Matews 26

Jesus givetunyavu ahegbeteviye ginetnikis adahan giwmasepten

Mk 14.1; Lk 22.2; Jo 11.47

1Pisenwa gawnan inakni, ig Kiyavwiye Jesus awna ta gitkis gikannuhnivwi akiw. Giwn:

2— Yis hiyakni ku pineme hawkri misekwevye adahan uvetrawiy ay Jerusalem adahan wixwiy hiyeg judeyenevwi axne muwtoh arih. Wixwiy axni adahan kiyene ku samah minikwak Uhokri umahkise muwtohyan gidukwenavrikkis amekenegben adahan ig giwiwhkiswitnikis giwakutakkis givetunyavukis. Ayge abet ini fet nah, ku pariye wageswe awayg amadgaya inin, nah kamaxwikanek adahan nah deddehpika aminat ah.

3Avimwata ini ku samah ig Kiyavwiye Jesus awnempiye inakni iwit, neras muwveg kiyatyevwi gikakkis neras judeyenevwi giwewkistenkis igkis pahadguhwe givinekut ner muwvegviyene gikivarakis kewye Kayfás.

4Ayge igkis ahegbeteviye ginetnikis igkiswonas. Igkis awna:

— Amawka ku wixwiy umahkise Jesus. Uyay kamaykiswig mownye ku aysaw ig ka wahapnima.

5Heneme igkis awna:

— Ka ik adahan wixwiy kamaykisgi abet fet. Awaku nawenetke hiyeg fetyavu kannikawbetnek utivutwiy givatra.

Pahavu tino imiha Jesus

Mk 14.3; Jo 12.1

6Igme Kiyavwiye Jesus kuwis avit paytwempu Betaniya ku pariye kennesa arimkat Jerusalem. Ig ayge givineku Simawh, ner ku pariye minikwak axpusakare gavit busukne.

7Pahaye, pahavu tino danuh atere git akak imihgi ariku paha atiy kehka tip seyno. Ini imihgi ka nitiwnisima. Eg tino dimukwin ta gitewharit Kiyavwiye Jesus ku samah ig axempiye.

8Igkisme gikannuhnivwi hiyapni hene, igkis dagawne. Igkis awna:

— Mmahki inin imihgi he sarayhpikanen waditnevyenen hene?

9Kiskama inin imihgi piyukwikankam adahan ka aynsima karukri. Inmekam akakuravik, ibekhepkankam givuwiwkis madiptavye.

10Igme Kiyavwiye Jesus hiyapni hene, ig awna gitkis:

— Mmahki yis mbeyhene nor tino gutew hene? Ka ba yis hiyap eg kehno ka aynsima kabayka nukakuh?

11Ik adahan avanenekwa yis kehnenekwa kabayka gidahankis madiptavye. Heneme nahme ka misekwevyema yibet avanenekwatma adahan yis kehne kabayka nukakuh.

12Eg numihetni adahan nahegbetepten adahan nah avuhpiki.

13Aysawnemenek ku aysaw hiyeg ekkenenek kibeyne inetit numinuh muwapuw amadga inin, amun ini ginetnikisnek ignes kinetihwanek amin inin kabayka ku pariye eg keh nukakuh. Inin gukehni misakwa akiwka akiwkanek. Ihanabay inakni nuwnuh. Henewatbaki in.

Judas Iskariyotis ahegbeteviye ginetni adahan kamaykiswiye Jesus

Mk 14.10; Lk 22.3

14Igme pahavwi gaytakis giwatnivwi, ig Judas Iskariyotismin, ig timapni hene, ig awna ginaktin:

— Kuri nah kamaykiswigte.

Ig tivik ta gimkanitkis neras muwveg kiyatyevwi.

15Ig danuh atere, ig awna gitkis:

— Aysamuk yis katiwnihun adahan nah ikevgi ta yiwakurit?

Igkisme timapni hene, igkis katiwnihpig mpanamku madikwa (30) karukri wahano seyno.

16Ayteke ariwnteke ini ig Judas gihavumpi Kiyavwiye Jesus adahan gikamaykiswitni.

Iwetrit ahegbet adahan Jesus fetya gikakkis giwatnivwi

Mk 14.12; Lk 22.7

17Ayteke ariwnteke ini pitatye hawkri danuh adahan ini fet adahan hiyeg axne muwtoh arih akak bugut miyegbiye adahan kiyene ku samah minikwak Uhokri umahkise muwtohyan gidukwenavrikkis gihiyegavu. Ayge nikwe gaytakkis Kiyavwiye Jesus gikannuhnivwi danuh ta git. Igkis ayavgi:

— Kiyavwiye, kineyva pimawkan adahan usuh ahegbeta pahavwi muwtoh adahan waxniwiy abet uvetrawiy?

