ಅಪೊಸ್ತಲ 11
11
ಪೇತ್ರ ಅಂವೊಂಡ ಸೇವೇನ ವಿವರಿಚಿಟ್ಟದ್
1ಯೆಹೂದ್ಯ ಜನ ಅಲ್ಲತೆ ಬೋರೆ ಜನಳು ದೇವಡ ವಾಕ್ಯತ್‍ನ ಸ್ವೀಕಾರ ಮಾಡ್‌ಚೀಂದ್ ಉಳ್ಳ ಸುದ್ದಿ ಅಪೊಸ್ತಲಂಗಕು, ಯೂದಾಯತ್‍ಲ್ ಉಳ್ಳ ಯೇಸುನ ನಂಬ್‍ನಯಿಂಗಕು ಕ್‍ಟ್ಟ್‌ಚಿ. 2ಆನಗುಂಡ್ ಪೇತ್ರ, ಬಯ್ಯ ಯೆರೂಸಲೇಮ್‌ಕ್ ಬಪ್ಪಕ, ಯೇಸುನ ನಂಬ್‍ನ ಚೆನ್ನ ಯೆಹೂದ್ಯಂಗ ಪೇತ್ರನ ನೋಟಿತ್: 3ನೀನ್ ಸುನ್ನತಿ ಮಾಡತಯಿಂಗಡ ಪಕ್ಕ ಪೋಯಿತ್, ಅಯಿಂಗಡ ಕೂಡೆ ಉಂಡಿಯಲ್ಲಾಂದ್ ವಾದ ಮಾಡ್‍ಚಿ.
4ಅಕ್ಕ ಪೇತ್ರ ಅಯಿಂಗಕ್ ನಡ್ಂದ ವಿಷಯತ್‍ನ ಬುಡ್‌ತಿತ್ ಅನ್ನನೆ ಎಣ್ಣುವಕ್ ಸುರ್ ಮಾಡಿತ್: 5ನಾನ್ ಯೊಪ್ಪ ಪಟ್ಟಣತ್‍ಲ್ ಪ್ರಾರ್ಥನೆ ಮಾಡಿಯಂಡಿಪ್ಪಕ ಒರ್ ದರ್ಶನ ಕಂಡಿಯೆ. ದರ್ಶನತ್‍ಲ್, ಕಂಬಳಿರನೆಕೆ ಒರ್ ಬಲ್ಯ ಬಟ್ಟೆ, ನಾಲ್ ಮೂಲೆಲ್ ಕೆಟ್ಟಿತ್ ಬಾನತ್ಂಜ ಇಳಿಂಜಿ ನಾಡ ಪಕ್ಕ ಬಪ್ಪಾನ ಕಂಡಿಯೆ. 6ಅದ್‍ನ ನಾನ್ ಚಾಯಿ ನೋಟ್‍ವಕ ಆ ಬಟ್ಟೇಲ್ ಎಲ್ಲಾ ತರತ್‍ರ ನಾಲ್ ಕಾಲ್‌ ಉಳ್ಳ ಪ್ರಾಣಿಯ, ಕಾಡ್ ಪ್ರಾಣಿಯ, ಬೂಮಿರ ಮೇಲೆ ಪರ್‌ಪ ಪ್ರಾಣಿಯ ಪಿಂಞ ಬಾನತ್‍ಲ್ ಪಾರುವ ಪಕ್ಷಿಯ ಇಂಜತ್. 7ಅದ್ ಮಾತ್ರ ಅಲ್ಲತೆ, ಪೇತ್ರನೇ, ಏಳ್, ಕೊಂದಿತ್ ತಿನ್ನ್ಂದ್ ನಾಡ ಪಕ್ಕ ಎಣ್ಣ್‌ವಾನ ಸಹ ನಾಕ್ ಕ್‍ೕಟತ್.
8ಅದ್ಂಗ್ ನಾನ್: ಒಡೆಯನೇ, ಅನ್ನನೆ ಅಲ್ಲ! ಅಸಹ್ಯವಾನದ್‍ನ ಪಿಂಞ ಅಶುದ್ದವಾನದ್‍ನ ನಾನ್ ಒರ್ ಕುರಿ ಸಹ ತಿಂದಂವೊನಲ್ಲಾಂದ್ ಎಣ್ಣಿಯೆ.
