Matthieu 12
12
1Ndò té ke nou, Jésus ndja mè ndòò ndakiri ndò sabbat té. Boo da ndjè kao gè tédjé, dèdè ntete mare ndakiri dao dousa.
2Tokou Pharisiendjé wo né nèn, dèdè mpa darè, Wo, ndjè kao goi tédjé da né ke tar ndedji pana ase ta da ndò sabbat té ang.
3Jésus pa aredè, Etouraidjé maketourou ang wa, né ke David da leo, tokou boo dè ke dèdè ke déh sa?
4Tokou nè nao mè kei Allah té, ke nè nousa mourou ke ngem dare Allah, mouroun lé ke tar ndedji pana to tar la ta kousa ang, ke to tar lodè ke déh sa ta kousa ang to, a to mbata dooudjé ke to ndjè kòrdjé kadaba ang wa?
5Aséh etouraidjé maketourou ndedji ang deo di a ke ndò sabbat té, ndjè kòrdjé mè tokou kei Allah té da ndò sabbat madjang, ke tar to dòdè té ang wa?
6Ma mpa maresè, né ke madji wota tokou kei Allah éh nèn.
7Tokou sésè egeridjé gel tar nèn, Mam ndiki mè madji, mam ndiki né polo ang, baa sésè a gangidjé saria dèdè té ang, dèdè ke déh ke madjang ang.
8Mbata Ngon lo doou to to Mbaibé ke ndò sabbat té.
9Jésus ï loou té ke nou, nao mè kei Allah té lodè.
10Wo, doou kada éh nou ke dja woei mba. Dèdè ndoudjou Jésus, Tar ndedji pana ase ta kòrou rò too ndò sabbat té wa? Mbata dèdè ndiki ta toula dè.
11Nè mpa naredè, Doou di a horosè té tokou bati la to kadaba, ke nè noso mè bwa té ndò sabbat té, nè na kwèè ta kòrè ke daka ang wa?
12Doou to madji nya wota bati ang wa? Tokou ban, deo tar ndedji té ase ta da madji ke ndò sabbat té.
13Bana nè mpa nare dooun lé, Ndòdjou dji. Dooun lé ndòdjou dja ke ndé madji deo kadaba tokou dja ke kada.
14A Pharisiendjé ao daka, mpa tar horodè té do Jésus té, deo di a ta kare ntòlè.
15A mbata Jésus geré tar nèn, nè ntéh loou té ke nou ke dang. Mare dooudjé baya ao gè té, ke nè nòrou rò too lodè toï.
16Nè ndedjidè ta tòdjou tar la ke daka ang.
17Yèn to ta kare tar ke prophète Ésaïe pa leo dé to tar ke tokoro, pana,
18Wo, ngonlokisi lom ke ma mberè, nè ke mam ndikè nya, ke rom nèlem nya mbata la.
Ma ma kounda Ndil lom dè té,
Nè na pa tar saria ke gaté gaté kare Gentildjé.
19Nè na maitar aséh nè na pa ke tarr ang, ke doou kada a ko ndouè ke deo bo ang.
20Kôbou ke ndouba mba nè na tetè ang,
Aséh koulaa lampe ke sa éh kendé, nè na tòlè ang,
Sar nè nda ta kare saria ke gaté gaté téh ke singa.
21Gentildjé a kounda mè ngebe lodè ria té.
22Bana dèdè ndé rè té ke doou kada ke éh ke ndil ke madjang, ke wo loou ang ke pa tar ang to. Jésus da rè madji, tokou ban doou ke pa tar ang mpa tar ke nè no loou.
23Mè dooudjé toï ounda do biâ, pana, Doou nèn to Ngon lo David ang wa?
24Tokou Pharisiendjé wo tar nèn, dèdè mpana, To to deo Béelzébul té ba, mbai lo ndildjé ke madjang ke doou nèn touba né ndildjé ke madjang.
25Tokou Jésus geré kedji ke mèdè té, nè mpa naredè, Béh kö kada kada toï ke kaina dana, ntoudjou, ke béh kada aséh kei kada ke kaina dana a to ang.
26Tokou Satan touba Satan, nè nkaina ke rè ndja, tokou ban béh kö la a to to di wa?
