Yone 7

Yasu hamenerume ibuhondo mini mbiraore nawi henego ogo

1Ani lowa Yu wali agali haru haga hearume ibu bole ka manda buwa Yasu ibu Yudia dindiha nape Galili dindihayagi hangu ibaga bu hene.#Yo 5.18 2Yu wali agalinaga Anda Nemandaha Palu Holene Horo kaware hayagola#LBM 23.24; Man 16.13 3Yasu hamenerume ibuhondo lalu, Í̱na biabe bialu kegoni í̱ haruru ibirarume de handai helo dindi ogo wahalu Yudia pobe. 4Mbirali ibugua birago bibahendeme manda biai helo manda biyagua ohowa nabi panigi biaga. Í̱na biabe bialu kego dindi bibahendeni karume í̱ manda biai helo walia halu bule pu, lene. 5Ibu hamenerume ibuhondo mini mbiraore nawi hene.#Md 13.55; Mg 3.21; Ab 1.14

6Ani layagola Yasuhanda tihondo lalu, I̱naga horo wene natagira ibi. Áyu tínaga horo hangu wiaabo ka.#Yo 2.4; 7.8; 7.30; 8.20 7Wali agali dindi bibahendeni karume tí handabe manga naholebira. I̱na tíhondo ko bialu kami lalu lamiaabo harogola ti bibahendeme i̱hondo handabe manga halu kagoni.#Yo 3.19; 15.18-19 8Tí ngoai hagane biagoria ngoai hole pudaba. I̱naga horo wene natagira ibigo i̱ haro, lene. 9Ani lalu ibu nape Galilini hondo hene.

Yasu ibu maha Yarusaleme penego ogo

10Yasu ibu hameneru ngoai hole piyadagua ibubi maha pene. Ibu wali agalime nahendelo ohowa pene. 11Wali agali ngoai hayagoria Yu wali agali haru haga haguane hearu tigua, Yasu agoha kabe, lalu hai bialu hene.#Yo 11.56

12Wali agalime hagarerebi laga laga bialu marume, Ibu agali bayale, la marume, Ndo ibugua wali agali mo guya halu ka, laga bialu hene.#Md 21.46; Lg 7.16; Yo 10.19 13Yu wali agali haru haga hearu hondowa ti bibahendeme gi howa latagi nahe hagarerebi lowa lalu hene.#Yo 9.22; 12.42; 19.38; 20.19

14Mo ngoai holene horo uruni maru peha Yasu ibu Anduane Homogonaga andaha puwa mana lawai halu hene. 15Yasuhanda mana lawai halu heago hale howa Yu wali agali bibahendeme ti mogolo hondowa lalu, Agali ogoni sigulu nabi howa manda timbuni taraore bidago agua manda binidabe, lene.#Md 13.54; Lg 2.47

16Ani layagola Yasuhanda ladai bialu lalu, Mana lawai halu kogo i̱ni mitangi bialu ndo Ngode Datagaliwabe i̱ pu layagonaga minini howa lawai halu ko.#Yo 3.11; 8.28; 12.49; 14.10 17Mbirali ibu Ngode Datagaliwabehanda hame ledadagua bua kayagua ogoni ibugua i̱na lawai halu kogo i̱ni mitangini howa lawai halu kobe Ngode Datagaliwabenaga mitangini howa lawai halu kobe manda bu hondolene nga.#Yo 8.43 18Mbirali ibuninaga mitangini howa lawai halu kagome ibuninaga mini mo yaraga helo lawai halu ka. Anigo ibu pu layagonaga mini mo yaraga helo hame lowa lawai halu kagome ogoni ibu tigabiore ibunaga miniha ke̱ holene mbira nawiore ka.#Yo 5.41; 5.44; 8.50 19Mosesehanda ibu heangi Mana tígua bilimulo lowinigo tí mbiralime bia nabi puguabo halu kami. I̱ homoliya bole manda bialu kamigo irane agibe, lene.#Har 24.3; Man 33.4; Md 12.14; Mg 3.6; Ab 7.38; 7.53; Lm 2.21-24

20Ani layagola tigua ladai bialu lalu, Í̱ dama daraga ho kebe. Í̱ homabelo aiwa bole kabe, lene.#Yo 8.48; 8.52; 10.20

