Sawmus 119
119
Uhokri giwn, gikumadukan, gannasan
1Ka aynsima kabaykanek gidahankis hiyeg ku pariye wewnevwi wadit, avigkutavrik Kiyavwiye Uhokri gikumadukan.
2Ka aynsima kabaykanek gidahankis hiyeg ku pariye ihpenevwi ignewa Kiyavwiye Uhokri giwn hawata ku pariye mpiksewnevwi giharit Kiyavwiye Uhokri akak madikte gimaviswankis.
3Ka aynsima kabaykanek gidahankis hiyeg ku pariye ka taraksa gikak pahavwinema hiyeg, igkis wew avigkuw Kiyavwiye Uhokri gihiyekemni.
4Kibeyne, Kiyavwiye, pis ike wotuh pikumadukan. Pis aye wotuh adahan usuhme tiviknene wewnene avigku pihiyekemni avanenekwa.
5Kiyavwiye, avititakwa nuyakni nah ihpekere ini pikumadukan. Nah ka muwaka taraksin aynesnima.
6Ku nah ikatuswanek arit madikte pikumadukan, nikwe nah ka marakwanek nuvituh.
7Ku nah hiyekenek ku nah kuwis wewnene avigkutavrik ini pikannuhakni waditye, nikwe nah kabayhapnek ka aynsima.
8Kiyavwiye, nah battukawnek ihpa pikumadukan. Ka ba ehwapmanek nukakuh ku nah ka huwitnek arit. Kiyaknihwanabanek nukakuh.
Ihpenevwi Uhokri giwn
9Mmahpa pahavwi takweye ik adahan avuriw gihiyekemni barewbet? Ku ig avuriwni ku samah pannasan awna, nikwe gihiyekemni barewbetnenekwa.
10Nah mpiksewnene wew akak pihiyekemni avititakwa nuyakni. Ka ba isaksa nah dagah ariw pikumadukan.
11Nah kiyenenekwa piwn abet nuhiyekemni kahadbe nah ka taraksa pikak.
12Nah kabayhap, Kiyavwiye! Uya kannuhun amin pihiyekemni adahan waymuhwan.
13Nah nubetki awna gitkis hiyeg akak nuhawna inwata iwit ku pariye pis awna adahan usuh keh.
14Nah pi batekte adahan wew avigku pikumadukan mpiya ariw ku nah kadahan ka aynsima igiska.
15Nah avanenekwa ivegmina nuhiyekemni amin pihiyekemni. Nah kiyenenekwa ini pikumadukan.
16Ka nubetkisima ku aysaw nah keh avigkutavrik pihiyekemni. Nah ka miyehnek ini pannasan.
Batekka adahan Uhokri gikumadukan
17Kiyavwiye, kehnaba kabayka nukakuh, nah pibuk, adahan nah tiviknene aymuhwenene hawata adahan nah ihpenene piwn ay amadga inin.
18Uya woka nudahan nuhiyekemni kahadbe nah hiyak ini pihiyekemni barewyewatnene ariwntak pannasan.
19Nah he mpiyevyenen avitiw inin waxri. Uya akka nutuh ini pikumadukan huwewehe marihwa nah ik adahan huwithasaw nit.
20Nutivuh ka aynsima aharitkere pikumadukan, mmanawa avanenekwa nah muwaka hiyak ku pariye pimawkan.
21Pis himah hiyeg ku pariye kane kumadukasewkere pit; neras ibiytahakare ku pariye kane huwithasewkere arit pikumadukan.
22Uya amnih wiwhun ariw mahivwihka ku pariye igkis awna numinuh, mmanawa nah ihpene pikumadukan.
23Hiyawa hiyegviyenevwi gikivarakis pahadguhwe adahan mbeyhene nuwhu, heneme nah pibuk, nah ikinek nuhiyekemni arimkanit pikumadukan.
24Nah ka nubetkisima akak pikumadukan, mmanawa innewa naydhetni adahan ikine nuhiyekemni.
Uya kannuhun amin pikumadukan
25Nah kuwis matekepka. Nah kuwis harit waykbor. Uya iki nutuh nukune nawaygi akiw, ku samah pis ikakse nutuh.
26Kibeyne nah ekke pit madikte ku pariye nukehni. Pisme kaytwe nuwnuh. Kiyavwiye, uya kannuhun amin pikumadukan.
