ಮಾರ್ಕ 9
9
1ಪುನಃ ಯೇಸು: ಇಲ್ಲಿ ಉಳ್ಳ ಚೆನ್ನ ಜನ ದೇವಡ ರಾಜ್ಯ, ದೇವಡ ಶಕ್ತಿಲ್ ಬಪ್ಪದ್‍ನ ಕಾಂಗತೆ ಅಯಿಂಗ ಚಾವ್‍ಲೇಂದ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.
ಯೇಸುರ ಮೂಡ್ ಮಹಿಮೆಲ್ ಬದ್‍ಲಾನದ್
(ಮತ್ತಾಯ 17.1–13; ಲೂಕ 9.28–36)
2ಆರ್ ದಿವಸ ಕಯಿಂಜದು ಅಂವೊಂಡ ಶಿಷ್ಯಂಗಳಾನ ಪೇತ್ರ, ಯಾಕೋಬ, ಯೋಹಾನನ ಕಾಕಿಯಂಡ್ ಯೇಸು ಕುಂದ್‌ರ ಕೊಡಿಕ್ ಪೋಚಿ, ಅಲ್ಲಿ ಅಯಿಂಗ ಮಾತ್ರ ಇಂಜತ್. ಅಯಿಂಗ ನೋಟಿಯಂಡ್ ಇಕ್ಕಣಕೆ ಯೇಸುರ ರೂಪ ಬದ್‍ಲಾನದ್‌ನ ಕಂಡತ್. 3ಬೂಲೋಕತ್‍ಲ್ ಏದ್ ಮಡಿವಾಳಂಗೂ ಅಚ್ಚಕ್ ಬೊಳ್‌ತಿತೆ ಒಲಿಪಕ್ ಕಯ್ಯತಚ್ಚಕ್ ಯೇಸುರ ಬಟ್ಟೆ ಬೊಳ್‌ತಿತ್, ಮಿನ್ನ್‌ವಕ್ ಸುರ್ ಆಚಿ. 4ಅಕ್ಕ ಎಲೀಯ ಪಿಂಞ ಮೋಶೆ ಯೇಸುರ ಕೂಡೆ ತಕ್ಕ್ ಪರಿವಾನ ಅಯಿಂಗ ಕಂಡತ್.
5ಪೇತ್ರ ಯೇಸುನ ನೋಟಿತ್: ಉಪಾದ್ಯ, ನಂಗ ಇಲ್ಲಿ ಇಪ್ಪದ್ ನಲ್ಲದ್! ನಂಗ ಇಲ್ಲಿ ನೀಕ್ ಒರ್ ಗುಡಾರ, ಎಲೀಯಂಗ್ ಒರ್ ಗುಡಾರ, ಮೋಶೇಕ್ ಒರ್ ಗುಡಾರಾಂದ್ ಮೂಂದ್ ಗುಡಾರ ಮಾಡನಾಂದ್ ಎಣ್ಣ್‌ಚಿ. 6ಅಯಿಂಗಕ್ ದುಂಬ ಪೋಡಿಯಾಯಿತ್ ಎಂತ ಎಣ್ಣಿಯಂಡುಂಡ್‍ೕಂದ್ ಗೊತ್ತಾಯಿತ್‌ಲ್ಲೆ.