21Yasuhanda ladai bialu lalu, I̱na agalime nabiagane ale mbira birugo hondowa mogolo handarimi. 22Dongone podo mabu biagane mana Mosesehanda bilimu lene manda buwa Sabada horongi tígua tí iginiru dongone podo mabu beramili. Dongone podo mabu biagane mana ogoni tene Mosesehanda wabu wini ndo. Pigane bamba tí mamalirume tenini.#Pig 17.9-13; LBM 12.3 23Mosese heneyangi Mana lowinigo napugule lowa tígua Sabada horongi igiri dongone podo mabu beramilidagua i̱na agali mbiranaga tingini ko heago mo dabi haiore harugonaga i̱hondo keba halu kamigo agibe.#Yo 5.8-10; 5.16 24Tígua de degeme hondowa daba ki nabilimu. Mana henene birago hondowa daba ki bialu halimu, lene.#LBM 19.15; Man 1.16-17; Ais 11.3-4; Yo 8.15; Ya 2.1

Mbirali Dabo Helenego ibuoredabe, lenego ogo

25Ani layago hale howa Yarusaleme wali agali marume lalu, Haru haga karume mbirali homelo bole lalu kago agali ogoni ndobe.#Yo 5.18 26Ibugua o nahe wali agali handai helo howa mana lalu kagoni. Tigua ibuhondo mbira nale helo wa kagoni. Ina haru haga karume ibu Mbirali Dabo Helenego ibulebira lowinigo ibu ka manda buwa wahaya bada. 27O ani ago Mbirali Dabo Helenego ibiragola ibu ogoha howa ibinida manda nabi holeberamago ai agali ogoni ibu ogoha howa ibini ka manda bu kamagoni, lene.#Md 13.55; Mg 6.3; Lg 4.22; Yo 7.41; 9.29

28Yasu ibugua Anduane Homogonaga andaha howa lawai halu dalimu lalu, Tígua i̱bi i̱ ogoha howa ibini kabi bayuwa manda bu kamibe. I̱ni mitangini ndo ibiru. I̱ pu layago ibu henene tene kagoni. Tígua ibu manda nabi kamigo#Md 11.27; Yo 5.32; 5.43; 8.14; 8.26; 8.55 29i̱na dege ibu manda bu ko. I̱ pu layagola ibuha howa ibiru, lene.#Md 11.27; Yo 10.15

30Ani layago hale howa tigua ibu minule binigo ibunaga horo ogoningi ndo hayagola mbiralime gi yade halu ibu mina nabi wahene.#Mg 11.18; Lg 19.47; Yo 7.44; 8.20; 8.37; 13.1 31Wali agali ngoai ho hearu dewalime lalu, Agali ogoni ibugua agalime nabiagane ale bialu kago emene lalu Mbirali Dabo Helenego ibu ibuwa ibugua dewaore bulebirabe, lowa ibuhondo mini mbiraore wini.#Yo 2.23; 8.30; 10.42; 11.45; 12.11; 12.42

Yasu minu pudaba, lenego ogo

32Yasuhanda uruni biyagonaga wali agalime hagarerebi lowa laga laga bialu heago Perisi agalime hale howa tiguabi loma binigo mo miaga haguane hearumebi Anduane Homogonaga anda mamage haga agaliruhondo, Yasu minu pudaba, layagola tigua ibu minu ibini. 33Ti ani íbu heagola Yasuhanda tihondo lalu, I̱ tí heba emene tigi mbira hangu halu i̱ pu layago karia dai bulebero.#Yo 13.33; 16.16 34Dai berogola tígua i̱ hai buwa handa walia naholeberami. I̱ poleberogoha tí haruru naibabehe kami, lene.#Hos 5.6; Yo 8.21; 13.33; 13.36; 17.24

35Ani layago hale howa Yu wali agali haru haga haguane hearume tini dege dege la la bialu lalu, I̱ handa walia naholeberami lalu kago ibu aniha pole howa lalu kabe. Ina aria maru Girigi dindi tara taraha purogolo karu uruni karia puwa Girigi wali agalihondo mana lawai hole pole howa larabe. 36Ibugua lalu, Tígua i̱ hai buwa handa walia naholeberemi, layagobi, I̱ poleberogoha tí haruru naibabehe, layagobi irane agi manda bialu layabe, lene.

