YONI 13
13
Yesu iwini kaikesi toligalega
1Igau makateki Luvapela pakala. Yesu inikoli la tuta bogwa leima bisilavi valu watanawa e bilokaia Tamala. Bogwa iyebwaili sala ovalu watanawa, e iyebwaili goli kala kalitutilela la momova iwokuva.
2Diabolo bogwa isaili onanola Yudasa#Diabolo bogwa isaili onanola Yudasa. Gagabila bitagini, “Diabolo bogwa inagi onanola kidamwa Yudasa”. Isikariota Saimoni latula, kidamwa bikasali matauna. Ikamkwamsi, 3e Yesu inikoli kidamwa Tamala bogwa isaiki matauna karaiwaga komwaidona e tuvaila inikoli leima metoya baisa Yaubada e ikikaimilavau baisa Yaubada. 4Mapaila Yesu itomalaula okabokamkwam, ivilili kala kwama, e ikau talubulabu igigi olopola. 5E oluvi iligabu sopi okailuya ivitouula biwini kaikesi toligalega, e bitalubulabu makwayasina deli miyana leigigi. 6E imakaia Saimoni Pita, mitaga Pita iluki matauna, kawala, “Tomoya, ki, yoku bukuwini kaikegu?”
7Yesu ivitakauloki matauna, kawala, “Avaka auvagi gala kunikoli baisa tuta, mitaga igau bukukwateta.”
8Pita iluki matauna, kawala, “Gala goli kwaitala tuta bukuwini kaikegu.”
Yesu ivitakauloki matauna, kawala, “Kidamwa gala bawinaim, gala bukubani kam vilavila baisa yeigu.”
9Saimoni Pita iluki matauna, kawala, “Tomoya, gala kaikegu wala, mitaga yamagu deli dabagu goli!”
10Yesu iluki matauna, kawala, “Availa bogwa ikakaya, bogwa imigileu tomwaidona, e ibodi matauna gala bikakayavau mesinaku kaikela wala.#mesinaku kaikela wala. Mimilisi buki pilabubogwa gala wala iginisi mabigasina “mesinaku kaikela wala”. E yokomi komwaidomi kumigileusi, mesinaku wala taitala.” 11Paila inikoli availa bikasali matauna, mapaila ikaibiga, kawala, “Yokomi komwaidomi kumigileusi, mesinaku wala taitala.”
12E bogwa iwini kaikesi, isikam kala kwama, isili tuvaila; e iluki matausina, kawala, “Ki, lokukwatetasi avaka lavagi baisa yokomi? #Lk 22.27 13Kudokaigusi, ‘Tovituloki’ kaina ‘Tomoya’, e kukwamokwitasi; paila yeigu makawala goli. 14Mapaila kidamwa yeigu mi Tomoya kaina mi Tovituloki lawini kaikemi, ibodaimi bukuwinaisi kaikesi semia taitala taitala. 15Paila bogwa asakaimi kabogigisa kidamwa bukuvagaisi makawala bogwa lavigakaimi. 16Biga mokwita alukwaimi, towotetila gala bikalisau kala tokwaraiwaga; kaina touwata gala bikalisau kala towitala. #Md 10.24; Lk 6.40; Yn 15.20 17Kidamwa kunikolaisi baisa, bogwa bukumwasawasi kidamwa kuvagaisi makwaina.
18“Gala lalilivala paila komwaidomi; anikoli availa bogwa goli lanagi; mitaga ibodi Buki Pilabumaboma kala ginigini makwaina gala bisala, ‘Matauna kakamkwam kamataiyu bogwa leivapupoiyaigu.’ #Sam 41.9 19Mitaga wa tuta matutona alukwaimi igau gala bikaloubusi, kidamwa nasigavila bikaloubusi bukudubumaisi kidamwa yeigu matauna.#Kugisi Yn 8.24 deli kala katumiki. 20Biga mokwita alukwaimi, availa biboda matauna awitali, e matauna bibodaigu; e availa bibodaigu matauna biboda agu towitala.” #Md 10.40; Mk 9.37; Lk 9.48; 10.16
Yesu ivitububoti kala tokwasesila
(Md 26.20-25; Mk 14.17-21; Lk 22.21-23)
21Bogwa ikaibiga makawala, Yesu ikaikai nanola, e ikabau, kawala, “Biga mokwita alukwaimi, taitala yokomi bikasalaigu.”
