1 Samiyɛli 24

Dauda ma sɔn Sayulu fagala

1Dauda bɔɔta ɲɔ, a tagata Engedi, dulanu tɔ ka min masɔtɔ bɛlɛ, a tota ɲɔ. 2Sayulu to saagita bɔɔla Filisiti kaanu bee dula, anu ka a fɔ a ye, aa Dauda be Engedi janfue tɔ. 3Sayulu ka kɛlɛ malá ɲinma mɔgɔ wulu saba jigan Isirayila bɛ tɔ, anu bɔɔta Dauda nun a la mɔgɛnu ɲinidula, han anu tagata ke dula do tɔ min tɔgɔ «Kɔnkɛ tɔ Baanu la Fata». 4Sayulu tanbita ɲɔ kaanu la saaka wɔɔrɛ kɛnna, min be kila da la. Sayulu ka fanmɛ do yen ɲɔ, a donta a butɔ hataju madula ɲɔla. Wo ka a taran, Dauda nun a la mɔgɛnu be sigiren ɲɔ butɔ. 5Dauda la mɔgɛnu kɔyikɔyita a ye, anu ko: «Awa, Alatala ka bi luŋɛ le la ko fɔ i ye, a to ka a fɔ aa a si i jague sa le i bole tɔ. I dita a mala kiyoki, aa i be a mala ɲɔgɔnna le.» Wo butɔ, Dauda wulita, a ka Sayulu la burumuse sɔngɔnden kuntu dɔyi, wo tota a bole tɔ.

6Dauda to banta wo mala, a juse bɔɔta nimisa la, bayi a bata Sayulu la burumuse sɔngɔnden kuntu. 7Dauda tugun kɔyikɔyita a la mɔgɛnu ye: «Alatala mu n natangala! N te sɔn feu n ni n bole maga n tige la, Alatala be min masubɛren. N kana fenfen ma a la, bayi Alatala le be a sɔren mansa la.» 8Dauda ka a la mɔgɛnu ladan wo kuma le la, anu ma anu bole maga Sayulu la. Sayulu wulita a bɔɔta fanmɛ butɔ, a ka a la kila bita.

9Wo tanbi kɔma, Dauda wulita, a bɔɔta fanmɛ tɔ, a bakkuta belebelela Sayulu kɔma: «N na mansa! Heee, n tige!» Sayulu ka a kɔma tafɛlɛ, Dauda butinta, a ka a majigi han a ka a tindɛ sɔ duge tɔ. 10Dauda ka a fɔ Sayulu ye, a ko: «I be i tolomasɔla mɔgɛnu la kumanu la fenna, minnu be a fɔla i ye, aa n be diren ko koroŋɛ le mala i la? 11I bata a yen i ɲa la kɔtɛ, bi luŋɛ Alatala bata i sa n sagoe tɔ nun fanmɛ butɔ. A fɔta le n ɲɛ aa n ni i faga, kɔnɔ n ka i to ɲɔ, n mɛn ka a fɔ, n te n bole maga ile n marige la, bayi Alatala le be i masubɛren. 12N baaba, i ɲa sɔ yan na, i la burumuse sɔngɔnden de be n bolo ka. N ka i la burumuse sɔngɔnden pɛti le kuntu, kɔnɔ n ma i faga. I bata a yen, n ma di ko koroŋɛ mala i la, n ma murutɛ i ma. I bata a yen, n ma hakkɛ yo sɔtɔ i la. Ile le be n ɲinila kan bɛ i ni n na ko ladufen. 13Alatala le be nala kiite sala nde nun ile tɛma, Alatala le si n tɛŋɛ yɔgɔ. Kɔnɔ, nde bole kan te ke i ma. 14Sanda kɔtɛ do be a fɔren, aa koronya be bɔɔla mɔgɔ koroŋɛnu le tɔ. Kɔnɔ nde dɔ bole yati le te ke i ma. 15Isirayila la mansa, i be bɔɔren ɲɔmɔ le digii ma? I be ɲɔmɔ le jokkiren i ni a ɲagankata? N bele maren fenfen na, fɔ min be toren iko wulu fagareŋɛ, ka wo ma koote. 16Alatala, kiiti salá le mu a la, ale le be kiite sala mɔle fila tɛma. Ale le be nala n na ko fɛlɛla, a ni n kunma kɛlɛ ma, a ni tɔɲa dii n ma, a ni n bɔɔ i bolo.»

17Dauda to banta wo kumanu fɔla Sayulu ye, Sayulu ka a fɔ, a ko: «N na den Dauda, ile le yati kulɛ mu ka?» Sayulu fɔlɔta dila. 18Wo butɔ, a ka a fɔ Dauda ye, a ko: «Ile telenta nde ko, bayi ile bata ko ɲinma ma n ɲɛ, nde bata a koroŋɛ ma i la. 19I ka ko ɲinma le yita n na bi i wali kɛɲa ma. Bayi Alatala bata n sa nun i sagoe tɔ, i ka n to ɲɔ i ma n faga. 20Ka mɔgɛ ka a jague masɔtɔ, a si a to le ba a ni taga a sagoe la? Alatala mu i sɔŋɛ diila ko ɲinma la i ka min ma n ɲɛ bi luŋɛ tɔ. 21Awa, n ka lɔn yati, i si mansaya sɔtɔ le Isirayila, mansaya mɛn ni na tenkun i bolo. 22Kɔtɛ, i kali n ɲɛ Alatala la ba, ka i te n juruya sɔntɔ n faga kɔma, ka i mɛn te naa n tɔgɛ lasama n baaba bɔnsɛ tɛma.» 23Dauda ka a kali Sayulu ye. Wo butɔ, Sayulu tagata a la boŋɛ tɔ, Dauda kan nun a la mɔgɛnu yɛlɛta anu be dogonden ka min na nun kɔnkɛ tɔ.

Currently Selected:

1 Samiyɛli 24: MOG

Highlight

Copy