ಯೋಹಾನ 2
2
ಯೇಸು ಮಾಡ್‍ನ ಆದ್ಯ ಅದ್ಬುತ ಕಾರ್ಯ
1ಮೂಂದನೆ ದಿವಸತ್‍ಲ್, ಗಲಿಲಾಯ ಪ್ರಾಂತ್ಯತ್‍ರ ಕಾನಾ ಎಣ್ಣುವ ಊರ್‌ಲ್ ಒರ್ ಮಂಗಲ ಇಂಜತ್. ಯೇಸುರ ಅವ್ವಳು ಅಲ್ಲಿ ಬಂದಿತ್ಂಜತ್. 2ಯೇಸು ಪಿಂಞ ಅಂವೊಂಡ ಶಿಷ್ಯಂಗಳ ಸಹ ಆ ಮಂಗಲಕ್ ಕಾ‌ಕಿತ್ಂಜತ್. 3ಮಂಗಲತ್‍ಲ್ ದ್ರಾಕ್ಷಿರಸ ತ್‍ೕಂದ್ ಪೋಯಿತಿಪ್ಪಕ, ದ್ರಾಕ್ಷಿರಸ ತ್‍ೕಂದ್ ಪೋಚೀಂದ್ ಯೇಸುರ ಅವ್ವ ಅಂವೊಂಗ್ ಎಣ್ಣ್‌ಚಿ.
4ಯೇಸು ಅವಕ್: ಅವ್ವ, ನಾನ್ ಎಂತ ಮಾಡಂಡೂಂದ್ ನೀನ್ ಎನ್ನಂಗ್ ನಾಕ್ ಎಣ್ಣ್‌ವಿಯಾ? ನಾಡ ಸಮಯ ಇಂಞು ಬಂದಿತ್‌ಲ್ಲೇಂದ್ ಎಣ್ಣ್‌ಚಿ.
5ಅಕ್ಕ ಯೇಸುರ ಅವ್ವ ಆಳ್‍ವಕ್: ಅಂವೊ ಎಂತ ಎಣ್ಣುವ, ಅದ್‍ನ ಮಾಡೀಂದ್ ಎಣ್ಣ್‌ಚಿ.
6ಆ ಜಾಗತ್‍ಲ್, ಯೆಹೂದ್ಯಂಗ ತಂಗಡ ಪದ್ದತಿರ ಪ್ರಕಾರ ಅಯಿಂಗಳ ಶುದ್ದ ಮಾಡ್‌ವಕಾಯಿತ್ ನೀರ್ ಬೆಪ್ಪಕುಳ್ಳ ಆರ್ ಕಲ್ಲ್‌ರ ಬರಣಿ ಇಂಜತ್. ಓರೋರ್ ಬರಣಿಯು ದಂಡ್ ಅಲ್ಲ ಮೂಂದ್ ಬಿಂದಿಗೆ ನೀರ್ ದುಂಬ್‌ವಚ್ಚಕ್ ಬಲ್ಯದಾಯಿತ್ಂಜತ್.
7ಯೇಸು ಆಳ್‍ವಳ ನೋಟಿತ್: ಆ ಬರಣಿಲೆಲ್ಲ ನೀರ್ ದುಂಬ್‌ಚಿಡೀಂದ್ ಎಣ್ಣ್‌ಚಿ. ಅಯಿಂಗ ಬರಣಿರ ಬಾಯಿಕತ್ತನೆ ದುಂಬ್‍ಚಿಟ್ಟತ್.
8ಪಿಂಞ ಯೇಸು ಅಯಿಂಗಳ ನೋಟಿತ್: ಇಕ್ಕ ನಿಂಗ, ಈ ನೀರ್‌ನ ಎಡ್‌ಪಂಜಿ ಗದ್ದಾಳತ್‍ರ ಕಾರ್ಯಕಾರಂಡ ಪಕ್ಕ ಕೊಡೀಂದ್ ಎಣ್ಣ್‌ಚಿ. ಅಯಿಂಗ ಅಂವೊ ಎಣ್ಣ್‌ನನೆಕೆ ಮಾಡ್‍ಚಿ.