27Uya keh nah pukuhpin kiyeste akiw, kahadbe nahme ivegminene nuhiyekemni amin ini pikiyakemni kibeynewatnene nudahan.
28Nah ka aynsima kadni. Nah tih aynte avit nuyakni. Uya amnih iki nutuh nawaygi akiw, ku samah pis ikakse nutuh.
29Ka ba isaksa nah wew akak hiyakemniki taraksebdivye. Heneme uya kannuhun amin pikumadukan akak pabay.
30Nah kuwis kaniye adahan nah wewne akak pihiyekemni inyewatnene. Hawata nah battukewnene ihpa ini pikumadukan adahan waymuhwan.
31Kiyavwiye Uhokri, nah mpiksewnene wew akak pikannuhakni; ka ba isaksa nah marekepma nuvituh. Keh nah mataka ini ku pariye nah aharit.
32Nah iwawhaw ihpa pihiyekemni, mmanawa nah aharit pukuhpa kiyeste akiw pikumadukan.
Keh nah pukuhpa pikumadukan
33Kiyavwiye Uhokri, uya kannuhun adahan nah pukuhpa pihiyekemni, adahan nah wew nivigku avanenekwa.
34Keh nah pukuhpin, kahadbe nah wew nikak avititakwa nuyakni.
35Huwithanuba avigkut pikumadukan. Innewa keh nah batek.
36Kehnaba nah batek akak pihiyekemni mpiy ariw igiska amadgaya inin.
37Ka ba isaksa nah ivegmina nuhiyekemni arimkanit arikna ku pariye yumanene awaygi. Kabaynaba nukakuh, ku samah pikaksan.
38Uya kahayaksa inyewa ku pariye pikaksan nutuh, nah pibuk, kahadbe nah inyewa avis taraksa pikak.
39Nah kuwis avise ku nawenetke nah kawih maraki akak nutaraksan ay pivetun. Kiyavwiye, ka ba isaksa inin danuh nutuh. Kibeyne pikumadukan kibeynewa adahan keh nah ka taraksa pikak.
40Nah wewkere akak ini pikumadukan kabayntiwa ku samah pimawkan. Kehnaba nuhiyekemni wadit, ku samah pihiyekemni waditye.
Nah kamaxwa avitit pannasan
41Kiyavwiye Uhokri, kehnaba nah kayah ini pibetki nukakuh. Hawata uya amnihun ku samah pis ikakse nutuh.
42Kahadbe nah kannuh kaytwa giwnkis neras ku pariye numahivwihtnivwi, mmanawa nah kamaxwa avitit pannasan.
43Ka ba isaksa nah miyeh inakni iwit inyewatnene, mmanawa nah kamaxwa avitit pihiyekemni kibeyne.
44Hewkevye nah mpiksawnek adahan ihpa pikumadukan, adahan avanenekwa nah wewne nikak.
45Kahadbe yuma ariknawnama avisasannek, mmanawa nah mpiksewnene keh ku pariye pis ayap nutuh.
46Hene nah kinetihwanek amin pikumadukan gitkis ikivaratviyenevwi. Nah ka maraka nuvituhnek gitivutkis.
47In pikumadukan ewk batekka nutuh, mmanawa nah bateke nikak.
48Nah taraknek nuwakuh adahan amevene ini pikumadukan, ku pariye nah inyewa bateke nikak. Nah ikinek nuhiyekemni nimkat avanenekwa.
Pikaksan iki nawaygi
49Kiyenaba pikaksan nutuh, nah pibuk, ku pariye kavit pis ike nawaygi adahan nah wahap akak madikte nukamaxwan.
50Ku aysaw nah bet mbeyne, in aydhaptipen, in ike nawaygi adahan nah patiptekene mbeyne.
51Neras ikewnevwi kabaytenene, igkis avanenekwa mahivwihun. Heneme ka sam nutuh, nah ka miniw ariw ini pihiyekemni.
52Kiyavwiye, minikwaknawa pikumadukan ekke wotuh ku samah in inyewa. Inneki keh nah iwi nawaygi niwntak.
53Ku aysaw nah hiyap hiyeg mbayavye ka wewkere avigku ini pikumadukan, in keh nah dagawnaw gitkis ka aynsima.
54Ku aysaw nah aynetenek amadga inin hawkri, nah kehnenekwa avatnek akak ini pihiyekemni barewye.
55Kiyavwiye, ku aysaw nah iveg tiyegem, nah ivegmina nuhiyekemni amin pihiyekemni. Numawkan nah ihpenenekwa pikumadukan.
