ಅಪೊಸ್ತಲ 3
3
ಪೇತ್ರ, ಬಿಕ್ಷೆ ಬೋಡುವ ಒರ್ ಕುಂಟನ ವಾಸಿ ಮಾಡ್‍ನದ್
1ಒರ್ ದಿವಸ ಪೇತ್ರ ಪಿಂಞ ಯೋಹಾನ ಮಜ್ಜಣ ಮೂಂದ್ ಗಂಟೆರ ಪ್ರಾರ್ಥನೆಕಾ‍ಯಿತ್ ದೇವಾಲಯಕ್ ಪೋಯಂಡಿಪ್ಪಕ, 2ಅಲ್ಲಿ, ಪುಟ್ಟ್‌ನಲ್ಲಿಂಜ ಕುಂಟನಾಯಿತ್ಂಜ ಒಬ್ಬನ ಚೆನ್ನ ಜನ ಕೊಂಡ್ ಬಂದಂಡಿಂಜತ್. ದೇವಾಲಯತ್‍ರ ಒಳ್‍ಕ್ ಪೋಪ ಜನಡ ಪಕ್ಕ ಬಿಕ್ಷೆ ಬೋಡ್‌ವಕಾಯಿತ್, ಅಂವೊನ ದಿನಾಲು ದೇವಾಲಯತ್‍ರ ಚಾಯಿ ಬಾಯಿಕಂಡೀಂದ್ ಕಾಕ್‍ವ ಪಡಿರ ಪಕ್ಕತ್‍ಲ್ ಅಳ್‍ಪಚಿಟ್ಟಂಡಿಂಜತ್. 3ಅಂವೊ, ದೇವಾಲಯತ್‍ರ ಒಳ್‍ಕ್ ಪೋಯಂಡ್ ಇಂಜ ಪೇತ್ರ ಪಿಂಞ ಯೋಹಾನನ ನೋಟಿತ್ ಬಿಕ್ಷೆ ಕ್‍ೕಟತ್. 4ಪೇತ್ರ ಪಿಂಞ ಯೋಹಾನ ದಂಡಾಳು ಅಂವೊಂಡ ಮೂಡ್‌ನೇ ನೋಟಿಯಂಡ್: ನಂಗಳ ನೋಟ್‍ೕಂದ್ ಪೇತ್ರ ಎಣ್ಣ್‌ಚಿ. 5ಅಕ್ಕ ಅಂವೊ, ಅಯಿಂಗಡ ಕೈಯಿಂಜ ಎಂತಾಚೇಂಗಿ ಕ್‍ಟ್ಟ್‌ವಾಂದ್ ಗೇನ ಮಾಡಿತ್ ಅಯಿಂಗಳ ನೋಟ್‌ಚಿ.
6ಅಕ್ಕ ಪೇತ್ರ: ನಾಡ ಪಕ್ಕ ಪೊನ್ನ್ ಬೊಳ್ಳಿ ಒಂದು ಇಲ್ಲೆ, ಆಚೇಂಗಿ ನಾಡ ಪಕ್ಕ ಉಳ್ಳದ್‍ನ ನೀಕ್ ತಪ್ಪೀಂದ್ ಎಣ್ಣಿತ್, ನಜರೇತ್‍ರ ಯೇಸು ಕ್ರಿಸ್ತಂಡ ಪೆದತ್‍ಲ್ ನೀನ್ ಎದ್ದಿತ್ ನಡೇಂದ್ ಎಣ್ಣಿತ್, 7ಅಂವೊಂಡ ಬಲ್‌ತೆ ಕೈಯಿನ ಪುಡ್‌ಚಿತ್ ನೇತ್‍ಚಿ. ಅಕ್ಕಲೆ ಅಂವೊಂಡ ಕಾಲ್ ಪಿಂಞ ಕಾಲ್‍ರ ಕರಡ್ ಬಲಪಟ್ಟತ್. 8ಅಂವೊ ತುಳ್ಳಿಯಂಡ್ ನಡ್‍ಪಕ್ ಸುರ್ ಮಾಡ್‍ಚಿ. ನಡ್ಂದ್ ಕಳಿಚಿತ್, ದೇವನ ತುದಿಚಂಡ್ ಪೇತ್ರ ಪಿಂಞ ಯೋಹಾನಂಡ ಕೂಡೆ ದೇವಾಲಯತ್‍ರ ಒಳ್‍ಕ್ ಪೋಚಿ. 