Luki 6

Sulen lɔ́gɛ́ la ko

1Sulen lɔ́gɛ́ do tɔ, Isa nun a la talibenu ka sɛnɛ donu tɛma takuntu. A la talibenu ka tɔnsɛ donu kentun anu ka a tugutugu anu bole tɔ, anu ka wo kole ɲimi. 2Wo mata Farisi donu ɲala. Anu ka a fɔ talibenu ye: «Koe min be latɔnden sulen lɔ́gɛ́, wo be wo mala fenna?» 3Isa ka anu jaabi, a ko: «Dauda ka min ma, kɔnkɛ to ka a nun a kafuɲɔgɛnu bita, wo ma wo karan ba? 4Wo ka a ma, Dauda donta Ala la boŋɛ tɔ, a ka dɛgɛ saniyandeŋɛnu jigan, a ka a dɔmɔ, a ka do dii a kafuɲɔgɛnu tugun ma. Adun, wo dɔmɔ koe bele dagɛren mɔgɔ yo ye, fɔ sarika lakelanu dɔrɔn.» 5Isa mɛn ka a fɔ anu ye: «Nde Adamadeŋɛ mu sulen lɔ́gɛ́ tige le la.»

Mɔgɛ bolo fagareŋɛ lakendeya koe

6Awa, sulen lɔ́gɛ́ do, Isa donta kawandi ma boŋɛ tɔ, a be mɔgɛnu kawandila. Kaye do be ɲɔ, a bolo ɲinma bole be fagaren. 7Farisinu anun sariya karamɔgɛnu be Isa makɛnkɛnna ka a si mɔgɛ lakendeya sulen lɔ́gɛ́, alako anu ni a masɔtɔ anu ni a lajarabi. 8Kɔnɔ Isa ka anu la mira lɔn. A ka a fɔ wo kayi bolo fagareŋɛ ye: «Wuli, i ni sɔ mɔ tɛma yan.» Wo butɔ, a wulita, a sɔta. 9Isa ka a fɔ anu ye, a ko: «N ni wo maɲininka, fen be dagɛren de sulen lɔ́gɛ́: mɔgɛ ni ko ɲinma ma ba, ka a ni ko koroŋɛ ma; a ni nɛ lakisi ba, ka a ni nɛ bɔɔ?» 10A ka a ɲa lataga a bɛ ma dɔndɔ dɔndɔ, a ka a fɔ wo kaye ye: «I bole lafonti.» A to ka wo ma, a bole mɛn takendeyata ken. 11Wolo ka a ma, anu dumɛnta koola han anu mafuta, anu tota kumala ɲɔgɔn ye, anu si fen min ma Isa la.

Isa la kiila tan nun fila masubɛ koe

12Wo lanuma, Isa bɔɔta, a tagata kɔnkɛ tɔ, Ala matarandula, a ka sue bɛ ban mamataraŋɛ la. 13Ɲɔ to kɛnɛta, a ka a la talibenu kele a kɛnna, a ka mɔgɔ tan nun fila masubɛ anu tɔ, a ka wonu tɔgɛ sa «kiilanu». 14Wo mɔgɔ tan nun fila tɔgɛ le mu ka: Simɔn, Isa ka min tɔgɔ sa Piyɛri, anun a dɔgɔ kayima Andire; Yaguba nun Yaya; Filipu nun Baritelemi; 15Matiyu nun Tomasi; Alifa la den kayiren Yaguba nun Simɔn, a be fɔla min ma Kunkala; 16Yaguba la den kayiren Judasi; anun Judasi Isikariyoti, min mata Isa janfala la.

Isa la mɔgɔ lakendeya koe

17Isa nun a la kiilanu jigita kɔnkɛ la, a tagata sɔ dugu dala kanyareŋɛ tɔ. A la talibe siyama be ɲɔ, jama banba tugun be ɲɔ kabɔɔ dula siyama tɔ. Donu be bɔɔren Darisalamu, donu be bɔɔren Juda duge saa tɔɛnu tɔ. Donu tugun be bɔɔren Tiiri nun Sidɔn jamanɛnu tɔ, minnu be ba dala. 18Anu bɛ be naren Isa kulɛ lamɔɛdula, anun a ni anu lakendeya anu la bande ma. Jinna koroŋɛ be minnu tɔɔrɔren, wonu kendeyata. 19Jama bɛ be katala anu ni maga Isa la, bayi a sɛnbɛ be walila mɔgɛ lakendeya koe la, a ka anu bɛ lakendeya.