56Nannivwi kuri amadga inin, numawkan na ihpene piwn.
Nah ka miniw ariw pihiyekemni
57Kiyavwiye, pisnewa madikte nudahan. Nah ikaksa pit ku nah inyewa ihpanek piwn.
58Avititakwa nuyakni nah aya pit: uya amnihun, keh ku samah pikaksan nutuh!
59Nah kuwis ivegmina nuhiyekemni adahan mmahpa nah wew, nah ikaksa pit ku nah inyewa wewnek avigkutavrik pihiyekemni.
60Nah ka ayivwihwanek adahan ihpin.
61Hiyeg mbayavye aharitnene adahan wageswiye nuhiyekemni piw, heneme nah ka miniw ariw pihiyekemni.
62Pabuskak mitipka nah kannikaw, nah kabeyhene piw adahan pikumadukan waditye.
63Nah gikagmadakis madikte hiyeg ku pariye kiyathap hawata ku pariye ihpenevwi pikumadukan.
64Kiyavwiye, waxri kuwis kivun akak areketni pamnihra. Uya kannuhun amin pihiyekemni.
Pikumadukan ka waditnevyenenma
65Kiyavwiye, kibeyne pis kehe kabayka nukakuh, nah pibuk, ku samah pis ikakse nutuh.
66Uya kannuhun amin pihiyekemni kahadbe nah hiyak ku pariye wadit, mmanawa nah iveg avitit pikumadukan.
67Minikwak ku samah nah kote hiyapte mbeyne, nah wew akak nudahanwa nuhiyekemni amadgaya inin, heneme kuri nah wewkere akak pidahan pihiyekemni kibeyne.
68Kiyavwiye, pisnewa kibeyne. Pisnewa keh kabayka. Uya kannuhun amin ku pariye pis muwaka nah keh.
69Hiyeg ku pariye kane kumadukasewkere pit, igkis wasaymaw nudahan, heneme akak ini, akak madikte nubetki, nah nudukwenewa ihpenene piwn.
70Ignes hiyeg dahkise giyaknikis piw. Nahme batek akak pikumadukan.
71Kibeynekata nah hiyap mbeyne. Inneki keh nah kannuhwa amin pihiyekemni.
72In pannasan ku pariye pes piwntak in pi awaygte nutuh ariw madikte igiska amadgaya inin.
Pihiyekemni in waditye
73Kiyavwiye Uhokri, pisnewa kehe nuvituh humaw payak akak nuhiyekemni. Kuri, uya kannuhun adahan nah pukuhpa pikumadukan.
74Neras ku pariye kiyathap igkis bateke giminkis ku aysaw igkis hiyavun, mmanawa nah kiyathap hawata nah kamaxwa avitit piwn.
75Kiyavwiye, nah hiyak ku pihiyekemni in wadit avigkut hiyakemniki. Pis muwaka amnihun, inneki keh pis isakse ini mbeyne danuhe nutuh.
76Ka sam. Nah muwaka pis ayta aydhan akak ini pamnihra ku samah pis ikakse nutuh, nah pibuk.
77Uya amnih iki nutuh nudehetni kahadbe nah tiviknene ay amadga inin, mmanawa nah batek akak pikumadukan.
78Neras ku pariye kawantiyavye igkis ka aynsima kanumtevun waditnevyenen. Uya keh igkis mara akak giwasemnikis. Nahme numawkan nah ikatuswenenekwa arit piwn.
79Nerasme ku pariye avisnevwi pibohri, neras ku pariye hiyeknevwi pikumadukan, numawkan igkis ayta misakwa nuwntak.
80Numawkan nuhiyekemni barewbet ariw taraksaki, kahadbe nah taraksema pikumadukan hawata adahan nah ka marekema nuvituh.
Nah kuwis wahap ayivwad kuwis adahan pis amnihun
81Kiyavwiye, nah kuwis wahap ayivwad kuwis adahan pis ayta amnihun. Nah ka aynsima wakaymni. Heneme nah nudukwenewa kamaxwenene avitit piwn.
82Mataytak hewke tiyegem nah misakwa avuriwvarimpi adahan wahepne ku pariye pikaksan nutuh, he nuwtyak mabip. Nah awna: “Aysawhki pis ayta amnihun?”