7ಅಕ್ಕಣೆಕ್ ಮೋಡ ಬಂತ್ ನೆಳ ಅಯಿಂಗಳ ಆವರಿಚಿಟ್ಟಿತ್: ಇಂವೊ ನಾಡ ಕೊದಿರ ಮೋಂವೊ, ಇಂವೊ ಎಣ್ಣುವಾನ ನಿಂಗ ಕ್‍ೕಳೀಂದ್ ಒರ್ ವಾಣಿ ಬಾತ್. 8ಅಕ್ಕಣೆಕೆ ಅಯಿಂಗ ಸುತ್ತ್‌ಮುತ್ತ್ ನೋಟ್‍ವಕ ಯೇಸುನ ಬುಟ್ಟಿತ್ ಬೋರೆ ದಾರ್‌ನು ಕಂಡಿತ್‌ಲ್ಲೆ, ಬರಿ ಯೇಸು ಮಾತ್ರ ಅಯಿಂಗಡ ಕೂಡೆ ಇಂಜತ್. 9ಅಯಿಂಗ ಕುಂದಿಂಜ ಅಡಿಕ್ ಇಳ್ಂಜಿತ್ ಬಂದಂಡ್ ಇಪ್ಪಕ,
ಯೇಸು ಅಯಿಂಗಕ್: ಮನುಷ್ಯಕುಮಾರ ಚಾವ್‍ಯಿಂಜ ಪುನಃ ಜೀವವಾಯಿತ್ ಬಪ್ಪಕತ್ತನೆ ಈ ವಿಷಯತ್‍ನ ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಆಜ್ಞೆ ಕೊಡ್‍ತತ್. 10ಯೇಸು ಎಣ್ಣ್‌ನ ಪ್ರಕಾರ ಶಿಷ್ಯಂಗ ದಾರ್‌ಕು ಎಣ್ಣಿತ್‌ಲ್ಲೆ. ಆಚೇಂಗಿ ಚತ್ತಯಿಂಗಡ ಮದ್ಯತ್ಂಜ ಎದ್ದಿತ್ ಬಪ್ಪದ್ಂಡ ಅರ್ಥ ಎಂತ್‍ೕಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್. 11ಅಯಿಂಗ ಯೇಸುನ ನೋಟಿತ್: ಎಲೀಯ ಮಿಂಞ ಬರಂಡೂಂದ್, ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಎಣ್ಣ್‌ವದ್ ಎನ್ನನೇಂದ್ ಕ್‍ೕಟತ್.
12ಅಕ್ಕು, ಎಲ್ಲಾನೂ ಸರಿಕೂಟ್‌ವಕಾಯಿತ್ ಎಲೀಯ ಮಿಂಞ ಬಪ್ಪ. ಆಚೇಂಗಿ ಮನುಷ್ಯಕುಮಾರ ದುಂಬ ಕಷ್ಟಪಟ್ಟಿತ್, ಎಲ್ಲಾಡಗುಂಡ್ ತ್‍ಕ್ಕಾರ ಆಪಾಂದ್ ಒಳ್‌ದಿತುಂಡಲ್ಲಾ! ಅದ್ ಎನ್ನನೇಂದ್ ಯೇಸು ಕ್‍ೕಟತ್. 13ಆಚೇಂಗಿ ಎಲೀಯ ಬಂದಿತಾಚೀಂದ್, ಪಿಂಞ ಅಂವೊಂಡ ವಿಷಯತ್‍ನ ದೇವಡ ವಾಕ್ಯತ್‍ಲ್ ಒಳ್‍ದ್‍ನ ಪ್ರಕಾರ ಜನ ತಾಂಡ ಮನಸ್ಸ್‌ಕ್ ಬಂದನೆಕೆ ಅಂವೊಂಗ್ ಮಾಡ್‍ಚೀಂದ್ ಎಣ್ಣ್‌ಚಿ.
