Markus 8

Jesus iki im ta gitkis hiyeg akiw

Mt 15.32

1Ayteke abetnewa ini hawkri ka aynsima hiyeg pahadguhwe atere git Kiyavwiye Jesus akiw. Ku samah igkis ayge timepne giwn, avim ini gimanakis madike. Ig Kiyavwiye Jesus hiyapni hene, ig pahadguhe gikannuhnivwi ta gimkanit. Ig awna gitkis:

2— Neras hiyeg kuwis misekwe ay ukakwiy mpana hawkri. Gimanakis madike kuwis. Nah wakaymni gidahankis.

3Nah ka muwaka awahkisgikis ta givinwatkis akakma mativwa. Nawenetke igkis tuguhenek pakwa ahin awaku mabimnaki. Mmanawa gaytakis ayta aytontak piyawakad.

4Igkisme gikannuhnivwi ayavgi:

— Mmah awitwak wotwiy bugut gidahankis ay amadga inin amatap?

5Igme Kiyavwiye Jesus ayavgikis:

— Aysaw akebi bugut yis kadahan?

Igkisme kaytwa giwn:

— Usuh kadahan ntewnehkerbu akebi.

6Ayteke nikwe ig Kiyavwiye Jesus keh neras hiyeg batahkiswa waygborit. Ku aysaw kuwis igkis batebdebdihpikis, ig iwe ini ntewnehkerbunene bugut, ig kabayha Kiyavwiye Uhokri adahan ini. Ayteke ig sigkabdihavepni, ig ikepni ta gitkis gikannuhnivwi. Igkisme ibekhepni givuwiwkis neras hiyeg.

7Igkis kadahan aynesa im nopsanyovwi masaraku hawata. Igme Kiyavwiye Jesus kabayha Kiyavwiye Uhokri adahan ini. Ayteke ig ibakhasin ta gitkis gikannuhnivwi.

8Ignesme neras hiyeg ax kabihribdave. Ka aynsima asemne misekwe. Pisenwa nikwe igkisme Jesus gikannuhnivwi ahiwavepni. Igkis kivunse ntewnehker akebi panye akak asemne gimanakis.

9 Igkis neras hiyeg ka aynsima gikebikis. Kaba danuh paxnika mil (4.000) gikebikis. Pisenwa nikwe ig awahkiswigkis diyuhe tahan givinwatkis.

10Ayteke ig katapte muhumdakat gikakkis gikannuhnivwi, ig tivik ta avitit Dalmanutamnaw.

Farizewkis kehkis annut git Jesus

Mt 12.39, 16.1; Lk 12.54

11Ig danuh atere, gaytakis neras farizewkis danuh atere git Kiyavwiye Jesus adahan gihikekten. Igkis kehkis git annut inuriktekne adahan areketni gidatni gitkis kahadbe igkis hiyakgi ba ig ayta giwntakwatma Kiyavwiye Uhokri.

12Igme Kiyavwiye Jesus hiyapni hene, ig kahekanaw avititak giyakni, ig awna gitkis:

— Aa, yis hiyeg amadgayavu hawkri. Mmahkay yis kehkis annut nutuh adahan areketni nudatni yit? Nah ka keh pahatnema annut yidahan. Ihanabay inakni nuwnuh. Henewatbaki in.

13Ig awna inakni, ig tivik ikiswigkis. Ig katapte muhumdakat akiw, ig tivik pahabakat mahakwa.

Farizewkis gihiyekemnikis kewa bugut abusanbe

Mt 16.5

14 Igkisme Kiyavwiye Jesus gikannuhnivwi tivik gihapti. Heneme igkis miyehe ewk bugut ayta gihaptikis. Pahatwowa bugut ayge amadga gihmunkis.

15Ayge ig Kiyavwiye Jesus kavusa iki gihiyekemnikis. Ig awna gitkis:

— Avuriwnabay, pukuhpawnabay abohri ini bugut abusan gidahankis neras farizewkis. Pukuhpawnabay hawata abohri ini bugut abusan gidahan ner hiyaptigi Erodis.

16Igkisme timapni hene, igkis kinetihwa pawtak amin inakni giwn. Igkis awna:

— Ig awna inakni awaku wixwiy ka ewk bugut ayta uhaptiwiy.

17Igme Kiyavwiye Jesus timapni hene, ig awna gitkis:

— Mmahpaki yis yivewkan ku nah awna inakni awaku yis yuma yibuguta? Mmah yis kote pukuhpate ku nah ka kiyimwihwa aharit naxni? Mmah yihiyekemni pet?

18Yis kowtyak heneme yis ka hiyap ku pariye inyewatnene. Yis kataybi heneme yis ka timap ku pariye hiyakemniki inyewatnene. Mmah yis kuwis miyehe 19ku samah nah kuwis ibakhase pohowkunene bugut givuwiwkis pohowku mil (5.000) gikebikis hiyeg? Aysaw akebi panye yis kivunse akak ini bugut asemne avim ini?

Igkisme kaytwa giwn:

— Usuh kivunse madikawku akebi panye akak pisaya arawna (12).

20Igme awna:

— Hawata akiw ini ntewnekerbunene bugut ku pariye nah ibakhase givuwiwkis paxnika mil (4.000) gikebikis hiyeg. Aysaw akebi panye yis kivunse akak ini bugut asemne avim ini?

Igkisme kaytwa giwn:

— Usuh kivunse ntewnehker akebi panye.

21Igme awna gitkis:

— Mmah yis kote pukuhate inakni nuwnuh?

Ig awna inakni awaku farizewkis gihiyekemnikis ik adahan wagesbeta uhiyekemni mownye hawata ku samah bugut abusan tukugasa bugut.