18Igme kaytwa giwnkis:

— Ataknay ta paytwempuwit Jerusalém. Ayge yis patiptaknek gikak pahavwi awayg. Awnanay ta git ku yikannuhten awna: “Nuhawkanavrik me danuhmet. Nuvewkan nah axne muwtoh arih ay pivinneku payak gikakkis nukannuhnivwi.”

19Igkisme gikannuhnivwi timapni hene, igkis ihe giwn. Ayge nikwe igkis tivik ahegbete madikte adahan igkis fetya axne muwtoh arih. Pisenwa igkis diyuhe akiw.

Jesus akki ku pariye gikamaykiswitninek

Mk 14.17; Lk 22.21; Jo 13.21

20Aygete igkis atere fetya. Igkis danuh, ig Kiyavwiye Jesus batahkiswe aranwa axtet gikakkis giwatnivwi madikawkunene gikebikis gikakkis piyananene gawnakis (12).

21Ayge abetnewa axka, ig Kiyavwiye Jesus awna gitkis:

— Pahavwi yaytaknek ay igi kamaykiswennek ta gitkis nuvetunyavu. Ihanabay inakni nuwnuh. Henewatbaki in.

22Igkisme giwatnivwi timapni hene, igkis wakaymnibdi ka aynsima. Igkis awnebdi pahavwimpi:

— Kiyavwiye, ku ka nahma kamaykiswepnek?

23Igme Kiyavwiye Jesus kaytwa giwnkis:

— Ner ku pariye mehbetene bugut nukakuh amadga paheknene miruk ignebaki nukamaykiswitninek.

24 Nah, ku pariye wageswe awayg amadgaya inin, nah umahkiswenek ku samah Uhokri gannasan kinetihwa numinuh. Amawka ku nah miya, heneme ner ku pariye nuwmasepten nah, ku pariye wageswe awayg amadgaya inin, igi hiyap mbeynenek ka aynsima nuvatra! Ka kiskama ner awayg humaw amadga wayk.

25Ayteke igme Judas Iskariyotismin, ner kamaykistinene Kiyavwiye Jesus, ig awna ta git:

— Kiyavwiye, ku ka nahma kamaykiswepnek?

Igme Kiyavwiye Jesus kaytwa giwn:

— Henewa ku samah pis awna.

Jesus kiyekiswa gitkis giwatnivwi

Mk 14.22; Lk 22.15; 1Ko 11.23

26Ku samah igkis axnene ayge, ig Kiyavwiye Jesus iwe pahak bugut. Ig kabeyhe Uhokri. Ayteke ig sigkebdihe ini bugut, ig ibekhepni givuwiwkis giwatnivwi. Ig awna gitkis:

— Ahah. Inin bugut in nihuh yidahan. Amavaniy, axnay niwntak.

27Pisenwa gibakhan ini bugut, ig iwe pohow higeptet. Ig kabeyhe Uhokri. Ayteke ig mpiyase egu higeptet givuwiwkis giwatnivwi. Ig awna gitkis:

— Higapnay niwntak, yis madikte. 28Mmanawa inin win in numiguh yidahan. Ig Uhokri ahegbete ginetni nukunewa akiw gikakkis hiyeg adahan ku samah ignes humaw gihiyegavu. In sukasekpa gidahankis ka aynsima hiyeg kahadbe ini gahegbetawni in humaw, hawata kahadbe Uhokri bayahminigkis ariw gitaraksankis. 29Kuri nah ka takunima higap win ay amadga inin akiw, nekwa aynte amun Wigwiy gikumadukan nah higapnek nukunewa win yikak akiw. Ihanabay inakni nuwnuh. Henewatbaki in.

30 Ayteke pisenwa gihigvankis igkis pekenekis avat. Ayteke igkis tivikwiye avitit ini waxri imuwvitnene kewye Olivegvit.

Jesus akki git Pedru ku igme wihwenek giw

Mk 14.27; Lk 22.31; Jo 13.36

31Ayge ig Kiyavwiye Jesus awna gitkis gikannuhnivwi:

— Ku avim inin tiyegem yis madikte ikiswennek awaku inin mbayka ku pariye me danuhmet nutuh. Mmanawa Uhokri gannasan kinetihwa hene. In awna:

“Nah umahkisenek ner muwtohvutne, igkisme givigvu muwtoh ibekhewbetnek madikte.”

