ಮಾರ್ಕ 8
8
ಯೇಸು ನಾಲಾಯಿರ ಜನಳ ಉಂಬ್‌ಚಿಟ್ಟದ್
(ಮತ್ತಾಯ 15.32–39)
1ಅಂದತ ದಿನತ್‌ಲ್ ಇಂಞೊರ್ ಬಲ್ಯ ಗುಂಪ್ ಜನ ಯೇಸುರ ಪಕ್ಕ ಬಾತ್. ಈಂಗ ನಾಡ ಪಕ್ಕ ಮೂಂದ್ ದಿವಸತ್ಂಜ ಉಂಡ್, ಅಯಿಂಗ ಒಂದು ತಿಂದಿತ್‌ಲ್ಲೆ. ಯೇಸು ಅಂವೊಂಡ ಶಿಷ್ಯಂಗಳ ಕಾಕುವಂಜಿ: 2ನಾಕ್ ಈ ಜನಳ ಕಾಂಬಕ್ ದುಂಬ ಬೇಜಾರಾಯಂಡುಂಡ್. ಈ ಜನ ನಾಡ ಪಕ್ಕ ಮೂಂದ್ ದಿವಸತ್ಂಜ ಒಂದು ತಿಂದಿತ್‌ಲ್ಲೆ. 3ಚೆನ್ನ ಜನಾಂಗ ದೂರತ್ಂಜ ಬಂದಿತುಂಡ್. ನಾನ್ ಅಯಿಂಗಕ್ ಒಂದು ತಿಂಬಕ್ ಕೊಡ್‍ಕತೆ ಬಯ್ಯಕ್ ಅಯಿಚತೇಂಗಿ ಅಯಿಂಗ ಸೊಯ ತಪ್ಪಿತ್ ಬುದ್ದ್‌ರ್‌ವ.
4ಅದ್ಂಗ್ ಶಿಷ್ಯಂಗ: ಈ ಮಣಬೂಮಿಲ್ ಇಚ್ಚಕ್ ಜನ ತಿಂಬಕ್ ಎಲ್ಲಿಂಜ ಒಟ್ಟಿ ಕ್‌ಟ್ಟುವಾಂದ್ ಯೇಸುನ ಕ್‍ೕಟತ್.
5ಅದ್ಂಗ್ ಅಂವೊ: ನಿಂಗಡ ಪಕ್ಕ ಎಚ್ಚಕ್ ಒಟ್ಟಿ ಉಂಡ್‍ೕಂದ್ ಶಿಷ್ಯಂಗಳ ಕ್‍ೕಟತ್.
ಅಕ್ಕ ಶಿಷ್ಯಂಗ: ಏಳ್ ಒಟ್ಟಿ ಉಂಡ್‍ೕಂದ್ ಎಣ್ಣ್‌ಚಿ. 6ಅಲ್ಲಿ ಇಂಜ ಜನಳ ನೆಲತ್‍ರ ಮೇಲೆ ಅಳ್‌ಪಕ್ ಯೇಸು ಎಣ್ಣ್‌ಚಿ. ಪಿಂಞ ಯೇಸು ಆ ಏಳ್ ಒಟ್ಟಿನ ಎಡ್‍ತಿತ್, ದೇವಕ್ ವಂದನೆ ಮಾಡಿತ್, ಒಟ್ಟಿನ ಪೊಳ್‌ಚಿತ್ ಶಿಷ್ಯಂಗಕ್ ಕೊಡ್‌ತಿತ್, ಎಲ್ಲಾರ್‌ಕು ಈ ಒಟ್ಟಿನ ಕೊಡೀಂದ್ ಎಣ್ಣ್‌ಚಿ. ಅದೇ ಪ್ರಕಾರ ಯೇಸುರ ಶಿಷ್ಯಂಗ ಎಲ್ಲಾರ್‌ಕು ಒಟ್ಟಿನ ಕೊಡ್‍ತತ್. 7ಚೆನ್ನ ಚೆರಿಯ ಮೀನ್ ಇಂಜತ್. ಇದ್‍ನ ಸಹ ದೇವಕ್ ವಂದನೆ ಎಣ್ಣಿತ್ ಎಲ್ಲಾರ್‌ಕು ಕೊಡ್‍ಪಕ್ ಕೊಡ್‍ತತ್. 8ಅಯಿಂಗ ಎಲ್ಲಾರು ತೃಪ್ತಿಯಾಯಿತ್ ತಿಂದತ್. ಜನ ತಿಂದಿತ್ ಆನುದು ಏಳ್ ಬಟ್ಟಿ ಒಟ್ಟಿ ಬಾಕಿ ಇಂಜತ್. 9ಅಲ್ಲಿ ಒಟ್ಟಿ ತಿಂದಯಿಂಗ ನಾಲ್ ಆಯಿರ ಜನ ಇಂಜತ್. ಪಿಂಞ ಯೇಸು ಆ ಜನಳ ಅಯಿಚತ್. 10ಯೇಸು ಎಲ್ಲಾ ಜನಳ ಅಯಿಪಂಜಿ, ಅಕ್ಕಣೆ ಅಂವೊನು ಅಂವೊಂಡ ಶಿಷ್ಯಂಗಳು ದಲ್ಮನೂಥ ಎಣ್ಣುವ ಪ್ರಾಂತ್ಯಕ್ ದೋಣಿಲ್ ಪೋಚಿ.
