ಮಾರ್ಕ 12

ದ್ರಾಕ್ಷಿ ತೋಟತ್‍ನ ವಾರಕಾರಕ್ ಬುಡ್‌ವ ಕಥೇರ ರೂಪ

(ಮತ್ತಾಯ 21.33–46; ಲೂಕ 20.9–19)

1ಯೇಸು ಅಯಿಂಗಕ್ ಇಂಞೊರ್ ಕಥೇರ ರೂಪತ್‍ನ ಎಣ್ಣಿ ಕೊಡ್‍ತತ್. ಅದ್ ಎಂತ ಎಣ್ಣ್‌ಚೇಂಗಿ, ಒರ್ ಮನುಷ್ಯ ದ್ರಾಕ್ಷಿ ತೋಟ ಮಾಡ್‍ಚಿ. ತೋಟತ್‍ರ ಸುತ್ತ್‌ಲೂ ಬೇಲಿ ಕೆಟ್ಟ್‌ಚಿ. ದ್ರಾಕ್ಷಿರಸ ಮಾಡ್‌ವಕ್ ಉಳ್ಳ ಒರ್ ಕುಂಡ್‌ನ ಸಹ ಎಡ್‍ತತ್. ಆಂಡ ಪಕ್ಕತ್‍ಲ್ ಒರ್ ಕಾಕೂಡ್ ಕೆಟ್ಟ್‌ಚಿ. ಅಲ್ಲಿಂಜ ಅಂವೊ, ಅಂವೊಂಡ ವಾರಕಾರಂಗಕ್ ಈ ದ್ರಾಕ್ಷಿ ತೋಟತ್‍ನ ನೋಟಿಯೊಳೀಂದ್ ಎಣ್ಣಿತ್ ದೂರ ದೇಶಕ್ ಪೋಚಿ. 2ದ್ರಾಕ್ಷಿ ಪಣ್ಣ್ ಕೊಯ್ಯುವಕ್ಕ್ ಸಮಯ ಬಾತ್. ಅಂವೊಂಡ ಪಾಲ್‍ಕ್ ಬಂದ ದ್ರಾಕ್ಷಿ ಪಣ್ಣ್‌ನ ಎಡ್‌ತ ಬಪ್ಪಕ್ ಒರ್ ಆಳ್‌ನ ಅಯಿಚತ್. 3ಆ ವಾರಕಾರಂಗ ಅಂವೊನ ಬಲಿಪಂಜಿ, ಪೊಜ್ಜಿತ್ ಅಂವೊಂಗ್ ಒಂದು ಕೊಡ್‍ಕತೆ ಬಯ್ಯಕ್ ಅಯಿಚತ್. 4ಆ ಎಜಮಾನ ಪುನಃ ಇಂಞೊರ್ ಆಳ್‌ನ ಅಯಿಚತ್. ವಾರಕಾರಂಗ ಅಂವೊನ ಸಹ ಪೊಯ್ಯುವಂಜಿ, ಮಂಡೆಕ್ ಗಾಯ ಮಾಡಿತ್, ಅವಮಾನ ಮಾಡಿತ್ ಬಯ್ಯಕ್ ಅಯಿಚತ್. 5ಎಜಮಾನ ಇಂಞೊರ್ ಆಳ್‌ನ ಸಹ ಅಯಿಚತ್. ಅಂವೊನ ವಾರಕಾರಂಗ ಕೊಂದ್‍ರ್‌ತ್. ಸುಮಾರ್ ಆಳ್‍ವಳ ಅಯಿಚತ್; ಚೆನ್ನ ಆಳ್‍ವಳ ಅಯಿಂಗ ಪೊಜ್ಜತ್ ಚೆನ್ನ ಜನಳ ಕೊಂದ್‍ರ್‌ತ್. 6ಅಂವೊಂಡ ಒರೇ ಕೊದಿರ ಮೋಂವೊನ ಮಾತ್ರ ಅಯಿಪಕ್ ಬಾಕಿ ಇಂಜತ್. ನಾಡ ಮೋಂವೊನ ಅಯಿಚತೇಂಗಿ ಅಂವೊಂಗ್ ಮರ್ಯಾದೆ ಕೊಡ್‍ಪ ಎಣ್ಣಿಯಂಡ್ ಮೋಂವೊನ ಅಯಿಚತ್.