9ಗದ್ದಾಳತ್‍ರ ಕಾರ್ಯಕಾರ, ದ್ರಾಕ್ಷಿರಸವಾಯಿತ್ ಬದ್‍ಲಾನ ನೀರ್‌ರ ರಸ ನೋಟ್‌ಚಿ. ಇದ್ ಎಲ್ಲಿಂಜ ಬಾತ್‍ೕಂದ್ ಅಂವೊಂಗ್ ಗೊತ್ತ್‌ಂಜತ್‌ಲ್ಲೆ. ಆಚೇಂಗಿ ಆಳ್‍ವಕ್ ಆ ದ್ರಾಕ್ಷಿರಸ ಎಲ್ಲೀಂದ್ ಬಾತ್‍ೕಂದ್ ಗೊತ್ತ್ಂಜತ್. ಅಕ್ಕ ಅಂವೊ ಮಂಗಲಕಾರನ ಕಾಕುವಂಜಿ: 10ಏದ್ ಒಬ್ಬನು, ಚಾಯಿ ದ್ರಾಕ್ಷಿರಸತ್‍ನ ಆದ್ಯ ಕೊಡ್‌ತಿತ್, ಎಲ್ಲಾರು ಕುಡಿಚಿತ್ತಾನ ಪಿಂಞ, ರುಚಿ ಕಮ್ಮಿ ಉಳ್ಳದ್‍ನ ಬಯ್ಯ ಕೊಡ್‍ಪ. ಆಚೇಂಗಿ, ನೀನ್ ಚಾಯಿ ದ್ರಾಕ್ಷಿರಸತ್‍ನ ಇಲ್ಲಿಕತ್ತನೆ ಬೆಚ್ಚಿತುಳ್ಳಿಯಲ್ಲಾಂದ್ ಎಣ್ಣ್‌ಚಿ.
11 ಇನ್ನನೆ, ಯೇಸು ತಾಂಡ ಆದ್ಯ ಅದ್ಬುತ ಕಾರ್ಯತ್‍ನ ಗಲಿಲಾಯ ಪ್ರಾಂತ್ಯತ್‍ರ ಕಾನಾ ಎಣ್ಣುವ ಊರ್‌ಲ್ ಮಾಡಿತ್, ತಾಂಡ ಮಹಿಮೆನ ಕಾಂಬ್‍ಚಿಟ್ಟತ್. ಅಂವೊಂಡ ಶಿಷ್ಯಂಗ ಯೇಸುನ ನಂಬ್‍ಚಿ.
ಯೇಸು ದೇವಾಲಯತ್‍ನ ಚಾಯಿಮಾಡ್‌ನದ್
(ಮತ್ತಾಯ 21.12–13; ಮಾರ್ಕ 11.15–17; ಲೂಕ 19.45–46)
12ಇದಾನ ಪಿಂಞ ಯೇಸು, ಅಂವೊಂಡ ಅವ್ವ, ಅಂವೊಂಡ ತಮ್ಮಣಂಗ ಪಿಂಞ ಅಂವೊಂಡ ಶಿಷ್ಯಂಗ ಎಲ್ಲಾರು ಕಪೆರ್ನೌಮ್ ಪಟ್ಟಣಕ್ ಪೋಯಿತ್, ಅಲ್ಲಿ ಚೆನ್ನ ದಿವಸ ಒಳಿಂಜತ್. 13ಪಿಂಞ ಯೆಹೂದ್ಯಂಗಡ ಪಸ್ಕ#2.13 ಪಸ್ಕ ಎಣ್ಣುವದ್, ಇಸ್ರಾಯೇಲ್ ದೇಶತ್‍ರ ಒರ್ ಮುಕ್ಯ ನಮ್ಮೆ. ಇದ್ ಇಸ್ರಾಯೇಲ್ ಜನ ಐಗುಪ್ತ ದೇಶತ್‍ರ ಅಡಿಯಾಳತನತ್ಂಜ ವಿಮೋಚನ ಕ್‍ಟ್ಟ್‌ನ ಗೇನತ್‍ಲ್ ಮಾಡ್‌ವ ನಮ್ಮೆ. ಪಸ್ಕ ಎಣ್ಣ್‌ಚೇಂಗಿ ಮರಣ ದೂತ ಐಗುಪ್ತ ರಾಜ್ಯತ್‍ರ ಎಲ್ಲಾ ಆದ್ಯ ಕುಂಞಿನ ಕೊಲ್ಲ್‌ವಕ ಯೂಹೂದ್ಯಂಗಡ ಆದ್ಯ ಕುಂಞಿಯಳ ಕೊಲೆ ಮಾಡತೆ, ಅಯಿಂಗಡ ಮನೆನ ದಾಟಿತ್ ಪೋನದ್‍ೕಂದ್ ಅರ್ಥ. ಪ್ರಯಾಣ ಪುಸ್ತಕ 12.1–14 ನಮ್ಮೆಕ್ ಇಂಞು ಚೆನ್ನ ದಿವಸ ಮಾತ್ರ ಇಂಜಗುಂಡ್, ಯೇಸು ಯೆರೂಸಲೇಮ್‌ಕ್ ಪೋಚಿ. 14ಅಲ್ಲಿ ದೇವಾಲಯತ್‍ಲ್, ಆಡ್, ಎತ್ತ್, ಪಾರಿವಾಳ ಇನ್ನತಾನದೆಲ್ಲಾ ಮಾರ್‌ವಯಿಂಗಳ ಪಿಂಞ ದುಡ್ಡ್‌ಕ್ ಚಿಲ್ಲರೆ ಬದ್‍ಲ್ ಮಾಡ್‌ವಯಿಂಗಳ ಕಂಡತ್. 15ಅಕ್ಕ ಯೇಸು ಕೇರ್‌ಲ್ ಒರ್ ಕೊರಡ್ ಮಾಡ್‌ವಂಜಿ ಅಲ್ಲಿ ಇಂಜಯಿಂಗಳ ಪಿಂಞ ಆಡ್, ಎತ್ತ್‌ನೆಲ್ಲಾ ದೇವಾಲಯತ್ಂಜ ದೌತ್‌ಚಿ. ದುಡ್ಡ್‌ನ ಬದ್‍ಲ್ ಮಾಡಿಯಂಡಿಂಜಯಿಂಗಡ ದುಡ್ಡ್‌ನ ಚಿಲ್ಲಾಪಿಲ್ಲಿ ಮಾಡಿತ್, ಅಯಿಂಗಡ ಮೇಜಿನ ತಿರ್‍ಕ್‍ಚಿ.
16ಪಾರಿವಾಳ ಮಾರ್‌ವಯಿಂಗಳ ನೋಟಿತ್: ಇದ್‍ನೆಲ್ಲ ಇಲ್ಲಿಂಜ ಎಡ್‍ತಂಡ್ ಪೋಯಿರಿ, ನಾಡ ಅಪ್ಪಂಡ ಮನೆನ ಚತ್ತೆರನೆಕೆ ಮಾಡಂಡಾಂದ್ ಎಣ್ಣ್‌ಚಿ.
17ಯೇಸು ಇನ್ನನೆ ಮಾಡ್‍ನದ್‍ನ ನೋಟಿತ್: ನೀಡ ಮನೆರ ಮೇಲೆ ಉಳ್ಳ ನಾಡ ವೈರಾಗ್ಯ, ನನ್ನ ಕತ್ತಿಚಿಡುವಾಂದ್#2.17 ದೇವಡ ಪಾಟ್ 69.9 ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳದ್‍ನ ಅಂವೊಂಡ ಶಿಷ್ಯಂಗ ಗೇನ ಮಾಡ್‍ಚಿ.
18ಅಕ್ಕ ಯೆಹೂದ್ಯ ಅದಿಕಾರಿಯಂಗ ಯೇಸುಕ್: ನೀನ್ ಏದ್ ಗುರ್‍ತ್‍ನ ಕಾಟಿತ್, ಇನ್ನನೆ ಮಾಡ್‌ವಕುಳ್ಳ ಅದಿಕಾರ ನೀಕ್ ಉಂಡ್‍ೕಂದ್ ನಂಗಕ್ ಕಾಟ್‌ವಿಯಾಂದ್ ಕ್‍ೕಟತ್.
