ಮಾರ್ಕ 13

ಯೇಸು ಯೆರೂಸಲೇಮ್‍ರ ಕಡೆ ಕಾಲತ್‍ರ ವಿಷಯತ್‍ನ ಎಣ್ಣ್‌ನದ್

(ಮತ್ತಾಯ 24.1,2; ಲೂಕ 21.5–36)

1ಯೇಸು ದೇವಾಲಯತ್ಂಜ ಪೊರಟಿತ್ ಪೋಪಕ ಒರ್ ಶಿಷ್ಯ, ಬೋದನೆಕಾರನೇ, ನೋಟ್ ಎಂತದೊರ್ ಕಲ್ಲ್ ಇದ್! ಎಂತದೊರ್ ಕಟ್ಟಡ ಇದ್! ಎಣ್ಣಿಯಂಡ್ ಎಣ್ಣ್‌ಚಿ.

2ಯೇಸು ಅಯಿಂಗಕ್: ನಿಂಗ ಈ ಕಟ್ಟಡತ್‌ನ ನೋಟ್‌ವಿರಾ? ಒರ್ ಕಲ್ಲ್‌ರ ಮೇಲೆ ಇಂಞೊರ್ ಕಲ್ಲ್ ಇಲ್ಲತನೆಕೆ ಈಂಗೆಲ್ಲಾ ನಾಶ ಆಯಿ ಪೋಪಾಂದ್ ಎಣ್ಣ್‌ಚಿ. 3ಪಿಂಞ ಯೇಸು ದೇವಾಲಯತ್‍ರ ಮಿಂಞತ್ ಆಲಿವ್ ಕುಂದ್‌ರ ಕೊಡಿಲ್ ಅಳ್‌ತಿತಿಪ್ಪಕ, ಪೇತ್ರ, ಯಾಕೋಬ, ಯೋಹಾನ ಪಿಂಞ ಅಂದ್ರೆಯ ಎಣ್ಣ್‌ವಯಿಂಗ ಗುಟ್ಟ್‌ಲ್ ಯೇಸುರ ಪಕ್ಕ ಬಾತ್.

ಕಷ್ಟ ಪಿಂಞ ಹಿಂಸೆ

(ಮತ್ತಾಯ 24.3–14; ಲೂಕ 21.7–19)

4ಇದೆಲ್ಲಾ ಎಕ್ಕ ಆಪಾಂದ್ ನಂಗಕ್ ಎಣ್ಣ್? ಇದೆಲ್ಲ ಆಪಕ್ ಮಿಂಞ ಎಂತ ಗುರ್‌ತ್ ಕಾಂಬಕಾಪಾಂದ್ ಅಯಿಂಗ ಕ್‍ೕಟತ್.

