Yela 39
39
Nɛn o bwara aa dɛ nyɛɡ wechɔɡa bola
Kooro Devid yel
1N lii n nyu bini ŋɔ,
“Mɛɛ nyiŋi n ŋwɛnɛre ta
kɛrɛdɛɛ,
maa ɡel a che n nyoa
wobol ta, n ɛ wechɔɡa.
Nɛnchɔɡa bɛn mɛ naa,
maa wobɛlbwaa bol.”
2Kɛ n fa aa tɔ nyoa
maa wola wobɛlbwa bolɛ,
n ta wedɛɛɡe bɛlbwa ɡe
bolɛ la,
a taa n bonyɛɡa
ɡwaa n nɛɛ kohona.
3N bambile chɔɡɔ kohona,
maa ŋɔ ń kpɔ liire la,
name tenee a yon
ɡwaa, asɛ n ŋɔ,
4“N Naa Korowii,
chaɡ mɛ saŋ maa so ka tel,
ne n tɔpera aa ka n sie.
Aa biɡri dɛ n sewɔ.
5He ɡelɔ me mkpa do bori,
a ta komɛlbwa ɛɛ
he siwi ta,
nɛwɛnyini bɛlbwa mkpa
do kɛŋɔ peu he be.
6Nɛwɛnyini mkpa
do kɛŋɔ lileo,
ba wobɛlbwa ɛ wepuu.
Wɛɛ nyin kondɔɔh
cheɡ kohona,
kɛ waa jemɛ naate
aa ba ɛ o kwa.
7N Naa Korowii,
bɔkwaa mɛɛ nyin taraken
jaɔ?
N hwɛɡa bwa lɔ he nɛ.
8Lɛɛ mɛ le n wechɔɡa bwa ta,
bɛ ɡel nɛra baa ɡɛna
dɔɔ mɛ, dɛ́ mam mɛ.
9N tɔ nyoa name,
maa wobɛlbwaa bol kpa,
henee ɛɛ mɛ ɡɛ.
10Bɛ n deŋne tɛr kpa!
He deŋnetɛra la ɡwaa n nɛ.
11He bol wa bandia ne,
dɛ kpɔ dɛɛ tɛr ya deŋne,
ya wechɔɡa wa,
ɡɛ dudul yon di kon
dɛ chɔɡo la,
ɡɛɛ he chɔɡ ya kondɔɔh,
nɛwɛnyini bɛlbwa
do kɛŋɔ peu ken.
12N Naa Korowii, no n wesoŋa,
no n wii dɛ́ cha mɛ,
bɛ he deŋna laa kpɔ n be.
N do kɛŋɔ hɔɔh harɛ nɔ ta
he sie, kɛŋɔ ya naawa bwa
fa aa ɛa la.
13Laa sie kpɔ n nɛ,
ásɛ n sie berɛ lɛ ja,
mɔɔ n sewɛ le harɛ nɔ ta.”
Currently Selected:
Yela 39: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