ಕೂಳಿ ಪುಡ್‌ಚ ಕ್‍ಣ್ಣ ಕುಂಞಿನ ಯೇಸು ವಾಸಿ ಮಾಡ್‍ನದ್
(ಮತ್ತಾಯ 17.14–21; ಲೂಕ 9.37–43)
14ಪಿಂಞ ಅಯಿಂಗ ಕುಂದ್‌ರ ಅಡಿಕ್ ಬಪ್ಪಕ ಬಾಕಿ ಶಿಷ್ಯಂಗಡ ಕೂಡೆ ದುಂಬ ಜನ ಕೂಡಿತ್ಂಜತ್. ಚೆನ್ನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಅಯಿಂಗಡ ಪಕ್ಕ ತರ್ಕ ಮಾಡ್‌ವಾನ ಕಂಡತ್. 15ಜನ ಯೇಸುನ ಕಂಡದು ಅಯಿಂಗಕ್ ದುಂಬ ಆಶ್ಚರ್ಯ ಆಯಿತ್ ಅಂವೊಂಡ ಪಕ್ಕ ಓಡಿ ಪೋಯಿತ್ ವಂದನೆ ಮಾಡ್‍ಚಿ. 16ಅಂವೊ ದೇವಡ ವಾಕ್ಯತ್‍ರ ಉಪಾದ್ಯಂಗಳ ನೋಟಿತ್, ನಿಂಗೆಲ್ಲಾರು ಎಂತ ತರ್ಕ ಮಾಡಿಯಂಡುಳ್ಳಿರಾಂದ್ ಕ್‍ೕಟತ್. 17ಜನಡ ಗುಂಪ್‍ಯಿಂಜ ಒರ್ ಮನುಷ್ಯ; ನಾನ್ ನಾಡ ಮೋಂವೊನ ನೀಡ ಪಕ್ಕ ಕಾಕಿಯಂಡ್ ಬಂದಿತುಳ್ಳ, ಅಂವೊಂಡ ಮೇಲ್‌ಲ್ ಕೂಳಿ ಪುಡ್‌ಚಿತುಂಡ್, ಅಂವೊಂಗ್ ತಕ್ಕ್ ಪರಿಯುವಕ್ ಕಯ್ಯುಲೇಂದ್ ಎಣ್ಣ್‌ಚಿ. 18ಅಂವೊಂಡ ಮೇಲ್‌ಲ್ ಉಳ್ಳ ಕೂಳಿ ಎಕ್ಕ ಅಂವೊನ ಪುಡಿಪೊ ಅಕ್ಕ ಅಂವೊನ ನೆಲಕ್ ತಳ್ಳಿರ್‌ವ. ಪಲ್ಲ್‌ಕಡ್‌ಪ್‌ಚಿಟ್ಟಿತ್ ಬಾಯಿಲ್ ನೊರೆ ಬಪ್ಪ್‌ಚಿಡ್‍ವ, ಪಿಂಞ ದಾರ್‌ಕು ಅಂವೊಂಡ ಮೇಲ್‌ನ ಅಲ್ಲಾಡ್‌ವಕ್ ಕಯ್ಯುಲೆ. ನೀಡ ಶಿಷ್ಯಂಗಕ್ ಅಂವೊಂಡ ಕೂಳಿನ ಬುಡ್‌ತುವಕ್ ನಾನ್ ಎಣ್ಣಿಯೆ, ಆಚೇಂಗಿ ಅಯಿಂಗಕ್ ಕಯಿಂಜಿತ್‌ಲ್ಲೇಂದ್ ಯೇಸುರ ಪಕ್ಕ ಎಣ್ಣ್‌ಚಿ.