32 Nah umehpikanek, heneme nah kannikawnek akiw. Ayteke ariwntak nukankawninek nah tiviknek yavit pitati ta avitit Galileyamnaw.

33Igme Pedru timapni hene, ig awna git:

— Hiyawa madikte hiyeg ikiswepnek, nahme ka ikispiti.

34Igme Kiyavwiye Jesus kaytwa giwn:

— Ku avim inin mitipka pis wihwe nuwhunek, pis awna ku pis ka hiyakun. Avit takarak awna pahaywowa gawnan pisme ayipa wihwe nuwhunek mpamavut. Ihanaba inakni nuwnuh. Henewatbaki in.

35Igme Pedru kaytwa giwn akiw:

— Hiyawa nah miya payak pikak, heneme nah ka awnatinek ku nah ka hiyakpi.

Hawata madikte igkis gikannuhnivwi awnenekuye henep ke inaknibe.

Jesus piriyepkaw aynte Jetsêmani

Mk 14.32; Lk 22.40

36Ayteke ig Kiyavwiye Jesus tivik gikakkis gikannuhnivwi ta avitit paha iwetrit kewye Jetsêmani. Igkis danuh atere, ayge ig awna gitkis:

— Batnay ay in. Nahme tahan piriyepkewne.

37Ig wiye Pedru gikakkis piyananene gikebikis Zebedew gikamkayuvwi tivik gihapti. Igkis wewkiswe atakesa, ayge igme kavusa wakaymni. Ig kayah avititak giyakni. Ig ka daykiswekere arit ini patahwaki ku pariye me danuhmet git.

38Ig awna gitkis:

— Nah wakaymni mpiynevevye avit nuyakni. Ini nuvewkan umehpen pahayewvi. Nah tahan piriyepkawte. Yisme misakwa ay. Misakwanay avuriw adahan yis piriyepkaw payak nukakuh.

39Ayteke ig wewkiswe atakesa aynesa. Ig mabukwe ta waykborit. Ig piriyepkaw ta git Uhokri. Ig awna:

— Niguh, ba hiya pisma mpitha ini mbeyne danuh nutuh? Ku pis mpithekere, uya amnihun mpithin nudahan. Heneme ku in pimawkanwa in danuh nutuh, ka sam in danuh nutuh. Nah ka kehkere nudahan nubetki. Heneme nah kehkere pidahanwa pibetki.

40Ayteke pisenwa giviryepkawni ig diyuhe ta gitkis gikannuhnivwi mpananene. Ig utevgikis himekweke. Ig hiyapni hene, ig awna ta git Pedru:

— Mmah yis ka hiya yisma misakwa avuriwnema payak nukakuh aynesnima?

41Avuriwnabay, piriyepkawnabay adahan yis ka isaksaw arit mbayka. Yitip ka isaksawkere arit mbayka, heneme yivitme amadgaya inin ik adahan isaksaw arit mbayka mmanawa yis yuma yawaygisima nitivut.

42Pisenwa gawnan inakni, ig diyuhe aterewata akiw. Ig piriyepkaw ta git Uhokri akiw. Ig awna:

— Niguh, ku pis ka mpitha inin mbeyne nudahan, ku in pimawkanwa in danuh nutuh, ka sam. Hiyawa pis keh ku samah pibetki nukakuh.

43Pisenwa ig diyuhe akiw. Ig ute gikannuhnivwi himekweke mmanawa igkis ka aynsima isevwe.

44Ayteke ig diyuhe aterewata akiw. Ig piriyepkaw amamnavutni akiw, inwata giviryepkawni.

45Pisenwa ig diyuhe akiw ta gitkis gikannuhnivwi. Ig awna gitkis:

— Mmahkay yis he himeknenenwa? Mmahkay yis he mayeknenenwa? Sarayhnay yivegyi tahan. Kuwis danuh nuhawkanavrik. Kuri nah, ku pariye wageswe awayg amadgaya inin, nah me ikepkamet giwakuritkis hiyeg taraksevye.

46Kannikawnay. Uyay tivik. Ivegnay! Ig nukamaykiswitni nehmnik.