83Nah ka kawih akiw, nah ke puwiknebe amar ku pariye harit abet tiket, madikte aravwi, heneme nah ka miyeh adahan keh ku samah pikumadukan awna.
84Aysawhki ayivwi adahan nah wahap akiw? Kabetvahki pis hiyapkisnek gitkis neras ku pariye nuharaksetnivwi?
85Ignes kawantiyavye, ku pariye ka ihpekere pikumadukan, igkis ahegbetave tey adahan nukamaxwitni.
86Kiskama madikte pikumadukan in ihpaka. Hiyaksa igkisme ka ihpin. Igkis haraksan waditnevyenen. Uya amnihun.
87Igkis kaba umehpen, heneme nah ka miniw ariw pikannuhakni.
88Uya amnihun. Iki nutuh nawaygi akiw, mmanawa nah hiyak ku pis batek nukakuh. Ku pis iki nawaygi akiw, nikwe nahme ihpanek madikte iwit ku pariye pes pibiyaptak.
Uhokri gihiyekemni ka mpiyati
89Kiyavwiye Uhokri, piwn in dahwa adahan avanenekwa. In dahwa avanenekwa ke inurikbe.
90Ku samah piwn in tiviknene avanenekwa, pis ike waxri niwetrimadgat in ka higihwati akiw.
91Madikte ariknebdi dahwa kuviknene akak inin ku samah piwn, mmanawa madikte wew avigkutavrik ku samah pimawkan.
92Wake nah ka batekbe akak pikumadukan, kuwiskama nah miyavikam awaku mbeyne ku pariye nah hiyap.
93Nah ka miyehtinek pikumadukan, mmanawa nivitimpi pis ike nawaygi, pis ka isaksa nah biyuksa nudehetni.
94Kiyavwiye, nah pidahan! Uya amnihun, mmanawa nah kuwis mpiksaw ihpa pikumadukan.
95Hiyeg mbayavye kuwis wahepbet adahan nuwmepten, heneme nah ikinene nuhiyekemni arimkanit pikumadukan.
96Nah kuwis avuriw ku madikte ariknebdi amadga inin in kadahan niwetu, heneme pikumadukan in kawih adahan madikte.
Nah ka nubetkisima akak pikumadukan
97Nah ka nubetkisima akak pikumadukan. Nah iki nuhiyekemni nimkat mataytak.
98In pikumadukan avanenekwa ay nukakuh. In keh nah pi hiyekemnite giwkis nuvetunyavu.
99Nah pukuhpate waymuhwan mpiy giwkis nukannuhtenvu, mmanawa nah ikatuswa arimkat pikannuhakni.
100Nah hiyakte hawkri giwkis kiyavwiyegben, mmanawa nah ihpa pikannuhakni.
101Nah ka atakti sibuh avigkut pahatnama ahin mbeyviye kahadbe nah ik adahan ihpenene piwn.
102Nah battukaw wew avigkut pikumadukan avanenekwa, mmanawa pisnewa kannuhun.
103Nah ka nubetkisima akak piwn, mmanawa in ka aynsima kitete ariw ahayak anunu.
104Nah uti nuhiyekemni ariwntak pikumadukan hene nah tukuhave madikte ahin adahan kinisaka.
Piwn in kewa abukribe
105Inakni piwn in kewa abukribe adahan uguhavrikune nuhina. In kabutniki adahan nuhwitenten.
106Nah kehnek ku samah nuwnuh pit. Nah ihpanek pikumadukan ku pariye waditye.
107Kiyavwiye Uhokri, nuhiyvan mbeyne in mbeyevye; uya iki nutuh nudatni akiw ku samah pikaksan.
108Kiyavwiye, uya amava nuviryepkawni adahan kabeyhene piw. Uya kannuhun amin pikumadukan.
109Nah avanenekwa abet mbeyne. Heneme abetnewa ini nah ka miyeh pikumadukan.
110Hiyeg mbayavye ahegbeta tey nudahan, heneme nah ka miniw ariw pikumadukan.
111In pikumadukan innewa nudahan avanenekwa. In keh nuyakni batek.
112Nah kuwis ahegbete nuhiyekemni adahan nah ihpene pikumadukan danuhte amaksemni nuwewni pikak.
Nah kiyathanek pikumadukan avanenekwa
113Nah amiyha hiyeg ku pariye ka wewkere inyewatma pikak, heneme nah batek akak pikumadukan.
114Pisnewa nayemwekri. Pisnewa numaptenten. Nah kamaxwa avitit piwn.