ಫರಿಸಾಯಂಗ ಯೇಸುರ ಪಕ್ಕ ಒರ್ ಅದ್ಬುತ ಕಾರ್ಯತ್‍ನ ಕ್‍ೕಟದ್
(ಮತ್ತಾಯ 16.1–12)
11ಚೆನ್ನ ಫರಿಸಾಯಂಗ ಯೇಸುರ ಪಕ್ಕ ಬಂದಿತ್ ಅಂವೊನ ಕೆಣಿಪಕಾಯಿತ್ ದುಂಬ ವಾದ ಮಾಡ್‍ಚಿ. ದೇವ ನಿನ್ನ ನೇರಾಯಿತು ಒಪ್ಪಿಯಂಡತಾಂದ್ ನಂಗಕ್ ಈ ವಿಷಯತ್‍ಲ್ ಬಾನತ್ಂಜ ಒರ್ ಗುರ್‍ತ್‍ನ ಕಾಟ್‍ೕಂದ್ ಕ್‍ೕಟತ್. 12ಯೇಸು ತಾಂಡ ಆತ್ಮತ್‍ಲ್ ನಿಟ್ಟುಸಿರ್ ಬುಟ್ಟಿತ್, ಈ ಸಂತಾನಕಾರಂಗ ಎನ್ನಂಗ್ ಗುರ್‍ತ್‍ನ ತ್‍ೕಡ್‌ವ? ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ, ಈ ಸಂತಾನಕಾರಂಗಕ್ ಬಾನತ್ಂಜ ಒರ್ ಗುರ್‍ತ್‍ನ ಸಹ ಕಾಟಿ ಕೊಡ್‍ಪ್‍ಲೇಂದ್ ಎಣ್ಣಿತ್, 13ಅಯಿಂಗಳ ಬುಟ್ಟ್‌ರ್‌ವಂಜಿ ಕೆರೆರ ಆ ಕರೆಕ್ ದೋಣಿಲ್ ಪೋಚಿ.
ಫರಿಸಾಯಂಗ, ಹೆರೋದ ವಿಷಯತ್ ಎಣ್ಣುವದ್
(ಮತ್ತಾಯ 16.5–12)
14ಯೇಸುರ ಶಿಷ್ಯಂಗ ಬೋಂಡಿಯಚ್ಚಕ್ ಒಟ್ಟಿ ಎಡ್‌ತ ಬಪ್ಪಕ್ ಮರ್ಂದ್‌ರ್‌ತ್, ಒರೇ ಒರ್ ಒಟ್ಟಿ ಮಾತ್ರ ಇಂಜತ್. 15ನಿಂಗ ಫರಿಸಾಯಂಗಡ ಪಿಂಞ ಹೆರೋದಂಡ ಈಸ್ಟ್‌ರ ವಿಷಯತ್‍ಲ್ ಜಾಗ್ರತೆಲ್ ಇರಂಡೂಂದ್ ಯೇಸು ಎಚ್ಚರ ಮಾಡ್‍ಚಿ.
16ಅದ್ಂಗ್ ಅಯಿಂಗ: ನಂಗ ಒಟ್ಟಿ ಎಡ್‌ತ ಬರತಾಂಗ್ ಯೇಸು ಇನ್ನನೆ ಎಣ್ಣುವಾಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದಂಡಿಂಜತ್.
17ಯೇಸುಕ್ ಇದ್ ಗೊತ್ತಾಯಿ ಪೋಚಿ; ನಿಂಗ ಎನ್ನಂಗ್ ಒಟ್ಟಿ ಇಲ್ಲೇಂದ್ ಎಣ್ಣುವಿರ? ನಿಂಗಕ್ ಇಂಞು ಗೊತ್ತಾಯಿತ್‌ಲ್ಲೆಯಾ ಇಲ್ಲತಪೋಚೇಂಗಿ ಅರ್ಥ ಆಪುಲೆಯಾ? ನಿಂಗಡ ಮನಸ್ಸ್ ಅಚ್ಚಕ್ ಕಮ್ಮಿ ಆಯಿಪೋಚಾ? 18ನಿಂಗಕ್ ಕಣ್ಣ್ ಇಂಜಿತು ಕಾಂಬ್‌ಲೆಯಾ? ನಿಂಗಕ್ ಕೆಮಿ ಇಂಜಿತು ಕ್‍ೕಪ್‌ಲೆಯಾ? ನಿಂಗ ಮರ್ಂದ್ ಪೋಯಿತುಳ್ಳಿರಾ? 19ನಾನ್ ಅಂಜ್ ಒಟ್ಟಿನ ಅಂಜ್ ಆಯಿರ ಜನಕ್ ಪೊಳ್‌ಚಿತ್ ಕೊಡ್‌ಪಕ ನಿಂಗ ಎಚ್ಚಕ್ ಕುಕ್ಕೆ ಒಟ್ಟಿ ಬಾಕಿ ಎಡ್‌ತಿರ?
ಅದ್ಂಗ್: ಪನ್ನೆರಂಡ್‍ೕಂದ್ ಶಿಷ್ಯಂಗ ಎಣ್ಣ್‌ಚಿ.
20ಪಿಂಞ ಯೇಸು: ನಾನ್ ಏಳ್ ಒಟ್ಟಿ ಮಾತ್ರ ಇಪ್ಪಕ ನಾಲ್ ಆಯಿರ ಜನಕ್ ಪೊಳ್‌ಚಿತ್ ಕೊಡ್‌ಪಕ ನಿಂಗ ಎಚ್ಚಕ್ ಕುಕ್ಕೆ ಒಟ್ಟಿ ಬಾಕಿ ಎಡ್‌ತಿರ?
ಅದ್ಂಗ್: ಏಳ್ಂದ್ ಶಿಷ್ಯಂಗ ಎಣ್ಣ್‌ಚಿ.
21ಅಕ್ಕ ಯೇಸು: ನಿಂಗಕ್ ಇಂಞು ಅರ್ಥ ಆಯಿತಿಲ್ಲೆಯಾಂದ್ ಕ್‍ೕಟತ್.
ಯೇಸು ಕುರ್‌ಡಂಗಳ ವಾಸಿ ಮಾಡ್‍ನದ್
22ಅಯಿಂಗ ಬೇತ್ಸಾಯಿದ ಎಣ್ಣುವಲ್ಲಿಕ್ ಬಾತ್; ಅಲ್ಲಿಕ್ ಒರ್ ಕುರ್‌ಡನ ಯೇಸುರ ಪಕ್ಕ ಕಾಕಿಯಂಡ್ ಬಂತ್, ಯೇಸುನ ಅಂವೊಂಡ ಮೇಲೆ ಕೈ ಬೆಪ್ಪಕಾಯಿತ್ ಬೋಡಿಯಂಡತ್. 23ಯೇಸು ಆ ಮನುಷ್ಯಂಡ ಕೈ ಪುಡ್‍ಚಿ ಕಾಕಿಯಂಡ್ ಊರ್‌ರ ಆಬರಿಕ್ ಪೋಯಿತ್, ಆ ಮನುಷ್ಯಂಡ ಕಣ್ಣ್‌ಕ್ ತುಪ್ಪಿತ್, ಅಂವೊಂಡ ಮೇಲೆ ಕೈ ಬೆಚ್ಚಿತ್, ನೀಕ್ ಎಂತೇಂಗಿಯು ಕಾಂಬಕ್ ಕಯ್ಯುವಾಂದ್ ಕ್‍ೕಟತ್.
24ಆ ಮನುಷ್ಯ ಕೊಡಿಕ್ ನೋಟುವಂಜಿ: ಅಕ್ಕು ನಾಕ್ ಜನಳ ಕಾಂಬ, ಆಚೇಂಗಿ ಅಯಿಂಗ ಮರತ್‌ರನೆಕೆ ನಡ್‍ಪದ್ ಕಾಂಬಾಂದ್ ಎಣ್ಣ್‌ಚಿ. 25ಯೇಸು ಪುನಃ ಅಂವೊಂಡ ಕೈಯಿನ ಆ ಮನುಷ್ಯಂಡ ಕಣ್ಣ್‌ಕ್ ಬೆಚ್ಚತ್, ಅಕ್ಕ ಅಂವೊಂಡ ಕಣ್ಣ್‌ರ ದೃಷ್ಟಿ ಸರಿಯಾಯಿತ್, ಅಂವೊ ಎಲ್ಲಾನ ಚಾಯಿತೆ ಕಂಡತ್. 26ಪಿಂಞ ಯೇಸು, ನೀನ್ ಊರ್‌ಕ್ ಪೋಕತೆ, ದಾರ್‌ಕು ಎಣ್ಣತೆ, ನೇರೆ ಮನೆಕ್ ಪೋಂದ್ ಆಜ್ಞೆ ಮಾಡ್‍ಚಿ.