7ಆಚೇಂಗಿ ಆ ವಾರಕಾರಂಗ ಮೋಂವೊ ಬಪ್ಪದ್ ಕಾಂಬಂಜಿ: ಇಂವೊ ಈ ತೋಟತ್‍ರ ಹಕ್ಕ್‌ದಾರಂಡ ಮೋಂವೊ ಎಣ್ಣಿಯಂಡ್, ಬಾರಿ ನಂಗ ಅಂವೊಂಡ ಮೋಂವೊನ ಕೊಂದ್‌ರ್‌ತೇಂಗಿ, ಅಕ್ಕ ಈ ಸೊತ್ತ್ ನಂಗಡದಾಪಾಂದ್ ತಕ್ಕ್ ಪರ್ಂದತ್. 8ಅಂವೊನ ದ್ರಾಕ್ಷಿ ತೋಟತ್‍ರ ಪೊರಮೆ ಚಾಡ್‍ವಂಜಿ, ಮೋಂವೊನ ಕೊಂದ್‍ರ್‌ತ್.

9ಅನ್ನನಾಚೇಂಗಿ ವಾರಕಾರಂಗಕ್ ದ್ರಾಕ್ಷಿ ತೋಟತ್‍ರ ಎಜಮಾನ ಎಂತ ಮಾಡ್‌ವ? ಅಂವೊ ಅಯಿಂಗಳ ಕೊಂದ್‍ರ್‍ವಂಜಿ ಬೋರೆ ವಾರಕಾರಂಗಕ್ ತೋಟತ್‍ನ ಕೊಡ್‍ಪಾಂದ್ ಯೇಸು ಎಣ್ಣ್‌ಚಿ.

10ಮನೆ ಕೆಟ್ಟ್‌ವಂವೊ ಲಾಯಕಾಯಿತ್‌ಲ್ಲೇಂದ್

ತ್‍ಕ್ಕಾರ ಮಾಡ್‍ನ ಕಲ್ಲೇ ಮುಕ್ಯವಾನ ಮೂಲೆ ಕಲ್ಲಾಚ್.

11ಇದ್ ದೇವನೇ ಮಾಡ್‍ಚಿ.

ಅದ್ ನಂಗಡ ಕಣ್ಣ್‌ಕ್ ಆಶ್ಚರ್ಯವಾಯಿತುಂಡ್‍ೕಂದ್

ಉಳ್ಳ ದೇವಡ ವಾಕ್ಯ ನೇರಾಯಿತು ನಿಂಗಕ್ ಗೊತ್ತುಂಡ್.#12.11 ದೇವಡ ಪಾಟ್ 118.22,23

12ಯೇಸು ಎಣ್ಣ್‌ನ ಈ ಕಥೇರ ರೂಪ, ಅಯಿಂಗಡ ವಿಷಯತ್‍ನೇ ಎಣ್ಣ್‌ಚೀಂದ್ ಯೆಹೂದ್ಯರ ಅದಿಕಾರಿಯಂಗಕ್ ಗೊತ್ತಾಯಿತ್, ಯೇಸುನ ಪುಡಿಪಕ್ ನೋಟ್‌ಚಿ. ಆಚೇಂಗಿ ಈ ಬಲ್ಯ ಜನಡ ಗುಂಪ್‍ನ ಕಂಡಿತ್ ಅಯಿಂಗಕ್ ಪೋಡಿ ಆಚಿ. ಯೇಸುನ ಅನ್ನನೆ ಬುಟ್ಟಿತ್ ಪೋಚಿ.