5ಅದ್ಂಗ್ ಯೇಸು: ನಿಂಗಳ ದಾರೂ ವಂಚನೆ ಮಾಡತನೆಕೆ ಎಚ್ಚರತ್ ಇರಿ. 6ಎನ್ನಂಗೆಣ್ಣ್‌ಚೇಂಗಿ ನಾಡ ಪೆದ ಎಣ್ಣಿಯಂಡ್, ನಾನೇ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್ ದುಂಬ ಜನ ಬಂತ್ ಜನಳ ವಂಚನೆ ಮಾಡ್‌ವ. 7ಯುದ್ದತ್‍ನ ಪಿಂಞ ಯುದ್ದತ್‍ರ ಸುದ್ದಿನ ಕ್‍ೕಪಕ ಗಾಬರಿ ಆಕತಿ. ಎಲ್ಲಾ ನಡ್‌ಕಂಡು, ಆಚೇಂಗಿಯು ಅದ್ ಅಂತ್ಯ ಕಾಲವಾಯಿತ್‌ಪ್ಪುಲೆ. 8ಜನಕ್ ವಿರೋದವಾಯಿತ್ ಜನಳು, ರಾಜ್ಯಕ್ ವಿರೋದವಾಯಿತ್ ರಾಜ್ಯವು ಯುದ್ದ ಮಾಡ್‌ವ; ದುಂಬ ಜಾಗತ್‍ಲ್ ಬಲ್ಯ ಬೂಕಂಪ ಆಪ, ಬರಗಾಲ ಬಪ್ಪ. ಇದ್ದೆಲ್ಲಾ ಎನ್ನನೆ ಎಣ್ಣ್‌ಚೇಂಗಿ ಪೊಣ್ಣಾಳ್‌ಕ್ ಪೆರುವ ನೊಂಬಲ ಸುರು ಆಪನೆಕೆ. 9ನಿಂಗ ಎಚ್ಚರತ್‍ಲ್ ಇರಿ. ಅಯಿಂಗ ನಿಂಗಳ ನ್ಯಾಯಾಲಯಕ್ ಬಲ್‍ಚಂಡ್ ಪೋಯಿತ್ ಅಯಿಂಗಡ ಆಲೋಚನೆ ಸಬೇಲ್ ಒಪ್ಪ್‌ಚ್ಚಿಟಿತ್, ಅಯಿಂಗಡ ಸಬಾಮಂದಿರತ್‍ಲ್ ನಿಂಗಳ ಚಾಟಿಲ್ ಪೊಯ್ಯುವ, ನಾಡಗುಂಡ್ ಬಲ್ಯ ಅದಿಪತಿಯಂಗಡ ಪಿಂಞ ರಾಜಂಗಡ ಮಿಂಞತ್‍ಲ್ ನಾಡ ನಲ್ಲ ಸುದ್ದಿ ಎಣ್ಣ್‌ವಕಾಯಿತ್ ನಿಪ್ಪ್‌ಚಿಡುವ. 10ಆಚೇಂಗಿ ಅಂತ್ಯಕಾಲ ಬಪ್ಪಗಿಂಜ ಮಿಂಞ ಎಲ್ಲಾ ಜಾತಿ ಜನಕು ದೇವಡ ನಲ್ಲ ಸುದ್ದಿ ಪ್ರಚಾರ ಮಾಡಂಡು. 11ನಿಂಗಳ ಜೈಲ್‌ಕ್ ಇಟ್ಟಕ ನ್ಯಾಯಲಾಯಕ್ ಕಾಕಿಯಂಡ್ ಪೋನಕ ನಿಂಗ ಎಂತ ಎಣ್ಣಂಡು, ಎಂತ ತಕ್ಕ್ ಪರಿಯಂಡು ಎಣ್ಣಿಯಂಡ್ ಬೇಜಾರ್ ಮಾಡಂಡ. ಆ ಸಮಯ ಬಪ್ಪಕ ನಿಂಗಕ್ ಎಂತ ಗೇನ ಬಪ್ಪ ಅದ್‍ನ ಎಣ್ಣಿ. ಅಕ್ಕ ನಿಂಗ ಎಂತ ತಕ್ಕ್ ಪರಿವಿರ, ಅದ್ ನಿಂಗ ತಕ್ಕ್ ಪರಿಯುವದ್ ಅಲ್ಲ, ಅದ್ ಪವಿತ್ರಾತ್ಮಂಡ ತಕ್ಕಾಯಿತ್ ಇಪ್ಪ 12ಮನುಷ್ಯಂಗ ತಾಂಡ ಸ್ವಂತ ಅಣ್ಣತಮ್ಮಣಂಗಳ ಒಪ್ಪ್‌ಚಿಡ್‌ವಂಜಿ ಕೊಲ್ಲ್‌ಚಿಡುವ, ಅಪ್ಪಂಗ ಸಹ ತಾಂಡ ಮಕ್ಕಳ ಅದೇ ಪ್ರಕಾರ ಒಪ್ಪ್‌ಚಿಡ್‌ವಂಜಿ ಕೊಲ್ಲ್‌ಚಿಡುವ. ಮಕ್ಕ ಅಪ್ಪವ್ವಂಗಕ್ ವಿರೋದವಾಯಿತ್ ಮಕ್ಕಳೇ ಅಯಿಂಗಳ ಕೊಲ್ಲ್‌ಚಿಡುವ. 13ನಿಂಗ ನಾಡ ಶಿಷ್ಯಂಗಳಾನಗುಂಡ್ ಎಲ್ಲಾರು ನಿಂಗಳ ತ್‍ಕ್ಕಾರ ಮಾಡ್‌ವ, ಆಚೇಂಗಿ ಕಡೇಕತ್ತನೆ ಸ್ತಿರವಾಯಿತ್ ನಿಪ್ಪಂವೊಂಗ್ ರಕ್ಷಣೆ ಕ್‍ಟ್ಟುವ.

ಅಸಹ್ಯ ವಸ್ತು

(ಮತ್ತಾಯ 24.15–28; ಲೂಕ 21.20–24)

14ಪಾಳ್ ಮಾಡ್‌ವ ಅಸಹ್ಯ ವಸ್ತು ನಿಪ್ಪಕ್ಕಾಗತ ಜಾಗದತ್‍ಲ್ ನಿಪ್ಪದ್‌ನ ನಿಂಗ ಕಾಂಬಕ, ಯೂದಾಯ ದೇಶತ್‍ಲ್ ಉಳ್ಳಯಿಂಗ ಕುಂದ್‌ರ ಕೊಡಿಕ್ ಓಡಡ್. ದಾನಿಯೇಲ ಪ್ರವಾದಿ ಎಣ್ಣ್‌ನನೆಕೆ, ಇದ್‍ನ ಓದ್‍ವಂವೊ ಗೇನ ಮಾಡಂಡು. 15ಮನೆರ ಕೊಡಿಲ್ ಇಪ್ಪಯಿಂಗ ಅಡಿಕ್ ಇಳಿಯತೆ, ಮನೇರೊಳ್‌ಕ್ ಪೋಯಿತ್ ಏದ್ ಒರ್ ಸಾಮಾನ್‌ನ ಎಡ್‌ತ ಬಪ್ಪಕ್ ಪೋಕತೆ ಇರಂಡು. 16ಬೇಲ್‌ಲ್ ಇಪ್ಪ ಮನುಷ್ಯಂಗ ಅಂವೊಂಡ ಬಟ್ಟೇನ ಎಡ್‌ತ ಬಪ್ಪಕ್ ಪೋಪಕ್ಕಾಗ. 17ಆ ದಿವಸತ್‍ಲ್ ಕೆಲಕರ್ತಿಯಂಗಕು, ಕುಂಞಿಕ್ ಪಾಲ್ ಕೊಡ್‍ಪ ಅವ್ವಂಗಕು ಅಯ್ಯೋ! 18ಈ ತರ ಕಠಿಣ ದಿವಸ ಕುಳ್‌ರ್ ಕಾಲವಾಯಿತ್ ಇಪ್ಪಕ್ಕಾಗಾಂದ್ ದೇವನ ಪ್ರಾರ್ಥನೆ ಮಾಡಿ. 19ದೇವ ಬೂಲೋಕತ್‍ನ ಸೃಷ್ಟಿ ಮಾಡ್‌ನಲ್ಲಿಂಜ ಇಕ್ಕಣೆಕೆ ಆಯಿತಿಲ್ಲತ, ಇಂಞು ಮಿಂಞಕು ಆಕತ ಅಚ್ಚಕ್ ಹಿಂಸೆ ಅಂದ್ ಆಪ. 20ಆ ದಿವಸತ್‍ನ ದೇವ ಕಮ್ಮಿ ಮಾಡತೆ ಪೋಯಿತ್ಂಜತೇಂಗಿ, ದಾರೂ ಬದ್‌ಕಿತ್ ಇಪ್ಪುಲೆ. ಆಚೇಂಗಿ ದೇವ ಗೊತ್ತ್ ಮಾಡಿತುಳ್ಳ ಮಕ್ಕಕಾಯಿತ್ ಆ ದಿವಸತ್‍ನ ಕಮ್ಮಿ ಮಾಡಿಯತ್.