Hɛra nun tana

20Wo kɔma, Isa ka a ɲa sɔ a la talibenu la, a ka kuma da bita, a ko:

«Wole fondobɔnɛnu,

hɛra be wo ye,

bayi Ala la mansabaya nɛɛma bata ma wole tɛŋɛ la.

21Kɔnkɛ be wole minnu la bi,

hɛra be wo ye,

bayi wo si naa fa le.

Wole min be dila bi,

hɛra be wo ye,

bayi wo si naa jele le.

22Mɔgɛnu tini wo kɔn wagate min tɔ,

anu ni wo bee,

anu ni wo fɛɛya,

ka wo tɔgɛ tiɲa nde Adamadeŋɛ la ko la,

hɛra be wo ye.

23Wo ni sɛɛwa wo lun,

wo ni tun nun sɔrɔŋɛ ma,

bayi wo si baraji banba sɔtɔ le arijanna.

Wo ni a lɔn, minnu ka wo ko koroŋɛnu ma wo la,

wonu benbanu ka nabiyonmɛnu tɔɔrɔ ɲɔgɔnna le.

24Kɔnɔ wole fondo tigenu,

ɲagankata be wo ye,

bayi wo ɲan bata ban wo la hɛra sɔtɔla.

25Wole minnu be faren bi,

ɲagankata be wo ye,

bayi wo si naa kɔnkɔ le.

Wole minnu be jelela bi,

ɲagankata be wo ye,

bayi wo si naa suunu le wo ni di.

26Mɔgɛ bɛ be wo tɔgɔ ɲinma fɔla wagate min tɔ,

ɲagankata be wo ye,

wonu benbanu tugun ka kiila foniyantenu matɔgɔ ɲɔgɔnna le.»

Jaguenu kanu koe

27Isa mɛn ka a fɔ: «Kɔnɔ wole minnu be n kulɛ mɔɛla, n ni a fɔ wo ye: Wo ni wo jaguenu kanu, wo ni ko ɲinma ma wo kɔnnɛlanu ye, 28wo ni duba wo dankalanu ye, wo ni Ala mataran hɛra la wo tɔgɔ tiɲalanu ye. 29Min tini i baŋɛ sɔngɔ dɔndɔ bantilan, sɔngɛ doe tugun sɔ a ye. Ka do ka i la doroki banba bɔɔ i bolo, i kana balan i la doroki kɔtɔnɛŋɛ tugun jigan koe la. 30Min yo ka i táran fondo la, i ni a kɔ. Min tini i bolofeŋɛ bosi i bolo, i kana wo lasaagi koe fɔ a ye.

31Awa, wo be diren mɔgɛnu ni koe ma wo ye ki min na, wole tugun ni wo siila ma anu ye.

32Ka wo ka wo kanunteŋɛnu dɔrɔn de kanu, wo si baraji miniman sɔtɔ wo tɔ ba? Hali ko koron malanu be anu kanunteŋɛnu kanula. 33Minnu be ko ɲinma mala wo ye, ka wo ka ko ɲinma ma wonu dɔrɔn ye, wo si baraji miniman sɔtɔ wo tɔ ba? Hali ko koron malanu be wo siila mala. 34Ka wo ka mɔgɛnu tun de dɔntɔ minnu si nɔ a ɲɔgɔla, wo si baraji miniman sɔtɔ wo tɔ? Hali ko koron malanu be ko koron malanu dɔntɔla minnu si nɔ a ɲɔgɔla. 35A bɛnta le wo ni wo jaguenu le kanu, wo ni ko ɲinma ma, wo ni mɔgɛ dɔntɔ, wo yili kana to ɲɔgɔ dee ma. Wo butɔ, wo baraje si koloya. Wo si a yita wo mu Ala la deŋɛnu le la, Ala min mayɛlɛta, bayi ale si nɛɛma fisiriwalenu nun mɔgɔ koroŋɛnu ma. 36Wo ni kinikini iko wo Baaba Ala be kinikinila ki min na.

