Psalmyn 26
26
PSAL. 26.
Judica me, Domine.
1Bee uss my vriw, O Hiarn, son ta mee er n’ymmyrkey mee hene gyn loght:
ta my varrant neesht er ny ve er y Chiarn, er-y-fa shen cha duittym.
2Feysht mee, O Hiarn, as prow mee:
ronsee my veeaghyn as my chree.
3Son ta dty chenjallys-ghraihagh kinjagh roish my hooillyn:
as nee’m gimmeeaght ayns dty irrinys.
4Cha vel mee er vaghey marish sleih foalsey:
cha-moo nee’m sheshaght rish y vooinjer volteyragh.
5Ta feoh er ve aym er chymsagh cooidjagh yn drogh ’leih:
as cha soie-ym mastey ny mee-chrauee.
6Niee-ym my laueyn ayns ônid, O Hiarn:
as myr shen hem gys dty altar;
7Dy voddym fockley magh yn coraa dy wooise:
as soilshaghey ooilley dty obbraghyn yindyssagh.
8Hiarn, ta mee er ve graihagh er coortyn dty hie:
as ynnyd cabbane-agglish dty ooashley.
9O ny jeigh seose m’annym marish ny peccee:
ny my vioys marish y vooinjer foalley;
10Ayns ny laueyn oc ta mee-chairys:
as ta nyn laue yesh laane dy yiootyn.
11Agh er my hon’s, nee’m gimmeeaght gyn loght:
O livrey mee, as bee myghinagh dou.
12Ta my chass shassoo dy kiart:
ver-ym moylley da’n Chiarn ayns chaglym cooidjagh y phobble.
Currently Selected:
Psalmyn 26: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
