ಅಪೊಸ್ತಲ 28

ಪೌಲ ಮೆಲೀತೆ ದ್ವೀಪತ್‍ಲ್ ಮಾಡ್‍ನ ಸೇವೆ

1ನಂಗೆಲ್ಲಾರು ಸಮುದ್ರತ್‍ರ ಕರೆಕ್ ಪೋಯಿತ್ ಎತ್ತ್‌ನ ಪಿಂಞ ಆ ದ್ವೀಪತ್‍ರ ಪೆದ ಮೆಲೀತೇಂದ್ ನಂಗಕ್ ಗೊತ್ತಾಚಿ. 2ಆ ದ್ವೀಪತ್‍ರ ಜನಾಂಗ, ನಂಗಕ್ ಗೊತ್ತ್‌ಲ್ಲತಯಿಂಗಳಾಯಿತ್ ಇಂಜತೇಂಗಿಯು ನಂಗಕ್ ದುಂಬ ಕನಿಕರ ಕಾಟ್‍ಚಿ. ಆ ಸಮಯತ್‍ಲ್ ಮಳೆಯು ಕುಳ್‍ರು ದುಂಬ ಇಂಜಗುಂಡ್, ತಿತ್ತ್ ಇಟ್ಟಿತ್ ನಂಗಳ ಕೂಟಿಯಂಡತ್. 3ಪೌಲ ಒರ್ ಕೆಟ್ಟ್ ಪುಳ್ಳಿನ ಎಡ್‍ತಿತ್ ತಿತ್ತ್‌ಕ್ ಇಡ್‍ವಕ, ದುಂಬ ಉಷ್ಣ ಇಂಜಗುಂಡ್ ಒರ್ ವಿಷ ಪಾಂಬ್ ಪುಳ್ಳಿಯಿಂಜ ಪೊರಮೆ ಬಂತ್ ಪೌಲಂಡ ಕೈಯಿನ ಗಟ್ಟಿಯಾಯಿತ್ ಪುಡ್‌ಚಿರ್‌ತ್. 4ಆ ಪಾಂಬ್ ಪೌಲಂಡ ಕೈಯಿಲ್ ತೂಂಗಿಯಂಡ್ ಇಪ್ಪದ್‍ನ ಆ ದ್ವೀಪತ್‍ರ ಜನ ಕಾಂಬಕ, ಈ ಮನುಷ್ಯ ಒರ್ ಕೊಲೆಗಾರನಾಯಿತ್ ಇಕ್ಕೂಂದ್ ಕಾಂಬ; ಸಮುದ್ರತ್‍ಂಜ ತಪ್ಪಿಚಿಟ್ಟಂಡ್ ಬಂದತೇಂಗಿಯು, ನ್ಯಾಯ ಇಂವೊನ ಬದ್‍ಕ್‍ವಕ್ ಬುಡ್‍ಲೇಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್. 5ಆಚೇಂಗಿ ಪೌಲ, ಅಂವೊಂಡ ಕೈಯಿನ ಪುಡ್‌ಚ ಪಾಂಬ್‍ನ ಕೊಡ್‍ಕಿತ್ ತಿತ್ತ್‌ಕ್ ಇಟ್ಟತ್. ಅಂವೊಂಗ್ ಒರ್ ತೊಂದರೆಯು ಆಯಿತ್‌ಲ್ಲೆ. 6ಆ ಜನ, ಅಂವೊಂಗ್ ಪುಡ್‍ಪಿತ್ ಅಥವ ಬೆರಿಯ ಬುದ್ದಿತ್ ಚತ್ತ್ ಪೋಪಾಂದ್ ಪಾರಕಾತಂಡ್ ಇಂಜತ್. ದುಂಬ ಸಮಯ ನೋಟ್‌ನ ಪಿಂಞ, ಅಂವೊಂಗ್ ಒಂದು ಆಯಿತ್‌ಲ್ಲೇಂದ್ ಕಂಡಿತ್ ಬೋರೆ ತರ ಗೇನ ಮಾಡಿತ್, ಇಂವೊ ಒರ್ ದೇವಾಂದ್ ಎಣ್ಣ್‌ಚಿ.

