Sawmus 115
115
Kabayhaki git igyewa Uhokri
1Kiyathasanaba pisnenwa, Kiyavwiye Uhokri, pisnenwa, ka ba usuhma, amawka pisnenwa kiyathaka awaku pamnihra hawata awaku pis inyewa.
2Mmahki neras nawenyevwi hiyegviyenevwi givewkankis ayapta usuh: “Kitwiki yiwohkiga?”
3Usuhme kaytwa: “Ig uwohkiga aynte inurik; ayteke ig wewkis hawkri ku samah gimawkan.
4Igkisme giwohkigavukis nawenyevwi hiyegviyene igkis kehka akak karukri seyno hawata akak karukri wahano, igkis kehka gavitkis awaykemni.
5Kadahan gibiykis, heneme igkis ka awna; kadahan giwtyakkis, heneme igkis ka hiyap.
6Kadahan gitaybikis, heneme igkis ka timap; kadahan gikigkis, heneme igkis ka ayh.
7Kadahan giwakkis, heneme igkis ka kamax; kadahan gikugkukis, heneme igkis ka wew. Hawata igkis mown.
8Neras ku pariye gibetketnikis hawata ku pariye gikiyathetnikis, igkis misekwebdinek hawata kewa ignesbe ahehpati bataka ka hiyak arikanawnama.
9Izhaewyenevwi, kamaxwanabay givitit Kiyavwiye Uhokri! Ignewatbaki wayavetniwiy hawata umaptentenwiy.
10Uhokri gimuwvegavu, kamaxwanabay givitit Kiyavwiye! Ignewatbaki wayavetniwiy hawata umaptentenwiy.
11Kamaxwanabay givitit Kiyavwiye, madikte yis ku pariye ihpenevwi giw! Ignewatbaki wayavetniwiy hawata umaptentenwiy.
12Ig Kiyavwiye Uhokri kiye wixwiy, ig ikinek kabayka wotwiy; ig ikinek kabayka gitkis gihiyegavu izhaewyenevwi hawata gitkis madikte gimuwvegavu, Arawh gihiwhivwi.
13Ig ikinek kabayka gitkis madikte ku pariye ihpenevwi giwn, neras ku pariye kiyatyevwi payak gikakkis neras ku pariye ikaka yumanene gikiytanikis.
14Numawkan Kiyavwiye Uhokri ikinek yit ka aynsima yikamkayuvwi, hawata yihiwhivwi ka aynsima gikamkayuvwikis.
15Numawkan sarayhka ka aynsima kabayka yivitit gavit Kiyavwiye, ku pariye kehe inurik akak waxri.
16Inurik in gidahannenwa Kiyavwiye, heneme waxri ig ikepni gitkis hiyegviyenevwi.
17Hiyeg miyaravye, ku pariye muhuk arimkanit miyaravye giwetrikis, ignes ka kabayha Kiyavwiye Uhokri akiw.
18Heneme wixwiy, ku pariye ivegnete, wixwiy ik adahan kabayha Kiyavwiye Uhokri kuri hawata adahan avenenekwa. Kabayhanay Kiyavwiye Uhokri!
Currently Selected:
Sawmus 115: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