19ಅದ್ಂಗ್ ಯೇಸು: ನಂಬಿಕೆ ಇಲ್ಲತ ಸಂತಾನಕಾರಳೇ, ನಿಂಗಡ ಕೂಡೆ ಎಚ್ಚಕ್ ಕಾಲ ನಾನ್ ತಾಳ್ಮೆಯಾಯಿತ್ ಇಪ್ಪಕ್ ಕಯ್ಯು? ನೀಡ ಮೋಂವೊನ ಇಲ್ಲಿ ಕಾಕಿಯಂಡ್ ಬಾಂದ್ ಆ ಕ್‍ಣ್ಣಂಡ ಅಪ್ಪಂಗ್ ಎಣ್ಣ್‌ಚಿ. 20ಅಲ್ಲಿ ಉಳ್ಳಯಿಂಗ ಕ್‌ಣ್ಣನ ಕಾಕಿಯಂಡ್ ಬಾತ್. ಆ ಕ್‍ಣ್ಣಂಡ ಮೇಲ್‌ಲ್ ಉಳ್ಳ ಕೂಳಿ ಯೇಸುನ ಕಂಡದು ಆ ಕ್‌ಣ್ಣನ ನೆಲಕ್ ತಳ್ಳಿತ್ ಅಂವೊನ ಅಲ್ಲಾಡ ಕಯ್ಯತನೆಕೆ ಮಾಡ್‍ಚಿ, ನೆಲತ್‌ಲ್ ಆ ಕ್‍ಣ್ಣ ಉರುಳಾಡ್‍ಚಿ, ಬಾಯಿಲ್ ನೊರೆ ಬಪ್ಪ್‌ಚಿಟ್ಟತ್. 21ಯೇಸು ಅಂವೊಂಡ ಅಪ್ಪಂಗ್: ಎಕ್ಕಯಿಂಜ ಇಂವೊ ಇನ್ನನೆ ಉಂಡ್‍ೕಂದ್ ಕ್‍ೕಟತ್.
ಅದ್ಂಗ್ ಅಂವೊ: ಅಂವೊ ಚೆರಿಯ ಕುಂಞಿ ಆಯಿತ್‌ಪ್ಪಕಿಂಜ್‌ಲೇ ಉಂಡ್; 22ಅದ್ ಸುಮಾರ್ ಕುರಿ ಅಂವೊನ ಕೊಲ್ಲ್‌ವಕ್ ತಿತ್ತ್‌ಕ್ ಪಿಂಞ ನೀರ್‌ಕ್ ತಳ್ಳ್‌ವಕಿಂಜತ್‍ೕಂದ್ ಕ್‍ಣ್ಣಂಡ ಅಪ್ಪ ಎಣ್ಣ್‌ಚಿ. ದಯಬೆಚ್ಚಿತ್ ನಂಗಡ ಮೇಲೆ ಕನಿಕರ ಕಾಟಿತ್ ನಂಗಕ್ ಸಹಾಯ ಮಾಡ್‌ವಕ್ ಕಯ್ಯುವೇಂಗಿ ಮಾಡೀಂದ್ ಎಣ್ಣ್‌ಚಿ.
23ಯೇಸು ಅಂವೊಂಗ್: ನೀಕ್ ನಂಬಿಕೆ ಉಂಡೇಂಗಿ ಆಪ, ನಂಬಿಕೆ ಉಳ್ಳಂವೊಂಗ್ ಎಲ್ಲಾ ಆಪಾಂದ್ ಎಣ್ಣ್‌ಚಿ.
24ಒಮ್ಮಕೆ ಕ್‍ಣ್ಣಂಡ ಅಪ್ಪ: ನಾಕ್ ನಿಂಗಡ ಮೇಲೆ ನಂಬಿಕೆ ಉಂಡ್, ಆಚೇಂಗಿ ಅದ್ ಪೋರಾ. ನಾನ್ ನಿಂಗಡ ಮೇಲೆ ದುಂಬ ನಂಬಿಕೆ ಇಡ್‍ವನೆಕೆ ಸಹಾಯಮಾಡಡೂಂದ್ ಕಣ್ಣೀರ್‌ಲ್ ಕೂತ್ ಕೊಡ್‍ತತ್.
