Sawmus 22
22
Kiyavwiye, mmahki pis ikiswen?
Mt 27.33; Lk 23.33; Jo 19.18
1Kiyavwiye nuwohkiga, nuwohkiga, mmahki pis ikiswen? Mmahki pis piyawakad nuwhu? Mmahki pis ka timap ku aysaw nah amnihswene pit?
2Nuwohkiga, puwivak nah kanumpi, pisme ka kaytwa nuwnuh. Nah kanumpi tiyegem, heneme nuhiyekemni ka karisahwa.
3 Mmahki hene? Nah hiyak ku pisnewa barewvitye. Pis ka pidatnisima adahan pis namnihten. Pis avitmin madikte. Pis bat amadga pevwi kiyatyo. Ayge pis amevene pihiyegavu gavankis kabayhaki.
4Minikwak igkis wahawkrivwi kamaxwa pivitit. Pisme amnihgikis akak pidatni.
5Igkis amnihswa pit, pisme wiwhgikis ariw mbeyne. Igkis iveg pivitit, pisme ka kinisgikis.
6Nahme ay pivetun kuri nah ka ariknawnama ta pit. Nah yuma nukiytani aynesnima givetunkis hiyeg. Nah yuma aynesnima nawaygi gitivutkis. Madikte igkis mahivwihun. Igkis amiyhevun.
7Madikte hiyeg ku pariye hiyavun igkis miyathan. Igkis tarak ginenkis numkanit igkis sasah gitewkis.
8Igkis awna: “Ku pis inyewa kamaxwa givitit Kiyavwiye Uhokri, mmahki nikwe ig ka amnihpi kuri? Ku ig batek pikak, mmahki ig ka ayavap?”
9Heneme nah hiyak ku pis avanenekwa ay nukakuh. Pisnewa keh nah amadga wayk. Ku samah nah bakimnite pis avuriwhun.
10Ku samah abetnewa nah amadga wayk nah ekkepka piwakurit. Ku samah nah amadga wayk pisnewa nuwohkiga.
11Ka ba ikiswenuma, Kiyavwiye. Mmanawa nah ay kiyaran akak mbeyevye mbayka. Yumahbaki pahavwinema adahan nayavetni.
12Nah kiyaran gikakkis ka aynsima nuvetunyavu. In ke wotbe nah aynte giyegbikisbe nopsadmin pakadmin kane gidatnikisima. Igkis ahegbet adahan nuwmepten.
13Igkis kewa kawokwinebe mativwevye. Igkis sakara gibiykis numkanit.
14Nahme yuma nudatni aynesnima akiw. Nah madikte kigiswip. Nah ke unbe dimuka waykborit. Nah wakaymine nah.
15Nukuvi aravwip kewa wayk tabutebnevyebe. Inme nunenuh madikte makeke amadgat nutomabiy. Pis ikiswen nah harit waykbo kewa miyareyebe.
16Igkisme pahabu arewhavyempu ayta tivuhpekevun. Igkis aytwe numkanit kewa pahabu pewrube kiyaran nukakuh. Igkis turuhbete nuwakuh payak akak nukugku.
17Madikte nuvita kahayak. Nuvetunyavu misakwa ivegbet numkanit. Igkis bateke ginaktinkis awaku igkis matekevun.
18Igkis ibekheke amin nukawihni. Igkis arehwe akak tip adahan hiyepne ku pariye kabunuganenwa igi darihpiye nusimsa.
19Kiyavwiye Uhokri, ka ba ikiswenuma. Pisnewa ikene nutuh nudatni. Ba ayta kibehtenwa adahan pis amnihun.
20Uya amnihun mpithan ariw giyakwokkis. Ka ba isaksa neras mbayavye gihiyekemnikis kene peruwbe umehpenuma.
21Uya amnihun mpithan ariw gaybukis neras kene puwiknebe axtigi. Mmanawa ka hiya nahma mpithamnihwa giwkis neras kene pakadminbe.
22 Kibeyne, Kiyavwiye. Nah hiyak ku pis kuwis timap namnihswan pit. Nikwe nah kinetihwanek amin pabay gitkis nukebyuvwi. Nah kabayhapnek ayge gibetkis pihiyegavu.
23 Nah awnanek: “Kabayhanay Kiyavwiye Uhokri Dehetniye madikte yis ku pariye kiyathenevwi Uhokri! Madikte yis ku pariye mpiksewnevwi giharit Kiyavwiye Uhokri hawata ke amekene Jakóbe, kabayhanigbay! Yis gihiyegavu izhaewyenevwi, kabayhanigbay kiyesad!
24Kabayhanigbay, mmanawa ig ka miyeh hiyeg abetnene mbeyne. Ig hiyap madikte gikayhawni. Ig ka wages giduhya gimkanit. Kawa! Ig ahegbet adahan timepne gamnihswan git.”
25 Henewatbaki, nuwohkiga. Nah kabayhapnek ayge gibetkis madikte pihiyegavu adahan ku pariye pikehavan nudahan. Ayge gibetkis madikte hiyeg ku pariye kiyathenevwi pis, nah kehnek ku pariye nukaksan ta pit.
26Igkisme madiptavye ayta axnek kabihribdave. Igkis ku pariye giharitne Kiyavwiye Uhokri igkis kabayhignek. Igkis bateke giminkisnek adahan avanenekwa!
27Aysawnemenek madikte hiyegviyenevwi amadga hawkri kiyenek Kiyavwiye Uhokri igkis wagesnek gihiyekemnikis gimkanit. Avim ini igkis madikte paberetusawnek gitivut adahan kawohkigahewne git.
28Mmanawa ignewa Kiyavwiye ig ikivarat adahan avanenekwa. Ignewa kumaduka madikte hiyegviyenevwi amadga hawkri.
29Madikte neras ku pariye kane dehwenema amadga inin igkis madikte kiyathignek. Madikte hiyeg ku pariye kuwewanek miyarap igkis madikte paberetusawnek gitivut ner ku pariye kane kavigsa givit ariw miyaka.
30Madikte ukamkayuvwiy gikakkis uhiwhivwiy igkis kiyathanek Kiyavwiye Uhokri adahan avanenekwa, mmanawa usuh kinetihwanek takunipti gitkis amin ku pariye gikehavan udahan.
31Igkisme neras ku pariye kotenene amadga wayk, aysawnemek igkis hawata timapnek arak gabay gamnihra ku samah ig Uhokri ka gamnihrasima gikakkis gihiyegavu.
Currently Selected:
Sawmus 22: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