Jesus kamaxwika

Mk 14.43; Lk 22.47; Jo 18.3

47Ku samah ig Jesus awnempiye inakni iwit, igme Judas Iskariyotismin danuh atere giharit. Ig pahavwi gaytakkis giwatnivwi. Ig danuh atere akak pahabunad hiyeg. Igkis kiyakwokmine akak iwan hawata akak gisugakis. Igkis iwatit gidahankis neras muwveg kiyatyevwi gikakkis neras judeyenevwi giwewkistenkis.

48Ig Judas Iskariyotismin ayipa ahegbet ginetni gikakkis adahan ku samahpa ig gekkepten Kiyavwiye Jesus ta gitkis. Ig awne gitkis:

— Ku yis hiyap nah ayhpoka pahavwi, ignewatbaki Jesus. Kamaxwinig.

49Ayteke nikwe ig Judas Iskariyotismin tivik wade gimkat Kiyavwiye Jesus. Ig danuh git, ig awna git:

— Uhokri gabay pikaknek, Kiyavwiye.

Akak ini ig ayhpokig.

50Igme Kiyavwiye Jesus kaytwa giwn:

— Nukagmada, hiyawa pis keh ku pariye pis kehkere nukakuh.

Nerasme pahabunene hiyeg igkis hiyapni hene, igkis sigise gimin, igkis sumuhpig, igkis kamaxwig.

Pedru ihuk pahavwi awayg gitaybi

Mk 14.47; Lk 22.50; Jo 18.10

51Aynewa pahavwi gaytakkis neras ku pariye aygnenevwi gikak Kiyavwiye Jesus ig kehe giwana. Ig huwivwihe pahavwi ibukti gidahan ner muwvegviyene gikivarakis. Ig hiwhe gitaybi.

52Igme Kiyavwiye Jesus hiyapni hene, ig awna git:

— Paris piwana ta pibutikminat. Mmanawa madikte hiyeg ku pariye umehekne akak iwan, akakwata iwan igkis umahkanek.

53Mmah pis ka hiyaknima ku, wake nah ayavasawbe ta git Niguh, ig awahkiskam numinuh kurinewatkam ka aynsima ahj adahan numaptenten?

54Heneme, amun inikam, mmahpaki kahayak avigkutavrik ku samah Uhokri gannasan kinetihwa numinuh?

55Ayteke ig Kiyavwiye Jesus awna ta gitkis neras pahabunene hiyeg ayge. Ig awna:

— Mmahkay yis ayta akak madikte yiwana akak madikte yasuga? Mmahkay yis ayta nukamaxwitni ayamaw ke wotbe nah amepyebe? Takunipti nah ay yikak yikannuhten ariku Uhokri Givin. Heneme yisme ka kamaxun ayge.

56Ka sam. Madikte inin danuh hene kahadbe in kahayak avigkutavrik ku samah Uhokri gawnevevu pitatyevwi kinetihwa amadga Uhokri gannasan.

Igkisme gikannuhnivwi timapni hene, igkis madikte tivikbet giw. Igkis ikiswig pahapo.

Jesus ay givetunkis muwvegviyenevwi gikivarakis

Mk 14.55; Lk 22.66; Jo 18.12

57Ayteke nikwe neras ku pariye gikamaxwitnivwi Kiyavwiye Jesus igkis waxwevgi ta givinekut Kayfas ner muwvegviyenevwi gikivarakis, ku kiney neras kannuhekevutnevwi amin amekene Moís gikumadukan gikakkis neras judeyenevwi giwewkistenkis ignes kuwis pahadguvu ayge.

58Igme Pedru hiyapni hene ku samah ig Kiyavwiye Jesus iwepka atere, ig makeke gihavu butte, heneme ig piyawakte giw aynesa. Ig danuh ta arimkanit muwvegviyenevwi gikivarakis givinbuku. Ig pareke atere, ig batahkiswe payak gikakkis neras avuriwnevwi Uhokri Givin. Ig adahan hiyepne ku pariye danuh ta git Kiyavwiye Jesus.

59Avimwata ini neras muwveg kiyatyevwi igkis pahadguvu gikakkis madikte judeyenevwi gikivarakis adahan aharitnes Jesus gikehni, adahan igkis giwmasepten. Igkis aharitnes ba igkis uti hiyeg ku pariye gikamyehpitnivwi he akak wasaymkanen. Amawka igkis uti gikamyehpitnivwi ku pariye giwnkis tuguh hehpekuye.

60Heneme igkis ka uti. Hiyawa ka aynsima hiyeg kamiyhevgi akak gikehbetankisnen, heneme giwnkis ka tuguhak hehpekuyema. Ayteke metakwa piyana gikebikis kannikaw adahan gikamiyehpitni akiw.