25ಅಕ್ಕ ಜನ ಅಂವೊಂಡ ಪಕ್ಕ ಓಡಿ ಬಪ್ಪದ್‍ನ ಯೇಸು ಕಂಡ್, ಕ್‍ಣ್ಣಂಡ ಮೇಲ್‌ಲ್ ಉಳ್ಳ ಕೂಳಿನ ನೋಟಿತ್: ಮೂಗ ಪಿಂಞ ಚೌಡ್ ಕೂಳಿಯೇ ಆ ಕ್‌ಣ್ಣನ ಬುಟ್ಟಿತ್ ಪೊರಮೆ ಬಾ, ಇಂಞು ಅಂವೊಂಡ ಒಳ್‍ಕ್ ಪೋಪಕ್ಕಾಗ ಎಣ್ಣಿಯಂಡ್ ಆಜ್ಞೆ ಕೊಡ್‍ತತ್. 26ಆ ಕೂಳಿಯು ಜೋರ್‌ಲ್ ಕೂತ್ ಕೊಡ್‌ತಂಡ್ ಆ ಕ್‌ಣ್ಣನ ನೆಲಕ್ ತಳ್ಳ್‌ವಂಜಿ ಚತ್ತನೆಕೆ ಮಾಡ್‌ವಂಜಿ ಪೊರಮೆ ಬಾತ್. ಎಲ್ಲಾರು ಈ ಕ್‍ಣ್ಣ ಚತ್ತ್ ಪೋಚೀಂದ್ ಎಣ್ಣಿಯಂಡಿಂಜತ್. 27ಆಚೇಂಗಿ ಯೇಸು ಆ ಕ್‍ಣ್ಣಂಡ ಕೈಯಿನ ಪುಡ್‌ಚಿತ್ ಏವಕ್ ಸಹಾಯ ಮಾಡ್‍ಚಿ. ಅಕ್ಕಣೆ ಆ ಕ್‍ಣ್ಣ ಎದ್ದತ್. 28ಯೇಸು ಮನೆರ ಒಳ್‍ಕ್ ಪೋನ ಪಿಂಞ ಅಂವೊಂಡ ಶಿಷ್ಯಂಗ, ನಂಗಕ್ ಎನ್ನಂಗ್ ಕೂಳಿಯಳ ಬುಡ್‌ತುವಕ್ ಕಯಿಂಜಿತ್‌ಲ್ಲೇಂದ್ ಯೇಸುನ ಕ್‍ೕಟತ್.
29ಅದ್ಂಗ್ ಯೇಸು: ಇನ್ನತಾನ ಕೂಳಿನ ಪ್ರಾರ್ಥನೆ ಪಿಂಞ ಉಪವಾಸತ್ಂಜ ಮಾತ್ರ ಬುಡ್‌ತುವಕ್ ಕಯ್ಯೂಂದ್ ಎಣ್ಣ್‌ಚಿ.
ಯೇಸು ತಾಂಡ ಮರಣತ್‌ರ ವಿಷಯತ್‍ನ ದಂಡೆನೆ ಕುರಿ ಎಣ್ಣ್‌ನದ್
(ಮತ್ತಾಯ 17.22–23; ಲೂಕ 9.43–45)
30ನಾನ್ ಎಲ್ಲಿ ಉಂಡ್‍ೕಂದ್ ಈ ಜನಕ್ ಗೊತ್ತಾಪಕ್ಕಾಗಾಂದ್, ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಗಲಿಲಾಯಕಾಲೆ ಬೋರೆ ಜಾಗಕ್ ಪೋಚಿ. 31ಎನ್ನಂಗೆಣ್ಣ್‌ಚೇಂಗಿ, ಮನುಷ್ಯಕುಮಾರನ, ಜನಡ ಕೈಯಿಕ್ ಪುಡ್‍ಚಿ ಕೊಡ್‍ಪ, ಅಯಿಂಗ ಅಂವೊನ ಕೊಲ್ಲುವ, ಅಂವೊ ಚತ್ತಿತ್ ಮೂಂದ್ ದಿವಸ ಆನ ಪಿಂಞ ಚಾವ್‍ಯಿಂಜ ಜೀವವಾಯಿತ್ ಏವಾಂದ್ ಯೇಸು ಅಂವೊಂಡ ಶಿಷ್ಯಂಗಕ್ ಉಪದೇಶ ಕೊಡ್‌ತಂಡ್ ಇಂಜತ್. 32ಶಿಷ್ಯಂಗಕ್ ಯೇಸು ಎಂತ ಎಣ್ಣಿಯಂಡುಂಡ್‍ೕಂದ್ ಅರ್ಥ ಆಯಿತಿಲ್ಲೆ. ಆಚೇಂಗಿಯು ಯೇಸುನ ಕ್‍ೕಪಕ್ ಶಿಷ್ಯಂಗಕ್ ಪೋಡಿ ಆಚಿ.
