Sawmus 116
116
Uhokri amnih ariw miyaka
1Nah batek gikak Kiyavwiye Uhokri, mmanawa ignewa timavun. Ignewa ataybiswa arimkanit nuviryepkawni.
2Ignewa timavun avanenekwa ku aysaw nah kabiman adahan amnihswene git.
3Miyaka ateyni kaba matekevun. Nah avisaseu ka aynsima abohri imewti. Nuwakemni keh nah biyuk nukan.
4Ayteke nah hiyapni hene, nah kabiman git Kiyavwiye. Nah awna git: “Kiyavwiye Uhokri, nah amnihswa pit: Uya wiwhun ariw inin mbeyne!”
5Ig Kiyavwiye ka gabaysima. Ig waditye hiyeg. Ig uwohkigawiy ka gamnihrasima ukakwiy.
6Ig Kiyavwiye mpithamni hiyeg yumanene gawaygi. Ku aysaw nah aynte abet mbeyne ig amnihpen atere.
7Nukamaxwan ta givitit Kiyavwiye, mmanawa ignewa ka gabaysima nukakuh.
8Kiyavwiye Uhokri wiwhpen ariw miyaka. Ig manwotevun ariw nukantak, hawata ig amnihpen ariw miyaka ateyni.
9Inneki keh nah wewnek givetun Kiyavwiye Uhokri wadit, ay gibetkis hiyeg ivegnenevwi.
10Hiyawa nah awna: “Nah kuwis hahwa.” Akak ini nah kamaxwenene.
11Hawata nah ka biyuksa nukamaxwan, hiyawa nah awna ka akakma ivegminaki hiyakemniki: “ka ik adahan wis kamaxwa givit pahavwinema.”
12 Nikwe pariye kuri nukannuh git Kiyavwiye Uhokri adahan madikte ini kabayka ku pariye ig kehe nudahan?
13Nah ewknek win adahan nukannuh git Kiyavwiye adahan kabeyhene giw ku samah ig amnihpen.
14Abet givahdukawnikis madikte gihiyegavu nah ikinek git ku pariye nukaksan git.
15Gitkis hiyeg kamaxwenevwi, ku aysaw pahavwi miya gibetitakkis Kiyavwiye Uhokri gihiyegavu in kabaykanenwa gidahan, gitme Kiyavwiye, ig pisenwe gannivwi amadgatak hawkri.
16Kiyavwiye, nah pibuk. Nah wew pikak ku samah minikwak nnaguh wew pikak. Pisnewa amnihpen ariw miyaka.
17Nah kakanhawnek pit adahan pikatiwnihpitni. Abet nuviryepkawni nah awnanek pikak.
18-19Abet givahdukawnikis madikte pihiyegavu, ay avetun pivin aynte Jerusalém, nah ikinek pit ku pariye nukaksan. Kabayhanay Kiyavwiye Uhokri!
Currently Selected:
Sawmus 116: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
