Jɔn 12

Ba fuɡe noo ta Yeesu napaala ta

(Mat 26:1-5; Mak 14:1-2; Luk 22:1-2)

1Aa baa ka tɔpera anumɛl bá di Galekaa Tɔpejen la, Yeesu berɔ ba Bɛtani dɛ la Lasorɔs la waa chumu seo ta la dem. 2Ba hɔɔhro, o ne nɛra bane ne Lasorɔs so dɛɛ di kwaa la, asɛ Maata tɔɔ dɛɛ tɛɛ ba. 3Anee Mɛɛre kpɔ nosɔɔhsoma loŋbir a yoɡ aa kpeɡa kohona ba fuɡe ta Yeesu napaala ta, dɛ kpɔ o nyumpona dɛɛ feera. Asɛ dea la bini bwa sɔɔh do som ken.

4Belaa Yeesu habɔteŋra la bini bɛl baa dɛ yerɔ Judas Eskareɔt o taa dɛ ba Yeesu lee tɛ la ŋɔ, 5“Ba fe yoɡ nosɔɔhsoma nɔ dɛ lɛ suuɡajena dɛ bɔne tɛ nyaara ta bɔ naa?” 6Menɛkɛsɛ ŋɔ nyaara waa hiaoh waa o ŋɔ ɡɛ la. Waa ɛ ŋwɛɛ waa o ŋɔ ɡɛ. Dɛ onee dɛɛ kpoŋe ba suuɡa, asɛ dɛ yon ŋwɛ ane dɛɛ di.

7Asɛ Yeesu ŋɔ, “Hé ɡelo jeiih ken. Noo o kpɔ dɛɛ huɡ mɛ. 8He ne nyaara ɛɛ do lee saŋ bɛlbwa. Kɛ n te, maa he bee so ka tonɛ.”

Lasorɔs kpoe vɔrɔwa

9Belaa Juu tena pirim aa noa kɛŋɔ Yeesu lɔ Bɛtani la, ba ba bela dɛɛ nyinu dɛ́ na. O ɡbo waa laa, Lasorɔs waa chumu seo ta la ɡe jao. 10Anomanta, Sɔfonomonome la vɔrɔwɔ kɛŋɔ bá kpo Lasorɔs ɡba, 11dɛkalkɛŋɔ o waa Juu tena kɛrɛdɛ vɛh ba nɛɛ teŋa dɛɛ yarada Yeesu dɛ kpɔ ba te tɛo.

Yeesu jo Jerusalam jirima ne

(Mat 21:1-11; Mak 11:1-11; Luk 19:28-40)

12Tɔ aa pera la, nɛnlaa baa ba Jerusalam dɛɛ ba ba di Galekaa la noɔ kɛŋɔ Yeesu dɛ ba bela. 13Belaa ba nyin bambie papooni dɛ kpɔ le bwɛɛ bini ka chemo ŋwɛnɛ ta silɛɛ ne dɛɛ ŋɔ,

“Woowo!

Korowii swee Israel tena Kooro

waa valɛ o sɔn ta dɛɛ ba nɔ andɛɛɡa.”

14Dɛ Yeesu nyin keeɡo bie bɛl, dɛ so o ta ɡɛ baa chwera Korowii Tɔn bini ŋɔ,

15“Saayɔn tena, he bɛ ɔmɛ!

Hé nyiŋi na! He Kooroo soɡe

keeɡo bie ta dɛɛ ba la.”#Sek 9:9

16Dɛ o habɔteŋra la ta o waa nɔ mun noɛ loɡla la, dɛ ka tel kɛ Korowii aa tɛo jirima mɔɔ ba ta lii kɛŋɔ ba chwerɛ o bwara waa Korowii Tɔn bini ɡɛ, asɛ ba ɛo ɡɛ kpela.

