2 Korintiërs 6
6
1Ek, Paulus, en die ander mense wat saam met my werk, werk saam met God. Daarom vra ons mooi vir julle: Onthou dat God genadig is vir julle, moenie dink dat dit nie belangrik is nie. 2Want God het gesê:
“ Toe die tyd reg was vir My,
het Ek gehoor hoe jy bid.
Ja, toe die dag gekom het,
die dag toe Ek jou wou red,
het Ek jou gehelp.”
Julle moet weet dit is nóú die regte tyd, dit is nóú die dag wanneer God julle wil red. 3Ons wil nie hê dat iemand slegte dinge moet dink van ons nie, sodat niemand sleg sal praat oor die werk wat ons vir God doen nie. 4Julle kan glo dat ons altyd dienaars van God is. Ons hou aan om vir God te werk wanneer ons swaarkry, wanneer ons bang is, wanneer ons probleme het, 5wanneer mense ons slaan, wanneer ons in die tronk is, wanneer mense vir ons probleme gee, wanneer ons hard moet werk, wanneer ons nie kan slaap nie, wanneer ons honger is. 6Ons hou aan om hierdie werk te doen omdat ons eerlik is, omdat ons weet hoe om reg te lewe, omdat ons geduldig is, omdat ons goed wil wees vir mense, omdat die Heilige Gees by ons is, omdat ons regtig lief is vir mense. 7Ons hou aan om die werk te doen terwyl ons die waarheid praat oor Jesus, en terwyl God ons help met sy krag. Ons doen wat God wil hê, dit is die wapens waarmee ons veg. Ons gebruik hierdie wapens wanneer ons aanval en wanneer ons verdedig. 8Ons hou aan om die werk te doen wanneer mense goeie dinge oor ons sê en wanneer mense slegte dinge oor ons sê, ons hou aan wanneer hulle dink ons is nie belangrik nie en wanneer hulle dink ons is baie belangrik. Mense sê ons vertel leuens, maar ons praat die waarheid. 9Party mense wil nie glo dat ons apostels is nie, maar party mense glo dat ons apostels is. Mense doen baie slegte dinge aan ons, ons sterf amper, maar ons lewe nog. Mense hou aan om ons te straf, maar hulle kan ons nie doodmaak nie. 10Dit lyk of ons altyd huil, maar ons is bly. Ons lyk soos mense wat arm is, maar ons maak baie mense ryk by God. Ons lyk soos mense wat niks het nie, maar ons het alles.
11Liewe Korintiërs, ons het nou reguit gepraat met julle, maar onthou, ons is baie lief vir julle. 12Julle moenie dink dat ons kwaai en hard is met julle nie. Dit is júlle wat hard is met óns. 13Ek praat met julle soos 'n pa met sy kinders praat: Julle moet julle harte wyd oopmaak vir ons, ons harte was oop vir julle.
Paulus waarsku die Korintiërs om nie vriende te maak met mense wat teen die goeie boodskap is nie
14Julle moenie vriende maak met ongelowiges nie. Want mense wat doen wat God wil hê en mense wat God se wette breek, mag nie vriende wees nie. Lig en donker kan nie maats wees nie. 15Christus kan nie met Beliar saamwerk nie. En 'n gelowige mag nie die dinge doen wat 'n ongelowige doen nie. 16God se tempel en die afgode pas nie bymekaar nie. Want ons is die tempel van God, God wat lewe. God het gesê:
Ek sal by hulle woon
en tussen hulle lewe,
Ek sal hulle God wees,
en hulle sal my volk wees.
17 Daarom moet julle weggaan
van hulle en julle moet niks
saam met hulle doen nie,
sê die Here,
julle moet aan niks raak
wat onrein is nie.
Dan sal Ek julle aanvaar.
18 Ek sal vir julle 'n Vader wees,
en julle sal my seuns
en dogters wees.
Dit sê die Here
wat oor alles regeer.
Currently Selected:
2 Korintiërs 6: ABA
Highlight
Share
Copy
Want to have your highlights saved across all your devices? Sign up or sign in
© Bybelgenootskap van Suid-Afrika 2007. Gebruik met toestemming. Alle regte voorbehou.