115Higihwanay nuwhu, yis hiyeg mbayavye, kahadbe nah ihpa Kiyavwiye Uhokri gikumadukan.
116Ikinaba nawaygi, ku samah pikaksan nutuh, nikwe nahme kadeheten. Ka ba isaksa nukamaxwan pivitit in hiyapka waditnevyenen.
117Uya parak abet nuhawkan kahadbe nahme isahptaw giwkis hiyeg mbayavye. Nahme kiyathanek pikumadukan avanenekwa.
118Pis tukuh madikte hiyeg ku pariye kane ihpekere pikumadukan, mmanawa gihiyekemnikis adahan kinisakanenwa.
119Hiyeg taraksavye ignes ta pit kewa igemnatbe adahan hawkri. Inneki keh nah batek akak pikannuhakni.
120He nah avis nah sagka ta pivetunat. Nah avise ku nah hiyapkisanek nutuh ku samah pikumadukan awna.
Nah kumadukasaw arit pikumadukan
121Nah kuwis keh ku pariye kabay hawata ku pariye wadit. Ka ba isaksa nuvetunyavu matekevunma.
122Akka nutuh ku inyewa pis avuriwhun, nah pibuk. Ka ba isaksa ignes hiyeg ku pariye kane batek pikak hiyapkiswima mbeyne nutuh, neras hiyeg ku pariye ikewnevwi ku igkisnewa kumaduka givitkis.
123Mataytak hewke tiyegem nah misakwa avuriwvarimpi adahan wahepne pis ayta amnihun, he nuwtyak mabip, adahan wahepne ini pamnihra ini kabayka ku pariye pis ikakse nutuh.
124Hiyapnanuba avigkutavrik pamnihra. Kannuhnanuba amin pannasan. Keh nah hiyak ku pariye pis.
125Keh nah humaw hiyekemniye, mmanawa nah pibuk. Numawkan nah pukuhpa pikannuhakni.
126Kiyavwiye Uhokri, kuwis danuh ahawkanavrik adahan pis hiyapkis pidatni, mmanawa pikumadukan in ka kiyathaka.
127Henewa nah batek akak pikumadukan mpiy ku samah nah batek akak karukri wahano.
128Inneki keh nah wew avigkutavrik ku samah pihiyekemni. Nah ka batek akak hiyakemniki ku pariye kane wadit.
Nah ihpekere piwn
129Pikumadukan in barewye kumadukaki, inneki keh nah ihpin avititakwa nuyakni.
130Ku aysaw piwn akkamnihka wot in uguh uhiyekemni, in kannuh hiyeg ku pariye kane hiyak hawkri.
131Nah ka aynsima aharit pikumadukan, kewa pahavwi hiyegbe ku pariye kane aynsima arabyu un.
132Ivegnaba numkanit akiw. Uya amnihun ku samah pihumpawan keh gikakkis hiyeg ku pariye batekyevwi pikak.
133Avuriwnanuba wadit, ku samah pikaksan nutuh, kahadbe mbayka ka kumadukevunma.
134Wiwhnanuba giwakutakkis neras ku pariye hiyapkisnevwi mbeyne nutuh kahadbe ik adahan nah ihpa pikumadukan!
135Iveganawnaba nutuh akak pabay, nah pibuk. Uya kannuhun amin pikumadukan!
136Nah suka nukantak ka aynsima awaku nawenyevwi hiyeg ka ihpekere pikumadukan.
Pikumadukan in waditye
137Pis waditye, Kiyavwiye. Pikumadukan in waditye.
138Inin pihiyekemni ku pariye pis ekke wotuh in madikte wadityenenwa.
139Nah kiyimwihwa ka aynsima, mmanawa nuvetunyavu ka aritnama ariw piwn.
140Kibeyne, in pikaksan in yuma kiniska nibet. Nah pibuk ka nubetkisima nikak.
141Nah tuwatasaw pitivut. Nah ka batekkan nukakan. Heneme nah ka miyeh ini pikumadukan.
142Pihiyekemni waditye in dahwa adahan avanenekwa. Pikumadukan in avanenekwa inyewa.
143Nah abet ka aynsima kiyimwiki, ka aynsima wakaymniki, heneme pikumadukan in kivunsan akak batekka.
144Inin pikannuhakni in waditnenekwa. Kehnaba nah pukuhpin, kahadbe nahme uti nudehetni.
