ಅಪೊಸ್ತಲ 5
5
ಅನನೀಯ ಪಿಂಞ ಸಪ್ಫೈರ
1ಅಲ್ಲಿ, ಅನನೀಯ ಎಣ್ಣುವ ಒಬ್ಬನು ಅಂವೊಂಡ ಪೊಣ್ಣ್ ಸಪ್ಫೈರಳು ಕೂಡಿತ್ ಅಯಿಂಗಡ ಜಾಗತ್‍ನ ಚೆನ್ನ ಮಾರ್‌ಚಿ. 2ಆ ಪಣತ್‌ಲ್ ಒರ್ ಪಾಲ್‍ನ ಅಯಿಂಗಕಾಯಿತ್ ಬೆಚ್ಚಂಡ್, ಇಂಞೊರ್ ಪಾಲ್‍ನ ಅಪೊಸ್ತಲಂಗಡ ಕಾಲ್‌ಕ್ ಬೆಚ್ಚತ್. ಇದ್ ಅಂವೊಂಡ ಪೊಣ್ಣ್‌ಕ್ ಸಹ ಗೊತ್ತ್ಂಜತ್.
3ಅಕ್ಕ ಪೇತ್ರ ಅನನೀಯನ ನೋಟಿತ್: ಅನನೀಯನೇ, ನೀಡ ಜಾಗ ಮಾರ್‌ನ ಪಣತ್‌ಲ್ ಒರು ಪಾಲ್‍ನ ನೀಕ್ ಬೆಚ್ಚಂಡ್, ಪವಿತ್ರಾತ್ಮತ್‍ರ ಪಕ್ಕ ಪೊಟ್ಟ್ ಪರಿಯುವನೆಕೆ, ಸೈತಾನ ನೀಡ ಹೃದಯತ್‍ನ ಪಾಳ್‍ಮ್‌ವಕ್ ಎನ್ನಂಗ್ ಬುಟ್ಟಿಯ? 4ಅದ್‍ನ ಮಾರ್‍ವಕ್ ಮಿಂಞ ಅದ್ ನೀಡದಾಯಿತ್ ಇಂಜತಲ್ಲ? ಅದ್‍ನ ಮಾರ್‌ನ ಪಿಂಞ ಸಹ ಅದ್ಂಡ ಪಣ ನೀಡ ಪಕ್ಕ ಇಂಜತಲ್ಲ? ಎನ್ನಂಗ್ ನೀನ್ ನೀಡ ಹೃದಯತ್‍ಲ್ ಇನ್ನನೆ ಗೇನ ಮಾಡಿಯ? ನೀನ್ ಮನುಷ್ಯಂಗಡ ಪಕ್ಕ ಅಲ್ಲ, ಆಚೇಂಗಿ ದೇವಡ ಪಕ್ಕ ಪೊಟ್ಟ್ ಪರ್ಂದಿಯಾಂದ್ ಎಣ್ಣ್‌ಚಿ. 5ಅನನೀಯ ಈ ತಕ್ಕ್‌ನ ಕ್‍ೕಪಕ ಅಲ್ಲೇ ಬುದ್ದಿತ್ ಜೀವ ಬುಟ್ಟತ್. ಇದ್‍ನ ಕ್‍ೕಟ ಜನಕೆಲ್ಲ ದುಂಬ ಪೋಡಿ ಆಚಿ. 6ಅಕ್ಕ ಬಾಲೆಕಾರಂಗ ಎದ್ದಿತ್ ಅಂವೊನ ಬಟ್ಟೇಲ್ ಸುತ್ತ್‌ವಂಜಿ ಎಡ್‍ತಂಡ್ ಪೋಯಿತ್ ಪೂತ್ತತ್. 7ಸುಮಾರ್ ಮೂಂದ್ ಗಂಟೆ ಆನ ಪಿಂಞ ಅಂವೊಂಡ ಪೊಣ್ಣ್, ನಡ್ಂದ ವಿಷಯ ಗೊತ್ತಿಲ್ಲತೆ ಒಳ್‍ಕ್ ಬಾತ್.
8ಪೇತ್ರ ಅವಳ ನೋಟಿತ್: ನಿಂಗ ನಿಂಗಡ ಜಾಗತ್‍ನ ಇಚ್ಚಕೇ ಪಣಕ್ ಮಾರಿಯತಾಂದ್ ನಾಕ್ ಎಣ್ಣ್‍ೕಂದ್ ಎಣ್ಣ್‌ಚಿ.