9ಅದ್ಂಗ್ ದಂಡೆನೆ ಕುರಿ ಬಾನತ್ಂಜ ಆ ವಾಣಿ: ದೇವ ಶುದ್ದಮಾಡ್‍ನಾನ ನೀನ್ ಅಶುದ್ದಾಂದ್ ಎಣ್ಣತೇಂದ್ ನಾಕ್ ಜವಾಬ್ ಕೊಡ್‍ತತ್. 10ಇನ್ನನೆ ಮೂಂದ್ ಕುರಿ ಆನ ಪಿಂಞ ಅದ್‍ನೆಲ್ಲ ಪುನಃ ಬಾನ ಎಡ್‍ತಂಡತ್.
11ಅಕ್ಕಲೆ, ಕೈಸರೈ ಪಟ್ಟಣತ್ಂಜ ನಾಡ ಪಕ್ಕ ಅಯಿಚ ಮೂಂದ್ ಜನ ನಾನ್ ಇಂಜ ಮನೆರ ಮಿಂಞತ್ ಬಂತ್ ನಿಂದತ್. 12ನಾನ್ ಏದ್ ಅನುಮಾನವು ಇಲ್ಲತೆ ಅಯಿಂಗಡ ಕೂಡೆ ಪೋಪನೆಕೆ ಪವಿತ್ರಾತ್ಮ ನಾಡ ಪಕ್ಕ ಎಣ್ಣ್‌ಚಿ. ಯೇಸು ಕ್ರಿಸ್ತನ ನಂಬುವ ಈ ಆರ್ ಅಣ್ಣತಮ್ಮಣಂಗಳು ಸಹ ನಾಡ ಕೂಡೆ ಬಾತ್. ನಂಗೆಲ್ಲಾರು ಆ ಮನುಷ್ಯಂಡ ಮನೆರ ಒಳ್‍ಕ್ ಪೋಚಿ. 13ಅಂವೊ ತಾಂಡ ಮನೆಲ್ ಎನ್ನನೆ ಒರ್ ದೇವದೂತನ ಕಂಡತ್‍ೕಂದೂ, ಯೊಪ್ಪ ಪಟ್ಟಣತ್‍ಲ್ ಉಳ್ಳ ಪೇತ್ರ ಎಣ್ಣುವ ಸೀಮೋನನ ಕಾಕ್‍ವಕ್, ಜನಳ ಅಯಿಚಿಕೊಡ್; 14ನೀಕು, ನಿಂಗಡ ಮನೆಕಾರಕು ರಕ್ಷಣೆ ಕ್‍ಟ್ಟ್‌ವಕ್ ಎಂತ ಮಾಡಂಡೂಂದ್ ಅಂವೊ ಎಣ್ಣುವಾಂದ್ ಆ ದೇವದೂತ ಎಣ್ಣ್‌ಚೀಂದು ಅಂವೊ ನಂಗಕ್ ಎಣ್ಣ್‌ಚಿ. 15ನಾನ್ ತಕ್ಕ್ ಪರಿವಕ್ ಸುರ್ ಮಾಡ್‌ವಕ, ಪವಿತ್ರಾತ್ಮ ಮಿಂಞ ನಂಗಡ ಮೇಲೆ ಬಂದನೆಕೆ ಅಯಿಂಗಡ ಮೇಲೆಯು ಪವಿತ್ರಾತ್ಮ ಇಳಿಂಜಿ ಬಾತ್.
16ಅಕ್ಕ: ಯೋಹಾನ ನಿಂಗಳ ನೀರ್‌ಲ್ ದೀಕ್ಷಾಸ್ನಾನ ಮಾಡ್‍ಚಿ, ಆಚೇಂಗಿ ನಿಂಗ ಪವಿತ್ರಾತ್ಮತ್‍ಲ್ ದೀಕ್ಷಾಸ್ನಾನ ಪಡೆಯುವಿರಾಂದ್ ಒಡೆಯ ಎಣ್ಣ್‌ನ ತಕ್ಕ್ ನಾಕ್ ಗೇನ ಬಾತ್. 17ಆನಗುಂಡ್, ಒಡೆಯನಾನ ಯೇಸು ಕ್ರಿಸ್ತನ ನಂಗ ನಂಬ್‌ವಕ, ನಂಗಕ್ ಕೊಡ್‍ತ ಅದೇ ವರತ್‍ನ ಯೆಹೂದ್ಯರಲ್ಲತ ಬೋರೆಯಿಂಗಕ್ ತಪ್ಪಕ, ದೇವನ ತಡ್‍ಪಕ್ ನಾನ್ ದಾರ್?