21ಅಕ್ಕ: ದಾರೇಂಗಿ, ನೋಟಿ! ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ#13.21 ನೋಟಿ 1.1 ಇಲ್ಲಿ ಉಂಡ್, ಅಲ್ಲಿ ಉಂಡ್‍ೕಂದ್ ಎಣ್ಣ್‌ಚೇಂಗಿ ನಂಬತಿ. 22ಎನ್ನಂಗೆಣ್ಣ್‌ಚೇಂಗಿ, ಕಳ್ಳ ಕ್ರಿಸ್ತಂಗ ಪಿಂಞ ಕಳ್ಳ ಪ್ರವಾದಿಯಂಗ ಉದಿಚಿ, ಕಯ್ಯುವೇಂಗಿ ದೇವ ಗೊತ್ತ್ ಮಾಡಿತುಳ್ಳಯಿಂಗಡ ನಂಬಿಕೇನ ಕೆಡ್‍ತ್‌ವಕ್ ವಂಚನೆ ಮಾಡಿತ್ ಗುರ್‌ತ್ ಕಾಟಿತ್ ಆಶ್ಚರ್ಯ ಕಾರ್ಯತ್‍ನ ಮಾಡ್‌ವ. 23ನಿಂಗ ಎಚ್ಚರತ್‍ಲ್ ಇರಿ! ಇದಾ! ನಾನ್ ಇದ್‍ನೆಲ್ಲ ಆಪಕ್ ಮಿಂಞಲೇ ಎಣ್ಣಿ ತಂದಿಯೆ.

ಮನುಷ್ಯಕುಮಾರ ಬಪ್ಪದ್

(ಮತ್ತಾಯ 24.29–31; ಲೂಕ 21.25–28)

24ಅಂದತ ಕಾಲತ್‍ಲ್, ಅಂತ ಸಂಕಟ ಕಾಲ ಆನ ಪಿಂಞ,

ಸೂರ್ಯ ಇರ್‌ಟ್ ಆಪ,

ಚಂದ್ರ ಬೊಳಿ ಕೊಡ್‍ಪ್‍ಲೆ.

25ಬಾನತ್ ಮೀನ್ ಅಡಿಕ್ ಬೂವ.

ಬಾನತ್‍ರ ಪ್ರತಿಯೊರ್ ಶಕ್ತಿಯು ನಡ್‌ಗುವ.

26ಅಕ್ಕ ಮನುಷ್ಯಕುಮಾರ ದುಂಬ ಶಕ್ತಿಲ್, ದುಂಬ ಮಹಿಮೆಲ್ ಮೋಡತ್‍ಲ್ ಬಪ್ಪದ್‍ನ ಕಾಂಬ. 27ಅಂವೊ ತಾಂಡ ದೇವದೂತಂಗಳ ಬೂಲೋಕತ್‌ರ ಒರ್ ಮೂಲೆಯಿಂಜ ಇಂಞೊರ್ ಮೂಲೆಕತ್ತನೆ ನಾಲ್ ದಿಕ್ಕ್‌ಕ್ ಅಯಿಪಂಜಿ ದೇವ ಗೊತ್ತ್ ಮಾಡಿತುಳ್ಳಯಿಂಗಳ, ಕಾಕಿತ್ ಕೂಟ್‌ವ.

ಅತ್ತಿ ಮರತ್‍ರ ಬೋದನೆ

(ಮತ್ತಾಯ 24.32–35; ಲೂಕ 21.29–33)

28ಅತ್ತಿ ಮರ ನಿಂಗಕ್ ಒರ್ ಪಾಠ ಪಡಿಪ್‌ಚಿಡಡ್. ಆ ಮರತ್‍ರ ಕೊಂಬ್ ಪಚ್ಚೆ ಆಯಿತ್, ಚಿಗ್‌ರೆಲೆ ಬಪ್ಪಕ, ನಿಂಗಕ್ ಬೇನಿಕಾಲ ಬಪ್ಪಕಾಚೀಂದ್ ಗೊತ್ತಾಪ. 29ಅನ್ನನೆ ಈ ತರತ್‍ರ ಘಟನೆಯೆಲ್ಲ ನಿಂಗ ಕಾಂಬಕಾಪಕ, ಅಂವೊ ಪಡಿರ ಪಕ್ಕತ್ ಬಂದಿತ್ತುಂಡ್‍ೕಂದ್ ನಿಂಗಕ್ ಗೊತ್ತಿರಡ್. 30ಈ ಘಟನೆಯೆಲ್ಲ ಆಪಕ್ ಮಿಂಞ ಈ ಸಂತಾನ ಪಾಳಾಯಿ ಪೋಪುಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ. 31ಬಾನ ಬೂಮಿ ಎಲ್ಲಾ ನಾಶ ಆಪ, ಆಚೇಂಗಿ ನಾಡ ತಕ್ಕ್ ನಾಶ ಆಪುಲೆ.