9ಅಂವೊ ನಡ್‍ಪದ್‌ನ, ದೇವನ ತುದಿಪದ್‍ನ ಅಲ್ಲಿ ಇಂಜ ಎಲ್ಲಾ ಜನಳು ನೋಟಿತ್, 10ಇಂವೊ ದೇವಾಲಯತ್‍ರ ಚಾಯಿ ಬಾಯಿಕಂಡಿರ ಬರಿಲ್ ಅಳ್‌ತಂಡ್ ಬಿಕ್ಷೆ ಬೋಡ್‍ವಂವೋಂದ್ ಗೊತ್ತಾಯಿತ್, ಅಂವೊಂಗ್ ಇನ್ನನೆ ಆನದ್‍ನ ನೋಟಿತ್ ಅಯಿಂಗಕ್ ನಂಬುವಕ್ ಕಯ್ಯತಚ್ಚಕ್ ಆಶ್ಚರ್ಯ ಆಚಿ.
ಪೇತ್ರಂಡ ತಕ್ಕ್
11ವಾಸಿಯಾನ ಮನುಷ್ಯ, ಪೇತ್ರ ಪಿಂಞ ಯೋಹಾನನ ಬುಟ್ಟಿತ್ ಪೋಕತೆ ಅಯಿಂಗಳ ಪುಡ್‍ಚಂಡ್ ಇಂಜತ್. ಅಂವೊ ಇನ್ನನೆ ವಾಸಿಯಾನದ್‍ನ ಕ್‍ೕಟ ಜನಯೆಲ್ಲ ಆಶ್ಚರ್ಯತ್‍ಲ್, ಸೊಲೊಮೋನಂಡ ಮಂಟಪಾಂದ್ ಕಾಕ್‍ವ ಮಂಟಪಕ್, ಅಯಿಂಗಡ ಪಕ್ಕ ಓಡಿ ಬಾತ್.
12ಪೇತ್ರ ಇದ್‍ನ ನೋಟಿತ್, ಜನಕ್: ಇಸ್ರಾಯೇಲ್ ಜನಳೇ, ನಿಂಗ ಎನ್ನಂಗ್ ಇದ್‍ನ ನೋಟಿತ್ ಆಶ್ಚರ್ಯ ಪಡುವಿರ? ನಿಂಗ ಎನ್ನಂಗ್ ನಂಗಳ ಇನ್ನನೆ ನೋಟ್‍ವಿರ? ಇಂವೊನ ನಡ್‍ಪನೆಕೆ ಮಾಡ್‍ನದ್, ನಂಗಡ ಸ್ವಂತ ಶಕ್ತಿಯಿಂಜಲು ಅಲ್ಲ, ನಂಗಡ ಬಕ್ತಿಯಿಂಜಲು ಅಲ್ಲ. 13ನಂಗಡ ಅಜ್ಜಂಗಳಾನ ಅಬ್ರಹಾಮ, ಇಸಾಕ ಪಿಂಞ ಯಾಕೋಬಂಡ ದೇವ, ತಾಂಡ ಸೇವಕನಾನ ಯೇಸುನ ಮಹಿಮೆಪಡ್‍ತಿತುಂಡ್. ನಿಂಗ ಅಂವೊನ ಶಿಲುಬೇಲ್ ಇಡ್‌ವಕ್ ಒಪ್ಪ್‌ಚಿಟ್ಟಿರ; ಪಿಲಾತ ಅಂವೊನ ಬುಡ್‍ತಂಡೂಂದ್ ಎಣ್ಣ್‌ಚೇಂಗಿಯು, ನಿಂಗ, ಅಂವೊನ ಅನ್ನನೆ ಮಾಡ್‍ವದ್ ಬೋಂಡಾಂದ್ ಎಣ್ಣಿರ. 14ಪವಿತ್ರವಾನ ಪಿಂಞ ನೀತಿವಂತಂವೊನಾಯಿತ್ಂಜ ಅಂವೊನ ನಿಂಗ ಬೋಂಡಾಂದ್ ಎಣ್ಣಿತ್, ಅಂವೊಂಡ ಬದ್‍ಲ್ ಕೊಲೆಗಾರನ ಬುಡುಗಡೆ ಮಾಡ್‌ವಕ್ ಎಣ್ಣಿರ. 15ಮನುಷ್ಯಂಗಕ್ ನಿತ್ಯ ಜೀವತ್‍ನ ತಪ್ಪಕ್ ಅದಿಕಾರ ಉಳ್ಳಂವೊನ ನಿಂಗ ಕೊಂದಿರ; ಆಚೇಂಗಿ, ದೇವ ಅಂವೊನ ಚಾವ್‍ಯಿಂಜ ಜೀವವಾಯಿತ್ ಎಪ್ಪ್‌ಚಿ. ಈ ವಿಷಯಕ್ ನಂಗ ಸಾಕ್ಷಿಯಳಾಯಿತುಂಡ್. 