ಪೇತ್ರ ಯೇಸುನ ಕ್ರಿಸ್ತ ಎಣ್ಣಿಯಂಡ್ ಒತ್ತಂಡದ್
(ಮತ್ತಾಯ 16.13–28; ಲೂಕ 9.18–21)
27ಪಿಂಞ ಯೇಸು ಅಂವೊಂಡ ಶಿಷ್ಯಂಗಡ ಕೂಡೆ ಕೈಸರೈಯ ಫಿಲಿಪ್ಪಿ ಎಣ್ಣುವ ಪಟ್ಟಣತ್‍ರ ಅಕ್ಕಪಕ್ಕತ್‌ಲ್ ಉಳ್ಳ ಊರ್‌ಕೇರಿಕ್ ಪೋಚಿ. ಬಟ್ಟೇಲ್ ಪೋಪಕಾಪಕ, ನಾನ್ ದಾರ್‍ೕಂದ್ ಈ ಜನ ಎಣ್ಣುವಾಂದ್ ಯೇಸು ಶಿಷ್ಯಂಗಳ ಕ್‍ೕಟತ್.
28ಅದ್ಂಗ್: ಚೆನ್ನ ಜನ ನೀನ್ ದೀಕ್ಷಾಸ್ನಾನ ತಪ್ಪ ಯೋಹಾನಾಂದು, ಚೆನ್ನ ಜನ ನೀನ್ ಎಲೀಯಾಂದು, ಚೆನ್ನ ಜನ ನೀನ್ ದಾರೋ ಒರು ಪ್ರವಾದೀಂದು ಎಣ್ಣಿಯಂಡುಂಡ್‍ೕಂದ್ ಅಯಿಂಗ ಜವಾಬ್ ಕೊಡ್‍ತತ್.
29ಪಿಂಞ ಯೇಸು ಅಯಿಂಗಳ ನೋಟಿತ್: ಆಚೇಂಗಿ ನಿಂಗ ನನ್ನ ದಾರ್‍ೕಂದ್ ಎಣ್ಣುವಿರಾಂದ್ ಕ್‍ೕಟತ್.
ಅದ್ಂಗ್ ಪೇತ್ರ: ನೀನ್ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್#8.29 ನೋಟಿ 1.1 ಎಣ್ಣ್‌ಚಿ.
30ಅಕ್ಕ ಯೇಸು ಅಯಿಂಗಕ್, ನಾನ್ ದಾರ್‍ಂದ್ ದಾರ್‌ಕು ನಿಂಗ ಎಣ್ಣತೀಂದ್ ಅಯಿಂಗಕ್ ಆಜ್ಞೆ ಮಾಡ್‍ಚಿ.
ಯೇಸು ತಾಂಡ ಕಷ್ಟ ಪಿಂಞ ಚಾವ್‍ರ ವಿಷಯ ಎಣ್ಣುವದ್
(ಮತ್ತಾಯ 16.21–28; ಲೂಕ 9.22–27)
31ಅಲ್ಲತೆ, ಮನುಷ್ಯಕುಮಾರ ದುಂಬ ಕಷ್ಟಪಟ್ಟಿತ್, ಪೆರಿಯಯಿಂಗಡ, ಮುಕ್ಯ ಯಾಜಕಂಗಡ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ಮಿಂಞತ್‍ಲ್ ತ್‍ಕ್ಕಾರ ಆಕಂಡು. ಎಲ್ಲಾರು ಕೂಡಿತ್ ಅಂವೊನ ಕೊಂದ್‌ರ್‌ವ, ಆಚೇಂಗಿ ಮೂಂದ್ ದಿವಸ ಆನ ಪಿಂಞ ಚಾವ್‍ಯಿಂಜ ಅಂವೊ ಜೀವವಾಯಿತ್ ಏವಾಂದ್ ಅಯಿಂಗಕ್ ಉಪದೇಶ ಮಾಡ್‌ವಕ್ ಸುರು ಮಾಡ್‍ಚಿ. 32ಈ ವಿಷಯತ್‌ನೆಲ್ಲ ಅಂವೊ ಚಾಯಿತೆ ವಿವರಿಚಿಡುವಕ, ಪೇತ್ರ ಯೇಸುನ ಆಬರಿಕ್ ಕಾಕುವಂಜಿ ಅಂವೊನ ಚೂಕ್‌ವಕ್ ಸುರು ಮಾಡ್‍ಚಿ.