22Toligalega igisamapusi sola baisa sola, e ininayuwasi paila availa goli ililivali. 23Taitala la toligalega, Yesu tombwailila, isividuli Yesu. 24Mapaila Saimoni Pita imitikipoki matauna, e ikaibiga, kawala, “Kukwatupoi paila availa goli eililivali.”
25Matauna isividuli Yesu, e ikalakova ikatupoi, kawala, “Tomoya, availa matauna?”
26Yesu ivitakaula, kawala, “Ka, kawotala bavidagu basaiki availa; e matauwena goli.” Mapaila bogwa ividagu makawona isaiki Yudasa, Saimoni Isikariota latula. 27Tutala bogwa ikau, Setani isikaila matauna. Yesu iluki matauna, kawala, “Avaka goli mwada bukuvagi nani kuvagi.” 28E gala availa wa kabokamkwam inikoli avaka uula ilivala makawala baisa matauna. 29Paila Yudasa toyamata mani kauyala e mimilisi idokaisi kidamwa Yesu eiluki matauna, “Kugimoli avaka ibodaidasi paila paka”; kaina eiluki kidamwa bisaiki avaka baisa tonamakava. 30Mapaila bogwa ikau makawona, nanakwa isunapula; e bogwa eidudubila.
Kwaitala karaiwaga kwaivau
31Mapaila Yudasa bogwa leisunapula, Yesu ikaibiga, kawala, “Baisa tuta yeigu Latula Tomota babani agu yakaula, e Yaubada bibani kala yakaula metoya baisa yeigu. 32E kidamwa Yaubada bibani kala yakaula metoya baisa yeigu,#E kidamwa. Mimilisi buki pilabubogwa gala wala iginisi mabigasina, “kidamwa Yaubada bibani kala yakaula metoya baisa yeigu.” Yaubada tuvaila biyakawolaigu metoya baisa titoulela, e nanakwa biyakawolaigu. 33Gugwadi,#Baisa bigala yebwaili. igau tuta pikekita asikailimi. Bukunevaigusi, e makawala laluki mina Yudia#Kugisi Yn 8.21. #Yn 7.34 makawala baisa tuta alukwaimi, ‘Ambaisa bam, gala igagabila bukuwaisi.’ 34Karaiwaga kwaivau asakaimi, kidamwa bukuyebulikaimi baisa taitala taitala; makawala bogwa layebwailimi, makawala goli yokomi bukuyebulikaimi baisa taitala taitala. #Yn 15.12,17; 1 Yn 3.23; 2 Yn 5 35Kidamwa kuyebulikaimi baisa taitala taitala, metoya baisa tomota komwaidosi binikolaisi kidamwa yokomi ulo toligalega.”
Yesu iluki Pita igau biyakali
(Md 26.31-35; Mk 14.27-31; Lk 22.31-34 )
36Saimoni Pita ikatupoi matauna, kawala, “Tomoya, am bukula?”
Yesu ivitakaula, kawala, “Ambaisa bam, gala igagabila bukubokulaigu baisa tuta; mitaga tuta oluvi bukubokulaigu.”#Yesu ililivala paila Pita kala katumata.
37Pita iluki matauna, kawala, “Tomoya, avaka paila gala igagabila babokulaim baisa tuta? Batugwalaigu okaliga paila yoku.”
38Yesu ivitakaula, kawala, “Bukutugwalaim okaliga paila yeigu ke? Biga mokwita alukwaim, rekorekwa gala bisilasola, mitaga bukusivatolu bukuyakalaigu.
Currently Selected:
YONI 13: PNGKIR
Highlight
Share
Copy
Want to have your highlights saved across all your devices? Sign up or sign in
Kiriwina Bible (Buki Pilabumaboma) © Bible Society of Papua New Guinea, 2011.