ಅದ್ಂಗ್ ಅವ: ಅಕ್ಕು ಇಚ್ಚಕೇಂದ್ ಎಣ್ಣ್‌ಚಿ.
9ಅಕ್ಕ ಪೇತ್ರ ಅವಕ್: ಒಡೆಯಂಡ ಆತ್ಮತ್‌ನ ಪರೀಕ್ಷೆ ಮಾಡ್‌ವಕ್ ಎನ್ನಂಗ್ ನಿಂಗ ದಂಡಾಳು ಒತ್ತಂಡಿರ? ನೋಟ್, ನೀಡ ವಡಿಯನ ಪೂಪಕ್ ಪೋನ ಜನ ಇಕ್ಕ ಪಡಿರ ಪಕ್ಕ ಬಾತ್, ನಿನ್ನ ಸಹ ಎಡ್‍ತಂಡ್ ಪೋಪಾಂದ್ ಎಣ್ಣ್‌ಚಿ. 10ಅಕ್ಕಲೆ ಅವ ಅಂವೊಂಡ ಕಾಲ್‍ರ ಅಡಿಕ್ ಬುದ್ದಿತ್ ಜೀವ ಬುಟ್ಟತ್. ಆ ಬಾಲೆಕಾರಂಗ ಒಳ್‍ಕ್ ಬಪ್ಪಂಜಿ ಅವ ಚತ್ತದ್‍ನ ಕಂಡಿತ್, ಅವಳ ಎಡ್‍ತಂಡ್ ಪೋಯಿತ್ ಅವಡ ವಡಿಯಂಡ ಪಕ್ಕತ್‍ಲ್ ಪೂತ್ತತ್ 11ಸಬೆರ ಜನಕೆಲ್ಲಾ ಪಿಂಞ ಇದ್‍ನ ಕ್‍ೕಟ ಬೋರೆ ಎಲ್ಲಾರ್‌ಕು ದುಂಬ ಪೋಡಿ ಆಚಿ.
ಅಪೊಸ್ತಲಂಗ ಮಾಡ್‍ನ ಅದ್ಬುತ ಕಾರ್ಯ
12ಇದ್‍ಲ್ಲತೆ, ಅಪೊಸ್ತಲಂಗಡ ಕೈಯಿಂಜ ದುಂಬ ಗುರ್‌ತ್ ಕಾರ್ಯ ಪಿಂಞ ಆಶ್ಚರ್ಯ ಕಾರ್ಯ ಜನಡ ಮದ್ಯತ್‍ಲ್ ನಡ್ಂದಡಿಂಜತ್. ಅಯಿಂಗ ಎಲ್ಲಾರು ಒರೇ ಮನಸ್ಸ್‌ಲ್ ಸೊಲೊಮೋನಂಡ ಮಂಟಪತ್‌ಲ್ ಇಪ್ಪಯಿಂಜತ್. 13ಪೊರಮೆ ಇಂಜ ಜನಕ್ ಅಯಿಂಗಡ ಕೂಟ್‍ಕ್ ಕೂಡುವಕ್ ದಾರ್‌ಕು ದೈರ್ಯ ಇಂಜಿತ್‌ಲ್ಲೆ. ಆಚೇಂಗಿಯು ಜನ ಅಯಿಂಗಕ್ ದುಂಬ ಮರ್ಯಾದೆ ಕೊಡ್‍ತತ್. 14ಆಚೇಂಗಿಯು ಇಂಞು ದುಂಬ ಆಣಾಳು ಪೊಣ್ಣಾಳು ಒಡೆಯನ ನಂಬಿತ್ ಅಯಿಂಗಡ ಕೂಟ್‍ಕ್ ಕೂಡಿಯಂಡೇ ಇಂಜತ್. 15ಇನ್ನನೆ ಇಪ್ಪಕ, ಪೇತ್ರ ನಡ್ಂದ್ ಪೋಪಕ ಅಂವೊಂಡ ನಳ ಆಚೇಂಗಿಯು, ಚೆನ್ನ ಜನಡಮೇಲೆ ಬೂವಡ್‍ೕಂದ್, ಜನ ರೋಗ ಇಂಜಯಿಂಗಳ ಮೆತ್ತೆ ಪಿಂಞ ಕಟ್ಟ್‌ಲ್ ಇಟ್ಟಿತ್ ಬೀದಿಕ್ ಎಡ್‍ತಂಡ್ ಬಾತ್. 16ಜನಡ ಗುಂಪ್ ಯೆರೂಸಲೇಮ್‍ರ ಸುತ್ತ್‌ಮುತ್ತ್ ಇಂಜ ಊರಿಂಜ ಸಹ ರೋಗಿಯಳ ಪಿಂಞ ಕೂಳಿ ಪುಡ್‌ಚಯಿಂಗಳ ಕೊಂಡ್ ಬಾತ್; ಅಯಿಂಗ ಎಲ್ಲಾರು ವಾಸಿ ಆಚಿ.