ನಾನಾತರ ಪ್ರಶ್ನೆ ಕ್‍ೕಟಿತ್ ಯೇಸುನ ಕೆಣಿಪಕ್ ನೋಟ್‌ನದ್ ಪಿಂಞ ಅದ್‍ಲ್ ಅಯಿಂಗ ಚೋತದ್

(ಮತ್ತಾಯ 22.15–22; ಲೂಕ 20.20–26)

13ಮಹಾ ಯಾಜಕಂಗ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಪಿಂಞ ಪೆರಿಯಯಿಂಗ ಯೇಸುನ ನಾನಾತರ ಪ್ರಶ್ನೆ ಕ್‍ೕಟಿತ್ ಕೆಣಿಪಕಾಯಿತ್ ಚೆನ್ನ ಫರಿಸಾಯಂಗ ಪಿಂಞ ಹೆರೋದ ರಾಜಂಡ ಪಕ್ಷಕಾರಂಗಳ ಅಯಿಚತ್.

14ಅಯಿಂಗ ಯೇಸುರ ಪಕ್ಕ ಬಂದಿತ್: ಉಪಾದ್ಯನೇ, ನೀನ್ ಸತ್ಯ ಉಳ್ಳಂವೊನು, ದೇವಡ ಚಿತ್ತತ್‍ರ ವಿಷಯತ್ ಜನಕ್ ಸತ್ಯವಾಯಿತ್ ಬೋದನೆ ಮಾಡ್‍ವಿಯಾಂದು, ದಾರ್‌ಕು ಬೊತ್ತ್‌ವಂವೊ ಅಲ್ಲಾಂದು, ಪಕ್ಷಪಾತ ಇಲ್ಲತಂವೋಂದು ನಂಗಕ್ ಗೊತ್ತುಂಡ್. ಕೈಸರಂಗ್ ಕಂದಾಯ ಕೊಡ್‍ಪದ್ ಸರಿಯಾ? ನಂಗ ಕೊಡ್‌ಕಂಡುವ ಅಲ್ಲತೆ ಕೊಡ್‍ಕತೆ ಬುಡಂಡುವಾಂದ್ ಕ್‍ೕಟತ್. 15ಆಚೇಂಗಿ ಅಯಿಂಗಡ ಕಪಟ ಕಳಿ ಯೇಸುಕ್ ಗೊತ್ತಾಚಿ.

ಅಕ್ಕ ಅಂವೊ: ನಿಂಗ ಎನ್ನಂಗ್ ನನ್ನ ಕೆಣಿಪಕ್ ನೋಟ್‍ವಿರ? ಒರ್ ಬೊಳ್ಳಿರ ನಾಣ್ಯತ್‍ನ ಕೊಂಡ್‌ಬಾರಿ ಅದ್‍ನ ನಾನ್ ನೋಟ್‌ವಿ. 16ಅಯಿಂಗ ಒರ್ ಬೊಳ್ಳಿರ ನಾಣ್ಯತ್‍ನ ಎಡ್‍ತಂಡ್ ಬಾತ್.

ಅಕ್ಕ ಯೇಸು: ಇದ್‍ಲ್ ದಾಡ ಪೆದ ಪಿಂಞ ದಾಡ ಮೂಡ್ ಉಂಡ್ ಎಣ್ಣೀಂದ್ ಅಯಿಂಗಳ ಕ್‍ೕಟತ್.

ಇದ್‍ಲ್ ಕೈಸರಂಡ ಮೂಡ್ ಉಂಡ್‍ೕಂದ್ ಅಯಿಂಗ ಎಣ್ಣ್‌ಚಿ.

17ಅಕ್ಕ ಯೇಸು ಅಯಿಂಗಕ್: ಅಕ್ಕುವ, ಅಕ್ಕ, ಕೈಸರಂಡದ್‍ನ ಕೈಸರಂಗ್ ಕೊಡಿ, ದೇವಡದ್ ದೇವಕ್ ಕೊಡೀಂದ್ ಉತ್ತರ ಕೊಡ್‍ತತ್. ಅಯಿಂಗಕ್ ಯೇಸುರ ತಕ್ಕ್ ಕ್‍ೕಟದು ಆಶ್ಚರ್ಯ ಆಚಿ.