7ದ್ವೀಪಕ್ ಮುಕ್ಯಸ್ತನಾನ ಪೊಪ್ಲಿಯ ಎಣ್ಣ್‌ವಂವೊಂಡ ನೆಲ, ಆ ಜಾಗತ್‍ರ ಪಕ್ಕತ್‍ಲ್ ಇಂಜತ್. ಅಂವೊ ನಂಗಳ ಅಂವೊಂಡ ಮನೆಕ್ ಸ್ವೀಕಾರ ಮಾಡಿತ್ ಮೂಂದ್ ದಿವಸ ಚಾಯಿ ಊಟೋಪಚಾರ ಮಾಡ್‍ಚಿ. 8ಅಂವೊಂಡ ಅಪ್ಪಂಗ್ ಚೋರೆ ತೂರಾಟ ಕಾಯಿಲೆ ಪಿಂಞ ಪನಿ ಬಂದಿತ್ ಬುದ್ದಂಡ್ ಇಂಜತ್. ಪೌಲ ಅಂವೊಂಡ ಪಕ್ಕ ಪೋಯಿತ್ ಪ್ರಾರ್ಥನೆ ಮಾಡಿತ್ ಅಂವೊಂಡ ಮೇಲೆ ಕೈ ಬೆಚ್ಚಿತ್ ಅಂವೊನ ವಾಸಿ ಮಾಡ್‍ಚಿ. 9ಇದಾನ ಪಿಂಞ, ಆ ದ್ವೀಪತ್‍ಲ್ ಇಂಜ ಬೋರೆ ರೋಗಿಯಳು ಅಂವೊಂಡ ಪಕ್ಕ ಬಂದಿತ್ ವಾಸಿ ಆಚಿ. 10ಅಯಿಂಗೆಲ್ಲರು ನಂಗಳ ಬಾರಿ ಚಾಯಿ ಉಪಚಾರ ಮಾಡ್‍ನದ್ ಅಲ್ಲತೆ ನಂಗ ಅಲ್ಲಿಂಜ ಪೊರಡ್‍ವಕ, ನಂಗಡ ಪ್ರಯಾಣಕ್ ಬೋಂಡಿಯಾನ ಎಲ್ಲಾನ ಕೊಂಡ್‌ಬಂತ್ ಹಡಗ್‍ಲ್ ಬೆಚ್ಚತ್.

ಪೌಲ ರೋಮ್ ಪಟ್ಟಣಕ್ ಎತ್ತ್‌ನದ್

11ಮೂಂದ್ ತಿಂಗ ಆನ ಪಿಂಞ, ಆ ದ್ವೀಪತ್‍ಲ್ ಕುಳ್‌ರ್ ಕಾಲಕಾಯಿತ್ ಅಲ್ಲೇ ನಿಂದಂಡಿಂಜ ಹಡಗ್‍ಲ್ ಪತ್ತಿತ್ ನಂಗ ಪೊರಟತ್. ಆ ಹಡಗ್ ಅಲೆಕ್ಸಾಂದ್ರಿಯತ್ಂಜ ಬಂದಿತ್ಂಜತ್. ಒಮ್ಮಕೆ ಜೊತೇಲ್ ಇಪ್ಪ ಎಣೆ ದೇವಡ ಮೂರ್ತಿರ ಗುರ್‌ತ್ ಅದ್ಂಡ ಮಂಡೆಲ್ ಇಂಜತ್. 12ಸುರಕೂಸ ಎಣ್ಣುವ ಪಟ್ಟಣಕ್ ಎತ್ತಿತ್, ಮೂಂದ್ ದಿನ ಅಲ್ಲೇ ಒಳಿಂಜತ್. 13ಅಲ್ಲಿಂಜ ಸುತ್ತಿಯಂಡ್ ನಂಗ ರೇಗಿಯ ಎಣ್ಣುವ ಜಾಗಕ್ ಬಾತ್. ಪಿತ್ಯಾಂದ್ ದಕ್ಷಿಣ ದಿಕ್ಕಿಂಜ ಕಾತ್ ಬೇಜುವಕ ಪೊರಟಿತ್, ದಂಡನೆ ದಿವಸ ಪೊತಿಯೋಲಕ್ ಕೂಡ್‍ಚಿ. 14ಅಲ್ಲಿ ಯೇಸುನ ನಂಬ್‍ನ ಚೆನ್ನ ಅಣ್ಣತಮ್ಮಣಂಗಳ ನಂಗ ಕಂಡಿಯೆ, ಅಯಿಂಗ ಒರ್ ವಾರ ಅಲ್ಲಿಯೇ ಇಪ್ಪಕ ಎಣ್ಣ್‌ಚಿ, ಅದಾನ ಪಿಂಞ ನಂಗ ರೋಮ್ ಪಟ್ಟಣಕ್ ಬಾತ್. 15ಅಲ್ಲಿಂಜ ಯೇಸುನ ನಂಬ್‍ನ ಅಣ್ಣತಮ್ಮಣಂಗ, ನಂಗ ಬಪ್ಪದ್‍ನ ಕ್‍ೕಟಿತ್, ನಂಗಳ ಕಾಂಬಕಾಯಿತ್ ಚೆನ್ನ ಜನ ಅಪ್ಪಿಯ ಪೇಟೆಕತ್ತನೆಯು, ಚೆನ್ನ ಜನ ತ್ರಿಛತ್ರ ಎಣ್ಣುವ ಜಾಗಕತ್ತನೆಯು ಬಾತ್. ಅಯಿಂಗಳ ನೋಟಿತ್ ಪೌಲ ದೇವಕ್ ವಂದನೆ ಮಾಡಿತ್, ದೈರ್ಯ ಎಡ್‍ತಂಡತ್. 16ನಂಗ ರೋಮ್ ಪಟ್ಟಣಕ್ ಎತ್ತ್‌ವಕ, ಪೌಲ, ಅಂವೊನ ಕಾತಂಡಿಂಜ ಸಿಪಾಯಿರ ಕೂಡೆ ಬೋರೆಯಾಯಿತ್ ಇಪ್ಪಕ್ ಅನುಮತಿ ಕ್‍ಟ್ಟ್‌ಚಿ.