ಯೆಹೂದ್ಯ ಪೆರಿಯಯಿಂಗ, ಅಪೊಸ್ತಲಂಗಕ್ ಮಾಡ್‍ನ ತೊಂದರೆ
17ಇಕ್ಕ, ಮಹಾ ಯಾಜಕ ಪಿಂಞ ಅಂವೊಂಡ ಮುಕ್ಯಸ್ತಂಗಳಾನ ಸದ್ದುಕಾಯಂಗಡ ಕೂಟ್‍ಕ್ ಕೂಡ್‍ನಯಿಂಗ, ದುಂಬ ಒಟ್ಟೆಕಿಚ್ಚ್‌ಲ್ ಇಂಜತ್ 18ಅಯಿಂಗ ಅಪೊಸ್ತಲಂಗಳ ಪುಡ್‌ಚಿತ್ ಪಟ್ಟಣತ್‍ರ ಸೆರೆಮನೆಕ್ ಇಟ್ಟತ್. 19ಆಚೇಂಗಿ ಒಡೆಯಂಡ ದೂತ, ಬಯಿಟ್ ಸೆರೆಮನೇರ ಪಡಿನ ತೊರಂದಿತ್ ಅಯಿಂಗಳ ಪೊರಮೆ ಕಾಕಿಯಂಡ್ ಬಾತ್.
20ಅಂವೊ ಅಯಿಂಗಳ ನೋಟಿತ್: ನಿಂಗ ಪೋಯಿತ್ ದೇವಾಲಯತ್‍ಲ್ ನಿಂದಿತ್, ಈ ಪುದಿಯ ಜೀವತ್‍ರ ಈ ಪೂರ್ತಿ ಸುದ್ದಿನ ಎಲ್ಲಾ ಜನಕ್ ಎಣ್ಣೀಂದ್ ಎಣ್ಣ್‌ಚಿ. 21ಅಪೊಸ್ತಲಂಗ ಅದ್‍ನ ಕ್‍ೕಟಿತ್, ದೇವದೂತ ಎಣ್ಣ್‌ನನೆಕೆ, ಪೊಲಾಕ ನೇರತೆ ದೇವಾಲಯತ್‍ರ ಒಳ್‍ಕ್ ಪೋಯಿತ್ ಜನಕ್ ಬೋದನೆ ಕೊಡ್‍ಪಕ್ ಸುರು ಮಾಡ್‍ಚಿ.
ಅಕ್ಕಣೆಕ್, ಮಹಾ ಯಾಜಕನು ಪಿಂಞ ಅಂವೊಂಡ ಕೂಡೆ ಇಂಜಯಿಂಗಳು, ಯೆಹೂದ್ಯಂಗಡ ಆಲೋಚನೆ ಸಬೆರ ಅದಿಕಾರಿಯಂಗಳ ಪಿಂಞ ಇಸ್ರಾಯೇಲ್‍ರ ಪೆರಿಯಯಿಂಗಳ ಕಾಕಿತ್, ಅಪೊಸ್ತಲಂಗಳ ಸೆರೆಮನೆಯಿಂಜ ಕಾಕಿಯಂಡ್ ಬಪ್ಪಕ್ ಎಣ್ಣ್‌ಚಿ. 22ಅದಿಕಾರಿಯಂಗ ಪೋಯಿತ್ ಸೆರಮನೇಲ್ ನೋಟುವಕ, ಅಲ್ಲಿ ಅಪೊಸ್ತಲಂಗಳ ಕಂಡಿತ್‌ಲ್ಲೆ,
ಅಯಿಂಗ ಬಯ್ಯಕ್ ಬಂದಿತ್: 23ನಂಗ ಸೆರೆಮನೆಕ್ ಪೋಪಕ ಅದ್ ಬೀಗ ಇಟ್ಟಿತ್, ಬದ್ರವಾಯಿತ್ ಇಂಜತ್, ಅದ್ಂಡ ಪಕ್ಕ ಸಿಪಾಯಿಯಂಗ ನಿಂದಂಡಿಂಜತ್. ಆಚೇಂಗಿ ಅದ್‍ನ ತೊರ್‌ಪಕ, ನಂಗ ಒಳ್‍ಲ್ ದಾರ್‌ನು ಕಂಡಿತ್ತಿಲ್ಲೇಂದ್ ಎಣ್ಣ್‌ಚಿ.