ಚಾವ್‍ಯಿಂಜ ಜೀವತ್‍ಲ್ ಬಪ್ಪ ವಿಷಯತ್‌ ಪ್ರಶ್ನೆ

(ಮತ್ತಾಯ 22.23–33; ಲೂಕ 20.27–40)

18ಚತ್ತ್ ಪೋನಯಿಂಗ ದಾರೂ ಜೀವವಾಯಿತ್ ಏವುಲೇಂದ್ ವಾದ ಮಾಡ್‌ವ ಸದ್ದುಕಾಯಂಗ ಯೇಸುರ ಪಕ್ಕ ಬಂತ್: 19ಉಪಾದ್ಯನೇ, ಒರ್ ಮನುಷ್ಯ ಮಕ್ಕ ಇಲ್ಲತೆ ಪೊಣ್ಣ್‌ನ ಬುಟ್ಟಿತ್ ಚತ್ತ್ ಪೋಯಿತ್ಂಜತೇಂಗಿ, ಚತ್ತ್ ಪೋನಂವೊಂಡ ತಮ್ಮಣ ಅಂವೊಂಡ ಅಣ್ಣಂಡ ಪೊಣ್ಣ್‌ನ ಮಂಗಲ ಕಯಿಕಂಡು. ಅಕ್ಕ ಅಯಿಂಗಕ್ ಮಕ್ಕ ಆನಕ ಆ ಮಕ್ಕ ಚತ್ತ್ ಪೋನಂವೊಂಡ ಮಕ್ಕಡನೆಕೆ ಆಪಾಂದ್ ಮೋಶೆ ನಂಗಕ್ ಈ ಕಾನೂನ್‌ನ ಒಳ್‍ದಿ ಬೆಚ್ಚತ್.#12.19 ದರ್ಮಶಾಸ್ತ್ರ ಪುಸ್ತಕ 25.5,6 20ಒಮ್ಮ ಏಳ್ ಅಣ್ಣತಮ್ಮಣಂಗ ಇಂಜತ್. ಪೆರಿಯಂವೊಂಗ್ ಮಂಗಲ ಆಚಿ ಅಂವೊಂಗ್ ಮಕ್ಕ ಇಲ್ಲತೆ ಚತ್ತ್ ಪೋಚಿ. 21ದಂಡನೆಯಂವೊ ಅವಳ ಮಂಗಲ ಕಯಿಚತ್ ಅಂವೊಂಗು ಮಕ್ಕ ಆಯಿತ್‌ಲ್ಲೆ, ಅಂವೊ ಸಹ ಚತ್ತ್ ಪೋಚಿ. ಅನ್ನನೆ ಮೂಂದನೆ ತಮ್ಮಣ ಸಹ ಅವಳ ಮಂಗಲ ಕಯಿಚತ್. ಅಂವೊಂಗು ಮಕ್ಕ ಆಯಿತ್‌ಲ್ಲೆ, ಅಂವೊನು ಚತ್ತ್ ಪೋಚಿ. 22ಎಲ್ಲಾ ಏಳ್ ಅಣ್ಣತಮ್ಮಣಂಗಳು ಅವಳ ಮಂಗಲ ಕಯಿಚತ್ ಆಚೇಂಗಿ ಏಳಾಳು ಮಕ್ಕ ಇಲ್ಲತೆ ಚತ್ತ್ ಪೋಚಿ. ಆಕೀರ್‌ಕ್ ಆ ಪೊಣ್ಣಾಳು ಚತ್ತ್ ಪೋಚಿ. 23ಅಂದಕ, ಚಾವ್‍ಯಿಂಜ ಎಲ್ಲಾ ಮನುಷ್ಯಂಗ ಜೀವವಾಯಿತ್ ಎದ್ದಿತ್ ಬಪ್ಪ ಆ ದಿನತ್‌ಲ್ ಆ ಪೊಣ್ಣಾಳ್ ಏದ್ ಆಣಾಳ್‌ರ ಪೊಣ್ಣಾಯಿತಿಪ್ಪ? ಏಳ್ ಅಣ್ಣತಮ್ಮಣಂಗಳು ಅವಳ ಮಂಗಲ ಕಯಿಚಿತಲ್ಲಾಂದ್ ಎಣ್ಣ್‌ಚಿ.