27Tokou mam ntouba ndildjé ke madjang deo Béelzébul té, ngansè toubadè deo té lo na wa? Tokou ban dèdè da to ndjè gange sariadjé losè.
28A tokou mam ntouba ndildjé ke madjang deo té lo Ndil lo Allah, bana béh kö lo Allah dé ròsè té mbä.
29Mbata deo di a mare doou a kase kao mè kei té lo ndjè singa ta toudjou né la, tokou nè ntò ndjè singa dongor ang wa? Tokou ban nè nase toudjou kei la.
30Nè ke néh sem ang mbetem, ke nè ke mbòna sem ang, nè nkai horè.
31Tokou ban mam mpa maresè, né ke madjang ke tar sä toï da kïya kare dooudjé, a ta pa tar sä ke Ndil ndja da kïya ang.
32Doou ke pa tar madjang dò Ngon té lo doou, da kïya tar la, a doou ke pa tar madjang dò Ndil té ke madji toï, da kïya tar la ang, ke ndò té ke nange nèn ang ke ndò té ke ao dé ang tò.
33Ase da kake madji ke kandè madji tò, aséh da kake madjang ke kandè madjang tò, mbata da geré kake deo kandè té.
34Sè ngan horomahodjé, sésè asidjé pa tar ke madji deo di wa, tokou sésè etoidjé madjang? Mbata ta doou pa tar né ke dousou mèa.
35Doou ke madji òrou tar ke madji ke né ke madji la, doou ke madjang òrou tar ke madjang ke né ke madjang la.
36Ma mpa maresè, tar kada kada toï ke dooudjé pa ba, ndò gange saria té da tél tar dò tar té ke dèdè mpa toï.
37Mbata deo té lo tar ke i pa, i a dé gaté gaté, ke deo té lo tar ke i pa, saria a koso dòi té.
38Bana mare ndjè da maketourou ndedjidjé ke Pharisiendjé mpa darè, Ndjè tòdjou tar, djèdjè ndiki ta ko né tòdjou kada loi.
39Nè ntél tar naredè mpana, Gel dooudjé ke madjang ke to kaiyadjé nsange né tòdjou, a da karedè né tòdjou kada ang, sè né tòdjou lo prophète Jonas.
40Mbata tokou Jonas to mè tokou kaindji té kade mouta ke til mouta, tokou ban Ngon lo doou a to mè nange té nèn kade mouta ke til mouta.
41Dooudjé ke Ninive té a kï ndò gange saria té ke gel dooudjé nèn, ta gange saria dòdè té, mbata dèdè mbeté kedji né da ke madjang lodè tokou Jonas pa tar aredè, ke woidjé, mare kada wota Jonas éh nèn.
42Mbai ke dènè ke loou té ke er ke ber, a kï ndò gange saria té ke gel dooudjé nèn, ta gange saria dòdè té, mbata nè nï nange té ke dèbè eo ta ko kemkarè lo Salomon, ke woidjé, mare kada wota Salomon éh nèn.
43Tokou ndil ke madjang téh mè doou té mba, nè ndja loou té ke man arr kendé ang, nao nsange loou ke ta kisi kendé dèkèkè, a nè ninga loou ang.
44Bana nè mpana, Ma ma tél ke kei té lom ke mïya leo. Tokou nè ndé, nè no kei to ba, douta loou ke né toï to madji.
45Bana nè nao, nè ndé ke mare ndildjé shiri ke to madjang wotè ndja, dèdè dao mè kei té disi nou, deo lo dooun lé ke goukou dé madjang wota yéh ke dongor. A to tokou ban ke gel dooudjé ke madjang nèn to.
46Tokou nè nai mpa tar nare dooudjé bai, wo, këndjè ke ngaköèdjé darr daka, dèdè ndoudjou ta pa tar sa.
47Mare doou kada pa arè, Köindjè ke ngaköidjé darr daka, dèdè ndoudjou ta pa tar sei.
48Nè ntél tar nare doou ke pa arè, mpana, Endjè to na wa, ke ngakömdjé to na wa?
49Nè noula dja ke rò ndjè kao gè tédjé, nè mpana, Endjè ke ngakömdjé éh nèn.
50Mbata doou ke da né tokou Bòi ke dara ndiki, nè nto to ngoköm ke dingao ke könanem ke dènè ke endjè.
Currently Selected:
Matthieu 12: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