ಪೌಲ ರೋಮ್ ಪಟ್ಟಣತ್‍ರ ಯೆಹೂದ್ಯಂಗಡ ಕೂಡೆ ತಕ್ಕ್ ಪರ್ಂದ ವಿಷಯ

17ಮೂಂದ್ ದಿವಸ ಕಯಿಂಜ ಪಿಂಞ, ಪೌಲ ಯೆಹೂದ್ಯ ಜನಡಡೆಲ್ ಮುಕ್ಯಪಟ್ಟಯಿಂಗಳ ತಾಂಡ ಪಕ್ಕ ಕಾಕ್‌ಚಿಟ್ಟತ್.

ಅಯಿಂಗೆಲ್ಲಾರು ಸಬೇಕೂಡ್‌ನ ಪಿಂಞ, ಅಂವೊ ಅಯಿಂಗಳ ನೋಟಿತ್: ನಾಡ ಅಣ್ಣತಮ್ಮಣಂಗಳೇ, ನಾನ್ ನಂಗಡ ಜನಕ್, ನಂಗಡ ಅಜ್ಜಂಗಡ ಆಚಾರಕ್ ವಿರೋದವಾಯಿತ್ ಒಂದು ಮಾಡತೆ ಪೋಚೇಂಗಿಯು, ಯೆರೂಸಲೇಮ್‍ಲ್ ರೋಮ್ ರಾಜ್ಯತ್‍ರ ಜನಡ ಕೈಕ್ ಕೈದಿಯಾಯಿತ್ ನನ್ನ ಒಪ್ಪ್‌ಚಿಟ್ಟತ್. 18ಅಯಿಂಗ ನನ್ನ ವಿಚಾರಣೆ ಮಾಡಿತ್, ನಾಡ ಪಕ್ಕ ಮರಣ ದಂಡನೆಕ್ ಒರ್ ಕಾರಣವು ಇಲ್ಲತೆಗುಂಡ್, ನನ್ನ ಬುಡ್‌ತ್‌ವಕ್ ನೋಟ್‌ಚಿ. 19ಅದ್ಂಗ್ ಯೆಹೂದ್ಯಂಗ ವಿರೋದವಾಯಿತ್ ಪರ್ಂದಗುಂಡ್, ನಾನ್ ಕೈಸರಂಡ ಮಿಂಞತ್ ನಿಪ್ಪಕ್ ಬೋಡ್‍ವಕಾಚಿ. ಆಚೇಂಗಿಯು, ನಾಡ ಜನತ್‍ರ ಮೇಲೆ ಏದ್ ಕುತ್ತವು ಪರಿಯುವಕಾಯಿತ್ ನಾನ್ ಅನ್ನನೆ ಮಾಡಿತ್‌ಲ್ಲೆ. 20ಈ ಕಾರಣಕಾಯಿತೇ ನಾನ್ ನಿಂಗಳ ಕಂಡಿತ್ ತಕ್ಕ್ ಪರಿಯಂಡೂಂದ್ ಕಾಕ್‍ಚಿಟ್ಟಿಯೇ. ಇಸ್ರಾಯೇಲ್ ಜನಡ ನಂಬಿಕೇರ ನಿರೀಕ್ಷೆಕಾಯಿತ್ ಮಾತ್ರ ನಾನ್ ಇನ್ನನೆ ಸರ್ಪಣಿಲ್ ಕೈದಿಯಾಯಿತ್ ಉಳ್ಳ್‌ಂದ್ ಎಣ್ಣ್‌ಚಿ.