24ಯೇಸು ಅಯಿಂಗಕ್: ದೇವಡ ಶಕ್ತಿ ಪಿಂಞ ದೇವಡ ವಾಕ್ಯ ನಿಂಗಕ್ ಗೊತ್ತಿಲ್ಲತಗುಂಡ್ ತಪ್ಪಾಯಿತ್ ನಿಂಗ ಗೇನ ಮಾಡಿಯಂಡುಂಡ್. 25ಚತ್ತ್ ಪೋನಯಿಂಗ ಎದ್ದಿತ್ ಬಪ್ಪಕ ಅಯಿಂಗ ಪರಲೋಕತ್‌ಲುಳ್ಳ ದೇವದೂತಂಗಡನೆಕೆ ಆಯಿತಿಪ್ಪ. ಅಯಿಂಗಕ್ ಮಂಗಲ ಆಪುಲೇಂದ್ ಎಣ್ಣ್‌ಚಿ. 26ಇಂಞು ಅಂವೊ, ಚತ್ತ್ ಪೋನಯಿಂಗ ಏವ ವಿಷಯತ್‍ನ: ನಾನ್ ಅಬ್ರಹಾಮಂಡ#12.26 ಇಸ್ರಾಯೇಲ್ ದೇಶತ್‍ರ ಕಾರಣಕಾರಣೇ ಅಬ್ರಹಾಮ. ಇಂವೊ ಕ್ರಿಸ್ತ ಪೂರ್ವ 2000 ಕಾಲಕ್ ಬಯ್ಯತ್‌ಲ್ ಬದ್‌ಕ್‌ನಂವೊ. ಇಸಾಕ ಇಂವೊಂಡ ಮೋಂವೊ. ಯಾಕೋಬ ಇಸಾಕಂಡ ಮೋಂವೊ. ಈ ಲೋಕತ್‍ಲ್ ಅಯಿಂಗೆಲ್ಲಾ ಚತ್ತ್ ಪೋಚೇಂಗಿಯು, ದೇವಡ ನೋಟತ್‌ಲ್ ಅಯಿಂಗೆಲ್ಲಾ ಬದ್‍ಕಿಯಂಡುಂಡ್. ದೇವ, ಇಸಾಕಂಡ ದೇವ, ಯಾಕೋಬಂಡ ದೇವಾಂದ್ ಚುಡ್‌ವ ಪೊದರ್ ಎಣ್ಣುವ ಜಾಗತ್‍ಲ್ ಮೋಶೇರ ಗ್ರಂಥತ್‌ಲ್ ಅಂವೊಂಗ್ ಎಣ್ಣಿತುಳ್ಳದ್ ನಿಂಗ ಓದಿತ್ತ್‌ಲ್ಲೆಯಾ?#12.26 ಪ್ರಯಾಣ ಪುಸ್ತಕ 3.6 27ಅಂವೊ ಚತ್ತಪೋನಯಿಂಗಕ್ ದೇವ ಅಲ್ಲ ಆಚೇಂಗಿ ಜೀವತ್‍ಲ್ ಉಳ್ಳಯಿಂಗಕ್ ದೇವ. ಆನಗುಂಡ್ ನಿಂಗ ದುಂಬ ತಪ್ಪಾಯಿತ್ ಅರ್ಥ ಮಾಡಿಯಂಡುಳ್ಳಿರಾಂದ್ ಎಣ್ಣ್‌ಚಿ.