61Igkis awna:

— Ner awayg awna: “Ik adahan nah mehbete inin leglis Uhokri Givin. Ayteke nah kannikasin akiw adahan mpana hawkri.”

62Igme muwvegviyene gikivarakis ig timapni hene, ig kannikaw. Ig awna git Kiyavwiye Jesus:

— Mmahki pis ka kaytwa giwnkis? Mmah henewatma ku samah igkis awna pimin?

63Igme Kiyavwiye Jesus tinwo. Igme muwvegviyene gikivarakis ig awna git akiw. Giwn:

— Giwavrik Uhokri dehetniye nah aya pit. Ku pis Cristo, ku pis Uhokri gikanyan adahan ukumaduketni, ku pis Uhokri gikamkayh, akkaw wotuh.

64Igme kaytwa giwn:

— Nahnewa ku samah pis awna. Kuri yis betebdebdih adahan yis hiyekne nukakuh. Heneme aysawnemenek yis hiyavunnek, nah ku pariye wageswe awayg amadgaya inin, yis hiyavun nah bat ayge gihumwa Uhokri detye ay amun ini iwetrit ku pariye kane nikiytanisima kihehaptak. Yis hiyavunnek nah muhuk abetimpi ukuhne inuriktak. Avim ini nahme hiyekne yikak nikwe. Henewatbaki nah.

65Ig muwvegviyene gikivarakis timapni hene, ig sigke gisimsa adahan areketni gidagoni avatra ku samah Kiyavwiye Jesus awna gitkis inakni iwit. Ig awna:

— Ig ikewne ke wotbe ig Uhokri gikamkayhbe. Ig makuksene Uhokri. Pariyeki umawkanwiy akiw? Wixwiy ka muwaka hiyeg akki wotwiy ariknawnema Jesus gitaraksan akiw! Kuwis ig makukse Uhokri ay wotrikwiy. Yiswa kuwis timapni akak yitaybi.

66Uyay katiwnise ini gitaraksan git. Mmani yit?

Igkisme kaytwa giwn:

— Pugamawka ig umehpika!

67Ayge nikwe igkis tuvestevgi. Igkis biptevgi. Gaytakkisme biwhbokevgi. Igkis awna git:

68— Aa, ku pis Uhokri gikanyan adahan ukumaduketni, nikwe asa akki wotuh ku pariye pibiwhatepten!

Pedru wihwa giw Jesus

Mk 14.66; Lk 22.55; Jo 18.15

69Avimwata ini ig Pedru bat ayge paytbuhku. Ayteke pahavu tino ibukti danuh atere git. Eg awna git:

— Pis hawata wew gikak Jesus Galileyene.

70Igme wihwe giw giwtrikneswa madikte hiyeg. Ig awna gut:

— Nah ka hiyakwa ku kamin pis awnano.

71Ayteke ig ayguhwe hanpa anumekut pesket. Ayge pahavuwa tino ibukti hiyavgi akiw. Eg hiyapni hene, eg awna ta gitkis hiyeg ku pariye ay kennesa guhumwa. Eg awna:

— Ner awayg hawata wew gikak Jesus Nazaréyene.

72Igme wihwe giw akiw. Ig awna:

— Uhokri timap nuwnuh. Nah ka hiyakgiwa ner awayg!

73Ayteke ariwnteke ini ayiptenesa akiw, neras hiyeg ku pariye ayge kennesa guhumwa igkis danukwa atere gimkat Pedru. Igkis awna git:

— Henewa. Pisnewa pahavwi gaytakkis Jesus gikannuhnivwi mmanawa pis awna ke nerasbe galileyenevwi. Pikuvimna akki wotuh.

74Igme timapni hene, ig awna akak gihawna. Giwn:

— Ku nah ka awna inyewatma iwit, hiyawa Uhokri hiyapkis mbeyne nutuh! Nah ka hiyakgiwa ner awayg!

Nikwenewa pahavwi takarak awna.

75Ayge nikwe ig Pedru kiye ku pariye Jesus giwn ta git: “Avit takarak awna pahaywowa gawnannek, pisme ayipa wihwe nuwhunek mpamavut.” Ig kiye inakni, ig pese. Ig kiyemina gitaraksan mpiynevevye. Ig biyuk gikan. Ig tihene ayge.

Currently Selected:

Matews 26: pluPB

Highlight

Copy