24 ದೇವಾಲಯತ್‍ರ ಸೇನೆರ ಅದಿಕಾರಿಯ ಪಿಂಞ ಮುಕ್ಯ ಯಾಜಕಂಗ ಈ ಸುದ್ದಿನ ಕ್‍ೕಟಿತ್ ಇದ್ಂಡ ವಿಷಯತ್ ಎಂತ ಆಪಾಂದ್ ಗಾಬರಿ ಪಟ್ಟತ್. 25ಇನ್ನನೆ ಇಪ್ಪಕ, ದಾರೋ ಒಬ್ಬ ಬಂದಿತ್: ಕ್‍ೕಳಿ, ನಿಂಗ ಸೆರೆಮನೆಕ್ ಇಟ್ಟ ಮನುಷ್ಯಂಗ ದೇವಾಲಯತ್‍ಲ್ ನಿಂದಂಡ್ ಜನಕ್ ಬೋದನೆ ಮಾಡಿಯಂಡ್ ಉಂಡ್‍ೕಂದ್ ಅಯಿಂಗಕ್ ಎಣ್ಣ್‌ಚಿ. 26ಅಕ್ಕ ದೇವಾಲಯತ್‍ರ ಸಿಪಾಯಿಯಂಗಡ ಅದಿಕಾರಿ ಅಂವೊಂಡ ಅದಿಕಾರಿಯಂಗಡ ಕೂಡೆ ಪೋಯಿತ್, ಜನ ಕಲ್ಲ್ ಕನಿಪಾಂದ್ ಬೊತ್ತಿತ್, ಒತ್ತಾಯ ಮಾಡತೆ ಅಯಿಂಗಳ ಕಾಕಿಯಂಡ್ ಬಾತ್.
27ಅನ್ನನೆ, ಅಯಿಂಗಳ ಕಾಕಿಯಂಡ್, ಆಲೋಚನೆ ಸಬೆರ ಮಿಂಞ ಪ್ರಶ್ನೆ ಇಡ್‌ವಕಾಯಿತ್ ನಿಪ್ಪ್‌ಚಿಟ್ಟತ್. ಅಕ್ಕ, ಮಹಾ ಯಾಜಕ ಅಯಿಂಗಳ ನೋಟಿತ್, 28ನಿಂಗ ಈ ಪೆದತ್‍ಲ್ ಬೋದನೆ ಮಾಡ್‌ವಕ್ಕಾಗಾಂದ್ ನಂಗ ನಿಂಗಕ್ ಕಂಡಿತವಾಯಿತ್ ಆಜ್ಞೆ ಮಾಡ್‍ಚಲ್ಲಾ? ಆಚೇಂಗಿಯು, ಇಕ್ಕ ನೋಟಿ: ಯೆರೂಸಲೇಮ್‍ನ ನಿಂಗಡ ಬೋದನೆಯಿಂಜ ದುಂಬ್‌ಚಿಟ್ಟಿತ್, ಆ ಮನಷ್ಯನ ಕೊಂದ ಅಪರಾದತ್‍ನ ನಂಗಡ ಮೇಲೆ ಇಡ್‌ವಕ್ ತೀರ್ಮಾನ ಮಾಡಿತುಳ್ಳಿರಾಂದ್ ಎಣ್ಣ್‌ಚಿ.