18ಇದ್‍ನೆಲ್ಲ ಅಯಿಂಗ ಕ್‍ೕಪಕ: ಅನ್ನನೆ ಆಚೇಂಗಿ, ದೇವ ಯೆಹೂದ್ಯರಲ್ಲತ ಬೋರೆ ಜಾತಿಯಂಗಕು, ಅಯಿಂಗ ತಂಗಡ ಪಾಪತ್ಂಜ ತಿರ್‌ಗಿತ್, ಯೇಸುನ ನಂಬ್‍ಚೇಂಗಿ, ನಿತ್ಯ ಜೀವತ್‍ನ ಪಡೆಯುವಕ್ ಒರ್ ಅವಕಾಶ ಕೊಡ್‍ತಿತುಂಡ್‍ೕಂದ್ ಎಣ್ಣಿತ್ ಒಂದು ಎಣ್ಣತೆ ದೇವನ ತುದಿಚತ್.
ಅಂತಿಯೋಕ್ಯ ಸಬೆ
19ಸ್ತೆಫನಂಡ ವಿಷಯತ್‍ಲ್ ಸುರು ಆನ ಹಿಂಸೆಯಿಂಜ ಚದ್‍ರಿಪೊನಯಿಂಗ, ಫೊಯಿನಿಕೆ, ಕುಪ್ರ ಪಿಂಞ ಅಂತಿಯೋಕ್ಯಕತ್ತನೆ ಪ್ರಯಾಣ ಮಾಡ್‍ಚಿ. ಆಚೇಂಗಿ ಅಯಿಂಗ ಯೆಹೂದ್ಯಂಗಕ್ ಮಾತ್ರ ದೇವಡ ಸುದ್ದಿನ ಪ್ರಸಂಗ ಮಾಡ್‍ಚಿ. 20ಆಚೇಂಗಿ, ಅಯಿಂಗಡಲ್ಲಿ ಕುಪ್ರ ಪಿಂಞ ಕುರೇನ್ಯತ್ಂಜ ಅಂತಿಯೋಕ್ಯ ಪಟ್ಟಣಕ್ ಪೋನ ಚೆನ್ನ ಜನ, ಯೆಹೂದ್ಯ ಅಲ್ಲತ ಜನಕ್ ಒಡೆಯನಾನ ಯೇಸುರ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕ್ ಸುರು ಮಾಡ್‍ಚಿ. 21ದೇವಡ ಶಕ್ತಿ ಅಯಿಂಗಡ ಕೂಡೆ ಇಂಜತ್. ಬಲ್ಯ ಜನಡ ಗುಂಪ್ ನಂಬಿತ್, ಒಡೆಯಂಡ ಪಕ್ಕ ತಿರ್‍ಗ್‍ಚಿ.
22ಈ ವಿಷಯನೆಲ್ಲ ಯೆರೂಸಲೇಮ್ ಸಬೆರ ಜನ ಕ್‍ೕಪಕ, ಅಯಿಂಗ ಬಾರ್ನಬನ ಅಂತಿಯೋಕ್ಯಕ್ ಅಯಿಚತ್. 23ಅಂವೊ ಅಲ್ಲಿಕ್ ಎತ್ತಿತ್ ದೇವಡ ಕೃಪೇನ ದೃಡವಾಯಿತ್ ಕಾಂಬಕ, ಅಂವೊಂಗ್ ದುಂಬ ಕುಶಿಯಾಯಿತ್, ಅಯಿಂಗಳ ನೋಟಿತ್, ಅಯಿಂಗ ತ್‍ೕರ ಹೃದಯತ್‍ಲ್ ಒಡೆಯಂಗ್ ನಂಬಿಕಸ್ತಂಗಳಾಯಿತ್ ಇಪ್ಪಕ್ ಪುರ್‌ಡ್ ಕೊಡ್‍ತತ್. 24ಬಾರ್ನಬ ದುಂಬ ನಲ್ಲಂವೊನಾಯಿತ್‌ಂಜತ್. ಅಂವೊ ಪವಿತ್ರಾತ್ಮತ್‍ಲ್ ದುಂಬ್‍ನಂವೊನು, ನಂಬಿಕೇಲ್ ದೃಡವುಳ್ಳಂವೊನಾಯಿತು ಇಂಜತ್. ಆನಗುಂಡ್ ದುಂಬ ಜನ ಒಡೆಯಂಡ ಪಕ್ಕ ಕೂಡ್‍ಚಿ.