21ಅಯಿಂಗ ಅಂವೊಂಗ್: ನೀಡ ವಿಷಯವಾಯಿತ್ ನಂಗಕ್ ಯೂದಾಯತ್ಂಜ ಏದ್ ಕಾಗದವು ಬಂದಿತ್‌ಲ್ಲೆ, ಅಥವ ಇಲ್ಲಿ ಬಂದ ಅಣ್ಣತಮ್ಮಣಂಗ ಒಬ್ಬನು ನೀಡ ವಿಷಯತ್ ಏದ್ ಕುತ್ತವು ಅರಿಚಿಟ್ಟಿತ್‌ಲ್ಲೆ, ಅದ್ಂಡ ವಿಷಯತ್ ತಕ್ಕ್ ಪರ್ಂದಿತು ಇಲ್ಲೆ 22ಆಚೇಂಗಿ ಎಲ್ಲಾ ಜಾಗತ್‍ಲು, ಈ ಮಾರ್ಗತ್‍ರ ವಿಷಯಕ್ ವಿರೋದವಾಯಿತ್ ತಕ್ಕ್ ಪರ್ಂದಂಡುಂಡ್. ಆಚೇಂಗಿ, ಇದ್‍ಲ್ ನೀಡ ಅಬಿಪ್ರಾಯತ್‍ನ ಕ್‍ೕಪದ್ ನಂಗಕ್ ನಲ್ಲದ್‍ೕಂದ್ ಎಣ್ಣ್‌ಚಿ.

23ಅಂವೊ ಎಣ್ಣುವಾನ ಕ್‍ೕಪಕಾಯಿತ್ ಒರ್ ದಿವಸತ್‍ನ ಗೊತ್ತ್ ಮಾಡ್‍ಚಿ. ಆ ದಿವಸತ್‍ಲ್ ದುಂಬ ಜನ ಅಂವೊ ಇಂಜ ಮನೆಕ್ ಬಾತ್. ಅಕ್ಕ ಪೌಲ, ಪೊಲಾಕಯಿಂಜ ಬಯಿಟಾಪಕತ್ತನೆ ದೇವಡ ರಾಜ್ಯತ್‍ರ ವಿಷಯತ್‍ನ ವಿವರಿಚಿಟ್ಟಂಡ್, ಸಾಕ್ಷಿ ಎಣ್ಣಿಯಂಡ್, ಮೋಶೇರ ನ್ಯಾಯಪ್ರಮಾಣತ್ಂಜ ಪಿಂಞ ಪ್ರಾವಾದಿಯಡ ಪುಸ್ತಕತ್ಂಜ ಆದಾರತ್‍ನ ಎಡ್‍ತಂಡ್ ಯೇಸುರ ವಿಷಯತ್‍ನ ಅಯಿಂಗಕ್ ವಿವರಿಚಿಟ್ಟಿತ್ ಎಣ್ಣಿಯಂಡಿಂಜತ್. 24ಅಂವೊ ಎಣ್ಣ್‌ನ ತಕ್ಕ್‌ನ ಚೆನ್ನ ಜನ ನಂಬ್‍ಚಿ; ಇಂಞು ಚೆನ್ನ ಜನ ನಂಬಿತ್‌ಲ್ಲೆ. 25ಅನ್ನನೆ ಅಯಿಂಗಯಿಂಗಳೇ ಒತ್ತತೆ ಇಪ್ಪಕ, ಪೌಲ ಅಯಿಂಗಕ್ ಇನ್ನನೆ ಎಣ್ಣ್‌ಚಿ. ಪ್ರವಾದಿಯಾನ ಯೆಶಾಯ ಪವಿತ್ರಾತ್ಮಂಡ ಮೂಲಕ ನಿಂಗಡ ಅಜ್ಜಂಗಕ್ ಸರಿಯಾಯಿತೆ ಎಣ್ಣ್‌ಚಿ. ಅದ್ ಎಂತ ಎಣ್ಣ್‌ಚೇಂಗಿ:

