Yaya 15

Rɛsɛn lɔgɛ yati nun a boliŋɛnu

1Isa mɛn ko: «Nde be misaliren rɛsɛn lɔgɛ le la, wo lɔgɛ mu rɛsɛn lɔgɛ yati le la. N Baaba le ka a ki, a be a mɛnnila. 2Boliŋɛ min bɛ be n ma, ka anu te wolo, n Baaba ni wonu latɛgɛ. Kɔnɔ boliŋɛ min bɛ be wolola a te wonu latɛgɛ. Wolenu tetita balanu min tɔ, a ni wo bala bɛ latɛgɛ, alako boliŋɛ ni fɛntɛn a ni wolo, ka tanbi a fɔlɔnɛŋɛ la. 3Wo be misaliren wo boliŋɛ le la, wo bata ban saniyanna, n na kuma la ko sabu la n be min fɔren wo ye. 4Boliŋɛ te nɔ wolola a yɛtɛ la, ka a bele bularen lɔgɔ kute ma. Wole tugun, wo ni patu n ma, iko nde tugun be paturen wo ma ki min na. Wo te nɔ wolola, ka wo bele paturen nde ma. 5Rɛsɛn lɔgɛ le mu nde la, boliŋɛ le mu wole la. Ka min be paturen n ma, nde tugun be paturen a ma, wo tigi si to le iko boliŋɛ min si den siyama wolo. Bayi nde kɔma wo te nɔ fenfen gasɛla. 6Ka min ma patu n ma, a si to le iko boliŋɛ matɛgɛreŋɛ min si lafili, a ni bala. Mɔgɛnu ni anu madɛn, ka anu sa ta tɔ, anu ni bintan. 7Ka wo patuta n ma, n na kumanu tugun sabatita wo juse tɔ, fenfen sɔgɔ be wo la, wo Ala mataran, a si a ma wo ye. 8Ka wo si to iko lɔgɔ boliŋɛ min si den siyama wolo, ka wo mata n na talibenu la, n Baaba la nɔɔra be makɛnɛnna wolo tɔ.

9N Baaba ka n kanu ki min na, nde tugun ka wo kanu ɲɔgɔnna le. Wo ni sabati n na wo kanunteya butɔ. 10Ka wo ka n na yamɔrenu labatu, wo si sabati le n na kanunteya butɔ, iko nde ka n Baaba la yamɔrenu labatu ki min na, nde tugun be sabatiren a la kanunteya butɔ.

11N be kɛ bɛ fɔren de wo ye, alako wo ni sɛɛwa n na ko la, wo la sɛɛwa ni kamali.

12N na yamɔre le ka: Wo ɲɔgɔn kanu, iko n ka wo kanu ki min na. 13Mɔgɛ tini diɲa a nɛ ma a kafuɲɔgɛ la ko la, kanunteya yo te tanbi wo la. 14Nde be wo yamɔrila min na, ka wo ka wo labatu, wo bata ma n kanunteŋɛnu la. 15N te a fɔ wo ma bitugun joŋɛnu, bayi jon tige be min mala, joŋɛ ma wo lɔn. N bata a fɔ wo ma n kanunteŋɛnu, bayi n ka koe min bɛ mɔɛ n Baaba la, n bata wo bɛ yita wo la. 16Wole le ma nde masubɛ, nde le ka wo masubɛ; n ka wo sɔ, alako wo ni ma n na kiilánu la, wo ni wolo iko lɔgɔ boliŋɛ, wolé min si mɛ. Wo butɔ, wo ka fenfen mataran n Baaba ma nde tɔgɛ la, a si wo dii le wo ma.

17Awa, n be wo yamɔriren min na, wolo mu ka: wo ni ɲɔgɔn kanu.»

Dɛnkɛnɛya mɔgɛnu kɔn koe la dunuya

18Isa mɛn ko: «Dunuya mɔgɛnu tini wo kɔn, wo ni wo hakkile to a ma, anu be nde le fɔlɔ kɔnden wole ko. 19Ka dunuya mɔgɛnu le mu wo la nun, dunuya si wo kanu le nun, bayi a tɛŋɛ le wo la. Kɔnɔ nde to bata wo masubɛ bɔɔla dunuya jama ɲaama, dunuya tɛŋɛ ma wo la bitugun, wolo mu dunuya be wo kɔnna. 20Wo hakkili to n na kuma ma n ka min fɔ wo ye, n ko: joŋɛ ma fisa a tige ko. Anu to bata kiti nde ɲagankata koe la, anu si wole tugun ɲagankata le. Kɔnɔ ka anu be nde la kuma labaturen, anu si wole tugun tɛŋɛ labatu le. 21Wo butɔ, anu si wo koe bɛ ma n tɔgɛ le la ko la, bayi anu ma n Kiilá lɔn. 22Ka n ma naa kuma anu ye nun, junubu yo bele anu ma nun. Kɔnɔ kɔtɛ, anu te nɔ a fɔla bitugun, ka a fɔla anu ma a lawuli a ma. 23Ka min ka nde kɔn, a bata n Baaba tugun kɔn. 24Ka n ma kabanakoenu ma anu ɲala nun, min fɔlɔ ma ma, anu te junube sɔtɔ nun. Kɔnɔ kɔtɛ, anu bata wonu yen, anu be nde nun n Baaba kɔnden. 25Anu bata mɔ kɔn, wo butɔ, kuma min be sɛbɛren anu la sariya Kitabue tɔ, wo bata kamali. A ko aa

anu bata n kɔn, kila yo bele a ma. #15:25 Jaburu Dauda, sora 35 haaya 19 fɛlɛ.

26Sabu Ɲinma tini na wagate min tɔ, n be min kiila ka bɔɔ n Baaba bata, ale si ma n seede la. Ale mu Ala Hakkili Saniyandeŋɛ le la, tɔɲa tige, min be fatanden n Baaba la. 27Wole tugun mu n seede la, bayi wo bata to n fɛ bɔɔla a fɔlɛ.»

Currently Selected:

Yaya 15: MOG

Highlight

Copy