25ಅಲ್ಲಿಂಜ ಬಾರ್ನಬ ಸೌಲನ ತ್‍ೕಡಿಯಂಡ್ ತಾರ್ಸ ಪಟ್ಟಣಕ್ ಪೊರಟ್ ಪೋಚಿ. 26ಅಂವೊನ ಅಲ್ಲಿ ಕಂಡಿತ್ ಅಂತಿಯೋಕ್ಯಕ್ ಕಾಕಿಯಂಡ್ ಬಾತ್. ಅಲ್ಲಿ ಅಯಿಂಗ ಒರ್ ಕಾಲಕತ್ತನೆ ಸಬೆರ ಜನಡ ಕೂಡೆ ಇಂಜಿತ್, ದುಂಬ ಜನಡ ಗುಂಪ್‌ಕ್ ಬೋದನೆ ಮಾಡಿಯಂಡಿಂಜತ್. ಅಂತಿಯೋಕ್ಯ ಪಟ್ಟಣತ್‍ಲ್ಲೇ ಯೇಸುನ ನಂಬ್‍ನಯಿಂಗಕ್ ಕ್ರಿಸ್ತಂಗಾಂದ್ ಆದ್ಯತ್ ಪೆದ ಕ್‍ಟ್ಟ್‌ಚಿ.
27ಆ ಕಾಲತ್‍ಲ್ ಬಾರ್ನಬ ಪಿಂಞ ಸೌಲ ಅಂತಿಯೋಕ್ಯತ್‍ಲ್ ಇಪ್ಪಕ, ಚೆನ್ನ ಪ್ರವಾದಿಯಂಗ ಯೆರೂಸಲೇಮ್ಂಜ ಬಾತ್. 28ಅಯಿಂಗಡಲ್ಲಿ ಅಗಬ ಎಣ್ಣುವ ಒಬ್ಬ ಎದ್ದಿತ್, ಪವಿತ್ರಾತ್ಮತ್‍ಲ್ ದುಂಬಿತ್, ಇಡಿ ಲೋಕತ್‍ಲ್ ಬರಗಾಲ ಬಪ್ಪಕುಂಡ್‍ೕಂದ್ ಎಣ್ಣ್‌ಚಿ. ಅದ್ ಅನ್ನನೆ ಕ್ಲೌದ್ಯ ಚಕ್ರವರ್ತಿರ ಕಾಲತ್‍ಲ್ ನಡ್ಂದತ್. 29ಅಕ್ಕ ಯೇಸುನ ನಂಬ್‍ನ ಓರೋರ್ ಅಣ್ಣತಮ್ಮಣಂಗಳು ಅಯಿಂಗಯಿಂಗಕ್ ಕಯ್ಯುವಚ್ಚಕ್ ಯೂದಾಯ ಪ್ರಾಂತ್ಯತ್‍ಲ್ ವಾಸ ಮಾಡಿಯಂಡುಳ್ಳ ಯೇಸುನ ನಂಬ್‍ನಯಿಂಗಕ್ ಸಹಾಯ ಮಾಡ್‌ವಕ್ ತೀರ್ಮಾನ ಎಡ್‍ತತ್. 30ಅನ್ನನೆ ಅಯಿಂಗ, ಎಲ್ಲಾನ ಕೂಟಿತ್, ಬಾರ್ನಬ ಪಿಂಞ ಸೌಲಂಡ ಕೂಡೆ, ಯೆರೂಸಲೇಮ್‍ಲ್ ಉಳ್ಳ ಸಬೆರ ಪೆರಿಯಯಿಂಗಕ್ ಈ ಸಹಾಯತ್‍ನ ಕೊಡ್‌ತಿತ್ ಅಯಿಚತ್.
Currently Selected:
ಅಪೊಸ್ತಲ 11: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
