Lugu 21

Wali dalo mbirame muni winigo ogo

(Maga 12.41-44)

1Yasuhanda handa a̱i̱ na̱i̱ bigi bialu hearia agali homogo hearume Anduane Homogonaga andaha muni wiagani muni wialu hearia hendene.#Mg 12.41 2Ani buwa wali dalo mbirame muni emeneore kuni kira toea mbira ale ibira halu hearia ibu de handa dege bini. 3Ani hondowa ibugua lalu, I̱na tí langerogo marume muni wiyaru emene lowa wali dalo yagibano ogome muni dewaore wiya.#2 Ko 8.12 4Marume homogoore howa maru tale buwa wiya. Wali dalo yagibano ogome mbira nayiore biruwa ibu tomo yolo bule yinigo bibahendeore wiai haya, lene.

Yasuhanda, Anduane Homogonaga anda gialo waholebira, lenego ogo

(Madiu 24.1-2; Maga 13.1-2)

5Yasunaga talima piaga marume Anduane Homogonaga anda handaya howa lalu, Anda baya buruguleore ege to̱le̱ timbuni hongoheme bidagoda. Mo yári bia karubi Ngode Datagaliwabehondo turu halu bame minida, lene. Ani layagola Yasuhanda lalu, 6Mbirale uru tígua hendedamigo ege to̱le̱ wia gimbu gimbu bima iraga karuni horo mbira ibulebirago ibirangi homane mbiraore winidagoria ngeladai nabi bibahendeore gialo ibira ibira biai holebira, lene.#Md 24.2; Mg 13.2; Lg 19.44

Mo ko holenebi mo tandaga holenebi wulebira, lenego ogo

(Madiu 24.3-14; Maga 13.3-13)

7Ibunaga talima piaga biarume lalu, Lawai haga-o ogoni angi bulebiragonaga ina langibe. Iname ala agi birane hondowa henge karulolene horo ha para hayada lolomabe, lene.

8Yasuhanda ladai bialu lalu, Marume tí mo hondo holigo mamage holene nga. Agali dewaoreme i̱naga mini lalu, Mbirali Dabo Helenego ibulebira lowinigo i̱ íbu kogoni, lalubi, Horo ha para haya, lalubi ibulebira. O laragoni hale nahalimu.#Md 24.4-5; Mg 13.5-6; Eb 5.6; 2 Te 2.3 9Wai timbuni tara tara bira, laragolabi, Dindi mbiraoreni talebu ki buwa mo ko hara, laragolabi hale howa gi nahalimu. Mbirale uruni ala ani bia bulebirago ani laragome horo hamaro bulene kawareore nga lalu ndo larago gi nahalimu, lene.

10Ibugua laabo halu lalu, Dindi mende mendela wai bia a̱i̱ na̱i̱ bialu gabumane tara tarala wai bia a̱i̱ na̱i̱ bialu holebira.#Md 24.6-7; Mg 13.7-8 11Dumbirumbi emene ndoore mo ko howa bialubi hina gari timbuniore pialubi warago timbuni ba gimbu bialubi dindi bibahendeha bulebira. Nahendene alebi mo gi timbuni holene tara tarabi hariha howa ibulebira. 12Uruni nabi howa marume tí minalu mo tandaga holebira. Ani buwa godi lole ngoai hagane andaruha minu yu puwa garabaya andaha helolebira. Ani buwa i̱naga mini yu tiga bu kamigo kini karubi gabumane haru haga karubi karia tí haru pu helolebira.#Md 24.9; Mg 13.9 13Ogoningi Bi Mana Debene lamilimulonaga henge wulebira. 14Minu yalu poragola miniha mbira agi ladai buledabe lolenaga ala mini dege dindi ho nahalimu.#Md 10.19; Mg 13.11#Lg 12.11-12 15Irane i̱na tínaga ne hambuha howa bi lolenebi miniha manda bulenebi ngerogola tí waitigi karume bi ogoni mo wahabi hale nahabi nabulebira.#Ab 6.10 16Tínaga aba ai̱yalamebi hamenemebi damenemebi nenegemebi agali maruhondo tí minu mialu tí maru homelo bolebira.#Mai 7.6; Md 10.21-22; Mg 13.12; Ab 7.59; 12.2 17Tígua i̱naga mini yu tiga bu kamigo hondowa wali agali bibahendeme tí handa tara holebira.#Md 10.22 18Anigo tínaga haguaneni mandari kamigo homane mbiraoreorebi tongolo wa naholebira.#1 Sml 14.45; Md 10.30; Lg 12.7 19Tí hongo howa ema nabi ho ununu lowa tíni pele mialu holeberami, lene.#Md 10.22; 24.13; Hi 10.36

Yasuhanda, Yarusaleme mo ko holebira, lenego ogo

(Madiu 24.15-21; Maga 13.14-19)

