Yone 5

Yasuhanda agali mbira mo dabi henego ogo

1Ani bialu howa Yasu ibu Yarusalemeni Yu wali agali ti bibahende lotu lolebi tomo nolebi ngoai hagane horongi ngoai hayagoria pene. 2-4Yarusalemeni wai pabe haraba timbuni mbira mini Nogo Sibi Panga laga heago kawareni iba emene mbira berene. Hiburu bi lalu iba ogoni mini Bedeseda laga wini. Anda mbira haraba duria wi heagoria wali agali de koheru ge koheru kuduguheru dewaore iba ogoni angeni biru wini. [Mbiruore uliningi Anduane Homogonaga dahuliyalime daluwa iba ogoni mo lumulumu bigi bia haga berene. Lumulumu bialu kagoha ala pora birago ibu mo dabi haga wini. Ani biagago manda buwa wali agali urunime abale pora bule lowa nende bia ho biraga biaga wini.] 5Agali mbira ibu warago bo wiane dege mali pira tebirani halira (38) pene wiago 6Yasu ibu de handalu ibu bambaore howa warago bo wiaabo heneda manda buwa ibuhondo lalu, Í̱ dabi holene hamelo bedebe, lene.

7Ani layagola ibugua ladai bialu lalu, Agali-o iba lumulumu bialu kaore i̱ mo yalu puwa ibira holene mbira nahedagola wene pialu koore dege maru ti abale pora biaga, lene.

8Ani layago hale howa Yasuhanda ibuhondo lalu, Heyalu í̱naga tamunguru mo yalu pu, lene.#Md 9.6 9Ani layangiore agali warago bo wiraligo mo dabi haya handala ibunaga tamunguru mo yalu pene.

Agali ogoni mo dabi hayadago Sabada horongi mo dabi hene. 10Agali dabi hayagome ibunaga tamunguru mo yalu piyadago Yu wali agalinaga haguane hearume hondowa ibuhondo lalu, Áyu Sabadangidago inanaga Mana lowini ngagome mbirale mbira yalu polene nawi longago í̱naga tamunguru yalu porego agibe, lene.#Har 20.10; Neh 13.19; Yar 17.21; Md 12.2; Mg 2.24; Lg 13.14; Yo 9.14

11Ibugua ladai bialu, I̱ mo dabi hayadago ibugua í̱naga tamunguru mo yalu pu laya handala yalu porogoni, lene.

12Ani layagola tigua lalu, Í̱naga tamunguru mo yalu pu layadagoni agali aiwa layabe, lene.

13Agali dabi hene biagome lalu, I̱ aiwa mo dabi hayabe manda nabido, lene. Yasuhanda agali biago mo dabi halu ibu wali agali dewa bu heagoha piyiyagola agali biagome agohayagi piyabe toba howa ani lene.

14Maha Yasu ibu Anduane Homogonaga anda tamuha pialu hearia ibugua agali biago hearia de hondowa ibuhondo lalu, Áyu í̱ dabi ho kegonigo mani mo ko holene mbira í̱ha wuligo mana ko nabi bayale hangu bialu habe, lene.#Yo 8.11

15Ani layago hale halu agali biagome puwa Yu agali haguane hearuhondo lalu, I̱ mo dabi haya larugo Yasuhandaya, lene. 16Ani layago hale howa Yu agali biarume, Sabada horongi nabulene winigo birida, lowa Yasu mo tandaga halu hene.#Md 12.14 17Ani bialu heagola Yasuhanda ladai bialu lalu, I̱ Abahanda biabe biaabo halu kadagua i̱nabi bialu kogoni, lene.#Yo 9.4; 14.10

18Yasuhanda bi ani layagome Yu wali agalinaga haguane biaru ti mo kebaore hene. Keba henego Yasu ibugua Sabada horongi puguayagonaga hangu ndo. Ngode Datagaliwabe i̱ Aba layago mine halu Ngode Datagaliwabela iya ogobi labolabo kaba lalu laya manda buwa tigua ibu homelo bo wahole manda bialu hene.#Md 26.4; Yo 7.1; 7.19; 7.30; 10.30; 10.33; Pb 2.6

