Osey 2
2
1A:dowali iyanigwala dima la, Ami, na:dowali luma. A:pite a:dowali sasawali dima la, Luyama, na:dowali awe iwaleda:na.
Islael wate sosawe wisa egete gwama sa:leyana gi
2Da:dowali agi anadela, oba anadela
Gi ase oba pa: na:dowali susa:gi,
Na: pa: obape dalagi.
Awapa oba ya:ma dala bilibilinapa tao lotobada: gi obape sosokole wama milamalelo.
A:na:pi obape omo saki tepa tepala pa: sogolale ela gi wama elatela gi awapa. 3Na: obape kaliko dapoma:malowa obate abadu elamalale,
A:pite oba kakana lopala bininapa minamalowa obate kowabi tepala eyana kadepala dololoyana gi a:na:pi.
Na: oba a:napa wa a:na:pi minamalowa.
Na: oba kadepa ila kalekalenapa wa a:na:pi minamalowa
A:pite ne oba wi iyawa gabile lapolamalowa.
4Na: na:pe awe iwalela gi obape segedima pa:pa kekeminamalowa
gi ase obai dala bilibilinapa susa:gipe sege.
5Obaimunu agite eta:mi dalada waminano
obai pisala gile pipiladiyana.
Obate layana, na: iwina:mininina dala gwaladamamalowa.
Obaite na:pe bayata: wita: napinini,
sipi konata: olib oweleta: nida: lopalata: napinamadili.
6Enobala na: obape nabidi tokobe olale kakamunamalowa.
Na: kakala bili lapilamalowa obate nabidi pa:pa tila gima.
7Obate oba iwiminina dala datate welamalelo ameta obai pa:pa atida:malelo.
Obate obai uwalodolote pa:pa tida:malelo.
Amale obate lalamalelo,
na: na:dowali dalagidima gwama welamalowa enoba lopenapa gi a:na:pi,
gi ase na: obada sa:kelada eloyamana.
8Obate na: pa:pa sa:lele tina:yana,
ne konata: waen kanika:ta: a:pite olib oweleta: oba dima apuloyamana gi,
a:na:pi silibata: gaolodota: kabigibegale apiladele oba sa:kelaminoyamana,
ameta obaite Ba:il ididalidima dapiliyana.
9Enobala na: kon ulama kakalewela wama auwaminamalowa,
a:pite na:dowali kanika:napa adami wi sa:lewela.
Na: na:pe sip konata: na:pe kalikota: gwama alolamalowa,
a:pite oba lopala bininapa elamalelo obape abadu kawapila gima.
10Enobala obape pa: awapada:na gi kekema milamalowa
oba iwiminetediliyana dalimunu tao luliyabala.
Eta lumagite na:pe mai gobala oba pa:pa gwalilamalelo.
11Na: obape sa:kela tetepa waelabeyagai ekeda:minamalowa,
gogo gobana balelada:mina gaogoda:mina gita: obape kanika:da:na samoso gita:,
obape sabadi kadepa gita: obape omoniyana tepala gaomina tepata:.
12Obape tokobe adamita: lepade adamita: dapolamamalowa.
Enobai adami obate iwida:munoyana dalate wisa gima oba dima apiliyana.
Na: obai da:niya da:minamalowa,
a:pite wa gobana anekekeyapote naenamadili.
13Na: ya:mai kadepa gima oba dima wisa atamalowa,
enoba Obate ilale oloda:na sa:lele ipowada:na lopala Ba:il ididalidima apuloyana.
Obate obaya obama mai mudita: tulikiyapota: kakamiyana,
amale oba iwiminetediliyana dala wapikile gwaladamate weleyana,
obate ameta na: gi a kobele ena:yana.
LOD enoba gi lalelo.
14Enobala na: oba giminamalowa,
na: oba a:napa wama lopama:te welamalowa
a:pite oba dima nagalale mamana:mina gilala ladolamalowa.
15 #
Yos 7:24-26
Amale na: obape ga:lip tokobe adami egada gwama apulamalowa,
a:pite na: amale Ako golo goba enamada:le atolamina ogosa minamalowa.
A:ma enoba wala obate dili gwaledolamalelo, obate apela kanika: tepala eloyana gi a:na:pi.
Enoba obate Isipt wale wama saoyana kadepa a:na:pi.
16 LODote lalelo,
ya:ma kadepala, a: na: pa:pa awana:minamalelo, a: na:dowali dalagi.
Ameta a: lalamalelo, na:pe apeyanapa. #2:16 Ibulu gilalale apeyanapa enoba na:pe ba:il, ba:il enoba ididalimunu gagi. Ka:in lumumunu ididali.
17Na: Ba:il ididalimunu gagi omona: gi obape magata pile wama galaminamalowa.
Obaimunu gagi pa:pa gwama domonamalelo, amowa gima.
18A:ma kadepala na: obaida gi kakalaminamalowa,
wa gobala edelina anekekeyapota: a:pite sidile puwida:midilina puwida:ta:
a:ile wamidilina anekekeyapota:.
Na: gagita: soba ta: gwama giwa:la gita:
ya:ma wala ekeminamalowa,
obaite ala gobala dowatelamada:le.
19Na: a:da gimalada: gile elomina tepala elamalowa.
Na: sogola gita: gibalama gi bamina gita: gobale a:da gimalada: elamalowa,
gwama awe iwalela nagala gita:le.
20Na: a: menagi dima gimala:da elamalowa,
a:pite a: LOD gi itawa bapi elamalelo.
21A:ma kadepala na: gilala wisa elamalowa,
LOD enoba gi lalelo.
Na: sawisakanapimunu gilala wisa elamalowa,
a:pite obaite a:ibaigama gilala wisa eda:madili,
22a:pite a:ibaigate kona taope gilala gima, gima kamida:madili
adami wi kanika:ta: a:pite oweleta:.
A:pite obaite Yeseleledima gima kamida:madili.
23Na: gima na: oba a:ma a:ima toda:malowa.
Na:pe awe iwalela kekeminamalowa ne Lo-Luyama lumagige layamana lumagidima, #2:23 Ibulu gilala gobale Lo-Luyama a:goba gi pa: na:pe awe iwalelanapa.
A:pite ne Lo-Ami gagi omona:yamana lumadima na: lalamalowa da: na:pe luma #2:23 Lo-Ami a:goba gi pa: na:pe luma
A:pite obaite lalamadili, a: enoba sa:dowali God.
Currently Selected:
Osey 2: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.