17Dɛ nɛnlaa Yeesu aa yerɛ Lasorɔs lalbɔɔ bini, o ir seo ta ba siwi ta la bol ɡɛ waa ɛa la bwa dɛɛ baɡle nɛra. 18Nɛnlaa baa noa kɛŋɔ o ɛ wejena nɔ la koh a waa dɛ ka chemo. 19Belaa Farisii tena la bol dɔŋa be ŋɔ, “Hɛlaa yaa hɛlɛ la! Yaa won ɛo wobɛlbwa noo! Na nɛra bwa aa wura teŋɛ o nɛɛ ɡɛ!”

Grik tena bane baa dɛ nyin Yeesu dɛ́ na

20Dɛ Grik tena bane ja nɛra baa kaa Jerusalam dɛɛ la ká tomɛ Korowii Galekaa tɔpere la ta la nɛ.#Jɔn 1:43-45 21Ba la Felep waa le Galilia harɛ bwɛɛ baa dɛ yerɔ Bɛtsaeda la be, dɛ ka soŋo ŋɔ, “Nomoa, ya dɛ nyin Yeesu dɛ́ nao.” 22Belaa Felep ka ŋɔ Andriu be, asɛ ba bwa la ka bol Yeesu be.

23Anee o chaŋ ba ŋɔ, “Men Nɛn Bie la tɔpere telo kɛŋɔ Korowii tɛ mɛ jirima. 24Kasinteŋ, dɛ ba ta boyubii kpɔe du o pɔh aa, waa won ya. O ɡboo dɛ do le. Dɛ he duu te naa, o dɛ le dɛ ya kɛrɛdɛ. 25Nomɛlbwa o siwi aa swɛɛ harɛ nɔ ta silɛɛ kwaa ta la, wɛɛ paŋɛ o nyuu. Asɛ nomɛlbwa ɡe o siwi aa wola harɛ nɔ ta silɛɛ kwaa ta lɛ la, wɛɛ dɔ o nyuu dɛ dɔ Korowii mkpa aa wola jaɡa dɔe la. 26Nomɛlbwa waa sɛh dɛɛ tom mɛ la, wɛ́ɛ teŋɛ n nɛ. Bobɛlbwa maa do la, belaa n toroma ɡe ɛɛ ba doe. N Mɛɛ la ɛɛ tɛ nomɛlbwa waa dɛ tom mɛ la sɔnee.”

Yeesu bol o seo wa

27Anee Yeesu berɛ ŋɔ, “Taraken n liire ta bobeŋkpoŋ cheɡɛ. Ɛrɛɛ ń soŋe n Mɛɛ ŋɔɔ? Ń soŋo ŋɔ, ‘N Mɛɛ, lɛɛ mɛ le waa nɔ nyoa’ aa? Akai! A ta ɡɛ maɡrɛ, dɛkalkɛŋɔ ɡɛ waa nɔ waa n ba.”#Mat 26:38-39 28Asɛ o ŋɔ, “N Mɛɛ, ɡel he sɔn dɔ jirima!” Belaa ba no taa bɛl le nyundua kɛŋɔ, “N ɡelɔ n sɔn dɔ jirima, kɛ mɛɛ berɔɔ ɡel o dɔ ja.” 29Nɛnlaa baa ja o nɛɛ bela la aa no taa la, bane ŋɔ bwaalaa kɔra, asɛ bane ɡe ŋɔ nyundua torome bɛlee bol waa o be.

30Asɛ Yeesu ŋɔ, “N waa laa ya no ɡɛ taa nɔ. He waa. 31Tɔpere Korowii aa bol harɛ nɔ ta nɛra bwa waa dɛ́ pa bole la telo, asɛ name ɡee mɛɛ ba ń doŋi Bɔnsam waa ɛ harɛ nɔ ta kooro la ta. 32Men, baa ɡɔɔ mɛ nyundua le harɛ nɔ ta. Ba baa ɡɔɔ mɛ naa, mɛɛ tɛr nɛra bwaa ba n be.”#Jɔn 18:32 33Anɔ waa bola nɔ dɛ baɡle seo la soo siwi waa dɛ ba sewa.