20Tígua handalu kamira ami agali dewaoreme Yarusaleme ho mabu bu karia hondowa mo ko holene kaware wiarua manda bilimu.#Md 24.15; Mg 13.14 21Ani buwa Yudiani karume hari hombene ngaruha hondo yalu gerai polene wulebira. Yarusaleme ogoriani padarume ibida piai holene wulebira. Ani buwa dindi udura amura ale padarume Yarusaleme ogoniha anda ibulene nawulebira. 22Ogonigo horo uruni Pani Nolene Hororu wiragola Anduane Homogonaga mbugani bi lo ngadagua lola holebira.#Man 32.35; Yar 5.29; 46.10; Dan 9.26-27; Hos 9.7 23Horo uruningi wali gali bere bedarubi gali andu mialu bedarubi dara timbuniore holene nga. Ani buwa dindi ogoria mo ko holene timbuniore ibira halu Ngode Datagaliwabehanda wali agali uruni pani nelo wia holebira.#Md 24.19; Mg 13.17; 1 Ko 7.26 24Ani buwa wali agali maru wai bulene ayu tibume bo wahai halu wali agali maru garabaya wali agali haru poradagua bialu dindi tara tararu kaundiaoreha haru polebira. Ani buwa Ngode Datagaliwabe manda nabi hope hene karume Yarusaleme karulo halu Ngode Datagaliwabehanda horo hairi holene pongo bo winingi hairi helo helolebira, lene.#Esr 9.7; Iba 79.1; Ais 63.18; Lm 11.25; Mo 11.2

Agali Hole Ibiyago lone ibulebira lenego ogo

(Madiu 24.29-31; Maga 13.24-27)

25Ani lowa Yasuhanda laabo halu lalu, Ninibi egenibi yapibiyanibi manane tara nahendene ale bulebira. Ani biragola dindini howa iba solowara timbuniore bedagome ta̱la̱ amu nana bima u lama ibiragola wali agali bibahende dindi tara tarani karume mogo taraore lowa gi timbuni holebira.#Iba 46.2-3; 65.7-8; Ais 13.10; Ese 32.7; Yol 2.31; Md 24.29; 2 Pi 3.10-12; Mo 6.12-13 26Hari daligaha hongo haga karu tarame mo ema bia haragola wali agalime hondowa dindi bibahendeha agua bulubadabe lowa gi halu mogo timbuniore lowa odo pebe bulebira. 27Ani biragola Agali Hole Ibiyago hongo timbuniore holenebi wá taraore holenebi heba hari beralibaha ha pani halu ibulebira.#Dan 7.13; Md 24.30; 26.64; Mo 1.7; 14.14 28Mbirale uruni tongo hinalu biragola tígua heyalu handa daga ho halimu. Irane tínaga pele mulene abale ha para haragoni, lene.#Lm 8.19; 8.23; 13.11

Yasuhanda pogenaga te lenego ogo

(Madiu 24.32-35; Maga 13.28-31)

29Ani lowa Yasuhanda bi yobage ogo tihondo lamialu lalu, Poge kagobi ira maru karubi manda bilimu. 30Yuni gahenge mabirago hondowa ni poboyogobi dolene tu kawareda manda beramili. 31Ogonidagua dege tígua mbirale uruni bigi biragola handalu kamiria Ngode Datagaliwabenaga Handame Ho Holene áyu dege ibulebira manda bilimu.

32Ogoninaga tí manda biaabo halimulo wali agali áyu kamiru nahome ogobi dege dege kamiore mbirale uruni bibahende bulebirago laro. 33Hari daligabi dindibi ereba hai holebira. I̱naga bi mana dege ereba nahe wiaabo holebira, lene.#Iba 102.26-27; Ais 40.8; Lg 16.17; 1 Pi 1.25

Mamage howa de hondo holene nga, lenego ogo

34-35Mamage howa de hondo holene nga. Tomo timbuni dawa naabo halubi iba na gimbu biaabo halubi dindini mbirale ngaru mo te te hangu bialubi nahalimu. Ani bialu harimiyagua Horo ogoni tagira ibirangi gono ngagoha poragola dagadagua ti abale doligo. Horo ogoni wali agali dindi bibahendeha kagoria tagira ibulebira.#Md 24.48-50; Mg 4.19; Lg 17.27; Lm 13.13; 1 Te 5.3; 5.6; 1 Pi 4.7#1 Te 5.2; 2 Pi 3.10; Mo 3.3; 16.15 36Urunidagua biragola horo bibahendengi tígua bayuwa hongo ho holebi Agali Hole Ibiyago deni holebi mamage howa Ngode Datagaliwabehondo bi laabo halu holene nga, lene.#Md 24.42; Mg 13.33; Lg 18.1; Eb 6.13; Mo 6.17

37Horo uruni bibahendeni Yasu ibu Anduane Homogonaga andaha mana lawai halu biraabo howa alendo haya handala Hari Olibe weagoria puwa mbiraga ogoniha palima piaga hene.#Lg 19.47 38Wali agali bibahende hearume horo bibahendengi egerebagiore Yasuhanda bi mana lawai hayago hale hole Anduane Homogonaga andaha ibaabo haga hene.

Currently Selected:

Lugu 21: HULIDC

Highlight

Copy