Yasu ibugua ibu abahanda biradagua biagago ogo

19Ani bu heagola Yasuhanda tihondo lalu, I̱na tíhondo heneneore langerogo. Igini ibuni hangume manda bialu mbira nabiaga. Ibu Abahanda birago hondowa ibugua biradagua hangu bulebira.#Yo 5.30; 8.28-29; 12.49; 14.10 20Abahanda ibu Igini gubalini timbuniore howa ibugua birago bibahende ibu Igini walia haga. Ibu Iginime biabe hongohe taraore áyu birane handarimigobi ndo timbuniorebi bilo walia holebira. Anidagua birago hondowa tí mogo loleberami.#Md 3.17; Yo 3.35; 2 Pi 1.17 21Abahanda wali agali homenego mo heya halu holene gahenge miagadagua ibu Iginimebi ani dege bialu holene gahenge ibuni mua biragohondo mulebira.#Man 32.39; 1 Sml 2.6; 2 Kin 5.7; Lg 7.14; 8.54; Yo 11.25; 11.43; Lm 4.17; Eb 2.5 22Aba ibunime wali agalime biragonaga daba ki nabulebira. Ibu Igini hangume bibahende daba ki bilo heleda.#Md 11.27; Yo 3.17; 5.27; 9.39; Ab 10.42; 17.31; 1 Pi 4.5 23Ani heledago irane wali agali bibahendeme Abanaga mini mo yaraga hagadagua ibu Igininaga minibi mo yaraga helo heleda. Mbirali Igininaga mini mo yaraga nahe kagome Aba ibugua i̱ pu layagonaga minibi mo yaraga nahaga dege ka, lene.#Pb 2.10-11; 1 Yo 2.23

24Tíhondo heneneore laro. Wali agalime i̱naga bi larogo hale halu bialu kagobi i̱ pu layagohondo mini mbiraore wialu kagobi ogoni ibu haabobo holene yu halu ibugua biyagonaga dabolene nawulebira. Ogoni ibu ala homaganehayagi henego áyu haabobo holenehayagi porabu ede ho ka, lene.#Yo 3.15-18; 6.40; 8.51; 1 Yo 3.14

Homaliha padarume Ngode Datagaliwabe Igininaga bi hale howa heyu holebira, lenego ogo

25Yasuhanda laabo halu lalu, Tíhondo heneneore laro. Horo mbira tagira ibulebira lowinigo áyu tagira ibiragonigo ibiragola homene homaliha padarume Ngode Datagaliwabe Igininaga bi hale holebira. Hale hararume heyulebira.#Yo 5.28; Eb 2.1; 2.5-6; Kl 2.13 26Aba ibuniha holene tene ngagobi Igini ibuhabi holene tene ngeleda. 27Ani buwa Ngode Datagaliwabehanda wali agali biraligonaga dabolene ibu Igini ibu Agali Hole Ibiyago ka lowa ibugua ibuhondo hongo mini.#Dan 7.13-14; 7.22; Yo 5.22; Ab 10.42; 17.31 28Áyu o larogo hale howa mini mogo nalalimu. Horo tara tagira ibulene kaware ngago tagira ibirangi homaliha hora heneru bibahendeme ibunaga bi hale halu 29heyalu tagira ibai holebira. Bayale bialu haga heneru heyalu ti haabobo holenehayagi pu hadaba lolebira. Ko bialu haga heneru heyalu ti baba godi lowa pani nolenehayagi pu hadaba lolebira, lene.#Ais 26.19; Dan 12.2; Md 16.27; Yo 6.40; Ab 24.15; 1 Ko 15.52; 1 Te 4.16

Yasu ibu Ngode Datagaliwabe Iginiore ka lenerume bi lenego ogo

30I̱ni manda bialu agua labehedago lowa mbira nalaruli. I̱ Abahanda, Agua lolene nga, lalu langirago hale howa hangu laruli. Dabolene ngadaguaore lo tiga biruli. I̱ni hameme mbira bupe halu nabiruli. I̱ pu layagome hame ledadagua hangu biruli.#Md 26.39; Yo 4.34; 5.19; 6.38