19ಅದ್ಂಗ್ ಯೇಸು: ಈ ದೇವಾಲಯತ್‍ನ ನಿಂಗ ಪೊಳಿರಿ, ನಾನ್ ಇದ್‍ನ ಮೂಂದ್ ದಿವಸತ್‍ಲ್ ಎಪ್ಪ್‌ಚಿಡ್‌ವೀಂದ್ ಎಣ್ಣ್‌ಚಿ.
20ಅಕ್ಕ ಯೆಹೂದ್ಯಂಗ: ಈ ದೇವಾಲಯತ್‍ನ ಕೆಟ್ಟ್‌ವಕ್ ನಾಪತಾರ್ ಕಾಲ ಆಚಿ, ನೀನ್ ಇದ್‍ನ ಮೂಂದ್ ದಿವಸತ್‍ಲ್ ಎಪ್ಪ್‌ಚಿಡುವಿಯಾಂದ್ ಕ್‍ೕಟತ್. 21ಆಚೇಂಗಿ, ಯೇಸು ಈ ದೇವಾಲಯಾಂದ್ ಎಣ್ಣುವಕ ತಾಂಡ ತಡಿಯಾನ ದೇವಾಲಯತ್‍ರ ವಿಷಯತ್‍ನ ಎಣ್ಣ್‌ಚಿ.
22ಯೇಸು ಚತ್ತಿತ್ ಜೀವವಾಯಿತ್ ಎದ್ದಿತ್ ಬಂದ ಪಿಂಞ, ಅಂವೊಂಡ ಶಿಷ್ಯಂಗ ಅಂವೊ ಎಣ್ಣ್‌ನದ್‍ನ ಗೇನ ಮಾಡ್‍ಚಿ. ಅಕ್ಕ ಅಯಿಂಗ ದೇವಡ ವಾಕ್ಯತ್‍ನ ಪಿಂಞ ಯೇಸು ಪರ್ಂದ ತಕ್ಕ್‌ನ ನಂಬ್‍ಚಿ.
ಯೇಸುಕ್ ಎಲ್ಲಾಡ ಹೃದಯವು ಗುತ್ತುಳ್ಳದ್
23 ಪಸ್ಕ ನಮ್ಮೆರ ಸಮಯತ್‍ಲ್ ಯೇಸು ಯೆರೂಸಲೇಮ್‍ಲ್ ಇಪ್ಪಕಾಪಕ, ಅಂವೊ ಮಾಡ್‍ನ ಅದ್ಬುತ ಕಾರ್ಯತ್‍ನೆಲ್ಲ ನೋಟಿತ್, ದುಂಬ ಜನ ಅಂವೊಂಡ ಪೆದತ್‍ರ ಮೇಲೆ ನಂಬಿಕೆ ಬೆಚ್ಚತ್. 24ಆಚೇಂಗಿಯು, ಯೇಸು ಎಲ್ಲಾಡ ಹೃದಯತ್‍ನ ಅರಿಂಜಗುಂಡ್, ಅಂವೊಂಡ ಮೇಲೆ ಅಯಿಂಗಕ್ ಇಂಜ ನಂಬಿಕೇಕ್ ಅಂವೊ ಕೆಮಿ ಕೊಡ್‍ತಿತ್‌ಲ್ಲೆ. 25ಮನುಷ್ಯಂಗಡ ಹೃದಯತ್‍ಲ್ ಉಳ್ಳದ್ ಅಂವೊಂಗ್ ಗೊತ್ತುಳ್ಳಗುಂಡ್, ಮನುಷ್ಯಂಗಡ ವಿಷಯತ್ ದಾರೂ ಅಂವೊಂಗ್ ಸಾಕ್ಷಿ ಕೊಡ್‍ಪಕ್ ಅವಸ್ಯ ಇಂಜಿತ್‌ಲ್ಲೆ.
Currently Selected:
ಯೋಹಾನ 2: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