33ಯೇಸು ಪುನಃ ತಿರಿತ್ ತಾಂಡ ಶಿಷ್ಯಂಗಡ ಪಕ್ಕ ನೋಟಿತ್ ಪೇತ್ರನ ಬಜ್ಜತ್. ನಾಡ ಬಯ್ಯಕ್ ಪೋ ಸೈತಾನೇ, ನೀನ್ ದೇವಡ ಚಿತ್ತತ್‍ರನೆಕೆ ಗೇನ ಮಾಡತೆ, ಮನುಷ್ಯಂಗಡ ಚಿತ್ತತ್‍ರನೆಕೆ ಗೇನ ಮಾಡ್‌ವಿಯಾಂದ್ ಅಂವೊನ ಚಾಕ್‍ಚಿ.
34ಯೇಸು ಅಲ್ಲಿ ಉಳ್ಳ ಜನಳ ಪಿಂಞ ಅಂವೊಂಡ ಶಿಷ್ಯಂಗಳ ಕಾಕುವಂಜಿ: ನಿಂಗಡಲ್ಲಿ ದಾರ್‌ಕೇಂಗಿ ನಾಡ ಶಿಷ್ಯನಾಯಿತ್ ಇಪ್ಪಕ್ ಕುಶಿ ಇಂಜತೇಂಗಿ, ಅಂವೊ ಅಂವೊಂಡ ಆಸೆನೆಲ್ಲಾ ಬುಟ್ಟಿತ್, ತಾಂಡ ಶಿಲುಬೇನ ನೇತಿಯಂಡ್ ನಾಡ ಬಯ್ಯತ್ ಬರಡ್. 35ದಾರ್‌ಕ್ ತಾಂಡ ಜೀವತ್‍ನ ಕಾಪಾಡ್‌ವಕ್ ಆಸೆ ಉಂಡೋ ಅಂವೊ ಅದ್‍ನ ಕಳೆಯುವ. ಆಚೇಂಗಿ ದಾರ್ ನಾಕಾಯಿತ್, ನಾಡ ನಲ್ಲ ಸುದ್ದಿಕಾಯಿತ್ ಜೀವತ್‍ನ ಕಳೆಯುವ ಅಂವೊ ಅದ್‍ನ ಕಾಪಾಡ್‌ವ. 36ಅಂವೊ ಈ ಲೋಕತ್‍ಲ್ ಉಳ್ಳಾನೆಲ್ಲಾ ತಾಂಗ್ ಸ್ವಂತವಾಯಿತ್ ಮಾಡ್‍ಚೇಂಗಿಯು, ಅಂವೊ ತಾಂಡ ಜೀವನತ್‌ನ ಪಾಳ್ ಮಾಡ್‍ಚೇಂಗಿ, ಅಂವೊಂಗ್ ಎಂತ ಲಾಬ? ಅಂವೊ ನಿತ್ಯ ಜೀವ ಇಲ್ಲತೆ ಚತ್ತ್ ಪೋಪ. 37ಅನ್ನನೆ ಆಚೇಂಗಿ ಅಂವೊಂಗ್ ನಿತ್ಯ ಜೀವ ಕ್‍ಟ್ಟ್‌ವಕ್ ಒಂದು ಮಾಡ್‌ವಕ್ ಕಯ್ಯುಲೆ. 38ಪಾಪ ಪಿಂಞ ವ್ಯಬಿಚಾರ ದುಂಬ್‍ನ ಈ ಲೋಕತ್‍ಲ್, ದಾರ್ ನಾಕಾಯಿತ್ ನಾಡ ಬೋದನೆಕಾಯಿತ್ ಞಾಣ ಪಡ್‍ವ, ಮನುಷ್ಯಕುಮಾರನು ಸಹ ತಾಂಡ ಅಪ್ಪಂಡ ಮಹಿಮೆಲ್ ತಾಂಡ ಪವಿತ್ರ ದೂತಂಗಡ ಕೂಡೆ ಬಪ್ಪಕ ಇನ್ನತಂವೊಂಡ ವಿಷಯತ್ ಞಾಣ ಪಡ್‍ವಾಂದ್ ಎಣ್ಣ್‌ಚಿ.
Currently Selected:
ಮಾರ್ಕ 8: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