16ನಿಂಗ ಕಂಡಿತ್, ಗೊತ್ತ್ಂಜ ಈ ಮನುಷ್ಯಂಡ ಕಾಲ್ ಬಲಪಡ್‌ವನೆಕೆ ವಾಸಿಯಾನ ಕಾರಣ, ಅಂವೊ ಯೇಸುರ ಪೆದತ್‍ರ ಮೇಲೆ ಇಟ್ಟ ನಂಬಿಕೆಯೇ. ಅಕ್ಕು, ನಿಂಗೆಲ್ಲಾ ನೋಟ್‍ವನೆಕೆ, ಈ ಮನುಷ್ಯ ಪೂರ್ತಿ ವಾಸಿಯಾನದ್, ಯೇಸುರ ಮೇಲೆ ಇಟ್ಟ ನಂಬಿಕೇರಗುಂಡ್ ಮಾತ್ರಾಂದ್ ಗೊತ್ತಿರಡ್.
17ನಾಡ ಅಣ್ಣತಮ್ಮಣಂಗಳೇ, ನಿಂಗಳು ನಿಂಗಡ ಅದಿಕಾರಿಯಳು ಗೊತ್ತಿಲ್ಲತೆ ಇನ್ನನೆ ಮಾಡಿರಾಂದ್ ನಾಕ್ ಗೊತ್ತುಂಡ್. 18ಆಚೇಂಗಿಯು, ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಇನ್ನನೆ ಕಷ್ಟಪಡಂಡೂಂದ್ ದೇವ ತಾಂಡ ಎಲ್ಲಾ ಪ್ರವಾದಿಯಂಗಡ ಮೂಲಕ ಮಿಂಞಲೇ ಎಣ್ಣ್‌ನಾನ ಪೂರೈಚಿಡ್‌ವಕ್ ಇನ್ನನೆ ಮಾಡ್‍ಚಿ. 19ಆನಗುಂಡ್, ನಿಂಗಡ ಪಾಪವೆಲ್ಲ ಅಳಸಿ ಪೋಪಕಾಯಿತ್ ಪಶ್ಚಾತಾಪ ಪಟ್ಟಿತ್, ನಿಂಗ ದೇವಡ ಪಕ್ಕ ತಿರಿಗಿ. ಪಿಂಞ ಒಡೆಯಂಡಿಂಜ, ನಿಂಗಕ್ ಆರಾಮ್‍ರ ಕಾಲ ಕ್‍ಟ್ಟ್‌ವನೆಕೆ ಮಾಡ್‌ವ. 20ಅಂವೊ ನೇಮಿಚಿಟ್ಟ ಕ್ರಿಸ್ತ ಎಣ್ಣುವ ಯೇಸುನ ನಿಂಗಕಾಯಿತ್ ಪುನಃ ಅಯಿಪ. 21ಅಂವೊಂಡ ಪವಿತ್ರವಾನ ಪ್ರವಾದಿಯಂಗಡ ಮೂಲಕ, ಪಂಡೇ ವಾಗ್ದಾನ ಮಾಡ್‍ನನೆಕೆ, ದೇವ ಎಲ್ಲಾನ ಸರಿಮಾಡ್‍ವಾಂದ್ ಎಣ್ಣ್‌ನ ವಿಷಯನೆಲ್ಲ ನೆರೆವೇರುವ ಕಾಲಕತ್ತನೆ, ಈ ಕ್ರಿಸ್ತ, ಪರಲೋಕತ್‍ಲ್ ಇಕ್ಕಂಡು.
