Psalmyn 69
69
EVENING PRAYER.
PSAL. 69.
Salvum me fac.
1Saue mee, O Yee:
son ta ny ushtaghyn er jeet stiagh, dy-jarroo gys m’annym.
2Ta mee cummit shickyr ayns y laagh dowin, raad nagh vel grunt erbee:
ta mee er jeet ayns ushtaghyn dowiney, myr shen dy vel ny thooillaghyn roih harrym.
3Ta mee skee lesh geam, ta my scoarnagh chirrym:
ta my hoilshey dy m’ailleil son farkiaght choud er my Yee.
4Adsyn ta dwoaie oc orrym gyn oyr, t’ad ny sliee na renaigyn my ching:
adsyn ta my noidyn, as bailliu mish ta neu-chyndagh y stroie, t’ad niartal.
5Deeck mee daue my reddyn nagh ren mee rieau y ghoaill:
Yee, ta fys ayd er my ônid, as cha vel m’oiljyn kellit voïds.
6Ny lhig dauesyn ta treishteil ayn-yds, O Hiarn Yee dy heshaghtyn-caggee, v’er nyn naaraghey son y chooish ayms:
ny lhig dauesyn ta dy dty hirrey, v’er nyn goyrt mow my hrooid’s, O Hiarn Yee dy Israel.
7As cre’n-oyr? er y choontey ayds ta mee er hurranse oghsan:
ta nearey er choodaghey m’eddin.
8Ta mee myr dooinney joarree da my vraaraghyn:
dy-jarroo myr fer-quaagh da cloan my vayrey.
9Son ta’n graih jeean t’aym da dty hie dy-jarroo er ghuinney mee gys y chree:
as ta ny oghsanyn ocsyn hug scammylt dhyts, er duittym orryms.
10Ren mee dobberan as smaghtaghey mee hene lesh trostey:
as va shen er ny hyndaa gys my scammylt.
11Hug mee orrym aanrit-sack myrgeddin:
as ren ad craidey moo’m.
12T’adsyn ta soie ’sy ghiat loayrt m’oï:
as ta’n vooinjer veshtal jannoo ronneeaght orrym.
13Agh, Hiarn, ta mee jannoo my phadjer hoods:
ayns traa nee oo soiaghey jeh.
14Clasht rhym, O Yee, ayns earroo dty vyghin:
dy-jarroo ayns firrinys dty haualtys.
15Gow mee ass y laagh, nagh jem fo:
O lhig dou ve er my livrey vowesyn ta feoh oc orrym, as ass ny ushtaghyn dowin.
16Ny lhig da ny thooillaghyn-ushtey mee y vaih, cha-moo lhig da’n diunid mee y luggey seose:
as ny lhig da’n ooig e beeall y yeigh orrym.
17Clasht rhym, O Hiarn, son ta dty chenjallys-ghraihagh gerjoilagh:
chyndaa uss hyms cordail rish earroo dty vyghinyn.
18As ny follee dt’eddin veih dty harvaant, son ta mee ayns seaghyn:
O jean siyr, as eaisht rhym.
19Tayrn er-gerrey gys m’annym, as saue eh:
O livrey mee, kyndagh rish my noidyn.
20T’ow uss er hoiggal m’oghsan, my nearey, as my vee-onnor:
ta my noidyn ooilley ayns dty hilley.
21Ta dt’oghsan er vrishey my chree, ta mee laane dy hrimshey:
yeeagh mee son fer ennagh dy ghoaill chymmey orrym, agh cha row dooinney erbee; cha-moo hooar mee unnane erbee dy my gherjaghey.
22Hug ad dou gall dy ee:
as tra va mee pa-agh, hug ad dou vinegar dy iu.
23Lhig da’n voayrd oc ve er ny yannoo ny ribbeh dy ghoaill ad hene lesh:
as lhig da ny reddyn lhisagh y ve son y foays oc, ve dauesyn oyr tuittym.
24Lhig da ny sooillyn oc ve er nyn gholley, nagh jean ad fakin:
as jean uss dy-kinjagh yn dreeym oc y chrommey sheese.
25Deayrt magh dt’eulys orroo:
as lhig dty yymmoose hrome ad y ghreimmey.
26Lhig da’n ynnyd-vaghee oc ve follym faase:
as gyn dooinney erbee dy chummal ayns ny cabbaneyn oc;
27Son t’ad jannoo tranlaase ersyn t’ow er woalley:
as ta’n taggloo oc kys oddys ad adsyn y heaghney t’ow uss er lhottey.
28Lhig daue tuittym veih un pheccah gys peccah elley:
as gyn cheet stiagh gys dty ynrickys.
29Bee ad er ny chrossey ass lioar ny bio:
as cha bee ad scruit mastey’n vooinjer chairagh.
30Er my hon’s, tra ta mee boght as ayns trimshey:
nee dty chooney, O Yee, mish y hroggal seose.
31Nee’m Ennym Yee y voylley lesh arrane:
as ver-ym ard-voylley da lesh toyrt-booise.
32Nee shoh myrgeddin yn Chiarn y wooieys:
ny share na dow ta eairkyn as yngnyn er.
33Ver y vooinjer imlee tastey da shoh, as bee ad gennal:
shir-jee lurg Jee, as bee’n annym eu bio.
34Son ta’n Chiarn clashtyn ny boghtyn:
as cha vel eh soiaghey beg jeh e phryssoonee.
35Lhig da niau as thalloo eh y voylley:
yn faarkey as ooilley ny ta gleashaght ayn.
36Son nee Jee Sion y hauail, as troggee eh ard-valjyn Yudah:
dy vod deiney vaghey ayns shen, as eh y ghoaill ayns nyn gummal.
37Nee sluight e harvaantyn myrgeddin y ghoaill eh ayns eiraght:
as adsyn ta graihagh er e Ennym nee ad vaghey ayn.
Currently Selected:
Psalmyn 69: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