ದಾರ್ ಬಲ್ಯಂವೊ?
(ಮತ್ತಾಯ 18.1–5; ಲೂಕ 9.46–48)
33ಅಯಿಂಗ ಕಪೆರ್ನೌಮ್ ಎಣ್ಣುವಲ್ಲಿಕ್ ಬಾತ್. ಯೇಸು ಶಿಷ್ಯಂಗಳ ನೋಟಿತ್: ನಿಂಗ ಬಟ್ಟೇಲ್ ಎಂತ ಚರ್ಚೆ ಮಾಡಿಯಂಡ್ ತಕ್ಕ್ ಪರ್‌ದಂಡ್ ಇಂಜಿರಾಂದ್ ಕ್‍ೕಟತ್. 34ಆಚೇಂಗಿ, ಶಿಷ್ಯಂಗ ಅಂವೊಂಗ್ ಉತ್ತರ ಕೊಡ್‍ತಿತ್‌ಲ್ಲೆ. ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಬಟ್ಟೇಲ್ ಅಯಿಂಗಡಡೆಲ್ ದಾರ್ ಬಲ್ಯಂವೊ ಎಣ್ಣಿಯಂಡ್ ಚರ್ಚೆ ಮಾಡಿಯಂಡ್ ಇಂಜತ್. 35ಯೇಸು ಒರ್ ಜಾಗತ್‍ಲ್ ಅಳ್‌ಪಂಜಿ ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕುವಂಜಿ, ದಾರ್‌ಕ್ ಆದ್ಯಂವೊನಯಿತ್ ಇಪ್ಪಕ್ ಕುಶಿ ಉಂಡೋ, ಅಂವೊ ಮಿಂಞ ಕಡೆಯಾಯಿತ್ ಬಂದಿತ್ ಎಲ್ಲಾರ್‌ಕು ಸೇವೆ ಮಾಡಂಡು.
36ಅಲ್ಲಿಂಜ ಒರ್ ಕುಂಞಿನ ಕಾಕುವಂಜಿ ಆ ಕುಂಞಿನ ತಬ್ಬ್‌ವಂಜಿ: 37ದಾರ್ ಈ ಮಕ್ಕಡಡೆಲ್ ಒರ್ ಕುಂಞಿನ ನಾಡ ಪೆದತ್‍ಲ್ ಸ್ವೀಕಾರ ಮಾಡ್‌ವ, ಅಂವೊ ನನ್ನ ಸ್ವೀಕಾರ ಮಾಡ್‌ವ. ನನ್ನ ಸ್ವೀಕಾರ ಮಾಡ್‌ವಂವೊ ನನ್ನ ಮಾತ್ರ ಅಲ್ಲ, ನನ್ನ ಅಯಿಚಂವೊನ ಸಹ ಸ್ವೀಕಾರ ಮಾಡ್‌ವಾಂದ್ ಎಣ್ಣ್‌ಚಿ.
ನಂಗಳ ವಿರೋದ ಮಾಡತಯಿಂಗ
(ಲೂಕ 9.49,50)
38ಅಕ್ಕ ಯೋಹಾನ ಯೇಸುನ ನೋಟಿತ್: ಉಪಾದ್ಯ, ನಂಗಡ ಗುಂಪ್‌ಲ್ ಇಲ್ಲತಂವೊ ನೀಡ ಪೆದ ಎಣ್ಣಿಯಂಡ್ ಕೂಳಿ ಬುಡ್‍ತಿಯಂಡಿಂಜದ್‍ನ ನಂಗ ಕಂಡತ್; ಅಂವೊ ನಂಗಡ ಗುಂಪ್‌ಲ್ ಇಲ್ಲತಂವೊನಾನಗುಂಡ್ ನಂಗ ಅಂವೊನ ನಿಪ್ಪ್‌ಚಿಟ್ಟತ್‍ೕಂದ್ ಎಣ್ಣ್‌ಚಿ.
