VITOUULA 11
11
Liliula makwaina liku Babiloni
1Omitibogwa, tomotala valu watanawa komwaidona bonasi kaigitinidesi wala, e si biga komwaidona makawala wala. 2Ililoulasi mapilana opilibomatu e ibanaisi kwaitala kabayatila mapilana Babiloni, e ibudaisi valu isikailisi baisa. 3Ilivalasi taitala baisa taitala, kawasi, “Ka, ibodi bitakauwaisi mlomwaluva pwaipwaia bitagabwaisi bikasai bimili dakuna.” E mapaila ikepupolaisi imili dakuna e ikikaliaisi, deli si kaibasi pwadidiweta pikipaki. 4Ikaibigasi, kawasi, “E ka, bitakaliaiisi valu vilouveka deli kwaitala bwala bitakaliaiisi olopola makawala liku, bitatakasaisi bila ikapituki labuma. E mina watanawa biyakawolaidasi, e taga bitabutusi ambaisa ambaisa ovalu watanawa komwaidona.”
5E baisa tuta Guyau ibusi ima bigisi makwaina valu vilouveka deli makaina liku avaka tomota eikaliaiisi. 6E Guyau ikaibiga, kawala, “Ka, matausina tomota budotala wala e bonasi ililivalasi kaigitinidesi wala! E baisa avaka eiuvagaisi kala vitouula wala. Igau goli gagabila bivagaisi avaka avaka ikikau ninasi. 7Ibodi bitabusisi#Kugisi Vit 1.26 kala katumiki. tawaisi takipinigwaisi bonasi e taga bikatetasi avaka sesia ililivalaisi.” 8Mapaila Guyau ikatugai matausina ilosi ovalu watanawa komwaidona e iligaimwaisi wala kaliai. 9E valu mapilana idokaisi Babiloni#Maigana Babiloni kala lega makawala mina Iberu si biga “eikipinigu”. paila uula Guyau eikipinigu bonasi tolesi mapilana valu e ikatugai matausina ilosi ambaisa ambaisa.
Sem tubula liliusi
(1 Lil 1.24-27)
10Baisa Sem tubula liliusi. Tutala dadoya bogwa leiwokuva, e kwaiyu taitu tuvaila, Sem kala taitu bogwa eiboda 100, matauna iuni guditala latula tau, yagala Apakisadi. 11E igau matauna isisu tuvaila 500 taitu, e matauna tuvaila iunai litula.
12Avai tuta Apakisadi kala taitu iboda 35, matauna iuni guditala latula tau yagala Sela, 13e igau, matauna isisu tuvaila 403 taitu, e iunai tuvaila litula.
14Avai tuta Sela kala taitu iboda 30, matauna iuni guditala latula tau, yagala Eba, 15e igau matauna isisu tuvaila 403 taitu, e tuvaila iunai litula.
16Avai tuta Eba kala taitu iboda 34, matauna iuni guditala latula tau yagala Pelegi, 17e igau matauna isisu tuvaila 403 taitu, e tuvaila iunai litula.
18Avai tuta Pelegi kala taitu bogwa eiboda 30, matauna iuni guditala latula tau yagala Reu, 19e igau isisu tuvaila 209 taitu, e tuvaila iunai litula.
20Avai tuta Reu kala taitu bogwa eiboda 32, matauna iuni guditala latula tau yagala Serugi, 21e igau isisu tuvaila 207 taitu, e iunai tuvaila litula.
22Avai tuta Serugi kala taitu bogwa eiboda 30, matauna iuni guditala latula tau, yagala Nayo, 23e igau isisu tuvaila 200 taitu e tuvaila iunai litula.
24Avai tuta Nayo kala taitu bogwa eiboda 29, matauna iuni guditala latula tau, yagala Tira, 25e igau, matauna isisu tuvaila 119 taitu, e tuvaila iunai litula.
26Avai tuta Tira kala taitu bogwa eiboda 70, matauna iuni litula, Eberam, Nayo, deli Erana.
Tira tubula liliusi
27Baisa Tira tubula liliusi. E Tira litula Eberam, Nayo, Erana. E Erana latula yagala Lota. 28Erana ikaliga oviloutabula Ura, baisa mapilana Babilonia, e tamala igau wala tomomova isisu. 29Eberam la kwava yagala Serai, Nayo la kwava yagala Milika. E minana Milika deli bodala Isika tumasi Erana. 30E mitaga Serai minana nakaliga, gala taitala latula.
31Tira ivakouli latula Eberam deli tabula Lota matauna Erana latula, e yawala Serai minana Eberam la kwava, e deli matausina isilavaisi ovilouveka Ura mapilana Babilonia mwada bilosiga Kenani. E ilosi iviloubusisi valu Erana, e baisa isisuaisi. 32E Tira isisu mapilana Erana kala taitu iboda lakatuyu kwailima, oluvi ikaliga.
Currently Selected:
VITOUULA 11: PNGKIR
Highlight
Share
Copy
Want to have your highlights saved across all your devices? Sign up or sign in
Kiriwina Bible (Buki Pilabumaboma) © Bible Society of Papua New Guinea, 2011.
