Jean 1
1
1Ke dongor kèté, Tar ndja éh tén, ke Tar ndja éh ke Allah, ke Tar ndja éh to Allah.
2Nè ndja néh ke Allah dongor kèté nou.
3Nè nda né toï, né kada ke nè nda ang goto.
4Tébe to mèa té, ke tében lé to lokarè lo dooudjé.
5Lokarèn lé ndokoo londoul té, a londoul ndoulè ang.
6Doou kada dé mba, doou ke Allah oulè leo, ria na Jean.
7Nè ndé mbata tar nadji, ke ta pa tar nadji lo lokarè, baa dooudjé toï ase ta ko mèdè té deo té la.
8Doou nèn to lokarèn lé ang, a nè ndé ta pa tar nadji lo lokarèn.
9Lokarè nèn ke tokoro, to lokarè ke dé nange nèn ke ndokoo horo dooudjé té kada kada toï.
10Nè néh nange nèn, ke nè nda nange nèn mba, a dooudjé ke nange nèn geré leo ang.
11Nè ndé horo nédjé té la, a dooudjé la tèè ke ròdè té ang.
12A dooudjé kada kada toï ke tèè ke ròdè té, ke wo mèdè té ke ria, nè naredè singa ta kare ndé to ngandjé lo Allah,
13Ke doudjou ke mese ang, ke né ke rò ndiki ang, ke né ke doou ndiki ang, a to ngà Allah ndja.
14Tar ndja dé to rò doou, ke nè nisi horodjè té, tòkou mè madji dousou mèa ke tar ke tokoro tò, djèdjè djo ndokoo la, ndokoo tokou mare lo Ngon kada lo Bò ngondjè.
15Jean pa tar nadji la, nè mpa ke tarr, mpana, Yèn to nè ke ma mpa tar la kèté, nè ke nao ndé gom té, nè mbo noutam, mbata nè néh kèté dongor narem.
16Djèdjè toï ntaa né la nya mbä, tokou mè madji mbata tokou mè madji.
17Mbata dare tar ndedji dé leo deo té lo Moïse, tokou mè madji ke tar ke tokoro dé deo té lo Jésus Christ.
18Doou kada nai wo Allah ang bai ndò kada ang. Ngon kada ke éh kare Bèdjè té, nè ntòdjou Allah ke daka.
19Yéh nèn to tar nadji lo Jean, ndò ke Juifdjé oula ndjè kòrdjé ke Lévitedjé ke Jérusalem té mbata doudjè, I to doou di wa?
20Nè mpa ke daka, nè mmai ang, nè mpa ke daka, Mam nto Christ ang.
21Dèdè ndoudjè, I to doou di wa? I to Élie? Nè mpana, Mam nto Élie ang. I to prophète nèn wa? Nè ntél mpana, Ban ang.
22Tokou ban dèdè mpa sa, I to doou di wa? Mbata kare djèdjè ntél djao mpa djare ndjè ke ouladjè. Di a epa mbata loi ndja wa?
23Nè mpana, Mam nto ndou doou ke ourouki mè kòr té, Edaidjé deo lo Mbaibé Seigneur ke dana gaté gaté, tokou prophète Ésaïe pa.
24Dooudjé ke douladè to Pharisiendjé.
25Dèdè ntél ndoudjè, mpa darè, Mbata di a i da baptême wa, tokou bo i to Christ ang, aséh i to Élie ang, aséh i to prophète nèn ang wa?
26Jean tél pa aredè, pana, Mam nda baptême ke man, a doou kada arr horosè té nèn ke sésè egerèdjé ang.
27Nè ke ndé gom té, ma mase ta toutou ndar gòlè té ang.
28Tar nèn toï téh Béthanie té, ke téh toura Jourdain té, ke loou ke Jean ao da baptême kendé.
29Ndò kada gè té, nè no Jésus ao dé ke rè té, nè mpana, Woidjé, Ngon bati lo Allah, nè ke nòrou né ke madjang ke nange nèn.
30Yèn to nè ke ma mpa tar la kèté, doou kada ao dé gom té ke bo wotam, mbata nè néh kèté dongor narem.
31Mam ngerè leo ang, a mbata nè nase ta téh gel Israël té, mbata lo yèn a mam ndé ta da baptême ke man.
32Jean pa tar nadji, nè mpana, Ma mo Ndil téh mè dara té disi tokou egoutou ke nisi dè té.
33Mam ngerè leo ang, a doou ke oulam ta karem nda baptême ke man, nè mpa narem, Tokou wo doou ke Ndil disi isi dè té, a nè nto doou ke da baptême ke Ndil ke madji toï.
34Ma mo, ke ma mpa tar nadji mba, nè nèn nto Ngon lo Allah.
35Gè té ndò kada, Jean arr ke mare ndjè kao gè tédjé djo.
36Tokou nè no Jésus ao ndai, nè mpana, Woidjé, Ngon bati lo Allah.
37Ndjè kao gè té ke djo wo tar ke nè mpa, dèdè dao go Jésus té.
38Jésus tourou rè, nè no dèdè ke ndé gè té, nè mpa naredè, Ao sangidjé di wa? Dèdè mpa darè, Rabbi (yèn pana, Ndjè tòdjou tar), I to da wa?
39Nè mpa naredè, Edéidjé, sésè a koidjé. Tokou ban dèdè dao do loou to la, dèdè disi sa ndè tén, kade dé ngosiba ta kwoei.
40André, ngokö Simon Pierre, to doou kada lo dèdè ke djo ke wo tar lo Jean, nè nao go Jésus té.
41Nè nsange ngoköè Simon dongor, nè mpa narè, Djèdjè djinga Messie mba (yèn pana, Christ).
42Nè ndé ke ngoköè rò Jésus té. Tokou Jésus woè, nè mpana, I to Simon, ngon lo Jonas, dèdè da bari Céphas, (yèn pana, Pierre, aséh err).
43Gè té mare ndò kada, Jésus ndiki ta kao Galilée. Nè ninga Philippe, nè mpa narè, Edé gom té.
44Philippe to doou ke Béthsaïda, béh lo André ke Pierre.
45Philippe inga Nathaniel, nè mpa narè, Djèdjè djingè mbä, nè ke Moïse pa tar la mè maketourou tar ndedji té, prophètedjé pa tar la mè maketourou té to, Jésus ke Nazareth, ngon lo Joseph.
46Nathaniel pa arè, Né kada ke madji ase ta téh Nazareth té wa? Philippe pa arè, Edé wo.
47Jésus wo Nathaniel ao dé rè té, nè mpa tar la, Wo, doou ke tokoro lo Israël, nere ngem ngadji ang.
48Nathaniel pa arè, I gerem loou té ke da wa? Jésus tél pa arè, Dongor Philippe bari, tokou i éh ko kake toungoutisa té nou, ma moi.
49Nathaniel pa arè, Ndjè tòdjou tar, i to Ngon lo Allah, i to Mbaibé lo Israël.
50Jésus tél pa arè, Mbata lo ma mpa mari, ma moi kò kake toungoutisa té, i wo mei té wa? I a ko né ke wota yéh nèn.
51Nè mpa narè, Tokoro, tokoro, ma mpa maresè, sésè a koidjé dara a teï, angedjé lo Allah al ke disi dò Ngon té lo doou.
Currently Selected:
Jean 1: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