Yasuhanda haabo holene ibanaga te lenego ogo

37Horo timbuni ngoai hayaru hamaro biyangi Yasu heyuwa tihondo dalimu lalu, Mbirali iba noa kamiyagua i̱ koria ibalimu.#LBM 23.36; Ais 55.1; Yo 4.10; 4.14; 6.35; Mo 22.17 38Anduane Homogonaga mbugani lo ngago ogo, I̱hondo mini mbiraore wu karu tinaga gubaliniha howa haabo holene iba miagane duguabo holebira, lalu gilibu nga, lene.#Ais 12.3; 58.11; Ese 47.1; Seg 14.8 39Ibugua bi ogoni layago wali agali ibuhondo mini mbiraore wu hararu tihondo maha Ngode Datagaliwabe Dinini mulebira manda buwa lene. Ogoningi Ngode Datagaliwabe Dinini naibinigo irane Yasu ibu wá taraore holeneha mo yaraga nahe henegome ani lene.#Ais 44.3; Yol 2.28; Yo 12.16; 16.7; 20.22; Ab 2.4; 2.17; 2.33

Wali agali talebu ki binigo ogo

40Ibugua bi ogoni layago hale howa wali agali marume lalu, Ngode Datagaliwabe Mana Latagi Haga Mbirali ibulebira lo ngago agali ogoni ibuoreda, lene.#Man 18.15-18; Yo 1.21; 2.11; 6.14

41Marume lalu, Mbirali Dabo Helenego ogoni íbu kaoreda, lene.

Marume lalu, Mbirali Dabo Helenego Galili dindi howa naibulebira.#Yo 1.46; 4.29 42Anduane Homogonaga mbugani lo ngago, Mbirali Dabo Helenego ibu handame haga kini Debidi aguanene holebira, lalu, Debidinaga dindi Bedelehemeni taba honolebira, lalu gilibu nga, lene.#2 Sml 7.12; Iba 89.3-4; 132.11; Yar 23.5; Mai 5.2; Md 2.5-6; Lg 2.4 43Wali agali bu hearume ani laga laga bialu Yasu ai kabe manda nabi howa talebu ki bini.#Yo 9.16 44Marume ibu minule manda binigo ti mbiralime gi yade halu mina nabi wahene.#Yo 7.30

Yu wali agali haru haga hearume Yasuhondo mini mbiraore nawi henego ogo

45Ani biyagola mamage haga agali biarume Yasu minule ibinigo mina nabi helalu Perisi agali hearubi loma binigo mo miaga haguane hearubi ti hearia dai bini. Dai biyagola tigua tihondo lalu, Agi biyagola wahalu ibu helalu ibirimibe, lene.#Yo 7.32

46Ani layagola mamage haga biarume ladai bialu lalu, Agalime nalagagodagua layago hale halu ibirima, lene.#Md 7.29; Mg 1.22

47Ani layago hale howa Perisi agalime ladai bialu, Ibugua tíbi mo guya haya handala lulu yalu ibirimibe. 48Ina Yu wali agali haru haga mbiramebi Perisi agali mbiramebi ibuhondo mini mbiraore wu hemaria handarimibe.#Yo 12.42 49Wali agali urunime Mosese heneyangi Mana lowini ngago manda nabi kago tihondo Ngode Datagaliwabehanda, Tandaga nama pobe, lolene wulebira, lene.

50Perisi agali mbira Nigodimusi Yasu hearia bamba penego ibugua ibuni aria biaruhondo lalu,#Yo 3.1-2 51Inanaga Mana lowini ngadagua mbirali ibugua biyadago hale nahe howa pani mia nalaramali, lene.#Man 1.16-17; 19.15

52Ani layagola tigua ibuhondo ladai bialu lalu, Í̱bi Galili howa ibini dege kebe. Anduane Homogonaga mbugani lo ngago handalu Ngode Datagaliwabe mana latagi haga mbira Galili howa ibulebira lalu gilibu ngaria handa walia naholeberego, lene. [53Ani lalu ti bibahende andaga purogo lene.#Yo 7.41-42

Currently Selected:

Yone 7: HUI

Highlight

Copy