22 ಮೋಶೆ ನಂಗಡ ಅಜ್ಜಂಗಳ ನೋಟಿತ್: ನಿಂಗಡ ಒಡೆಯನಾನ ದೇವ ನಿಂಗಡ ಮದ್ಯತ್ಂಜ ನಾಡನೆಕೆ ಒರ್ ಪ್ರವಾದಿನ ಕೊಂಡ್ ಬಪ್ಪ, ಅಂವೊ ಎಣ್ಣ್‌ವಾನೆಲ್ಲ ನಿಂಗ ಕ್‍ೕಕಂಡು, 23ಪಿಂಞ ಆ ಪ್ರವಾದಿರ ತಕ್ಕ್‌ನ ಕ್‍ೕಕತಂವೊ ನಿಂಗಡ ಮದ್ಯತ್ಂಜ ಪೂರ್ತಿಯಾಯಿತ್ ಪಾಳಾಯಿ ಪೋಪಾಂದ್ ಎಣ್ಣಿತುಂಡಲ್ಲ?#3.23 ದರ್ಮಶಾಸ್ತ್ರ ಪುಸ್ತಕ 18.15,18,19; ಯಾಜಕ ಪುಸ್ತಕ 23.29
24ಸಮುವೇಲ ಎಣ್ಣುವ ಪ್ರವಾದಿರ ಕಾಲತ್ಂಜ, ಏದೆಲ್ಲಾ ಪ್ರವಾದಿಯ ಪ್ರವಾದನೆ ಎಣ್ಣ್‌ಚೋ ಅಯಿಂಗೆಲ್ಲಾ ಈ ಕಾಲತ್‍ರ ವಿಷಯತ್‍ನ ಎಣ್ಣಿತ್ಂಜತ್. 25ನಿಂಗ ಈ ಪ್ರವಾದಿಯಡ ಮಕ್ಕಳಾಯಿತುಳ್ಳಿರ; ಪಿಂಞ, ನೀಡ ಸಂತಾನತ್‍ರಗುಂಡ್, ಈ ಲೋಕತ್‍ಲ್ ಉಳ್ಳ ಎಲ್ಲಾ ಜಾತಿಯಂಗಕು ಆಶೀರ್ವಾದ ಬಪ್ಪಾಂದ್ ದೇವ ಅಬ್ರಹಾಮಂಗ್ ಎಣ್ಣಿತ್, ನಂಗಡ ಅಜ್ಜಂಗಡ ಕೂಡೆ ದೇವ ಮಾಡ್‍ನ ಒಪ್ಪಂದಕ್ ಸಹ ನಿಂಗ ಮಕ್ಕಳಾಯಿತುಳ್ಳಿರ.#3.25 ಆದ್ಯ ಪುಸ್ತಕ 22.18 26ದೇವ ನಿಂಗಳ ನಿಂಗಡ ಕೆಟ್ಟ ಗುಣತ್ಂಜ ತಿರಿಕಿತ್ ಬಪ್ಪ್‌ಚಿಡುವಕಾಯಿತ್ ಪಿಂಞ ನಿಂಗಳ ಆಶೀರ್ವಾದ ಮಾಡ್‌ವಕಾಯಿತ್, ದೇವ ಅಂವೊಂಡ ಮೋಂವೊನಾನ ಯೇಸುನ, ನಿಂಗಡ ಕಡೆಯೇ ಆದ್ಯವಾಯಿತ್ ಕೊಂಡ್ ಬಾತ್‍ೕಂದ್ ಪೇತ್ರ ಎಣ್ಣ್‌ಚಿ.
Currently Selected:
ಅಪೊಸ್ತಲ 3: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