29ಪೇತ್ರ ಪಿಂಞ ಬಾಕಿಯುಳ್ಳ ಅಪೊಸ್ತಲಂಗ ಅಯಿಂಗಕ್: ಮನುಷ್ಯಂಗಡ ತಕ್ಕ್ ಕ್‍ೕಪಕಿಂಜ ದೇವಡ ತಕ್ಕ್‌ಕ್ ಬಗ್ಗಿತ್ ನಡ್‍ಪದೇ ಸರಿಯಾನದ್. 30ನಿಂಗ ಶಿಲುಬೇಲ್ ಇಟ್ಟಿತ್ ಕೊಂದ ಯೇಸುನ, ನಂಗಡ ಅಜ್ಜಂಗಡ ದೇವ, ಚಾವ್‍ಯಿಂಜ ಎಪ್ಪ್‌ಚಿ. 31ಇಸ್ರಾಯೇಲ್‍ರ ಜನ ಪಶ್ಚಾತಾಪ ಪಡ್‍ವಕಾಯಿತ್ ಪಿಂಞ ಅಯಿಂಗಡ ಪಾಪಕ್ ಪರಿಹಾರತ್‍ನ ಕೊಡ್‍ಪಕಾಯಿತ್ ಅಂವೊನ ಅದಿಪತಿಯಾಯಿತು ರಕ್ಷಕನಾಯಿತು ತಾಂಡ ಬಲ್‌ತೆ ಕೈಯಿರಗುಂಡ್ ಕೊಡಿಕ್ ಕೊಂಡ್ ಪೋಚಿ. 32ಈ ಸತ್ಯಕ್ ನಂಗ ಸಾಕ್ಷಿಯಾಯಿತುಂಡ್; ಅದಲ್ಲತೆ, ದೇವ, ಅಂವೊಂಗ್ ಬಗ್ಗಿತ್ ನಡ್‍ಪಯಿಂಗಕ್ ತಪ್ಪ ಪವಿತ್ರಾತ್ಮ ಸಹ ಸಾಕ್ಷಿಯಾಯಿತುಂಡ್‍ೕಂದ್ ಅಯಿಂಗಕ್ ಜವಾಬ್ ಕೊಡ್‍ತತ್.
33ಈ ತಕ್ಕ್‌ನ ಅಯಿಂಗ ಕ್‍ೕಪಕ, ಅಯಿಂಗಕ್ ದುಂಬ ಚೆಡಿ ಬಂತ್, ಅಯಿಂಗಳ ಕೊಲೆ ಮಾಡ್‌ವಕ್ ತೀರ್ಮಾನ ಮಾಡ್‍ಚಿ. 34ಅಕ್ಕ, ದೇವಡ ವಾಕ್ಯತ್‍ರ ಉಪಾದ್ಯನಾಯಿತು, ಎಲ್ಲಾ ಜನಡ ಮರ್ಯಾದೆನ ಪಡ್ಂದಿತ್ಂಜ ಗಮಲಿಯೇಲ ಎಣ್ಣುವ ಒರ್ ಫರಿಸಾಯ ಆಲೋಚನೆ ಸಬೇಲ್ ಎದ್ದ್ ನಿಂದಿತ್, ಅಪೊಸ್ತಲಂಗಳ ಚೆನ್ನ ನೇರ ಪೊರಮೆ ಅಯಿಕಂಡೂಂದ್ ಆಜ್ಞೆ ಕೊಡ್‍ತತ್.
