Genesis 11

Godthu guḻk-guḻkthurruna dhäruknha yolŋu'-yulŋunhanydja barrkuwatjkuŋalana

11:1-9 (The Tower of Babel)

1Ga ŋulinyaramirriyunydja ŋäthilinydja bukmak ŋunhi yolŋu walala ŋuli yukurranha waŋanha waŋganygurru yana dhäruktja, 2ga nhinanhanydja walala yukurranha wäŋaŋuranydja balkuwarraŋura, baṉarraŋura yana wäŋaŋura, ŋunhala Bapilun. 3-4Walala waŋanharaminanydja, walala yurru nhina ŋunhili bili wäŋaŋura mukthunna, waŋgany yana mala: bitjarrana walala waŋanhaminanydja gam', “Ŋilimurrunydja yurru ga dhiyalana yukurra nhina. Gul' ŋilimurru dhoḻuna dhiṯthun, bala ŋomaṉna wuṉḏaŋarrkuma gurthayuna, märr ŋilimurru dhuḻ'yun yurru wäŋana ŋilimurruŋguway dhiyala. Ŋilimurru yurru dhuḻ'yundja buṉbu dhiŋgikuma walŋu yana, be-wala weyinguma yurru, märr yurru dhanu'yun ŋunha walŋu djiwarrny'tja wäŋa; dhiyaŋunydja ŋilimurru yurru yäkumirrina walala yolŋu'-yulŋu, yindithirrina walŋu yurru mala, märr ŋilimurru yaka muka barrkuwatjthirrinydja wäŋalili malanyŋulili.” Bitjarrana walala waŋanharaminanydja, bala yana walala ŋurru-yirr'yurruna djämana, dhuḻ'yurrunana marrtjina.

5Yo, Garrayyunydja Gunhu'yu nhäma yukurra walalanha, ŋunhi walala marrtji dhuḻ'yun walalaŋguway wäŋa malanha ŋunhimala, ga biyapul ŋunhi yindi buṉbu walala marrtji dhuḻ'yun weyinguma. 6Ŋe, Garrayyunydja nhäma yukurra, bala yana waŋa bitjanna, “Yolŋunydja walala yukurra dhuwala nhina waŋgany yana mala, ga waŋgany yana dhäruktja. Ŋuli walala yurru bitjandja liŋgu waŋganyŋuranydja nhina yukurra, waŋganydja mala, galki walala yurru marŋgithirrina, bala yurru walala ŋula nhä djämana ŋunhi walalawuy yurru nhäku ŋula ḏukṯukthirri. 7Ŋarra yurru dhäruktja djambina guḻk-guḻkthunna gam' walalanha, barrkuwatjkumana; walala waŋanydja yukurra yurru wiripuna ga wiripuna dhäruktja, märr walala yurru ŋäma dhäruktja ŋamunharamirrina.” Bitjarra ŋayi Godthu waŋananydja.

8Ga bitjarrayi ŋayipi Godthu yana barrkuwatjkuŋalanydja marrtjina yolŋunha walalanha wäŋalili ga wäŋalili dhika, wiripulilina ga wiripulilina. ḏaḏawyurrunana walala dhuḻ'yunaraŋuru buṉbuŋuru ŋuliŋuruyinydja, bala yana barrkuwatjthinana marrtjina dhika, wäŋgaŋalana yukurrana. 9Ga yäkunydja ŋayi ŋunhiyi wäŋa Bapilun, liŋgu ŋunhalayinydja wäŋaŋura Garrayyu djambi walalanha dhäruk malalili ga malalili ga malalili, yurruna yolŋunydja walala buḻwaŋ'thurruna dhika wäŋakurru buku-ḻiw'maraŋalanydja.

Ḻakarama yukurra Yipuramgalaŋuwuynha yarraṯaŋuru

11:10-32 (Abram's family line)

10-30Guḻku'na dhuŋgarranydja marrtjina djuḻk-djuḻkmaraŋala-a-a, maḻŋ' gay' Dera yäku yolŋu ŋulinyaramirriyu, yurru ŋayi ŋunhi yarraṯaŋurunydja Djimgala, ŋurikala ŋunhi ŋayi Nowawu gäthu'mirriŋu. Ga nhanŋu Derawu walkurnydja ḻurrkun', dhuwala walala yäkunydja Yipuram ga Näyu ga Yaran.

Yo, ŋulinyaramirriyunydjayi Dera ga nhanŋu gäthu'mirriŋu walala ŋunhi ḻurrkun' nhinananydja walala yukurrana nhäyika yäkuŋura wäŋaŋura ŋunhala Wo. Bala yana Yipuramdhunydja märraŋala dhäykanhana yäkunha Saraynha, yurru ŋuriŋiyi Sarayyu yaka ŋula yothunhanydja gurrukaŋala, yothumiriw yana yukurrana ŋayi nhinana. Ga nhanŋu Yarangunydja maḻŋ'thurruna walkur yäku Lot, ga ŋuliŋurunydja dhurrwaraŋuru bala ŋayi Yarandja rakunydhina ŋunhiliyina Wona wäŋaŋura.

31-32Wiripunydja ŋayi waŋa Dera nhanŋuway gäthu'mirriŋunha Yipuramnha bitjan gam', “Gul' ŋilimurru marrtjina ŋi'... nhäyikalili Gaynanlilina, ŋilimurru ŋunhalana nhina yukurra yurru.” Bala yana yuwalkthi walala gonha'yurruna ŋunhiyinydja wäŋa Wonydja, Derayu, ga nhanukala gäthu'mirriŋuyu Yipuramdhu ga miyalkthu nhanukala Sarayyu, ga wiripunydja Lot malthurruna walalaŋgu.

Wäŋgaŋalana yukurrana walala-a-a, wäŋana ŋunhi ŋupara-a-a, yana liŋgu ga wäŋa ŋayathaŋala Yaranbuy, nhanbalaynha ŋunhi Derawuna nininyŋuna walŋu wäŋa, ga ŋunhala walala gandarrŋura nhinananydja. Dhut-gay nhinanana walala yukurrana ŋunhiliyina wäŋaŋura märr-weyin muka, yana liŋgu-u-u ga Dera rakunydhina ŋunhili bäyma Yaran, ga dhuŋgarranydja ŋayi ŋunhi rakunydhinanydja 200-thu ga 5-thuna.

Currently Selected:

Genesis 11: gnnNTOTPO

Highlight

Copy