Sawmus 118
118
Kabayhaki adahan mataki
1Kabayhanabay Kiyavwiy Uhokri, mmanawa ig kibeyne hawata awaku gamnihra in dahawa adahan avanenekwa.
2Inneki keh, amawka madikte izhaewyenevwi awnanekuye:
“Gamnihra in dahwa adahan avenenekwa!”
3Hawata Uhokri gimuwvegavu, amawka igkis awnanekuye:
“Gamnihra in dahwa adahan avenenekwa!”
4Hawata neras ku pariye ihpenevwi giwn, amawka igkis madikte awnanekuye:
“Gamnihra in dahwa adahan avenenekwa!”
5Abetnewa nah kiyimwiye, nah amnihswe git Kiyavwiye. Igme timevun ig wiwhpen abetitak wakaymniki.
6Nah hiyak ku Kiyavwiye Uhokri ay nukakuh, inneki keh nah ka avis gibohrikis hiyeg. Igkis ka hiya nusamanak.
7Nah hiyak ku Kiyavwiye Uhokri ay nukakuh, ignewa ku pariye ayavan. Inneki keh nah hiyapnek nuvetunyavu gibiykemnikis.
8In kabayte wis kamaxwa givitit Kiyavwiye, mpinekata wis kamaxwa givititkis hiyeg amadgayavu. inin.
9In kabayte wis iveg givitit Kiyavwiye mpinekata wis iveg givititkis hiyeg kiyatyevwi.
10Nuventuyavu ku pariye kiyaraniwhpen igkis ka aynsima. Heneme akak Kiyavwiye Uhokri gidatni nah matekevgikis madikte.
11Nah misekwe kiyaran gikakkis, heneme giwavrik Kiyavwiye Uhokri nah matekevgikis madikte.
12Igkis ayta ivukwe numinuh ke ahayakbe kamabyanavye, heneme igkis bukahavepka madikte ta abetit tiket ke ah atawnibdibe huruhruvye.
13Igkis aytwe nuvitit akak madikte garewhankis, kaba nah hahwa, heneme, kibeyne, ig Kiyavwiye Uhokri ayavevun.
14Ig Kiyavwiye Uhokri ike nawaygi akak nudatni; hene ig amnihpen.
15Timapnay kabimanka akak batekka avititak paytwempu, Uhokri gihiyegavu givinkis:
“Kiyavwiye Uhokri gidatni kehe wixwiy mataka kerka.
16Akak gidatni ig kehe ka aynsima barewyevwi annut. Kiyavwiye Uhokri gidatni kehe wixwiy mataka kerka.”
17Nah ka miyanek, heneme nah aymuhwanek adahan nah kinetihwene amin ku pariye Kiyavwiye Uhokri gikehni.
18Ig waditevun akak madikte ahawna, heneme ig ka isaksa adahan nah miya.
19Wokanay nudahan Uhokri givin, kahadbe nahme parak atere adahan kabeyhene Kiyavwiye.
20Atere igkisnenwa hiyeg ku pariye ihpenevwi giwn ik adahan mpiya.
21Kiyavwiye Uhokri, nah kabeyhekere pis atere, mmanawa pis ayavevun pis kehe nah isahptaw.
22Hiyeg kehne paha payt tiptiye, igkis tukuhe pahow tip. Givewkankiskam ku egu tip ka kawihkam. Bawa egu tip eg pi awaygtenano ariw madikte. Eg humaw adahan payt akoksa.
23Igwa Kiyavwiye Uhokri ikaksig hene. In kabayntiwa wotwiy ig kehgu hene.
24Inin hawkri igwa Kiyavwiye Uhokri ahegbetin hene, nikwe uyay batek uminwiy, uyay fetya gidahan.
25Uya amnih usuh, Kiyavwiye, uya amnih usuh! Kannikasaba usuh akiw, Kiyavwiye Uhokri!
26Uhokri gabaynek gikak ner ku pariye ayta giwavrik Kiyavwiye Uhokri!
Ig amavakanek akak Uhokri gabay ay givineku Kiyavwiye Uhokri.
27Kiyavwiye ignewa Uhokri; ignewa uguhwiy akak gibutni.
Akak ahamna yiwaku, amavanig akak fet, wewnay aranwavrik kakanhawket.
28Kiyavwiye, pisnewa nuwohkiga. Inneki keh nah kabayhap, nah awna amin pikiytani.
29Kabayhanabay Kiyavwiye Uhokri, mmanawa ignewa kibeyne hawata awaku gamnihra in dahwa adahan avanenekwa.
Currently Selected:
Sawmus 118: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