35ಪಿಂಞ ಸಬೇಕಾರಂಗಳ ನೋಟಿತ್: ಇಸ್ರಾಯೇಲ್ ಜನಳೇ, ಈ ಮನುಷ್ಯಂಗಡ ವಿಷಯತ್ ನಿಂಗ ಮಾಡ್‌ವಕ್ಕುಳ್ಳಾನ ಎಚ್ಚರ ಎಡ್‌ತೊಳಿ. 36ಚೆನ್ನ ಕಾಲಕ್ ಮಿಂಞ ಥೈದ ಎಣ್ಣುವ ಒಬ್ಬ ಬಂದಿತ್ ತಾನ್ ಒರ್ ಬಲ್ಯ ಮನುಷ್ಯಾಂದ್ ಎಣ್ಣಿಯಂಡಿಂಜತ್. ಅಂವೊಂಡ ಪಕ್ಕ ಸುಮಾರ್ ನಾನೂರ್ ಜನ ಕೂಡಿಯಂಡತ್. ಅಂವೊನ ಸಿಪಾಯಿಯಂಗ ಕೊಂದ್‍ರ್‌ತ್, ಅಕ್ಕ ಅಂವೊಂಡ ಕೂಡೆ ಇಂಜಯಿಂಗೆಲ್ಲ ಆಲೆ ಈಲೆ ಚದ್‌ರಿ ಪೋಯಿತ್ ಇಲ್ಲತೆ ಆಚಿ. 37ಇದ್ ಆನ ಪಿಂಞ, ಜನಸಂಖ್ಯೆ ಕಣಕ್ ಎಡ್‌ಪ ಕಾಲತ್‍ಲ್, ಗಲಿಲಾಯಕ್ ಕೂಡ್‍ನ ಯೂದ ಎಣ್ಣ್‌ವಂವೊ ಬಾತ್. ಅಂವೊ ತಾಂಡ ಪಕ್ಕ ಸುಮಾರ್ ಜನಳ ಬಲ್‍ಚಿರ್‌ತ್, ಅಂವೊನ ಸಹ ಸಿಪಾಯಿಯಂಗ ಕೊಂದ್‍ರ್‌ತ್. ಅಂವೊನ ನಂಬ್‍ನಯಿಂಗ ಚದ್‌ರಿ ಪೋಚಿ. 38ಆನಗುಂಡ್, ನಾನ್ ನಿಂಗಕ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ಈ ಮನುಷ್ಯಂಗಳ ಒಂದು ಮಾಡತೆ ಬುಡಿ, ಅಯಿಂಗ ಪೋಡ್. ಅಯಿಂಗಡ ಉದ್ದೇಶ ಪಿಂಞ ಅಯಿಂಗಡ ಸೇವೆ ಮನುಷ್ಯಂಗಡದಾಯಿತ್ ಇಂಜತೇಂಗಿ, ಅದ್ ಪಾಳಾಯಿ ಪೋಪ. 39ಆಚೇಂಗಿ, ಇದ್ ದೇವಡಗುಂಡ್ ಆಯಿತ್ಂಜತೇಂಗಿ, ಅದ್‍ನ ಪಾಳ್ ಮಾಡ್‌ವಕ್ ನಿಂಗಕ್ ಕಯ್ಯುಲೆ; ನಿಂಗ ದೇವಕ್ ವಿರೋದವಾಯಿತ್ ಯುದ್ದ ಮಾಡ್‌ವಯಿಂಗಡನೆಕೆ ಆಪಿರಾಂದ್ ಎಣ್ಣ್‌ಚಿ. 40ಅಕ್ಕ, ಅಯಿಂಗ ಅಂವೊಂಡ ತಕ್ಕ್‌ಕ್ ಒತ್ತಿತ್, ಅಪೊಸ್ತಲಂಗಳ ಒಳ್‍ಕ್ ಕಾಕಿತ್, ಚಾಟಿಲ್ ಪೊಯ್ಯುವಂಜಿ, ಯೇಸುರ ಪೆದತ್‍ಲ್ ತಕ್ಕ್ ಪರಿಯುವಕ್ಕಾಗಾಂದ್ ಆಜ್ಞೆ ಕೊಡ್‌ತಿತ್ ಅಯಿಂಗಳ ಬುಟ್ಟತ್. 41ಯೇಸುರ ಪೆದಕಾಯಿತ್ ಅವಮಾನ ಪಡುವಕ್ ದೇವ ಅಯಿಂಗಳ ಯೋಗ್ಯ ಉಳ್ಳಯಿಂಗಳಾಯಿತ್ ನೋಟ್‍ನಗುಂಡ್, ಅಪೊಸ್ತಲಂಗ ಅಲ್ಲಿಂಜ ಕುಶೀಲ್ ಪೊರಟಿತ್ ಪೋಚಿ. 42ಪಿಂಞ ದಿನಾಲು ಅಯಿಂಗ ದೇವಾಲಯತ್‍ಲು, ಓರೋರ್ ಮನೇಲು, ಕೂಡಿ ಬಂದಿತ್, ದೇವಡ ವಾಕ್ಯತ್‍ನ ಬೋದನೆ ಮಾಡಿಯಂಡ್, ಯೇಸುವೇ, ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್#5.42 ನೋಟಿ 2.31 ನಿಪ್ಪ್‌ಚಿಡತೆ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡಿಂಜತ್.
Currently Selected:
ಅಪೊಸ್ತಲ 5: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
