mare prophète kada.
15Nè mpa naredè, A sésè epaidjéna mam nto na wa?
16Simon Pierre tél tar pana, I to to Christ ndja, Ngon lo Allah ke tébe.
17Jésus tél tar arè pana, Madji éh sei, Simon ngon lo Jonas. Mbata da rò ke mese tòdji tar nèn ang, a Bòi ke isi dara.
18Ma mpa mari, i to Pierre, a dò err té nèn ma ma da kei Allah lom, ke tadeo djabao a ndai dè té ang.
19Ma ma kari klélé béh kö ke dara, né toï ke i tò ke nange nèn, da tò ke dara, né toï ke i toutou ke nange nèn, da toutou ke dara.
20Bana nè ndedji ndjè kao gè tédjé ta pa kare mare doou kada ang ke nè nto Christ.
21Ke ndò té ke nou Jésus ounkotè ta tòdjou ndjè kao gè tédjé ke nè nase kao Jérusalem té, ta kinga né ongou nya dji tòkou dooudjé té, ke tòkou ndjè kòrdjé ke ndjè da maketourou ndedjidjé, ke ta kare ntòlè, gè té ndò mouta nè nase ta kï.
22Pierre wèè ounkotè ta ndangè, pana, Allah ndiki ban ang, Mbaibé Seigneur. Né nèn a dé ròi té ndò kada ang.
23Nè ntoutou rè mpa nare Pierre, Ao ke nou gom té, Satan. I to né ta karem ntouka gòlem mbata i ndiki gè ke Allah ang, a ndiki gè ke dooudjé.
24Bana Jésus pa are ndjè kao gè tédjé, Tokou doou kada ndiki ta dé gom té, ase kare nè mbeté rè ndja, ke nase koto kake yo la baa ta kao gom té.
25Mbata doou ke ndiki ta kadji tébe la ndja, tébe la a nai, a doou ke tébe la nai mbata lom, nè na kingè.
26Tokou mare doou inga né ke nange nèn toï a tébe la nai, né lé toï a da sa madji to di wa? Aséh doou ase ta koun né di wa mbel né tébe la wa?
27Mbata Ngon lo doou a dé ke ndokoo lo Bèdjè ke angedjé la, ndò té ke nou nè na kouka dooudjé kada kada toï ase koula ke ndjè da.
28Tokoro ma mpa maresè, maredjé arr nèn ke da kwoei ang dongor dèdè do Ngon lo doou dé ke béh kö la.
Currently Selected:
Matthieu 16: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