31I̱na agua biruli lalubi i̱ ogobi ko lalubi koyagua nde henene ndo lare lolene nga.#Yo 8.13-14; Mo 3.14 32Mbirale i̱na biaganego agua biaga lalu mbiralime lamialu kago henene biruligobi tiga tiga lamialu ka manda bu ko.#Md 3.17; Yo 5.36-37; 8.18; 1 Yo 5.6-9 33Tínaga bi lamule piagarume Yone hearia piyagola ibugua tihondo bi lamiyagoni henene hangu lamiya.#Yo 1.19-34; 3.27-30; Eb 2.8; Ta 3.5 34I̱na agalime i̱ kogobi henene ka lelo manda buwa ndo tí pele ngulenaga manda buwa laro. 35Yone ibu lamu hale ale dalu howa wá timbuni hagadagua ibuni wá ho heago handarimingi turu ho harimi.#Md 13.20-21; Mg 6.20; 2 Pi 1.19 36Yonehanda i̱ tíhondo emene walia haya. I̱ Aba ibunime mo hongo haragola biabe buliya ngiyago bialu kogome i̱ tíhondo timbuniore ogonime walia haragoni. Ogoni hondowa i̱ Abahanda i̱ pu layagola ibinida manda bibehe kami.#Yo 3.2; 10.25; 10.38; 14.11; 1 Yo 5.9 37I̱ Aba i̱ pu layago ibunime bi i̱ henene kogobi lalu ka. Tígua ibunaga bi hale nahene halu ibunaga denguibi nahendene kami.#Md 3.17; 17.5; Mg 1.11; Lg 3.22; Yo 5.32; 6.27; 8.18; 1 Ti 1.17; 1 Yo 4.12 38Ibugua pu layagola ibiyagohondo mini mbiraore nawi kamigome ibunaga bi mana tí bu miniha yu tiga nabi kami. 39Anduane Homogonaga mbugaha haabobo holene handa walia hole manda buwa daga laabo haramiligo nde Anduane Homogonaga mbugani lo ngagome i̱ tíhondo walia haga nga.#Man 18.15-18; Lg 16.29; 24.27; 24.44; Yo 5.46; Ab 13.27; 17.11; 2 Ti 3.15; 1 Pi 1.10-11 40Ani bidago áyu i̱na tíhondo holene gahenge nguliya i̱ kogoria ibulene manga halu kami.#Yo 1.11; 3.19

41Agalime i̱naga mini mo yaraga helo hame lowanaga ndo laro.#Yo 5.34; 1 Te 2.6 42Anigo i̱na tínaga bu miniha kamigobi manda bidogo tígua Ngode Datagaliwabehondo gubalini holene tíha nawiore kamilo manda bido. 43I̱ Abanaga minini howa íbu kogo tígua i̱hondo turu halu ina hami̱ya ibinida lowa i̱naga bi yamia nabi kami. Agali tara mbira ibuninaga minini howa ibiyagua tígua ogoni ibunaga bi larago turu halu ina hami̱ya lowa abale yamuleberami.#Md 24.5; 24.24 44Ngode Datagaliwabe mbiraore hangu kago ibugua tínaga mini mo yaraga helo ha nabi howa tínime tíninaga mini mo yaraga haga haga bialu kami. Ani bialu haabo howa i̱hondo mini mbiraore agua wuleberamibe.#Yo 12.43; Lm 2.29 45Tígua bialu kamigoni agua biya lalu manani dabelo i̱na i̱ Aba lamulebiralo manda nabilimu. Mosesehondo tígua mini dunubia ho harimigo ogoni ibugua tígua bialu harimidagoni agua biya lalu manani dabelo i̱ Aba lamulebira.#Man 31.26-27; Lm 2.12 46Iname Mosesenaga bi hale howa mini mbiraore wu kama, lalu kamigo ibuhondo mini mbiraore heneneore ngamile nde i̱naga bi hale howa i̱hondobi mini mbiraore ngamile. Ibugua i̱ lalu bi te gilibu wini ngagoni.#Pig 3.15; Man 18.15-18; Yo 1.45; Ab 3.22; 26.22 47Ibugua i̱ lalu gilibu wini ngago hondowa mini mbiraore nawi kamigoria i̱naga bi hale halu mini mbiraore agua wuleberamibe, lene.#Lg 16.31

Currently Selected:

Yone 5: HULIDC

Highlight

Copy