Jesus makniwa pahavwi motviye

22Ayteke pisenwa igkis danuh ta avitit paytwempu Betsayda. Ayge hiyeg waxwe pahavwi motviye ta git Kiyavwiye Jesus. Igkis aya git:

— Kiyavwiye, uya amnihgi sarayh piwak givitit kahadbe ig makniw.

23Igme Kiyavwiye Jesus sumuh ner motviye giwaku, ig itukevgi avawyewa ariw paytwempu. Igkis danuh atere, ig tuves ig manotig akak gaybi. Ayteke ig sarayh giwak givitit. Pisenwa ig ayavgi:

— Mmani? Ba pis hiyap?

24Igme kannikase gitew, ig iveg. Ig awna:

— Nah hiyap hiyeg heneme nah hiyavgikis henenwa ke ahavwibe akat waywempi.

25Ig Kiyavwiye Jesus timapni hene, ig daxe giwtyak akiw. Ayteke ig awayg padukise givegi kabayntiwa. Ig makniw. Ig hiyap madikte huwewe.

26Igme Kiyavwiye Jesus awahkiswig diyuhe wade givinwat. Ig awna git:

— Ka ba mpiya avuwiw paytwempu.

Igme tivik.

Pedru ikiy Jesus ku ig Uhokri gikanyan adahan ukumaduketniwiy

Mt 16.13; Lk 9.18

27Ayteke ariwnteke ini ig Kiyavwiye Jesus tivik gikakkis gikannuhnivwi. Igkis danuh ta avitit waxri kennesa amun paytwempu kewye “Sesareya gidahan Kiyavwiye Filip”. Ayge avigku ahin ig aya gikannuhnivwi. Giwn:

— Pariyeki givewkankis neras hiyeg ikanuh nah kuri?

28Igkisme kaytwa giwn:

— Gaytakis hiyeg ikapi ku pis Joawh Batistamni kannikew akiw. Gaytakisme ikapi ku pis amekene Eliyas. Igkisme gaytakis hiyeg ikapi ku pis pahavwi gaytakis Uhokri gawnevevu pitatyevwi.

29Igme Kiyavwiye Jesus timapni hene, ig awna gitkis:

— Ya yis. Mmahpa yis ikanuh kuri?

Igme Simawh Pedru kaytwa giwn:

— Pis Cristo pis Uhokri gikanyan adahan ukumaduketni.

30Igme Kiyavwiye Jesus awna gitkis:

— Henewa. Heneme ka yi muwaka akka inakni ta gitkis hiyeg kuri.

Pedru mpithevye Jesus ariw gimiremni

Mt 16.21

31Ayteke ariwnteke ini, ig Kiyavwiye Jesus kavusa akkamnih gitkis gikannuhnivwi huwewe amin ku pariye nehmnikuhpiye git. Ig awna gitkis:

— Nah ku pariye wageswe hiyeg amadgaya inin amawka ku nah hiyap mbeyne ka aynsimanek ay amadga inin. Aysawnemenek neras uwewkistenwiy gikakkis muwveg kiyatyevwi gikakkis neras kannuhekevutnevwi, igkis madikte tukuhptevunek. Ayteke nah umehpikanek. Heneme abet amamnampiye hawkri ariwntak numiremni nah kannikaw akiwnek.

32Ig akkamnih inakni gitkis huwewe. Igme Pedru timapni hene, ig wewkiswa gikak atakesa aynesa adahan ig awnene gikak. Ig awna:

— Kiyavwiye, ka muwaka awna inakni hene.

33Ig awna inakni hene, igme Kiyavwiye Jesus wagese giduhya gimkat, gihepka hanpa gimkatkis gikannuhnivwi. Ig himehe Pedru. Ig awna git:

— Pes ayteke, Satanas. Pedru, pis ka awna inakni akakma Uhokri gihiyekemni. Pis awna akak gihiyekemnikis hiyeg amadgayavu inin.

Amawka wixwiy miyeh uvitwiy amadgaya inin

Mt 10.36, 16.24; Lk 9.23, 14.25; Jo 12.26

34Ayteke ig Kiyavwiye Jesus pahadguhe ka aynsima hiyeg gikakkis gikannuhnivwi. Ig awna gitkis:

— Ku pahavwi humewkerevye nuhiyega, amawka ku ig ikise gidahan gibetki. Amawka ku ig umahkise gihiyekemni amadgaya inin ke wotbe ig daddahkiswinbe ta aminat ah. Amawka ku ig ikaw hawata ke nahbe.

35Mmanawa pahavwi ku pariye kiye givitnen, igi biyuknek giw Uhokri adahan avanenekwa. Pahavwime ku pariye miyehe givitwa nudahan adahan ig ekkene nnetni gitkis hiyeg, igi aymuhwanek gimun Uhokri adahan avanenekwa.

36Ku pahavwi darih madikte igiska amadgaya inin heneme ku ig biyuke giw Uhokri, amun ini nikwe ini igiska waditnevyenen gidahan.

37Yuma ariknawnema igiska ik adahan kawenyana pahavwi gaymahwan gimun Uhokri akiw.

38Mmanawa aysawnemenek Nah, ku pariye wageswe awayg amadgaya inin, nah aytanek gikak Wigwiy gikiytani gikakkis ahj barewvityevwi. Avim ini nah marekevwe gikakkis hiyeg ku pariye marekevwevye nukakuh gikakkis hiyeg ku pariye marekevwevye akki nuwnuh ta gitkis hiyeg. Hiyeg amedgenevwi inin igkis kuwis isahkiswe giw Uhokri. Igkis mbeyevye gihiyekemnikis. Ka yi muwaka mara gibohrikis.

Currently Selected:

Markus 8: pluPB

Highlight

Copy