Nah wew avigku pikumadukan
145Nah piriyepkaw pit avititakwa nuyakni. Kaytwanaba nuwnuh, Kiyavwiye. Nahme ihpanek pikumadukan.
146Nah ayap pit, uya amnihun! Nahme wewnek avigku pikumadukan.
147Kabeweke nah kannikaw adahan nah amnihswene pit, mmanawa nah ivegnenekwa avit pikaksan.
148Hewke tiyegem nah ka himak adahan nah ivegminene nuhiyekemni amin piwn.
149Timapnanuba, Kiyavwiye Uhokri, ku samah pamnihra nukakuh. Nukunehnaba nudatni akiw, ku samah pibetki.
150Neras mbayavye nuharaksetnivwi igkis danuhnene numkat, ignes hiyeg ku pariye kane ihpati piwn.
151Pisme, Kiyavwiye, kibeyne pis ay kennesa nuhumwa. Madikte pikumadukan in wadityenenwa.
152Ka kuyenema nah kannuhwa amin pikannuhakni. Pis ikepni adahan in dahwa adahan avanenekwa.
Amnihswaki
153Kiyavwiye, ivegnaba arimkanit nuhiyvan mbeyne. Uya amnihun, mmanawa nah ka miniw ariw pikumadukan.
154Paraknaba abet nuhawkan, hawata uya wiwhun ariw mbeyne. Nukunehnaba nudatni akiw, ku samah pikaksan nutuh.
155Hiyeg mbayavye pis ka amnihgikisnek, mmanawa igkis ka aritnama ariw pikumadukan.
156Kiyavwiye, pis ka pamnihrasima. Nukunehnaba nudatni akiw, ku samah pibetkiyavrik!
157Nuvetunyavu nuharaksetnivwi igkis ka aynsima, heneme nah ka miniw ariw pikumadukan.
158Ku aysaw nah iveg gimkatkis neras kinisekevutnevwi, nah ka nuwakemnisima, mmanawa igkis ka ihpa pikumadukan.
159Kiyavwiye, ivegnaba ku samah nah batek akak pikumadukan. Nukunehnaba nudatni akiw, awaku ku samah pamnihra.
160Madikte piwn in inyewa. Madikte pikumadukan in wadityekuye. In dahwa adahan avanenekwa.
Nah ka nubetkisima awaku pikaksan
161Neras ikivaratviyenevwi haraksan waditnevyenen, heneme nah kiyatha pikumadukan mpiynigkis.
162Pikaksan keh nah betek ka aynsima, kewa pahavwi hiyegbe ku pariye utevye igiska.
163Nah amiyha wasaymka, nah ka betek nikak aynesnima, heneme nah batek akak pikumadukan.
164Ntewnehkervut mpuse hawkri nah kabayhap, mmanawa pikumadukan wadityekuye.
165Neras ku pariye batekyevwi akak pikumadukan igkis uti ka aynsima pasamraki. Yuma ariknawnama keh igkis tuguh.
166Kiyavwiye, nah wahap pis amnihun, mmanawa nah wew avigkut pikumadukan.
167Nah ihpa pikumadukan, hawata nah batek nikak avititak nuyakni.
168Nah ihpa pikannuhakni akak pikumadukan, mmanawa pis hiyak madikte nukehni.
Nah ka miyeh pikumadukan
169Kiyavwiye Uhokri, numawkan namnihswan danuh ta pit. Ikinaba nutuh hiyakemniki ku samah piwn.
170Numawkan nuviryepkawni danuh ta pivetunat. Uya amnihun, ku samah pikaksan.
171Avanenekwa nah kabayhapnek, mmanawa pisnewa kannuhun amin pikumadukan.
172Nah paknek amin pikumadukan, mmanawa madikte pikumadukan in wadityekuye.
173Kiyavwiye, ba ayta ayavan avanenekwa, mmanawa nah kuwis kaniye wew avigkut pikumadukan.
174Kiyavwiye, ka aynsima nah muwaka pis amnihun. Ariwntak pikumadukan, nah uti batekka.
175Nukunehnaba nudatni akiw kahadbe nah ik adahan kabayhap. Numawkan pikannuhakni kawih adahan nayavetni.
176Nuwewni kewa pahavwi muwtohbe biyukwiye. Kiyavwiye, ba ayta iwevun nah pibuk, mmanawa nah ka miyeh pikumadukan.
Currently Selected:
Sawmus 119: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