ಮುಕ್ಯಪಟ್ಟ ಕಾನೂನ್

(ಮತ್ತಾಯ 22.34–40; ಲೂಕ 10.25–28)

28ಒರ್ ನ್ಯಾಯಪ್ರಮಾಣ ಗೊತ್ತುಳ್ಳ ಉಪಾದ್ಯ ಅಯಿಂಗ ಈ ತರ ಚರ್ಚೆ ಮಾಡಿಯಂಡಿಂಜ ತಕ್ಕ್‌ನ ಕ್‍ೕಟಂಡಿಂಜತ್. ಯೇಸು ಅಯಿಂಗಕ್ ಚಾಯಿತೆ ಜವಾಬ್ ಕೊಡ್‌ತತ್‍ೕಂದ್ ಯೇಸುರ ಪಕ್ಕ ಬಂದಿತ್, ನ್ಯಾಯಪ್ರಮಾಣತ್‍ಲ್ ಏದ್ ಮುಕ್ಯಪಟ್ಟ ಆಜ್ಞೇಂದ್ ಕ್‍ೕಟತ್.

29ಅದ್ಂಗ್ ಯೇಸು: ಎಲ್ಲಾಗಿಂಜ ಮುಕ್ಯಪಟ್ಟ ಆಜ್ಞೆ ಎಂತ ಎಣ್ಣ್‌ಚೇಂಗಿ: ಇಸ್ರಾಯೇಲ್ ಮಕ್ಕಳೇ, ನಂಗಡ ದೇವನಾನ ಒಡೆಯ ಒಬ್ಬನೇ, ಅಂವೊನೇ ಒಡೆಯ. 30ನೀಡ ದೇವನಾನ ಒಡೆಯನ ನೀಡ ತ್‍ೕರ ಹೃದಯತ್‍ಲ್, ನೀಡ ತ್‍ೕರ ಆತ್ಮತ್‍ಲ್, ನೀಡ ತ್‍ೕರ ಮನಸ್ಸ್‌ಲ್, ನೀಡ ತ್‍ೕರ ಶಕ್ತಿಲ್ ಪ್ರೀತಿಮಾಡ್, ಎಣ್ಣುವ ಕಾನೂನೇ ಮುಕ್ಯಪಟ್ಟ ಕಾನೂನ್.#12.30 ದರ್ಮಶಾಸ್ತ್ರ ಪುಸ್ತಕ 6.4,5

31ದೇವಡ ಮುಕ್ಯಪಟ್ಟ ದಂಡನೆ ಕಾನೂನ್ ಎಂತ ಎಣ್ಣ್‌ಚೇಂಗಿ: ನೀನ್ ನಿನ್ನ ಎಚ್ಚಕ್ ಪ್ರೀತಿ ಮಾಡ್‌ವಿಯೋ ಅನ್ನನೆ ನೀಡ ನೆರಮನೆಕಾರಳ ಪ್ರೀತಿಮಾಡ್.#12.31 ಯಾಜಕ ಪುಸ್ತಕ 19.18 ಈ ದಂಡ್ ಆಜ್ಞೆಕಿಂಜ ಬಲ್ಯದ್ ಏದು ಇಲ್ಲೆ.