ದಾರ್‌ಕು ಗೊತ್ತಿಲ್ಲತ ಸಮಯ

(ಮತ್ತಾಯ 24.36–44)

32ಆ ದಿನವು, ಆ ಸಮಯವು ನಾಡ ಅಪ್ಪನಾನ ದೇವ ಒಬ್ಬನ ಬುಟ್ಟಿತ್ ಬೋರೆ ದಾರ್‌ಕು ಗೊತ್ತ್‌ಲ್ಲೆ. ಪರಲೋಕತ್‍ಲ್ ಉಳ್ಳ ದೂತಂಗಕು ಪಿಂಞ ಅಂವೊಂಡ ಮೋಂವೊಂಗ್ ಸಹ ಗೊತ್ತಿಪ್ಪುಲೆ. 33ಆ ಕಾಲ ಎಕ್ಕ ಬಪ್ಪಾಂದ್ ನಿಂಗಕ್ ಗೊತ್ತಿಲ್ಲತಗುಂಡ್, ಎಲ್ಲಾರು ಎಚ್ಚರತ್‍ಲ್ ಪಾರಕಾತಂಡ್, ಪ್ರಾರ್ಥನೆ ಮಾಡಿಯಂಡಿರಿ. 34ಒರ್ ಮನುಷ್ಯ ಅಂವೊಂಡ ಮನೆನ ಬುಟ್ಟಿತ್ ದೂರ ದೇಶಕ್ ಪೋಪಕ, ಅಂವೊಂಡ ಆಳ್ಂಗಕ್ ಅದಿಕಾರ ಕೊಡ್‌ತಿತ್, ಅಯಿಂಗಯಿಂಗಕ್ ಕೆಲಸತ್‍ನ ಪಾಲ್ ಮಾಡಿ ಕೊಡ್‌ತಿತ್, ಎಚ್ಚರತ್‍ಲ್ ಇರ್‍ೕಂದ್ ಮನೆನ ಕಾಪಂವೊಂಗ್ ಎಣ್ಣಿತ್ ಪೋಪ. 35ಅನ್ನನೆ ನಿಂಗಳು ಎಚ್ಚರವಾಯಿತಿರಿ, ಎನ್ನಂಗೆಣ್ಣ್‌ಚೇಂಗಿ, ಮನೆರ ಎಜಮಾನ ಬಪ್ಪದ್ ಬೈಟಾಕು, ಅಥವ ನಡ್‌ಪಾದ್ರೆ ಆಕು, ಅಥವ ಪೊಲಾಕ ಮಲ್ಲಂಗೋಳಿ ಕೂವ ನೇರಾಯಿತಿಕ್ಕು, ಅಥವ ಪೊಲಾಕ ಆಯಿತಿಕ್ಕು. ಎಕ್ಕ ಬಯ್ಯಕ್ ವಾಪಸ್ ಬಪ್ಪ ಎಣ್ಣಿಯಂಡ್ ನಿಂಗಕ್ ಗೊತ್ತ್‌ಲ್ಲೆ. 36ನಿಂಗ ಗೇನ ಮಾಡತ ಸಮಯತ್‍ಲ್ ಅಂವೊ ಬಂತ್, ನಿಂಗ ವರಿಯಂಡಿಪ್ಪದ್‍ನ ಕಾಂಗತನೆಕೆ ಎಚ್ಚರವಾಯಿತಿರಿ. 37ನಾನ್ ನಿಂಗಕ್ ಎಂತ ಎಣ್ಣ್‌ವಿ, ಅದ್‍ನ ಎಲ್ಲಾರ್‌ಕು ಎಣ್ಣ್‌ವಿ, ಎಚ್ಚರವಾಯಿತ್ ಇರಿ.

Currently Selected:

ಮಾರ್ಕ 13: ಕೊಡವ

Highlight

Copy