39ಅದ್ಂಗ್ ಯೇಸು: ಅಂವೊನ ನಿಪ್ಪ್‌ಚಿಡಂಡ; ನಾಡ ಪೆದತ್‍ಲ್ ಅದ್ಬುತ ಕಾರ್ಯ ಮಾಡ್‌ವಂವೊ, ಸುಲಬವಾಯಿತ್ ನಾಡ ಮೇಲೆ ಕೆಟ್ಟದ್ ಎಣ್ಣುಲೆ, ನಂಗಕ್ ವಿರೋದವಾಯಿತ್‌ಲ್ಲತಂವೊ ನಂಗಡ ಗುಂಪ್‌ಕ್ ಕೂಡ್‍ನಂವೊನೇ. 40ನಂಗಳ ವಿರೋದ ಮಾಡತಂವೊ ನಂಗಡಕಡೆಕಾರನೆ. 41ನಿಂಗ ಕ್ರಿಸ್ತಂಡಯಿಂಗಳಾನಗುಂಡ್ ದಾರ್ ನಿಂಗಕ್ ಒರ್ ಲೋಟ ನೀರ್ ಕುಡಿಪಕ್ ತಪ್ಪಾ, ಅಯಿಂಗಕ್ ಕಂಡಿತವಾಯಿತ್ ಅದ್ಂಡ ಫಲ ಕ್‍ಟ್ಟತೆ ಪೋಪ್‌ಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.
ಪಾಪತ್‍ರ ಸೋದನೆ
(ಮತ್ತಾಯ 18.6–9; ಲೂಕ 17.1,2)
42ನಾಡ ಮೇಲೆ ನಂಬಿಕೆಯುಳ್ಳ ಈ ಚೆರಿಯಯಿಂಗಳ ದಾರ್ ನಾಡ ಮೇಲೆ ನಂಬಿಕೆ ಇಲ್ಲತ್ತನೆಕೆ ಮಾಡ್‌ವ, ಅಯಿಂಗಡ ಬೋಳೆಕ್ ಬಲ್ಯೊರ್ ಬೀಜುವ ಕಲ್ಲ್‌ನ ಕೆಟ್ಟಿತ್ ಸಮುದ್ರತ್‍ಲ್ ಚಾಡ್‌ಚೇಂಗಿ ಅಂವೊಂಗ್ ನಲ್ಲದ್. 43ಅನ್ನನೆ ನಿಂಗಡ ಕೈ ಪಾಪ ಮಾಡ್‌ವಕ್ ಕಾರಣವಾಚೇಂಗಿ ಆ ಕೈಯಿನ ಕೆತ್ತಿತ್ ಚಾಡಿರ್. ದಂಡ್ ಕೈಯಿನ ಬೆಚ್ಚಂಡ್ ಎಕ್ಕಾಲು ಕೆಡತ ತಿತ್ತ್ ಇಪ್ಪ ನರಕಕ್ ಪೋಪಗಿಂಜ ಒರ್ ಕೈ ಉಳ್ಳಂವೊನಾಯಿತ್ ಪರಲೋಕಕ್ ಪೋಪದ್ ನಲ್ಲದ್. 44ನರಕತ್‌ರ ಪುಳ್ ಚಾವದೇ ಇಲ್ಲೆ. ಅಲ್ಲಿಯತ್‍ರ ತಿತ್ತ್ ಕೆಡುವುದೇ ಇಲ್ಲೆ.