32 ನ್ಯಾಯಪ್ರಮಾಣತ್‍ರ ಉಪಾದ್ಯ ಯೇಸುಕ್: ಇದ್ ನೇರಾಯಿತ್ ಸರಿ; ಒರೇ ಒರ್ ದೇವ ಮಾತ್ರ ಉಂಡ್. ಅಂವೊನ ಬುಟ್ಟಿತ್ ಬೋರೆ ದೇವ ಇಲ್ಲೆ.#12.32 ದರ್ಮಶಾಸ್ತ್ರ ಪುಸ್ತಕ 4.35 33ನೀಡ ತ್‍ೕರ ಹೃದಯತ್‍ಲ್, ತ್‍ೕರ ಆತ್ಮತ್‍ಲ್, ತ್‍ೕರ ಮನಸ್ಸ್‌ಲ್, ತ್‍ೕರ ಶಕ್ತಿಲ್ ದೇವನ ಪ್ರೀತಿಮಾಡ್, ನೀನ್ ನಿನ್ನ ಎಚ್ಚಕ್ ಪ್ರೀತಿ ಮಾಡ್‌ವಿಯೋ ಅನ್ನನೆ ನೀಡ ನೆರಮನೆಕಾರಳ ಪ್ರೀತಿಮಾಡ್. ಇನ್ನನೆ ಮಾಡ್‍ವದ್, ದೇವಕ್ ಪ್ರಾಣಿಯಳ ಬಲಿ ಕೊಡ್‌ಪಕಿಂಜ ಪಿಂಞ ಬೋರೆ ತ್ಯಾಗ ಮಾಡ್‌ವಕಿಂಜ ಮುಕ್ಯವಾಯಿತುಂಡ್‍ೕಂದ್ ಅಂವೊ ಎಣ್ಣ್‌ಚಿ.#12.33 ಹೋಶೇಯ 6.6

34ದುಂಬ ಬುದ್ದಿವಂತಂವೊನಾಯಿತ್ ಈ ಉಪಾದ್ಯ ತಕ್ಕ್ ಪರ್ಂದಾನ ಯೇಸು ಕಂಡಿತ್: ನೀನ್ ದೇವಡ ರಾಜ್ಯಕ್ ಕೂಡ್‍ವಕ್ ದುಂಬ ದೂರ ಇಲ್ಲೇಂದ್ ಉಪಾದ್ಯಂಗ್ ಎಣ್ಣ್‌ಚಿ. ಅಲ್ಲಿಂಜಪ್ಪರ ದಾರ್‌ಕು ಯೇಸುನ ಪ್ರಶ್ನೆ ಕ್‍ೕಪಕ್ ದೈರ್ಯ ಇಂಜಿತ್ತ್‌ಲ್ಲೆ.

ಕ್ರಿಸ್ತಂಡ ವಿಷಯತ್ ಪ್ರಶ್ನೆ

(ಮತ್ತಾಯ 22.41–46; ಲೂಕ 20.41–44)

35ಯೇಸು ದೇವಾಲಯತ್‍ಲ್ ಬೋದನೆ ಮಾಡಿಯಂಡಿಪ್ಪಕ, ಅಂವೊ: ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ, ದಾವೀದಂಡ ಮೋಂವೋಂದ್ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಎಣ್ಣುವದ್ ಎನ್ನನೆ?

36ನಾನ್ ನೀಡ ಶತ್ರುವಳ ನೀಡ ಕಾಲ್‌ಕ್ ಇಡ್‍ವಕತ್ತನೆ,

ನೀನ್ ನಾಡ ಬಲ್‌ತೆ ಬರಿಲ್ ಅಳೆಂದ್

ದೇವ ನಾಡ ಒಡೆಯಂಗ್ ಎಣ್ಣ್‌ಚೀಂದ್

ದಾವೀದ ಪವಿತ್ರಾತ್ಮನಗುಂಡ್ ಎಣ್ಣಿತುಂಡಲ್ಲ.#12.36 ದೇವಡ ಪಾಟ್ 110.1

37 ದಾವೀದ ತಾನೇ ಅಂವೊನ ಒಡೆಯಾಂದ್ ಕಾಕ್‍ವಕ, ಅಂವೊಂಗ್ ಅಂವೊ ಮೋಂವೊನಾಯಿತ್‌ಪ್ಪದ್ ಎನ್ನನೇಂದ್ ಕ್‍ೕಟತ್. ಯೇಸುರ ಬೋದನೆನ ಜನ ಬಾರಿ ಕುಶೀಲ್ ಕ್‍ೕಟಂಡ್ ಇಂಜತ್.

