Ko fɔlɔfɔlɛ 28

1Isiyaka ka Yaguba kele, a dubata a ye, a ka a fɔ a ye: «I kana Kanana kaanu la den musereŋɛ jigan de! 2Wuli, i ni taga i mankayi Betuyɛli bata, Padan-Arami jamanɛ tɔ, i ni i kau Laban na den musereŋɛ do futu.

3Ala mu barikɛ sala i la ko tɔ,

Ala sɛnbɛ tige,

a ni den siyama dii i ma,

a ni i bɔnsɛ lasiya i ni ma jama siyama benba la.

4Ala mu Iburahima la barikɛ sala i nun i bɔnsɛ la ko tɔ,

alako kɛ duge ni ma i tɛŋɛ la,

i be luntanya tɔ duge min tɔ ka,

Ala ka duge min dii Iburahima ma.»

5Awa, Isiyaka ka Yaguba lasanba Padan-Arami jamanɛ tɔ ɲɔgɔn na le, a ni taga Laban bata, min mu Arami kaa Betuyɛli la den kayireŋɛ la. Yaguba nun Esayu nɛɛnɛ Rebeka kɔtɔ kayima le mu Laban na.

6Esayu ka a mɔɛ Isiyaka dubata Yaguba ye, a ka a lasanba Padan-Arami jamanɛ tɔ, a ni muse jigan ɲɔ, a la duba butɔ, a ka kɛ yamɔre dii a ma, a ko a kana Kanana kaanu la den musereŋɛ jigan; 7Esayu mɛn ka a mɔɛ Yaguba ka a baaba nun a nɛɛnɛ la kuma bita a ni taga Padan-Arami jamanɛ tɔ; 8Esayu mɛn ka a lɔn, Kanana kaanu la den musereŋɛnu ma di a baaba Isiyaka ye, 9wo butɔ, a tagata Isumayila bata, Iburahima la den kayireŋɛ. A ka wo la den musereŋɛ do futu, a ka a sa a la musenu kunma. Wo den musereŋɛ tɔgɔ le Mahalati. A kɔtɔ kayima tɔgɔ Nebayoti.

Yaguba la kiboe

10Yaguba bɔɔta Bɛri-Seba a tagata Haran. 11A be kila kunma tɛmuɛ min tɔ, ɲɔ pinpita. A keta dula do tɔ, a be kila ka min na. A ka kure do jigan a ka a lasori a kun kɔtɔ, a sata ɲɔ. 12A ka a yen kiboe tɔ, samɛ be sɔren duge tɔ, a kuŋɛ be yɛlɛren han a be magaren saŋɛ la, Ala la malekanu be yɛlɛla wo samɛ la, anu be jigila. 13A ka a yen, Alatala yɛtɛ le be sɔren a kɛnna, a be kumala a ye: «Nde le mu Alatala la, i mankayi Iburahima la Ala, anun Isiyaka la Ala. I be saren duge min tɔ, n si a dii i nun i bɔnsɛnu ma. 14I bɔnsɛnu si naa siya iko mɛɲɛŋɛ min be duge tɔ. Wo la duge si naa koloya le ka bɔɔ tele yɛlɛ han tagala sigila tele jige la, anun bolo ɲinma nun bolo mara. See bɛ si hɛra sɔtɔ i nun i bɔnsɛ fɛ. 15I tolomasɔ, i be tagala kan do kan, n si to le i fɛ n ni i latanga. N si i talasaagi kɛ duge tɔ. N te bɔɔ i kɛnna feu. N bata lahire min jigan i ye, n si a bɛ ma le.»

16Yaguba kunɛnta, a ko: «Yaga, nde ma a lɔn nun Alatala be kɛ dula tɔ yan.» 17A kilanta, a ko: «Dula makilandeŋɛ le yan na! Yan te ma fenfen na fɔ a ni ma iko Ala la boŋɛ, anun saŋɛ dondula.» 18A wulita saguma piri, a ka kure min nasori a kun kɔtɔ nun, a ka wo jigan a ka a sɔ, a ka a ma kuru manditɛreŋɛ la, a ka tule sa a kun tɛma ma. 19A ka wo dula tɔgɔ sa Betɛli. Wo be a fɔren de: «Ala la boŋɛ». Wo saa tɔgɔ be fɔla le nun Lusi. 20Yaguba ka lahire jigan Ala ye, a ko: «Ka Ala tota n fɛ, a ka n natanga n na kɛ tagamaŋɛ tɔ, a ka dɔmɛ dii n ma, a ka n fetibɔ, 21wo kɔma, ka n saagita hɛra tɔ n baaba la boŋɛ tɔ, n si Alatala batu a ni ma n na Ala la. 22Kɛ kure, n bata min manditɛ, a si ma Ala la boŋɛ la. I be min bɛ diila n ma, n si a farila bɔɔ le i ye.»

Currently Selected:

Ko fɔlɔfɔlɛ 28: MOG

Highlight

Copy