Sawmus 41
41
Uya keh nah makniw akiw
1Ka aynsima kabaykanek gidahan pahavwi ku pariye kiyene hiyeg madiptavye. Mmanawa Kiyavwiye Uhokri Dehetniye hawata kiyeginek ku aysaw ig abetnek mbeyne!
2Ig Kiyavwiye Uhokri mpithignek ariw mbeyne hawata ariw miyaka. Ig keh ig utinek ka aynsima kabayka ku samah ig ay amadga inin. Ig ka isaksanek givetunyavu kamaxgi.
3Ku aysaw ig haritnek kakahriye amadga gisivamna, ig Kiyavwiye Uhokri ikinek gawaygi, ig kehnek ig makniw pahaynewata akiw.
4Nah awne git Kiyavwiye Uhokri: “Kiyavwiye, nah kakahrip avatra nutaraksan pikak. Amnih bayahminan. Uya keh nah makniw akiw.”
5Igkisme nuvetunyavu awna numinuh, giwnkis: “Aysawneki ig miyapnek adahan ig miyehpika?”
6Ku pahavwi gaytakkis ayta iwasavun ig ikawvari ke wotbe ig wakayminebe nudahan bawa ig he isenenwa. Ig iwasavun he adahannen nuhiyvetni ba nah tiviknenema mihenene. Ayteke ig pes adahan ig kinetihwene numinuh gitkis gikagmadavu.
7Madikte ku pariye namiyhetnivwi igkis kinetihwa numinuh akak minimnika. Igkis aharitne nah hiyapte mbeyne akiw.
8Igkis awna: “Kibeyne, ig mihenevye kuwis. Ig ka kannikaw akiw.”
9He igwa nudahewekten ku pariye nah ka aynsima iveg givitit, ku pariye ax payak nukakuh, he igwa hawata wageswe nuvetunya.
10Pisme, Kiyavwiye, ka miniwti nuwhu. Uya amnihun kannikasan adahan nah iki gitkis neras ku pariye gimawkankis!
11Ini ku samah nuvetunyavu ka matakunnek, in keh nah hiyaknek ku pis batek nukakuh.
12Pis keh nah kabimnahwanek akiw awaku nah keh ku pariye wadit. Pis keh nah misakwanek avanenekwa ay pimun.
13Ig izhaewyenevwi giwohkigakis, Kiyavwiye Uhokri, ignewa kis adahan kabayhaka! Ignewa kis adahan kabayhaka, ku akak inin hawata adahan avanenekwa! Ameh! Ameh! Henewatbaki.
Currently Selected:
Sawmus 41: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