ಯೇಸು ಎಚ್ಚರಿಕೆ ಕೊಡ್‌ತದ್

(ಮತ್ತಾಯ 23.1–36; ಲೂಕ 20.45–47)

38ಇಂಞು ಅಂವೊ ಬೋದನೆ ಮಾಡಿಯಂಡಿಪ್ಪಕ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳ ನೋಟಿತ್: ಉದ್ದ ಬಟ್ಟೇನ ಇಟ್ಟಂಡ್, ಚತ್ತೆಲ್ ಎಲ್ಲಾರು ಮರ್ಯಾದೆ ಕೊಡ್‌ಕಡ್ ಎಣ್ಣಿಯಂಡ್, 39ಸಬಾಮಂದಿರತ್ ಮುಕ್ಯಪಟ್ಟ ಕುರ್ಚಿಲ್ ಅಳ್‌ಪಕ್, ಗದ್ದಾಳತ್‍ಲ್ ಗನಪಟ್ಟ ಜಾಗತ್‍ಲ್ ಇಪ್ಪಕ್ ಕುಶಿಪಟ್ಟಂಡುಂಡ್. 40ಪಿಂಞ ವಿದವೆಯಂಗಡ ಮನೆನ ಚದಿ ಮಾಡಿತ್ ಮುಗ್ಗಿತ್, ಎಲ್ಲಾರು ಕಾಂಬನೆಕೆ ಉದ್ದವಾಯಿತ್ ಪ್ರಾರ್ಥನೆ ಮಾಡ್‌ವ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಕ್ ನಿಂಗ ಎಚ್ಚರತ್‍ಲ್ ಇರಿ. ಅಯಿಂಗಕ್ ದೇವಡ ಶಿಕ್ಷೆ ದುಂಬ ಕಠಿಣವಾಯಿತ್‌ಪ್ಪಾಂದ್ ಎಣ್ಣ್‌ಚಿ.

ವಿದವೆರ ಕಾಣಿಕೆ

(ಲೂಕ 21.1–4)

41ಯೇಸು ದೇವಾಲಯತ್‍ರ ಬಂಡಾರ ಪೊಟ್ಟಿರ ಎದ್‍ರ್‌ಲ್ ಅಳ್‌ತಂಡ್ ಜನ ಬಂಡಾರ ಇಡ್‌ವಾನ ನೋಟಿಯಂಡ್ ಇಂಜತ್. ಪಣಕಾರಂಗ ದುಂಬ ದುಡ್ಡ್ ಇಟ್ಟತ್. 42ಕಡೇಕ್ ಒರ್ ಗರೀಬತಿಯಾನ ವಿದವೆ ಬಂದಿತ್ ಒರ್ ಪಣಕ್ ಸಮವಾನ ದಂಡ್ ತಾಂಬ್ರ ದುಡ್ಡ್‌ನ ಇಟ್ಟತ್. 43ಯೇಸು ಶಿಷ್ಯಂಗಳ ಕಾಕುವಂಜಿ; ಈ ಗರೀಬತಿಯಾನ ವಿದವೆ ಬಂಡಾರ ಪೊಟ್ಟಿಕ್ ಇಟ್ಟ ದುಡ್ಡ್, ಬೋರೆ ಎಲ್ಲಾರ್‌ಗಿಂಜ ದುಂಬ ಇಟ್ಟತ್‍ೕಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ. 44ಎಲ್ಲಾ ಬಲ್ಯಯಿಂಗಳು ಅಯಿಂಗಡ ದುಂಬ್‍ನ ಐಶ್ವರ್ಯತ್ಂಜ ಇಟ್ಟತ್, ಆಚೇಂಗಿ ಈ ವಿದವೆ ತಾಂಡ ಬಡತನತ್‌ಂಜ ಅವಕ್ ಬದ್‍ಕ್‍ವಕ್ ಉಳ್ಳ ಎಲ್ಲಾ ದುಡ್ಡ್‌ನ ಇಟ್ಟತ್‍ೕಂದ್ ಎಣ್ಣ್‌ಚಿ.

Currently Selected:

ಮಾರ್ಕ 12: ಕೊಡವ

Highlight

Copy