Jɔn 2

Keenan hanfalwa

1A habɔɔ tɔpetooro wee la, dɛ ba dɛ ɛ hanfalwaa bwɛɛ bɛl baa dɛ yerɔ Keena o do Galilia harɛ ta la. Dɛ Yeesu nya Mɛɛre lɔ bela. 2Ba yerɛ Yeesu ne o habɔteŋra la bane ɡe hanfale waa la bɔr bela. 3Dɛ ba dɛ tɛ nɛra la aa cheme bela la sen, asɛ a bo. Belaa Yeesu nya ŋɔ o be ŋɔ, “Ba sen bwa tonɔ.”

4Anee Yeesu bɔɔ o nya ŋɔ, “N nya, aah ɛrɛ waa he berɛ dɛɛ nyiŋi n te siwi ta nɔɔ? Gɛ saŋ maa dɛ ba n toma ɛɛ la ta tele mɔɔ.”

5O nya berɔ ŋɔ bonɔɔna baa dɛ do sene la be ŋɔ, “Dɛ o baa ŋɔ hé ɛ wobɛlbwa naa, hé ɛ.”

6Dɛ vɛɛhna anumɛl cheɡɛ bela asɛ ba kpɔ dɛɛ ɛ ba nawee bɛl. Ba yon ɛ nee do a bini ásɛ nɛra yon dɛɛ sarame ba sarama bɛl soo mɔɔ dɛɛ di kwa. Dɛ vɛɛhna la bɛlbwa won nee haŋkorɔ fah lɛɛ. 7Yeesu ŋɔ ba be ŋɔ bá do nee vɛɛhna la bini á su, asɛ ba do nee a su laɡlaɡ ken. 8Baa do nee vɛɛhna la bini la, o ŋɔ ba be ŋɔ, “Hé ɛ ane la ka tɛ hanfale dea nomoa la.” Waa ŋɔ ɡɛ la, ba la nee la ne ka tɛo. Baa tɛo la, dɛ senee. 9Nomoa la aa daɡɛ nee aa berɛ sen la na la, o ta wone jemɛ bela aa lea ba, kɛ dɛ bonɔɔna baa dɛ do sen la te jemɔ. 10Anomanta, o yerɛ hanfale jaa la dɛ ŋɔ o be ŋɔ, “Nomɛlbwa dɛ ba nɛra sen tɛɛ yaa, andɛɛɡa nee o yon tɔ sie le, ásɛ nɛra bwa aa dɔ kohona nyɔ la, mɔɔ o yon le anɔ la aa wola somɛ la ne ásɛ baa nyɔ. Ɛrɛɛ he te tɔ sendɛɛɡa cheɡ dɛ ka mun dɛɛ ba a ne nɔɔ?”

11Yeesu nyokpowaa waa tɔ sie ɛa laanee la. Keena waa lɔ Galilia harɛ ta laanee o ɛa, dɛ chaɡle o nɛnsoo ne kpeɡri waa dɔa, asɛ o habɔteŋra la na dɛ yaradao.

12A habɔɔ la, Yeesu ne o nya ne o nimanar dɛ o habɔteŋra la la Kapeeneɔm dɛ ka so bela tɔpera anɛ.#Mat 4:13

Yeesu la Korowii Dea

(Mat 21:12-13; Mak 11:15-17; Luk 19:45-46)

13Dɛ Juu tena tɔpejen baa dɛ yerɔ Galekaa la joɔ tonɛ, anomanta, Yeesu la Jerusalam. 14Bela la, o nao kɛŋɔ nɛra bane aa dɛ yoɡ nae ne peera ne borɔnomare Korowii Dea bobɛl. Dɛ nɛra baa dɛ peɡri suuɡare ɡe soɡe ba teeburre ta dɛɛ ɛ ba toma. 15Belaa Yeesu pɛrɛ bampɔrɔ ŋwɛɛra, dɛ kpɔ doŋi peera ne nae ne kondɛɛra la bwa bela. O taɡɛ nɛra baa dɛ peɡri suuɡare la teeburre piiɡi, dɛ lɔ ba suuɡare merɛ, 16dɛ kɔr banɔ la baa dɛ yoɡ borɔnomare la ŋɔ bá le a ne bela, dɛ ŋɔ ba bɛ o Mɛɛ dem kpɔ berɛ bonadibɔr.

17Bela la, o habɔteŋra la liiro kɛŋɔ ba chwerɛ Korowii Tɔn bini bobɛl kɛŋɔ, “Korowii Dea waa swɛɛ n siwi taeh” la.#Yel 69:9

18Belaa Juu tena nomonome la ŋɔ o be ŋɔ, “Bɔkwa nyokpowaa hɛɛ ba wona ɛ dɛ́ chaɡle kɛŋɔ he dɔ ŋwɛnɛ dɛ́ won ɛ a ɡɛ waa nɔɔ?”

19Anee Yeesu ŋɔ, “He kuuɡi Korowii Dea nɔ naa, n ɡe ɛɛ kpɔ tɔpera atoroo doo.”#Mat 26:60-61; Mak 14:58

20Belaa ba bɔɔro ŋɔ, “Dea baa kpɔ bene fifraanaarɛ dɛ anumɛl mao la, hen dɛ won kpɔ tɔpera atoro ɡbo doo wa aa?” 21Dɛ Yeesu ɡbaɡba bwadabii waa wɛɛ bol dɛ kpɔ maɡɛ Korowii Dea la. 22Anomanta, Korowii aa ir Yeesu seo ta la, belaa o habɔteŋra la lii kɛŋɔ Yeesu fa bol a ɡɛ waa nɔ. A ɡelɔ ba yarada waa baa chwera Korowii Tɔn bini la, ne waa Yeesu aa bola la.

23Yeesu ta aa lɔ Jerusalam dɛɛ di Galekaa Tɔpejen la, nɛra warɔ dɛ che o nyokpowaa waa ɛa ta, dɛ yaradao kɛŋɔ onee Kristo la Korowii aa baɡɛ nyoa ŋɔ wɛɛ tomɔɔ ó ba lɛ nɛwɛnyina la. 24Kɛ Yeesu ta ban yaradae kɛŋɔ ó kpɔ o te tɛɛ ba, dɛkalkɛŋɔ o jemɛ nɛwɛnyini da kɛrɛdɛ. 25A ta hiaih kɛ nɛn baɡlo ɡɛ nɛwɛnyini aa doa, dɛkalkɛŋɔ o ɡbaɡba jemɛ waa aa lɔ nɛn bambile bini.

Currently Selected:

Jɔn 2: mzw

Highlight

Copy