26ಈ ಜನಡ ಪಕ್ಕ ಪೋಯಿತ್:

ಅಯಿಂಗ ನೋಟುವ ಆಚೇಂಗಿ ಒಂದು ಕಾಂಬುಲೆ,

ಅಯಿಂಗ ಕ್‍ೕಪ ಆಚೇಂಗಿ ಒಂದು ಅರ್ಥ ಆಪುಲೆ.

27ಈ ಜನ ಕಣ್ಣಿಂಜ ಕಾಂಗತೆಯು, ಕೆಮಿಯಿಂಜ ಕ್‍ೕಕತೆಯು,

ಹೃದಯತ್ಂಜ ಅರ್ಥ ಆಕತೆ ಅಯಿಂಗಡ ಮನಸ್ಸ್ ಬದ್‍ಲಾಕತೆ,

ನಾನ್ ಅಯಿಂಗಳ ವಾಸಿ ಮಾಡತೆ ಇಪ್ಪನೆಕೆ ಅಯಿಂಗಡ ಹೃದಯ ಕಠಿಣವಾಯಿತು,

ಕೆಮಿ ಕ್‍ೕಪಾನ ನಿಪ್ಪ್‌ಚಿಟ್ಟಿತು, ಕಣ್ಣ್‌ನ ಮುಚ್ಚಿತು ಉಂಡ್.#28.27 ಯೆಶಾಯ 6.9–10

28ಆನಗುಂಡ್ ದೇವಡ ರಕ್ಷಣೆರ ವಿಷಯತ್ ದೇವಡ ವಾಕ್ಯ ಯೆಹೂದ್ಯಂಗ ಅಲ್ಲತ ಬೋರೆ ಜಾತಿ ಜನಕ್ ಪೋಯಂಡುಂಡ್‍ೕಂದ್ ನಿಂಗಕ್ ಚಾಯಿತೆ ಗೊತ್ತಿರಡ್; ಅಯಿಂಗ ಇದ್‍ನ ಕ್‍ೕಟಿತ್ ಅದ್ಂಗ್ ಕೆಮಿ ಕೊಡ್‍ಪಾಂದ್ ಎಣ್ಣ್‌ಚಿ. 29ಅಂವೊ ಈ ತಕ್ಕ್‌ನ ಎಣ್ಣ್‌ನ ಪಿಂಞ ಅಯಿಂಗೆಲ್ಲಾರು ತರ್ಕ ಮಾಡಿಯಂಡ್ ಪೋಚಿ#28.29 ಚೆನ್ನ ಮೂಲ ಪ್ರತಿಲ್ ಈ ವಾಕ್ಯ ಇಲ್ಲೆ.

30ಅಲ್ಲಿಂಜ ಅಂವೊ ತಾನ್ ಮಾಡ್‍ನ ಬಾಡಿಗೆ ಮನೆಲ್, ದಂಡ್ ಕಾಲ ಇಂಜಿತ್, ತಾಂಡ ಪಕ್ಕ ಬಪ್ಪಯಿಂಗಳೆಲ್ಲಾ ಸ್ವೀಕಾರ ಮಾಡ್‍ಚಿ. 31ತಾಂಡ ಪಕ್ಕ ಬಪ್ಪಯಿಂಗಕ್ ದೈರ್ಯವಾಯಿತ್, ಏದ್ ತಡೆಯು ಇಲ್ಲತೆ, ದೇವಡ ರಾಜ್ಯತ್‍ರ ವಿಷಯತ್‍ನ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ವಿಷಯತ್‍ನ ಬೋದನೆ ಮಾಡಿಯಂಡ್ ಇಂಜತ್.

Currently Selected:

ಅಪೊಸ್ತಲ 28: ಕೊಡವ

Highlight

Copy