Kiiti koe

37Wo kana wo fan ma kiiti salá la, alako wo kana makiiti. Wo kana mɔgɛnu kɔn, alako wole tugun kana kɔn. Wo ni diɲa mɔgɛ ye, alako wole tugun ni diɲa sɔtɔ. 38Wo ni mɔgɛ kɔ, Ala tugun si wo kɔ. A si wo kɔ iko mɔgɛ be sumarifen ɲinma lafala ki min na, a ni a yegeyege, a ni a madigin, a ni do tugun sa a kunma han a ni bɔn, a ni a sa fakɛlɛ tɔ. Wo be mɔgɛnu kɔla ki min na, Ala tugun si wo kɔ ɲɔgɔn na.»

39Wo butɔ, Isa ka sanda do sa anu ye, a ko: «Ɲabɔnɛ si nɔ ɲabɔnɛ latagamanna ba? Kaa, anu fila bɛ te boe le dinka tɔ? 40Karandeŋɛ te tanbi a karamɔgɔ la, kɔnɔ ka a bata karaŋɛ ban, a si to iko a karamɔgɔ.

41Ɲagama mɛsɛŋɛ min be i bareŋɛ ɲa tɔ, i be wo fɛlɛla fenna, a taranta kebeŋɛ min be i yɛtɛ ɲa tɔ, i ɲan bele wo yenden ba? 42I si nɔ a fɔla kama le i bareŋɛ ye: ‹N bareŋɛ, a to n ni wo ɲagama mɛsɛŋɛ bɔɔ i ɲa tɔ›, a taranta kebeŋɛ min be i yɛtɛ ɲa tɔ, i bele wo yenden ba? Ile nɛnfilatige, kebeŋɛ bɔɔ i yɛtɛ fɔlɔ ɲa tɔ, alako i ni ɲɔ tayen a ɲinma la. Wo kɔma, i si nɔ ɲagama mɛsɛŋɛ bɔɔla i bareŋɛ tugun ɲa tɔ.»

Kifeŋɛ nun a wole

43«Kifeŋɛ ɲinma yo bele min si den koroŋɛ wolo, iko kifeŋɛ koroŋɛ to te den ɲinma wolo. 44Kaa, kifeŋɛ bɛ be lɔnna a wole le la. Mɔgɛ te toore bɔɔ ŋanin lɔgɛ tɔ, iko a to te rɛsɛn bɔɔ baagi nɔnbɛ tugun tɔ. 45Kuma ɲinma le be bɔɔla mɔgɔ ɲinma sondoŋɛ tɔ. Kuma koroŋɛ le be bɔɔla mɔgɔ koroŋɛ tugun sondoŋɛ tɔ. Mɔgɛ sondoŋɛ be faren min na, wo kuma le be bɔɔla a da tɔ.»

Bon sɔlá fila

46«Wagati bɛ wo be a fɔla nde ma: ‹n Marige!›, kɔnɔ ka n ka min fɔ wo ye, fen de wo te sɔn a mala? 47Min bɛ nata nde ma, a ka n na kuma mɔɛ, a ka a ma, wo tigi nun min si mulunya, n si a yita wo la. 48A be toren de iko mɔgɛ min be boŋɛ sɔla: a ka duge soe han a luggɛta, a keta fata ma, a ka fondoma sigi a kunma. Sangi je nata a mata banbaraŋɛ la, han a tuguta wo boŋɛ la, kɔnɔ a ma nɔ a laboela, bayi a be sɔren a ɲinma la. 49Mɔgɛ min ka n na kuma mɔɛ, kɔnɔ a ma a ma, wo be toren de iko mɔgɛ min ka boŋɛ sɔ duge kunma, a ma fondoma sigi. Banbaraŋɛ tuguta wo boŋɛ la, boŋɛ boeta fipu! A tiɲata feu!»

Currently Selected:

Luki 6: MOG

Highlight

Copy