34Belaa nɛnlaa la chaŋe ŋɔ, “Ya noɔ Korowii Tɔn la ɛɛ baɡle kɛŋɔ dɛ Kristo la balaa, waa sewɛ bwa. Aah, ɛrɛɛ he te berɛ ŋɔ Nɛn Bie la chɛ kɛŋɔ bá saɡɔ nyundua ɔ? Umee Nɛn Bie nɔ kwaraa te nɔ?”

35Anee Yeesu ŋɔ ba be ŋɔ, “Bɔr taa dɛ chaah he nɛɛ tɔpera anɛ nɔ, hɛ́ɛ valɛ o ta. Dɛ ɡɛ laa aa, bɔr ɛɛ biruu he nɛ. Nomɛlbwa waa dɛ valɛ biro ta la aa bela waa dɛ kaa jemɛ. 36Bɔr taa dɛ chaah he nɛɛ nɔ, hé yarada bochaah la dɛ berɛ bochaah nɛra.” Yeesu aa bol ɡɛ waa nɔ tonɛ la, o le ba baah asɛ dɛ ka sɔh.

Yeesu waa la bɛ yaradae

37O ɛ nyokpowaa kohona ba siwi ta, kɛ ane abwa, ba ta on yaradae. 38Anɔ dɛ baɡle kɛ Korowii keame Aesaya waa waa bola la ɛ kpela. O bolɔ ŋɔ,

“N Dɔɔ, umee dɛ́ fe yarada waa yaa dɛ bol nɔɔ?

Umee dɛ́ fe jemɛ kɛŋɔ Korowiirii ɛaɔ?”#Aes 53:1

39Gɛɛ a do ba ta waa la yaradae, asɛ Aesaya berɛ bol ja ŋɔ,

40“Korowii tɔɔɡe ba sie,

dɛ ɡel ba bambile do kpeɡri,

ɡɛ aa ɛ ba sibie bɛ na, ásɛ ba liiree bini

bɛ chaah ba no a mun, á ba ɛ kɛ

baa charɛ ba liire dɛ́ ba o be ó chaah ba.”

41Yeesu jirimaa Aesaya na asɛ dɛ bol o waa ɡɛ la.#Aes 6:1

42Juu tena nomonome kɛrɛdɛ ɡba yarada Yeesu, kɛ baa dɛ ɔmɛ Farisii tena nomanta, ba ta bolɛ nomɛlbwa no, dɛkalkɛ dɛ ba bolaa, aa ɡeloo ba doŋ ba cheremi dea joe. 43Nɛra bee baa nyin sɔn dɛ ɡwaa kɛ Korowii aa tɛɛ ba sɔn.

44Belaa Yeesu kpɔ takpeɡ dɛ ŋɔ, “Nomɛlbwa waa yarada mɛ la, n laa wɛɛ yarada. Naate waa tom mɛ laanee wɛɛ yarada la. 45Nomɛlbwa waa na mɛ la, dɛ naate waa tom mɛ laanee o na ɡɛ la. 46N ba harɛ nɔ ta kɛŋɔ kandea dɛ baa chaah nɛra bwa, ásɛ nomɛlbwa waa yarada mɛ la bɛ biro ta do kpa.

47Dɛ nɛn no n waa la dɛ waa a ta teŋaa, n laa dɛ bol o waa dɛ́ pa bole, dɛkalkɛ nɛra waa bola dɛ́ pa bole waa laa n ba harɛ nɔ ta. Nɛra bwa lɛɛ waa n ba. 48Kɛ nɛn waa vɛh n ne n waa maa dɛ bol la ɛɛ di bolchɔɡee. N waa maa dɛ bol nɔɔ dɛ́ pao bolchɔɡe tɔpere bwa jaɡa wee. 49Dɛkalkɛ n ɡbabir kpeɡri ne laa mɛɛ bol waa nɔ. N Mɛɛ waa tom mɛ laanee do mɛ dɛ chaɡ mɛ ɡɛ maa bol o wa. 50N jemɔ kɛŋɔ o waa la dɛ́ tɛ mkpa aa wola jaɡa dɔe, anomanta, anɔ la waa bol n be laanee n ɡee bol.”

Currently Selected:

Jɔn 12: mzw

Highlight

Copy