#9.44 ಈ ವಾಕ್ಯ ಚೆನ್ನ ಮೂಲ ಪ್ರತಿಲ್ ಇಲ್ಲೆ 45ಅನ್ನನೆ ನೀಡ ಕಾಲ್ ಪಾಪ ಮಾಡ್‌ವಕ್ ಕಾರಣವಾಯಿತ್ ಇಂಜತೇಂಗಿ, ಆ ಕಾಲ್‌ನ ಕೆತ್ತಿತ್ ಚಾಡಿರ್. ದಂಡ್ ಕಾಲ್ ಉಳ್ಳಂವೊನಾಯಿತ್ ಎಕ್ಕಾಲು ಕೆಡತ ತಿತ್ತ್ ಇಪ್ಪ ನರಕಕ್ ಪೋಪಗಿಂಜ ಒರ್ ಕಾಲ್ ಉಳ್ಳಂವೊನಾಯಿತ್ ಪರಲೋಕಕ್ ಪೋಪದ್ ನಲ್ಲದ್. 46ನರಕತ್‌ರ ಪುಳ್ ಚಾವದೇ ಇಲ್ಲೆ. ಅಲ್ಲಿಯತ್‍ರ ತಿತ್ತ್ ಕೆಡುವುದೇ ಇಲ್ಲೆ#9.46 ಈ ವಾಕ್ಯ ಚೆನ್ನ ಮೂಲ ಪ್ರತಿಲ್ ಇಲ್ಲೆ. 47ಅನ್ನನೆ ನಿಂಗಡ ಕಣ್ಣ್ ಪಾಪ ಮಾಡ್‌ವಕ್ ಕಾರಣವಾಯಿತ್ ಇಂಜತೇಂಗಿ, ಆ ಕಣ್ಣ್‌ನ ಬಲ್‍ಚಿತ್ ಚಾಡಿರ್. ದಂಡ್ ಕಣ್ಣ್ ಉಳ್ಳಂವೊನಾಯಿತ್ ನರಕಕ್ ಪೋಪಗಿಂಜ ಒರೇ ಕಣ್ಣ್‌ಲ್ ದೇವಡ ರಾಜ್ಯಕ್ ಪೋಪದ್ ನಲ್ಲದ್.
48ನರಕತ್‌ರ ಪುಳ್ ಚಾವದೇ ಇಲ್ಲೆ.
ಅಲ್ಲಿಯತ್‍ರ ತಿತ್ತ್ ಕೆಡುವುದೇ ಇಲ್ಲೆ.
49ತ್ಯಾಗ ಬಲಿ ಎನ್ನನೆ ಉಪ್ಪ್‌ಲ್ ಶುದ್ದ ಆಪ ಅನ್ನನೆ ಎಲ್ಲಾ ಮನುಷ್ಯಂಗಳು ತಿತ್ತ್‌ಲ್ ಶುದ್ದ ಆಪ. 50ಉಪ್ಪ್ ನಲ್ಲದ್, ಆಚೇಂಗಿ ಉಪ್ಪ್‌ರ ಸತ್ವ ಪೋಚೇಂಗಿ, ಪುನಃ ನಿಂಗಕ್ ಉಪ್ಪ್‌ನ ಎನ್ನನೆ ಸತ್ವ ಮಾಡ್‌ವಕಯ್ಯು?#9.50 ಕ್ರಿಸ್ತಂಡ ಗುಣ ಇಲ್ಲತ ಬದ್‍ಕ್, ಸತ್ವ ಇಲ್ಲತ ಉಪ್ಪ್‌ರನೆಕೆ. ನಿಂಗ ಉಪ್ಪ್ ಉಳ್ಳಯಿಂಗಳಾಯಿತ್ ಇರಿ, ಎಲ್ಲಾಡ ಕೂಡೆ ಸಮಾದಾನತ್‍ಲ್ ಬದ್‍ಕ್‍ವಿರ.
Currently Selected:
ಮಾರ್ಕ 9: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
